Стартуваат шест проекти за медиумска писменост и критичко мислење


Скопје, 19 октомври, 2018 - 15:17 (META) 

Во организација на Фондацијата за интернет и општество „Метаморфозис“ и „Евротинк – центар за европски стратегии“, шест граѓански организации денеска во Граѓанскиот ресурсен центар во Скопје ги презентираа своите замисли со кои во рамките на проектот „Со критичко мислење до граѓани со медиумска умешност – КриТинк“ во неколку градови во земјава ќе работат на развојот на критичкото мислење и зголемување на медиумската писменост и сузбивање на дезинформациите кои се шират и преку социјалните мрежи и преку медиуми.

Како што истакна Филип Стојановски, програмски директор во „Метаморфозис“, целта на проектот, со финансиска поддршка на Европската Унија преку ИПА Програмата за граѓанско општество и медиуми, е да се работи повеќе со граѓаните, наместо со новинарите, за да се крене нивото на критичко размислување кај граѓаните, оти дезинформациите и другите негативни појави се насочени кон нив, а не толку кон новинарите.

– Младите се авангардата и нивната едукација за критичко размислување е нешто што, се надеваме, ќе има долгорочни ефекти, и овие проекти и нивниот ефект ќе имаат еден свој живот кој ќе продолжи долго – порача Стојановски.

Горан Лазаров од „Евротинк“, кој е еден од координаторите на проектот, рече оти денешниот координативен настан е со цел да се создаде мрежа на соработка меѓу организациите-добитници на грантови, која на локално ниво ќе ги спроведува целите на главниот проект.

– Целта е темата околу критичкото мислење, медиумската писменост да ја спуштиме и на локално ниво. Голем дел од активностите на суб-грантистите се поврзани со создавање на медиумски производи, одржување јавни настани, и целта е да се направи некакво вмрежување на сите активности и преку тоа на национално ниво да се влијае околу целата работа. Секако, очекуваме да се создаде мрежа што ќе се гради и понатаму и ќе ги реализира целите – вели Лазаров.

Проектите, кои ќе наскоро ќе почнат да ги реализираат „Диверзити Медиа“ заедно со „Алсат-М“, ДРОМ од Куманово со телевизијата „Плус“, Фондацијата „Фокус“ од Велес со „Дума“ и телевизијата КТВ, „Ганимед“ од Битола со ТВ „21“, потоа Македонскиот институт за европски студии заедно со „Студентско радио“, но и „Медиа плус“ од Штип заедно со „Канал 77“, ќе бидат насочени претежно кон младите, односно средношколците и бруцоши на факултетите од областа на општествените науки на скопскиот универзитет „Свети Кирил и Методиј“.


Реактор ја промовираше веб-страницата за млади „Млади низ бројки“


Скопје, 26 септември, 2018 - 9:24 (META) 

Невладината Реактор – истражување во акција организираше настан под мотото „Да зборуваме за млади – Што е планот?“ на кој беа присутните беа дел од пет различни дискусии на теми и прашања кои ги засегаат младите, како што се образование, невработеност и социјални политики, граѓанско учество, здравје и релевантни алатки за младинско застапување.

Во рамките на дискусиите, Блажен Малески од Реактор презентираше наоди од истражувањата за состојбите со младите, капацитетите на младинските организации и алатките кои им се на располагање.

Зборувајќи пак, на темата невработеност и социјални политики, Младен Фрчковски од Министерството за труд и социјална политика ја презентираше младинската гаранција и што таа овозможува. За состојбите со младите и образованието зборуваше Мартина Илиевска од Младински Образовен Форум, а пак во име на Национален младински совет на Македонија, Илија Станковски дискутираше за младинските политики и механизмите за граѓанско учество за младите. На крајот, Мери Цветковска од ХЕРА ја нагласи потребата и важноста младите да се информираат и едуцираат за своето здравје.

Воедно, на настанот беше промовиран и новиот ресурсен веб-сајт „Млади низ Бројки“ изработен од тимот на Реактор на кој се прикажуваат сите податоци релевантни за младите во Македонија. Од Реактор велат дека целта е преку обезбедување на лесно достапни, интерактивни и визуелизирани податоци, да се поттикне информирана дискусија за положбата на младите во македонското општество, но и да се развие дебата, активности и иницијативи за младинските теми.


Кукан: Учеството на младите на референдумот може да биде одлучувачко


Скопје, 21 септември, 2018 - 11:29 (META) 

Вистинското место каде што треба да се води политичкиот дијалог и да се постигне консензус е Собранието и тој не треба да се ограничи само на политичките партии, туку во него треба да се вклучи граѓанскиот сектор, експерти и други формални или неформални групи.

Ова денеска го истакна претседателот на македонското Собрание Талат Џафери на конференцијата „Поттикнување на политички дијалог и консензус“ што се одржува во Собранието на која учествуваат пратеници од Европарламентот, пратеници од парламентите на земјите од Западен Балкан, претставници на младински организации.

– Пред четири години кај нас се случија настани кои беа предизвикани од несоодветниот однос на Владата кон младите, поточно кон студентите во врска со донесување закон кој директно ги засегаше студентите. Тогаш Студентскиот пленум со своите активности и организираност ни покажа на нас постарите политичари како не треба да се владее – рече Џафери.

Посочи дека тогаш студентите настапиле сплотени без разлика на нивната етничка припадност и на тоа дали се членови или симпатизери на која било партија, додавајќи оти студентите и младите воопшто се движечка сила што ги придвижува работите кон подобро во новото време на глобализација.

Џафери задоволство што според најновите истражувања на јавното мислење токму младата генерација и повторно без разлика на која етничка заедница припаѓа или, пак, на која политичка опција го поддржува договорот од Преспа и референдумот.

Европратеникот Едуард Кукан, кој е копретседавач на дијалогот на Жан Моне истакна дека Собранието и политичкото лидерство во земјата покажале способност да влезат во дијалог и на тој начин да продолжат во создавањето имплементација на реформите.

Тој смета дека младите луѓе се клучот за иднината на регионот и оти учеството на младите на претстојниот референдум во Македонија може да биде одлучувачко во европската судбина на земјата и ќе го одреди напредокот во европската интеграција на земјата и на регионот.


Владата ја почна постапката за универзален снабдувач со струја за домаќинствата


Скопје, 15 август, 2018 - 9:51 (META) 

На вчерашната 83. седница, на која беше донесена и одлуката за кампањата за референдумот, Владата одобрила да почне постапката за избор на универзален снабдувач со електрична енергија за домаќинствата и малите потрошувачи.

Ќе се формира Комисија за спроведување на постапката за избор на универзален снабдувач, во која треба да има претставници на Кабинетот на премиерот, кабинетот на вицепремиерот за економски прашања и од Министерството за економија. Во оваа комисија ќе членуваат и Регулаторната комисија за енергетика и на МАНУ. Сите институции ќе бидат претставувани од член и заменик-член, кои треба да ги соопштат до петок.

Комисијата, пак, за 14 дена треба до Владата да го достави текстот на јавниот повик и тендерската документација, за да може да се распише тендерот.

„Заради остварувањето на правото на сите домаќинства и мали потрошувачи да се снабдуваат со електрична енергија со утврден квалитет по разумни, јасно споредливи, транспарентни и недискриминаторни цени, Владата на Република Македонија избира универзален снабдувач кој истовремено ќе ја врши и дејноста снабдување во краен случај. Целта на оваа постапка е остварувањето на правото на домаќинствата и малите потрошувачи на универзална услуга во снабдувањето со електрична енергија, односно да бидат снабдувани од универзалниот снабдувач во согласност со обврските утврдени со Законот за енергетика и правилата за снабдување“, соопштија од Владата.

Покрај тоа, владиниот кабинет го разгледувал и извештајот за извршувањето на Планот за гаранција за млади – пилот фаза за 2018 година, кој, според Владата, дава резултати и се спроведува по урнекот на сличните мерки во ЕУ, иако Македонија не е членка на европското семејство.

Исто така, се разгледувало и спроведувањето на Националната стратегија за стари лица 2010-2020 година.


Шекеринска: Со потпишувањето на договорот помалку граѓани ќе бегаат од државата


Скопје, 19 јуни, 2018 - 14:46 (META) 

Мигрантските кризи треба да престанеме да ги гледаме како моментални проблеми со кои се соочуваме денес, а со надеж дека ќе престанат утре. Тие станаа наше секојдневие и според сите анализи се сметаат како еден од клучните феномени кој ќе влијае врз стабилноста на светот. Ова денеска го порача министерката за одбрана Радмила Шекеринска на отворањето на Меѓународната летната школа насловена „Управување во услови на мигрантски кризи“.

– Кога Македонија се најде на таква бегалска рута и кога избија немири на Блискиот Исток, но и кога на мигрантскиот бран му се придружија луѓе кои решиле да си го сменат местото на живеење поради економски причини, ние видовме што значи да градите институции кои ќе се соочат со оваа мигрантска криза. Како држава се справивме со предизвикот, но видливо е дека треба да ги поместиме нашите приоритети кон вештини кои претходно не сме ги имале – истакна Шекеринска.

Шекеринска потсети кога пред два дена таа со премиерот и уште неколку министри на Преспанското езеро со чамец кој не бил преоптоварен успешно стигнале во грчкото село Псарадес.

– Не беше преоптоварен, бидејќи малкумина сакаа да се качат на чамецот на кој треба да се носат тешки одлуки. На тој чамец влеговме со желба да решиме проблем и спор кој предизвикува многу емоции и во Македонија и во Грција кој трае 27 години и предизвика парализа на Македонија и на нејзините стратешки приоритети. Чамецот не се преврте бидејќи не бегавме од никого, бидејќи одевме во пресрет на една нова перспектива и шанса за сите граѓани на оваа држава и за пoдржувачите на договорот и за оние кои истиот го критикуваат, а можеби за нив дури и повеќе – рече таа.

Според неа, потпишаниот договор е вистинската одлука бидејќи, како што рече, потпишувањето на овој договор ќе значи дека помалку наши сограѓани ќе бегаат од оваа држава и ќе бараат егзистенција во други земји. Нагласи дека овој договор ќе значи поголема интегрираност и повеќе шанси за младите во Македонија, но и дека дава шанса и на регионот кога во време кога целиот свет констатира дека безбедноста повторно е вратена како прва точка на дневен ред


DOCU.TECH ќе ги собере на едно место младите иноватори и ентузијасти за технологија


Скопје, 17 мај, 2018 - 16:50 (META) 

На 9 и 10 јуни во Креативниот центар „Термокис“ во Приштина неколку десетици ентузијасти за технологија и млади иноватори ќе имаат можност да разменуваат идеи, да дискутираат и да добијат совети на DOCU.TECH 2018 еден од најголемите технолошки настани на Балканот.

Организатори на овој настан се Фондот за Западен Балкан, кој обезбедува и дел од финансиите, како и Фондацијата Шеар од Србија и ДОКУФЕСТ од Косово.  Фондацијата за интернет и општество „Метаморфозис“  во соработка со Фондацијата ИПКО од Косово, оваа година овозможува покривање на сите трошоци за одреден број на млади учесници од Македонија.

„Метаморфозис“ на 23 мај со почеток во 13 часот во училницата 101 на Универзитетот на Југоисточна Европа во Тетово ќе организира Инфо-ден. Потоа веднаш ќе почне и пријавувањето, со испраќање на мотивациско писмо на англиски јазик и биографија на docutech@metamorphosis.org.mk.

ДОКУ.ТЕК е одлична можност за студентите и младите да дознаат за новите технолошки трендови, како и да сретнат еминентни говорници од целиот свет, односно познати имиња од областа на технологиите и бизнисот. Повеќе за овој настан може да прочитате на следниот линк.


Економски институт: Невработеноста опаѓа затоа што младите ни одат во странство


Скопје, 25 април, 2018 - 11:11 (META) 

Последиците од политичката криза во Македонија врз пазарот на трудот се неповолни, иако релативно малку се одразија врз вработеноста и невработеноста, но имаа значајно влијание врз неговата ефикасност, покажува истражувањето „Влијанието на политичката криза врз пазарот на трудот“ на д-р Верица Јанеска и д-р Александра Лозаноска од Економскиот институт при УКИМ.

Во него се вели дека намалувањето на невработеноста не е условено од зголемувањето на вработеноста, туку е резултат на порастот на неактивноста и интензивирање на емиграцијата на младите во странство.

„Податоците од анкетата за работна сила на Државниот завод за статистика покажуваат дека во периодот од 2014 до 2016 година, бројот на вработени се зголеми за 4,2 отсто, односно порастот речиси се преполови во споредба со претходниот период (6,8 отсто во периодот од 2010 до 2013 година), како резултат на забавената економска активност. Промените кај бројот на невработени се одвива во спротивна насока. Во последните години тој се намали за 16,2 отсто што е за два пати повеќе од претходниот период 7,9 отсто. Ваквите дивергентни движења на вработеноста и невработеноста може да се објаснат со порастот на неактивното работоспособно население и со интензивирање на емиграцијата во странство“, се вели во истражувањето.

Податоците за неактивно работоспособно население од 15 до 64 години потврдуваат дека во последните години, повлекувањето на дел од работоспособното население од економска активност е многу понагласено, особено кај неактивните лица на возраст од 20 до 39 години.

„Особено индикативни се промените во обемот на неактивно население според образовното ниво во 2016 година, кога околу 55.000 неактивни лица се со високо ниво на образование“, се вели во истражувањето.

Во однос на влијанието на политичката криза врз ефикасноста и флексибилноста на пазарот на труд се вели дека рангирањето на Македонија е неповолно според ефикасноста на користењето на таленти (108 место од 138 земји во 2015 година), капацитетот за задржување на таленти (115 место) и капацитетот за привлекување на таленти (128 место).

„Тоа имплицира на недоволно користење на талентите во земјата, што резултираше со интензивирање на емиграцијата на младите, посебно на високообразованите лица“, се вели во истражувањето.

Во заклучокот се додава дека, независно од овие сознанија, останува впечатокот дека импликациите од политичката криза врз пазарот на трудот не можат целосно да се идентификуваат поради недостиг на целосни податоци за 2016 и 2017 година.


Повеќе средства за поддршка и партнерски односи со младите во институциите


Скопје, 20 март, 2018 - 16:59 (META) 

Со младинските организации дискутиравме за напредокот на спроведувањето на младинските политики во рамките на ресорните институции, информираше денеска премиерот Зоран Заев по завршувањето на тематската владина седница посветена на младинските политики.

Тој додаде дека ќе се организираат јавни дискусии за новиот Закон за млади, но и се донеле одлуки за формирање на важни работни групи.

– Со 16,5 милиони евра, Владата ги стимулира програмите и мерките за вработување на младите оваа година. За подбрување на образованието превидуваме 1,27 милијарди денари. За прв пат се обезбедени 80 милиони денари за подобрување на условите во ученичките и студентските домови. За капитални инвестиции во образованието предвидени се 2,14 милијарди денари – рече Заев.

Дона Костуранова од Младинскиот образовен форум информираше дека на седницата се дискутирало за средношколско и студентско право на учество во самите образовни институции.

– Преку законот за средно образование побаравме средношколците во земјата да добијат законско право да се самоорганизираат во училиштата и да им се слуша гласот. Во однос на студентските претставнички тела, побаравме вистински избори за вистински студентски претставници – рече Костуранова.

Директорот на Агенцијата за млади и спорт, Дарко Каевски, рече дека оваа институција повеќе нема да биде само за спорт туку за поддршка на младинските политики и мерки и спроведување на проектите.

– Ќе бидеме партнери на институциите во процесите на креирање и имплементација на младинските мерки – додаде Каевски.


Утре тематска владина седница посветена на младинските политики


Скопје, 19 март, 2018 - 16:10 (META) 

Владата утре ќе одржи 59. седница која ќе биде тематска, односно посветена на младински политики кои Владата ги имплементира и ќе ги имплементира во иднина.

„На оваа седница и претходеа серија на отворени координативни средби, организирани и координирани од страна на Агенцијата за млади и спорт (АМС) и Владата, кои преку средбите и широка јавна расправа, отворија простор за предлог-политики на младинските организации. На седницата, покрај младинските политики кои ги имплементира Владата, заедно со претставници на младинските организации, ќе ги разгледуваат доставените, предлог – политики, посветени на унапредување и подобрување на животот на младите во земјава“, се вели во соопштението на Владата.

По завршувањето на седницата, премиерот Зоран Заев, ќе одржи прес-конференција, со почеток во 14. 30 часот.

Дневниот ред на седницата не е објавен на сајтот на Владата. Портпаролот Миле Бошњаковски минатата недела информираше дека се укинува досегашната практика на сајтот на владата, пред седниците да се објавува дневниот ред и сите точки кои би биле разгледувани. Тоа, како што објасни, од сега ќе се прави во текот на седницата кога дневниот ред ќе биде усвоен.


Владата предвидува 16 милиони евра за намалување на невработеноста


Скопје, 28 февруари, 2018 - 12:54 (META) 

За Оперативниот план за активни мерки и програми за вработување кој беше усвоен вчера на 56. владина седница, предвидени се околу 16.260.163 евра и вработување на околу 9.511 лица, односно повеќе од 16.000 лица преку услугите кои ги дава Агенцијата за вработување, појасни денеска министерката за труд и социјална политика Мила Царовска.

Таа додаде дека, предвидена е поддршка за самовработување на невработени лица, невработени млади лица до 29 години, невработени инвалидни лица, субвенционирање на плати, а предвидена е и посебна пилот-програма Гаранција за млади.

-Во програмата за самовработување предвидени се 4.500 евра за поединци или 10.000 евра за здружување. Со оваа мерка ќе бидат опфатени 1.176 лица – рече Царовска.

Корисници на поддршката за вработување на инвалидни лица можат да бидат оние кои самостојно вршат дејност како трговец поединец, работодавач или пак се во својство на работадавач, трговски друштва за вработување на инвалидни лица, државна администрација, локална самоуправа, јавни претпријатија.

Во пилот-програмата Гаранција за млади, која ќе се спроведе во три центри за вработување Гостивар, Струмица, Скопје целта е, на младите лица од 15 до 29 години во период од четири месеци понуда за вработување, континуирано образование и обука и практиканство.