Мицкоски до 10 септември ќе се изјасни за референдумот, од СДСМ велат дека е несериозен


Скопје, 8 август, 2018 - 9:53 (META) 

Претседателот на ВМРО-ДПМНЕ, Христијан Мицкоски во интервју за телевизијата „Канал 5“ вчера рече дека до 10 септември ќе соопшти дали ќе го повика членството да го бојкотира референдумот за името на 30 септември, или пак да гласа против или за. Тој исто така негираше дека неговата партија барала амнестија. На неговите тврдења реагираше СДСМ, порачувајќи дека сепак Мицкоски потврдил дека неговата партија барала амнестија на криминалот. Порача и дека

– Не е точно дека ВМРО-ДПМНЕ нема став по ова прашање. Во минатото во многу наврати го има кажано и повторено својот став што се однесува на принципот за промена на Уставот а со цел промена на уставното име. Впрочем кампањата за референдумот почнува на 10 септември. Дотогаш се надевам дека оваа акција ќе трае така што јавноста благовремено ќе биде информирана за сите чекори на ВМРО-ДПМНЕ – рече Мицкоски за референдумот.

Во интервјуто тој порача дека тврдењата на власта за наводно барање на амнестија од страна на опозицијата се лага. Тој рече дека со ваквите тврдења  кореспондираат со криминалите и скандалозните тендери кои ја тресат владата на СДСМ, а со тврдењето за барање на амнестија Заев и СДСМ се обидуваат да го оттргнат вниманието на јавноста од актуелните скандали.

-Овој дел кој што вие мене ме прашувате коинцидира со периодот исполнет со многу афери во јавноста, коруптивни како што се на пример доделувањата на оние грантови преку оној криминален Фонд за иновации. Потоа тука се оние криминални тендери кои што ги добиваат фирми формирани пред 6-7 дена пред да аплицира на тендер, еве гледаме, сведоци сме како се злоупотребува државен имот за приватни цели. Од прилика тоа беше еден груб обид да се сврти вниманието на јавноста од реалните теми кон некои други теми – рече Мицкоски.

Од СДСМ велат дека Мицкоски директно одбил да одговори на новинарско прашање и со тоа потврдил дека единствено за што се залага партијата е амнестија на криминалот.

„Македонија му кажа збогум на криминалот и црното минато, сега чекори кон ЕУ и НАТО, а таму важат поинакви вредности и правила од оние за кои се залага ВМРО-ДПМНЕ. Сите политички чинители кои се за македонската иднина се одлучни и обединети, освен Мицкоски и тесното партиско раководство на ВМРО-ДПМНЕ кои сакаат назад во темното минато на криминал, насилство и неказнивост. На Мицкоски веќе треба да му е јасно дека амнестија за криминалците нема да има, секој ќе одговара согласно законите“, порача СДСМ.

Партијата вели дека „без разлика на неодговорност однесување на ВМРО-ДПМНЕ, граѓаните на Македонија, на 30 септември, ќе ја искористат историската шанса за напредок“.

„Прашањето на референдумот е јасно и едноставно – иднина или изолација. Доколку Христијан Мицкоски има малку одговорност и сериозност, јавно ќе излезе и ќе каже за која опција навистина е. Обединети се сите политички партии кои навистина се за ЕУ и НАТО, а само Мицкоски и раководството на ВМРО-ДПМНЕ се изолирани и се против интергација, во обид да одбранат криминал“, велат од СДСМ.

На интервјуто реагираше и Граѓанско демократска унија (ГДУ), која порача дека со одлагањето да изнесе цврст став за референдумот, Мицкоски се однесува непринципиено и крајно несериозно.


Контраспин: Петте струмички студенти, петте пратеници на ВМРО-ДПМНЕ и Мицкоски


Скопје, 9 јули, 2018 - 17:14 (META) 

Барањето за амнестија може да биде поставено, но само откако сите ќе дознаеме што навистина се случи на 27 април 2017 година. А, да се споредуваат тие настани, петте обвинети пратеници на ВМРО-ДПМНЕ и петте стрелани струмички студенти во 1951 г. е неумесно, невкусно и калкулантски, пишува „Вистиномер.мк“.

Лидерот на ВМРО-ДПМНЕ, Христијан Мицкоски, од говорот на протестниот марш на неговата партија во Струмица даде изјави што ги оценуваме како спин:

Спин: И на ова лудило на политички реваншизам мора еднаш, еднаш засекогаш да му дојде крајот, затоа што премногу долго се делиме на ваши и наши, на Македонци, и помалку Македонци и затоа апелирам е потребна амнестија за луѓето од 27 април, затоа што мора да продолжиме напред, а нема напред ако живееме во минатото. Тоа е она што го бараме. И тоа е она за што ќе се бориме и ќе се залагаме.

Контраспин: Христијан Мицкоски недвосмислено, не по прв пат, побара амнестија за сите инволвирани во настаните од 27 април 2017 година во Собранието на РМ, но упорно одбива да даде своја или партиска квалификација на тие настани.

Нешто што е најблиску до квалификација на настаните е реченицата на Мицкоски дека луѓето „се воделе од чесна идеја и мисла“, а дека мотив им бил „Република Македонија“. Притоа, тој негира дека има какво било кривично дело, туку обвиненијата и досегашните пресуди ги сведува на политичка хајка:

„Ако кренете главата може да ви случи ова“, тоа е пораката. ВМРО-ДПМНЕ има денес 5 пратеници кои се теретат за нешто што не го направиле, односно за тероризам, а немојте никогаш да помислите дека ги заборавам и оние наши браќа и сестри кои сега се по затворите, и кои се дел од оваа конструирана политичка хајка, насочена против секој слободномислечки Македонец. Јас ги живеам нивните судбини. И не заборавајте дека, сепак, има невини луѓе по затвортите, затоа што се воделе од чесна идеја и мисла и единствен мотив им била нивната татковина Република Македонија.

Претседателот на ВМРО-ДПМНЕ, барајќи амнестија за настаните од 27 април 2017 година, практично спинува дека станува збор за „чесна идеја и мисла и единствен мотив им била нивната таковина Република Македонија“.

Спинот е очигледен, бидејќи никој кој се води од чесна идеја и мисла, нема да ја доведе Република Македонија пред работ на граѓанска војна, пред работ на воведување на вонредна состојба, пред работ на неизвесност и грч на своето население, а особено нема да дозволи загрозување на невини животи на пратеници, граѓани, новинари, службени лица вработени во Собранието…

Целата статија прочитајте ја на „Вистиномер.мк“.


Мицкоски: Договорот на Заев е капитулација, ВМРО-ДПМНЕ нема да го поддржи


Скопје, 12 јуни, 2018 - 22:13 (META) 

Ако постигнатиот таканаречен договор на Зоран Заев е прифаќање на промена на уставот, и внатрешна и надворешна употреба на новото име, тогаш тоа е договор на Зоран Заев за капитулација, рече Христијан Мицкоски, лидерот на ВМРО-ДПМНЕ вечерва на прес-конференцијата веднаш по обраќањето на премиерот на која ја соопшти веста за постигнатиот договор за името.

– Зоран Заев покажа нестабилност, недостоинственост, покажа и континуирана променливост на сопствените лични ставовите, недостоинствено за премиер на држава. Ставовите на ВМРО-ДПМНЕ се познати, непроменети и прецизни. ВМРО-ДПМНЕ нема да отстапи од своите принципи и уверувања и нема да поддржи промена на Уставот – рече Мицкоски нагласувајќи дека „доколку Зоран Заев се обиде шверцерски капитулацијата да ја протне низ собраниска процедура, мора да знае дека референдум мора да има, и тој мора да биде задолжителен, а не консултативен како што се обиде повторно денеска шверцерски на прес конференција да и го протне на македонската јавност“.

Според него, штетата што сега се прави е огромна и државата се турка во неповратен амбис.

– Ние сме за ЕУ и НАТО членство, многу повеќе од сите други, но напредокот и интегрирањето таму мора да биде ценето по мерит систем т.е. по сработената работа, а не по предавствата и капитулациите како што денеска Зоран Заев се обиде да им ги претстави на македонската јавност. Со ваквите договори како денес Македонија губи – рече Мицкоски и нагласи дека тој ќе гласа „против“ на најавениот референдум.


„Вистиномер“: Мицковски спинува со долгорочните ветувања на СДСМ


Скопје, 4 јуни, 2018 - 10:23 (META) 

Манипулација е и спинување ако ветувања на една политичка партија дадени за до крајот на мандатот, друга политичка партија и ги предочува како неисполнети во рок од една година од преземањето на власта. А, Мицкоски го прави токму тоа, се вели во анализата што ја објавува „Вистиномер“ за изјавата на претседателот на ВМРО-ДПМНЕ, Христијан Мицкоски, која ја оценува како како извртена вистина, т.е. спин:

Спин: Имаме една година полна со лаги. Имаме една година полна со нереализирани ветувања, со неисполнети очекувања. Имаме една година позади нас каде што се изгуби она ветување за 500 евра просечна плата, се изгубија оние 100.000 денари ветувања за специјалистите доктори, се изгубија поголемите субвенции за земјоделците, се изгубија поголемите стипендии за младите луѓе, се изгубија сите оние средства кои што треба да бидат одвоени за подобрување на стандардот на младите луѓе, се изгубија ветувањата за поголеми пензии за пензионерите, се изгубија ветувањата за што уште не, а тоа е така затоа што не знаеја што ветуваат, ветуваа напразно и ветува само шарени лаги, истакна Мицкоски

[Извор: ВМРО-ДПМНЕ/веб страна – датум: 01.06.2018]

Kontraspin-foto-Vistinomer-1024x281-e1500652724996

Контраспин:  Првиот човек на ВМРО-ДПМНЕ, Христијан Мицкоски, на зачестените средби со граѓаните во општините и населените места користи генерализирани реченици и оценки за владејачката СДСМ, со цел да прикаже дека сите ветувања што ги дале се неисполнети. Па, така, на средба со граѓани и симпатизери од Ѓорче Петров, Мицкоски искажа неколку извртени вистини, односно спинови за дел од ветувањата на владејачката партија.

Прво, не е целосна вистина дека владејачката партија управува цела една година.

Второ, не е вистина, односно извртена вистина е дека „имаме една година позади нас каде што се изгуби она ветување за 500 евра просечна плата“.

Трето, извртена вистина е дека се „изгубија оние ветени 100.000 денари за докторите специјалисти“.

Четврто, само делумно е точно дека за една година се изгубија поголемите субвенции за земјоделците.

Целата анализа на Теофил Блажевски можете да ја прочитате на „Вистиномер“.

 


Мицкоски побара предвремени избори догодина, Анѓушев вели дека тоа не е добро за економијата


Скопје, 3 јуни, 2018 - 19:14 (META) 

На протестот пред Владата, лидерот на опозициската ВМРО-ДПМНЕ, Христијан Мицкоски, побара предвремени парламентарни избори кои би се одржале догодина заедно со престедателските.

– Избори мора да има! Предвремени парламентарни избори заедно со претседателските мора да има. Ајде да подготвиме чист и еднаков терен за сите политички партии. Ајде да избереме Претседател на ДИК на предлог од опозицијата. Ајде да формираме техничка влада на 100 дена пред предвремените парламентарни избори, впрочем исто како што беше во 2016-тата кога Зоран Заев и СДСМ ги загубија изборите и да видиме дали народот се согласува со ова што го прави Зоран Заев и СДСМ – повика Мицкоски.

Тој рече дека како човек му паѓа многу тешко кога гледа како некој друг кој е власт во оваа наша убава земја си игра со достоинството на сите и ја распродава честа како на пазар, она што е на сите и што ни припаѓа на сите, го продава многу евтино, иако тоа е бесценето и си игра со трпението и интелигенцијата на 2 милиони луѓе.

– Сакам во оваа прилика да повторам дека ВМРО-ДПМНЕ нема да поддржи промена на Устав, а со цел промена на уставното име. Од ова појасен став нема! Историјата ќе суди кој бил во право, а името на нашата партија било и ќе биде Внатрешна Македонска Револуционерна Организација – Демократска Партија За Македонско Национални Единство. Ќе не заплашуваат, гонат и притискаат, ќе ни се закануваат и армадилата неверници ќе не критикуваат, мене и оваа генерација политичари во партијата, мои соработници и другари, но ќе им порачам нешто од овде, ако некој смета дека ќе се уплашиме, се лаже. Слушајте ме сега добро мои политички конкуренти од СДСМ. Не ви се плашиме! ВМРО- ДПМНЕ не се плаши кога Македонија е во прашање и иднината на нашата земја, нема страв и нема предавање! Затоа што ние одиме по патот на вистината, по патот на татковината, а кога си на таа страна тогаш си победник – рече Мицкоски.

На овие негови изјави реагираше владејачкиот СДСМ, според кој Мицкоски продолжува прецизно по патот на Груевски и за жал повторно одбива да им се извини на граѓаните за пустошeњето што ВМРО-ДПМНЕ го вршеше врз Македонија цели 11 години.

„Мицкоски вечерва повика Македонија да се врати назад, во темното минато на криминалот, корупцијата, осиромашувањто на граѓаните, на газењето на човековото достоинство, на оддалечувањето на земјата од европските вредности. И тоа нема да се случи“ се вели во соопштението.

Вицепремиерот Кочо Анѓушев не го коментраше барањето за предвремени парламентарни избори што го упати опозициската ВМРО-ДПМНЕ од вчерашниот митинг, но забалежа дека многу чести избори не се поволни за економските активности.


Заев побара поддршка од сите за името Република Илинденска Македонија


Скопје, 19 мај, 2018 - 20:59 (META) 

Со целосна одговорност, внимателност и посветеност на државните интереси, ги информирав претседателот на државата, претседателот на Собранието и претседателите на ВМРО-ДПМНЕ и ДУИ за сите детали од преговорите и известив дека владите на Република Македонија и Република Грција разговараа за опција и решение кое може да биде прифатливо за двете страни, рече во обраќањето по лидерската средба премиерот Зоран Заев.

Тој нагласи дека Република Илинденска Македонија е името за кое е можен компромис со Грција – на англиски “Republic of Ilinden Macedonia”,а на албански “Republika Ilinditase e Maqedonisë”.

Заев ги повика сите политички сили во општеството, сите групи и заедници да се приклучат за да ја искористиме оваа историска шанса за дефинитивен заеднички успех за Македонија.

– Република Илинденска Македонија е име со кое го зајакнуваме темелот на нашата Република, a Илинден значи историски континуитет на нашите стремежи, нашата државност и нашата гордост. Илинден е нашето славно минато, Илинден е и нашата светла иднина – рече Заев.

Според премиерот, со ова можно решение го чуваме достоинството, го потврдуваме и го зајакнуваме нашиот идентитет македонски.

– Со ова име, правиме целосно разграничување со регионот Македонија во Грција. Разграничување од секој аспект. Илинденското востание е заедничка борба на нашиот мултиетнички народ за социјални права и слободи. И нема никакви територијални аспирации према ниту една соседна земја, вклучително и Грција. Тоа е истата борба, и во 1903 и во 1944 година. Уште еднаш потврдувам, и јас и мојот народ, дека немаме никакви територијални претензии и ги потврдуваме неменливоста на границите и почитувањето на наследството на грчкиот народ и Грција. Македонија е подготвена да го потврди ова на сите потребни начини – рече Заев.

Со евентуален договор, како што нагласи, неповратно го отвораме патот кон членство во ЕУ и НАТО. Во јули добиваме покана за членство во НАТО и нема повеќе пречки за членство во ЕУ.

– Со можниот договор добиваме финална потврда – јазик македонски, language Macedonian. Идентитетот гарантиран. И меѓународните кодови МК и МКД ќе бидат обезбедени – истакна премиерот и додаде дека заради овие историски придобивки, заради ваквата гаранција за развој на Македонија, заради гаранцијата за влез во НАТО и ЕУ, заради гаранцијата за идентитетот македонски – ќе прифатиме севкупна употреба на името Република Илинденска Македонија како и заради зајакнување на меѓуетничката кохезија.

Премиерот рече и дека сроведувањето на употребата на новото име за внатрешна употреба би се реализирало во фази, етапно, онака како што ќе напредуваме низ преговорите за членство во ЕУ, а ќе се обезбеди преку референдум и преку уставни амандмани.

– Јас донесов одлука и стојам стопроцентно позади стремежот да успееме како народ, како држава, како идеја! Верувам во ова решение, подготвен сум да водам и ќе водам напред – рече Заев.

Лидерот на опозициската ВМРО-ДПМНЕ, по завршувањето на лидерската средба во Клубот на пратениците во Скопје рече дека предлогот – Република Илинденска Македонија за севкупна употреба за него е неприфатливо и повтори дека тие нема да поддржат промена на Уставот за промена на името.

Шефот на државата Ѓорѓе Иванов побара на писмено да го добие она што досега е разговарано во преговорите со Грција, а потоа ќе се изнесе во однос на предлогот.

– Првпат сме информирани за некои работи. Првпат ги слушнавме, усно се пренесни и очекувам за сите предлози да добиеме писмен документ. На овој состанок не изградивме став, само ги добивме информациите. Очекуваме во иднина да не бидеме селективно информирани, туку целосно да имаме увид за да знаеме за кои прашања се разговара. Досега сум бил принципиелен и останувам доследно да се придржувам на изградените ставови од претходните претседатели на Република Македонија, а тоа е дека процесот мора да се води во рамка утврдена од ОН – рече Иванов.


Лидерска средба за името денеска во 13 часот


Скопје, 19 мај, 2018 - 11:26 (META) 

Премиерот Зоран Заев за денеска во 13 часот во Клубот на пратеници во Скопје најави дека ќе се одржи лидерска средба на која тој ќе информира за преговорите за спорот за името и неговата средба со грчкиот премиер Алексис Ципрас во Софија.

На средбата, како што рече, очекува да се изгради консензус за ова прашање.

На средбата во Клубот на пратениците се поканети претседателот Иванов, претседателот на Собранието Џфаери, претседателот на ВМРО ДПМНЕ Мицкоски и претседателот на ДУИ Ахмети.

Премиерот Заев не сакаше да го коментира најновиот предлог за решавање на спорот за името, за да се даде шанса да успее преговарачкиот процес.

Присуството на средбата го потврди македонскиот претседател Ѓорге Иванов, од чиј кабинет вчера соопштија дека тој ја прифатил поканата на премиерот Зоран Заев за лидерската средба.

Иванов на средбата очекува да биде информиран за суштината и за деталите од разговорите во процесот за надминување на разликата околу името, истакнаа вчера од кабинетот на претседателот.

И лидерот на ВМРО-ДПМНЕ Христијан Мицкоски синоќа во изјава за медиумите потврди дека ќе учествува на средбата и истакна оти ставот по однос на евентуален договор партијата ќе го каже по нејзиното завршување, откако ќе ги има сите информации.

Денеска и грчкиот премиер Алексис Ципрас во претседателската палата во Атина ќе го извести претседателот Прокопис Павлопулос за текот на преговорите околу името.

Последниот предлог за решавање на спорот за името е „Република Илинденска Македонија“, кој наводно бил прифатен и од грчкиот премиер Ципрас.

Средбата доаѓа по вчерашните разговори на Заев со неговиот грчки колега Алексис Ципрас во Софија, по која Заев изјави дека е утврдена една опција што е прифатлива за двете страни, но дека за неа прво треба да се консултираат со сите релевантни фактори во своите земји.


Заев – Меј: Опцијата за името која би можела да биде прифатлива, е комплетно решение


Скопје, 17 мај, 2018 - 22:25 (META) 

Тереза Меј, првата премиерка од Обединетото Кралство што доаѓа во Македонија по скоро 2 децении, рече дека Македонија е интегрален дел од Европа и вети подршка за македонските евроинтеграции.

Меј која со сите почести беше пречекана во Владата, во врска со спорот со името порача дека е значајно тоа што Македонија пружала рака кон својот сосед, но дека за решение ќе треба силна политичка волја за тешки одлуки.

– Знам дека конфликтите од минатото некогаш можат да бидат невозможни за надминување. Многу тешки прашања остануваат нерешени – како внатрешните конфликти во регионот, организираниот криминал и т.н. Мора да се соочиме со предизвиците од минатото, но да останеме амбициозни во обезбедувањето на мирна и просперитетна иднина која вашите граѓани ја заслужуваат – рече премиерката Меј.

Премиерот Зоран Заев посетата ја оцени како круна на долгогодишното партнерство меѓу двете земји, а на следниот самит во Лондон очекува европските лидери да верификуваат напредок на Македонија. Од Софија се враќа со оптимизам.

– Едно е сигурно, пријателството ќе расте меѓу Македонија и Грција и од тоа бегање нема. Довербата е изградена. Граѓаните соработуваат, институциите соработуваат и тоа ќе биде така. Јас искрено верувам дека можеме да најдеме решение, опцијата која би можела да биде прифатлива од двете страни е комплетно решение. Продолжуваат сега консултациите во двете држави – рече Заев.

Попладнево Меј се сретна со претседателот на Собранието, Талат Џафери, му изрази поддршка за реформите, нагласувајќи дека знае дека изминатава година зградата на македонскиот парламент беше сведок на тешки времиња. Меј исто така истакна дека е свесна и за промените кои се случија оттогаш.

– Горда сум што Обединетото Кралство ги поддржува овие реформи преку нашите програми за финансирање. Кога владее демократијата, придобивките ги чувствуваме сите – посилно Собрание значи посилна Македонија – истакна Меј, која имаше средба и со лидерот на опозициската ВМРО-ДПМНЕ, Христијан Мицкоски.


Лидерска средба за името ќе има, но во термин кој на сите им одговара


Скопје, 13 мај, 2018 - 21:58 (META) 

Лидерска средба ќе се одржи во термин кој им одговара на сите политички субјекти кои се дел од овој вид средби. Додека се утврди термин кој одговара за сите, лидерот на опозицијата може да побара средба со премиерот, велат за МИА од Владата во врска со барањето на ВМРО-ДПМНЕ за итна лидерска средба за преговорите за името.

– Владата на Република Македонија како и секогаш досега кога има значаен развој во текот на преговорите за проблемот кој го има Република Грција со нашето уставно име, навремено и целосно ги информира сите засегнати политички субјекти. Истовремено, транспарентно и одговорно ја информира и јавноста, односно граѓаните – наведуваат од Владата.

Генералниот секретар на ВМРО-ДПМНЕ Игор Јанушев денеска на прес-конференција рече дека бараат итна лидерска средба, на која премиерот Зоран Заев и министерот за надворешни работи Никола Димитров во присуство на претседателот на државата Ѓорѓе Иванов би ги соопштиле деталите и насоките по кои се движат разговорите за името.

По средбата на министрите за надворешни работи на Македонија и на Грција, Никола Димитров и Никос Коѕијас, близу до Атина, посредникот во преговорите Метју Нимиц рече дека разговорите биле сериозни, со позитивни моменти.

Министрите за надворешни работи треба да ги информираат своите премиери пред самитот во Софија каде што двајцата премиери ќе имаат средба на 17 мај.


Утре прва расправа и гласање за (не)доверба за владата на Зоран Заев


Скопје, 10 април, 2018 - 0:46 (META) 

Собранието на својата веб-страница го објави барањето на ВМРО-ДПМНЕ за гласање на доверба на Владата, а собранискиот спикер, Талат Џафери, потврди дека расправата ќе се одржи утре.

„Единствени проекти коишто ги спроведе Владата на СДСМ и ДУИ во изминатиов период се партизирање на институциите и нивно деградирање, заробено судство, луксузирање на владините функционери со парите на граѓаните и политички реваншизам“, пишува во образложението на опозициската партија во барањето за изгласување на недоверба на Владата, потпишано од 41 пратеник на ВМРО-ДПМНЕ.

Во документот се вели дека СДСМ и ДУИ за да ја одржат коалицијата ја погазиле демократијата во државата, Уставот, законите и собранискиот Деловник. Дека на сила го изгласале Законот за јазиците, не спровеле ниту една реформа од планот 3-6-9, кој, велат, доживеал целосен колапс.

Претседателот на Собранието, Талат Џафери, со СМС-пораки им потврдил на пратениците дека утре ќе се одржи расправата за доверба на Владата.

Лидерот на ВМРО-ДПМНЕ, Христијан Мицкоски изјави дека очекува Собранието да изгласа недоверба на Владата и да се организираат предвремени парламентарни избори.

– Очекувам на крај на денот да се изгласа недоверба на Владата и да можеме понатаму да видиме како ќе ја развиваме Република Македонија, да организираме предвремени парламентарни избори и се што оди со тоа – рече Мицкоски.

Според собранискиот Деловник, гласањето за доверба на Владата се врши по истекот на три дена од поставувањето на прашањето за доверба.

За изгласување недоверба потребно е апсолутно мнозинство, односно 61 глас од вкупниот број на пратеници.