За да излезе од притвор Митко Чавков дал гаранција во недвижен имот


Скопје, 23 април, 2018 - 15:59 (META) 

Кривичниот совет на одделението за гонење организиран криминал и корупција при Основниот суд Скопје 1, по предлог на одбраната на Митко Чавков, донесе решение со кое го прифати предлогот за обезбедување присуство – гаранција во недвижен имот.

По правосилноста на решението и запишување на гаранцијата, притворот треба да се укине, а да му се одземе пасошот и да има обврска еднаш неделно да се јавува во судот.

Обвинителството може да вложи жалба на решението на кривичниот совет, што значи дека дотогаш Чавков останува во притвор.

Поранешниот министер за внатрешни работи Митко Чавков беше вратен во притвор на 28 март, еден ден откако Врховниот суд го пушти од Истражниот затвор во куќен притвор. Причината за неговото враќање, како што образложија од Кривичниот суд, било тоа што тој самоволно ја сменил локацијата за издржување домашен притвор.


Апелација го потврди притворот на Митко Чавков


Скопје, 11 април, 2018 - 16:16 (META) 

Скопска Апелација го потврди решението на Кривичниот суд со кое поранешниот министер за внатрешни работи и екс директор на Бирото за јавна безбедност, Митко Чавков останува во притвор.

Од Апелација велат дека е отфрлено и барањето за обезбедување гаранција за пуштање да се брани од слобода, бидејќи тоа било некомплетно.

Чавков заедно со уште четири лица беа вратени во притвор на 28 март со одлука на Кривичниот суд, еден ден откако Врховниот суд ги пушти од истражниот затвор во куќен притвор.


Полицијата два пати го барала Чавков дома, но тој бил на друга адреса


Скопје, 30 март, 2018 - 14:38 (META) 

Разликата во одлуките на Кривичниот и на Врховниот суд за мерките притвор на Митко Чавков е сосема мала и двата суда се произнеле дека треба да има мерка притвор со тоа што Врховниот суд вели „во домашни услови“, додека Кривичниот „во установа“, образложи претседателот на Кривичниот суд Иван Џолев на денешниот брифинг со новинари.

– Надлежност имаат и Врховниот и Кривичниот суд да одлучуваат, но во различни фази. Сплет на околности е тоа што одлуката на Кривичниот е еден ден по одлуката на Врховниот – рече Џолев.

Тој образложи дека Кривичниот суд одлучил за притвор во „Шутка“ затоа што имале на увид изнесување од Секторот за внатрешни работи Скопје од 27 март каде стои дека се извршени две контроли на локацијата одредена од Врховниот суд за издржување на мерката притвор.

Контролите биле во 18 и 21 часот, но Чавков не е најден таму.

Кривичниот судот добил известување од МВР дека тој не бил на адресата каде што требало да ќе ја издржува мерката притвор, односно бил на друга локација во Скопје. Џолев нагласи дека Чавков самоволно одлучил каде ќе ја издржува мерката куќен притвор и тоа да биде на друга локација.

На брифингот беше посочено дека во однос на изречените мерки досега се пристигнати девет жалби.


ВМРО-ДПМНЕ: Сведочењето на Заев дека барал поткуп го покриват со нови притвори


Скопје, 28 март, 2018 - 10:24 (META) 

На голем дел од неосновано притворените за 27-ми април, завчера им беше преиначена мерката од ефективен во куќен притвор, а веќе вчера, партискиот суд и обвинителство на Зоран Заев, одлучија повторно да ги приведуваат пред очите на нивните семејства, велат од ВМРО-ДПМНЕ како реакција на приведувањето на Митко Чавков и уште четворица обвинети за упадот во Собранието.

„Кој го нарача и кому му беше потребно ваквото малтретирање? Зошто некој сакаше семејствата повторно да ги проживуваат истите трауми? Што се смени во однос на околностите поради кои беше преиначен притворот? Одговорот е ништо! Ништо освен што видовме и официјално сведочење и потврда пред судот дека Зоран Заев барал поткуп. После ова сведочење Зоран Заев нема кредибилитет да биде премиер. Токму ова сведочење мора да биде покриено со нови политички апсења и притвори без никаква основа. Судството и јавното обвинителство мора да ја докажат својата лојалност кон Заев и власта“, стои во партиското соопштение.

Од партијата потенцираат дека Обвинителството мора да ги гони вистинските криминалци во Македонија, од кои дел, како што велат од ВМРО-ДПМНЕ, се наоѓаат на Илинденска бр. 2, наместо да ги гони патриотите и уставобранителите.


Судот ги врати во притвор Чавков и уште четворица обвинети за упадот во Собранието


Скопје, 28 март, 2018 - 9:32 (META) 

Митко Чавков, поранешниот директор на Бирото за јавна безбедност во времето на крвавите настани во Собранието, Горан Ѓошевски, од обезбедувањето на поранешниот спикер Трајко Вељановски, Душко Лазаров и Оливер Поповски од МВР и Мунир Пепиќ од Агенцијата за разузнавање синоќа повторно се приведени, и се пренесени во Истражниот затвор Шутка.

Кривичниот совет делумно го прифатил барањето на Обвинителството за организиран криминал и корупција кое вчера поднесе обвинение против 30 лица за насилствата во Собранието од 27 април лани и притоа побара и враќање на мерките притвор и куќен притвор за обвинетите.

На Чавков и останатите четворица обвинети определен им е 30 дневен притвор иако тие завчера по одлука на Врховниот суд беа пуштени во куќен притвор поради упадот во Собранието на 27 април минатата година при што беа повредени повеќе пратеници, новинари и граѓани.

Според обвинението кое го покрена Обвинителството вчера, 28 лица се товарат за терористичко загрозување на Уставниот поредок и безбедноста, а две лица се товарат за помагање за истото кривично дело.

Од ВМРО-ДПМНЕ на повторното притворување реагираа дека „тортурата и изживувањето на Зоран Заев и власта со притворените патриоти ги надмина сите граници“.

„Судот мора да пронајде сила и да се ослободи од стегите на власта и да суди во корист на правото. Сите граѓани мора да бидат еднакви пред законот. Обвинителството мора да ги гони вистинските криминалци во Македонија од кои дел се наоѓаат на Илинденска број 2, наместо да ги гони патриотите и уставобранителите“, соопштија од ВМРО-ДПМНЕ од каде рашуваат и што се сменило во однос на околностите поради кои беше преиначен притворот.


Укинати притворите на Чавков, Мукоски и Василески, Тарчуловски и Димовски


Скопје, 27 март, 2018 - 9:36 (META) 

Поранешниот министер за внатрешни работи Митко Чавков и пратениците Крсто Мукоски и Сашо Василески излегуваат од истражниот затвор „Скопје“ во населбата Шуто Оризари, откако вчера попладне Врховниот суд донесе одлука да им го замени притворот со куќен притвор.

Врховен суд вчера решавашe по жалбите кои Чавков, Мукоски и Василески ги поднесоа на одлуките на Кривичниот и Апелацискиот суд, со кои им се одредуваше и продолжуваше притворот.

Врховниот суд одлучи од притвор да се пуштат и Митко Пешев, Душко Лазаров, Горан Ѓошевски, Оливер Поповски и Мунир Пепиќ сите вработени во МВР, на кои исто така им е одреден куќен притвор.

По вчерашната одлука во притвор остануваат уште четворица осомничени за настаните од 27 април. Меѓу нив се членовите на патриотското здружение од Велес, Горанче Анѓелов и Илија Славевски.

Врховен суд, исто така, вчера решаваше за жалбите на пратениците Јохан Тарчуловски и Љупчо Димовски, кои повеќе од еден месец се во куќен притвор, и им го укина притворот и им одреди мерка на претпазливост, односно одземени им се патните исправи и тие мора задолжително да се јавуваат во суд еднаш неделно.


Апелација ги одби жалбите на Чавков, Јовановски, Дурловски и Илиевски


Скопје, 12 јануари, 2018 - 15:42 (META) 

Апелацискиот суд ги одби жалбите на единаесетмина осомничени за насилствата во Собранието од 27 април, меѓу кои и поранешниот министер за внатрешни работи, Митко Чавков, актерот Владо Јовановски, поранешниот директор на Македонската опера и балет Игор Дурловски и Богдан Илиевски – Бетмен, кои и понатаму остануваат во притвор што им го одреди и продолжи Кривичниот суд.

Дел од одлуките на Апелација следуваат по јавните седници, кои беа одржани вчера и завчера на кои адвокатите на осомничените, но и самите тие, побараа од судот да им биде укината мерката притвор и таа да биде заменета со куќен притвор или друга поблага мерка.

Меѓу осомничените чии жалби Апелација ги разгледувала на затворена за јавноста седница се Богдан Илиевски, Илија Славевски, Митко Пешов и Оливер Радулов.

„Апелациониот суд Скопје, по одржаните јавни и нејавни седници на ден 10.01.2018 година и 11.01.2018 година, донесе одлуки со кои ги одби како неосновани жалбите на обвинетите и ги потврди решенијата на Основниот суд Скопје 1 Скопје донесени во рамки на предметите во врска со настаните во Собранието на Република Македонија на 27 април 2017 година и тоа за обвинетите Оливер Поповски, Горан Ѓошевски, Владо Јовановски, Митко Чавков, Игор Дурловски, Мунир Пепиќ, Душко Лазаров, Митко Пешов, Оливер Раудлов, Богдан Илиевски и Илија Славевски“, стои во соопштението на Апелација.

Според донесените одлуки, Апелацицскиот суд го отфрлил и предлогот на Вишото јавно обвинителство за укинување на притворот на Владо Јовановски и негова замена со друга мерка за обезбедување присуство.

Кривичниот совет денеска на јавна седница ја разгледуваше жалбата за продолжување на притворот на пратеникот Сашо Василевски, исто така сосомничен за насилствата во Собранието.


Чавков: Ова е апсурден процес што е дамка на македонското правосудство


Скопје, 11 јануари, 2018 - 15:23 (META) 

Митко Чавков, поранешниот директор на Бирото за јавна безбедност, тврди дека со материјални докази ќе потврди дека раководел со акцијата за смирување на состојбата во Собранието по насилствата на 27 април минатата година и дал клучен придонес. Тој го нарече случајот против него темна дамка за македонскиот кривично-правен систем.

На денешното разгледување на неговата жалба за новиот притвор од 30 дена, пред Советот на Апелацискиот суд Скопје, неговиот адвокат Сашо Дуковски побара притворот што го изрече Основен суд Скопје 1 да биде поништен или заменет со поблаги мерки. Дуковски наведе дека понискиот суд со наведувањето на кривичната одговорност како основа за продолжување на притворот, веќе го прогласил Чавков за виновен, а истрагата на Основното јавно обвинителство се уште е во „ембрионална фаза”.

– Ништо не е преземено во истрагата, а осомничениот веќе се прогласува за виновен – рече Дуковски.

Адвокатот посочи дека не држат ниту наводите дека Чавков може да влијае на сведоци и да ја попречува истагата кога веќе поминале седум месеци од настанот пред да биде приведен. Ја спомена и здравствената состојба на Чавков, односно инфарктот што го добил неколку месеци пред притворањето.

Претставникот на Вишото јавно обвинителатво побара да се одбие жалбата, бидејќи во оваа фаза притворот е непходен за обезбедување на присуство на Чавков.

Чавков во своето обраќање пред тричлениот судски совет на скопска Апелација рече дека материјалните докази ќе покажат дека раководел со акцијата за смирувањето на состојбата во Собранието на 27 април.

-Од материјалните докази ќе се види дека со раководењето на акцијата во едни специфични околности дадов клучен допринос за спасување на животите на пратениците и нивна дислокација на безбедно. Апсолутно не се чувствувам виновен и тоа ми дава сила и покрај мојата здравствена состојба да истраам и во една легална процедура даја докажам мојата невиност- рече Чавков.

Пред жалбата на Чавков, се разгледуваше жалбата на началникот во МВР за специјални операции, Душко Лазаров, чии адвокати во образложението дадено на јавната седница на Советот на Апелација, рекоа дека продолжувањето на притворот е тенденциозно и неосновано. Побараа да се укине притворот или да се замени со поблага мерка.

Душко Лазаров пред судот рече дека нема намера да бега и дека ако сакал да влијае на сведоци имал шанса да го направи тоа.

Претставникот на Вишото јавно обвинителство смета дека апелација треба да ја одбие жалбата.


Апелација ќе решава за притворите на Чавков, Дурловски, Пепиќ и Лазаров за 27 април


Скопје, 11 јануари, 2018 - 11:02 (META) 

Апелацискиот суд Скопје покрај жалбите на Мунир Пепиќ, од Агенцијата за разузнавање и на Душко Лазаров, началник за специјални операции во МВР, денеска на јавна седница ќе расправа и за продолжениот притвор на поранешниот министер за внатрешни работи и директор на Бирото за јавна безбедност (БЈБ), Митко Чавков и на поранешниот директор на Македонска опера и балет (МОБ), Игор Дурловски.

Четворицата се притворени поради насилствата во Собранието од 27 април и Основното јавно обвинителство за гонење на организиран криминал и корпуција ги товари за кривичното дело терористичко загрозување на уставниот поредок и безбедноста.

Адвокатите на Чавков поднеле жалба веднаш по одлуката на Кривичниот да му го продолжи притворот за нови 30 дена.

Денешните јавните седници се закажни од 13 часот.

Во меѓувреме се очекуваат одлуките на второстепниот суд по вчерашните јавни седници на кои беа разгледувани жалбите на актерот Владо Јовановски, на Оливер Поповски од Шестата управа и на Горан Ѓошевски, шеф на обезбедувањето на поранешниот претседател на Собранието, Трајко Вељаноски.

Претставникот на Вишото јавно обвинителство, обвинителот Јован Цветановски побара од тричлениот совет на Апелацискиот суд да му го укине притворот на Јовановски и да го замени со поблага мерка за обеабедување на присуство.

Неговите двајца колеги од Вишото јавно обвинителство за Поповски и за Ѓошевски побараа второстепениот суд да го потврди решението за продолжување на притворот.


Продолжен притворот на пратениците и на Чавков, Илиевски, Дамовски, Дурловски…


Скопје, 27 декември, 2017 - 15:55 (META) 

Кривичниот суд во Скопје денеска им го продолжи притворот за нови триесет дена на пратениците Крсто Мукоски, Сашо Василевски и Љубен Арнаудов, на поранешниот министер за внатрешни работи и директорот на Бирото за јавна безбедност Митко Чавков, организаторите на протестите на „За заедничка Македонија“ Игор Дурловски, Борис Дамовски, Богдан Илиевски и на уште шестнаесет лица осомничени за насилствата во Собранието од 27 април, оваа година.

„Кривичниот совет на одделението за организиран криминал и корупција при Основниот суд Скопје 1 – Скопје постапувајќи по предлог на ОЈО за гонење организиран криминал и корупција за продолжување на мерката притвор и мерката куќен притвор за 29 лица, а во врска со настаните од Собранието на Р.Македонија од 27 април, донесе решенија со кои го прифати предлогот на обвинителството и за К.М., С.В., Љ.А., М.Ч., Д.Л., Г.Ѓ., О.П., О.Р., М.П., А.А., Е.Д.Б., И.Ц., Б.Д., Б.И., В.Ј., И.Д., М.П., З.С., Ј.Ч., И.С., Г.А., В.Т. и В.М. ја продолжи мерката притвор во траење од 30 дена“, стои во соопштението на судот.

Куќниот притвор им е продолжен на пратениците Љупчо Димовски, Јохан Тарчуловски, Жаклина Пешевска и на уште еден осомничен, додека за С.М. и М.М. судот го прифати предлогот на обвинителството за укинување на мерката притвор и определување мерка куќен притвор.

Против овие решенија осомничените имаат право на жалба до Апелацискиот суд во рок од 48 часа од приемот на решенијата.

Обвинителството за гонење на организиран криминал и корупција на 28 ноември отвори истрага против 36 лица за насилствата во Собранието, кои ги товари за терористичко загрозување на уставниот поредок и безбедноста на државата.