Трамп ги доведе во прашање мировните преговори меѓу Израел и Палестина


Давос, 25 јануари, 2018 - 17:52 (META) 

Претседателот на САД, Доналд Трамп ја доведе во прашање можноста за продолжување на мировните преговори меѓу Израел и Палестина, префрлајќи ја одговорноста за тоа на палестинската страна, пренесува „Би-би-си“.

Како што изјавил Трамп во Давос, Палестинците „покажале непочитување“ кон САД, по неговата одлука да го признае Ерусалим за главен град на Израел.

– Кон САД мора да биде искажана почит или едноставно не одиме понатаму – изјавил Трамп пред новинарите во Давос.

Седејќи покрај израелскиот премиер, Бенјамин Нетанјаху на Светскиот економски форум во Давос, Трамп рекол дека Израел секогаш ги поддржувал САД и дека за него било чест тоа што го направил со признавањето на Ерусалим за главен град.

По одлуката за Ерусалим, палестинските официјални претставници соопштија дека САД повеќе не можат да се сметаат како неутрални посредници во преговорите. Палестинскиот претседател Махмуд Абас ја нарече декларацијата на Трамп за Ерусалим „шлаканица на векот“.


Авганистан и Пакистан ги повикаа талибанците на мировни преговори


Пекинг, 26 декември, 2017 - 15:51 (META) 

Министрите за надворешни работи на Пакистан и на Авганистан денеска ги повикаа талибанците да се придружат на мировни преговори.

Повикот е испратен после состанокот кој го организираше Кина за да ги поправи „напнатите односи“ меѓу двете влади.

Во заедничкото соопштение на владите на трите земји повикуваат на „широко втемелен и инклузивен мировен процес и помирување“, поради секојдневните напади на талибанците во областите ширум Авганистан.

Официјален Пекинг го свика состанокот откако авганистанските власти го обвинија Пакистан дека обезбедува „сигурно прибежиште“ за талибанците.


Нова рунда од мировните преговори за Сирија следната недела во Женева


Ријад, 25 ноември, 2017 - 10:44 (META) 

Новиот круг од мировните преговори за решавање на ситуацијата во Сирија под покровителство на Обединетите нации (ОН) ќе се одржи во Женева на 28 ноември. Ова било потврдено на состанокот на членовите на сириската опозција во Саудиска Арабија, јавуваат светските агенции.

За нов предводник на делегацијата на сириската опозиција е избран Насер ал Харири, кој го замени радикалниот Ријад Хиџаб, кој во понеделникот оваа недела поднесе оставка на функцијата.

Харири ги повикал ОН да иницираат директни преговори за политичка транзиција во Сирија и порачал дека фокусот треба да биде ставен на мировните преговори со поддршка на ОН.

Околу 150 претставници на различните опозициски групи во Сирија одлучиле да испратат заедничка делегација на преговорите следната недела. Тие, решението за ставање крај на војната во Сирија, која трае веќе седум години, го гледаат исклучиво во заминувањето на сирискиот претседател Башар ал Асад, кој ја има поддршката на Русија, додека на страна на опозицијата се Турција и други регионални сили, како и Соединетите Американски Држави.


Одложени мировните преговори за Сирија во Астана


Астена, 8 јуни, 2017 - 11:29 (META) 

Русија, Турција и Иран ја одложија планираната рунда преговори за Сирија, која на предлог на Русија требаше да се одржи во Казахстан на 12 и на 13 јуни, соопшти денеска казахстанското министерството за надворешни работи.

Портпаролот на министерството рекол дека не се знае кога ќе се одржи следната рунда преговори.

На преговорите требаше да учествуваат сириската влада и некои фракции на бунтовниците. Претходниот мировен состанок за Сирија се одржа во казахстанскиот главен град Астана на крајот на јануари годинава.


Нова рунда преговори за Сирија во Казахстан, бунтовниците најавија бојкот


Астана, 14 март, 2017 - 10:11 (META) 

Во Астана, главниот град на Казахстан, денеска почнува новата рунда мировни преговори за Сирија, кои, како што јавуваат странските агенции, ќе бидат бојкотирани од сириските бунтовнички фракции.

Портпаролот на сириската вооружена опозација, Осама Абу Заид, изјавил дека одлуката за бојкот е донесена бидејќи не се почитуваат ветувањата за прекин на огнот во Сирија, кој на иницијатива на Русија и на Турција стапија на сила кон крајот на декември минатата година.

Преговорите во главниот град на Казахстан ги организираат Русија и Иран, кои ги поддржуваат сириските власти, и Турција, која е на страната на бунтовниците.

Ова е втора рунда преговори во Астана од почетокот на годинава, но засега нема конкретни резултати.

Сирискиот претседател Башар ал-Асад во пресрет на преговорите изјави дека за иднината на земјата ќе се одлучува по „пресметката“ со екстремистите и по националното помирување.

Министерството за надворешни работи на Казахстан соопшти дека на новата рунда преговори Русија ќе ја претставува специјалниот пратеник на претседателот Владимир Путин, Александар Лаврентијев, а Иран – заменик-шефот на дипломатијата, Хосеин Џабери Ансари.

Според весникот „Ал Ватан“ близок до властите во Дамаск, делегацијата на сириската влада ќе ја предводи сирискиот амбасадор во Обединетите нации, Башар ал Џафари.

На состанокот се повикани и претставници на САД и на Јордан, како и специјалниот пратеник на ОН за Сирија, Стефан де Мистура.


Во Женева продолжуваат мировните преговори за Сирија


Женева, 23 февруари, 2017 - 10:44 (META) 

Мировните преговори на сириските власти и на опозицијата под покровителство на Обединетите нации, денеска ќе продолжат во Женева во обид да се стави крај на повеќегодишната војна во Сирија, во која настрадале повеќе од 310.000 лица.

Специјалниот претставник на ОН за Сирија, Стефан де Мистура, изјави дека Русија од сириските власти побарала прекин на воздушните напади додека траат мировните преговори во Женева.

Де Мистура рече дека не очекува „важен напредок“ во преговорите, кои ќе се одржат во европското седиште на ОН.

Делегациите на сириските власти и на опозицијата веќе допатуваа во Женева на нова рунда преговори, на кои ќе биде разгледана и политичката транзиција на Сирија.

Прашањето за останувањето на сирискиот претседател Башар ал Асад на власт претставува главна точка на спорот меѓу властите и опозицијата.


Путин и Ердоган разговараа за одржување преговори за Сирија во Казахстан


Москва, 19 декември, 2016 - 10:25 (META) 

Претседателот на Русија, Владимир Путин, телефонски разговарал со турскиот претседател, Реџеп Таип Ердоган, за најновите случувања во Сирија, соопшти синоќа прес-службата на Кремљ.

Двајцата претседатели разговарале за можноста за одржување преговори меѓу сириските власти и умерената опозиција во казахстанскиот главен град Астана, при што, како што соопшти Кремљ, ја нагласиле потребата од блиска соработка меѓу Москва и Анкара во решавањето на сирискиот конфликт.

Путин и Ердоган претходно телефонски разговарале и со казахстанскиот претседател Нурсултан Назарбаев, кој ја потврдил подготвеноста на неговата земја да биде домаќин на евентуални преговори меѓу завојуваните страни во Сирија.


Сè помали се изгледите за мир на Блискиот Исток, оцени Бан Ки-мун


Њујорк, 30 ноември, 2016 - 12:15 (META) 

Генералниот секретар на обединетите нации, Бан Ки-мун, рече дека меѓународната заедница мора јасно да каже дека и понатаму е посветена на мировните преговори меѓу Израел и Палестинците, затоа што изгледите за мир „можат да се лизнат од раце“.

Бан, чиј десетгодишен мандат завршува за еден месец, синоќа издаде соопштение во пресрет на состанокот на Генералното собрание на ОН, кое го сочинуваат 193 земји, по повод Меѓународниот ден на солидарноста со палестинскиот народ.

Тој наведе дека поради настаните од последната година, вклучувајќи ги и двата неуспешни обида во преговорите за договор и вооружените судири, Палестинците и Израелците се фрустрирани и разочарани.

„Тоа им даде сила на радикалите и ги ослабна умерените на двете страни. Тоа што ги прави работите уште полоши е опасниот вакуум во меѓународната заедница затоа што кризите во другите места го одвлекуваат вниманието на светските лидери“, рече Бан.

Палестинците сакаат да основаат независна држава на Западниот Брег и во Појасот Газа, со источен Ерусалим како главен град на државата. Израел ги освои овие територии во шестдневната војна во 1967 година и на Западниот Брег и во анектираниот источен Ерусалим сега живеат околу 600.000 еврејски населеници.


Авганистан не планира продолжување на преговорите со талибанците


Кабул, 14 јули, 2016 - 12:26 (META) 

Авганистан, Пакистан, Кина и САД не планираат да ги продолжат мировните преговори со талибанците откако претходните состаноци не дадоа резултати, соопштија авганистанските претставници.

Портпаролот на авганистанскиот претседател, Ашраф Гани, рече дека не постои план за заживување на мировниот процес, кој тежнееше да ги доведе талибанските лидери на преговарачка маса.

Претставниците нагласуваат дека нов состанок не е закажан.

Група претставници на четирите земји се состанаа пет пати од јануари во Кабул и во Пакистан. Во мировните преговори не учествуваа талибанците кои добија покана да учествуваат на заедничките состаноци.

Авганистанските претставници го обвинуваат Пакистан дека го крие лидерот на талибанците, додека Исламабад ги отфрла обвинувањата. Тие наведуваат дека Авганистан е на удар на „терористичките групи кои дејствуваат и имаат упориште во Пакистан“.


Одложена конференцијата за израелско-палестинскиот мировен процес


Париз, 17 мај, 2016 - 10:44 (META) 

Францускиот претседател Франсоа Оланд денеска рече дека меѓународната конференција, предвидена за 30 мај во Париз, на која требаше да се поттикне израелско-палестинскиот мировен процес, е одложена за летово.

– Американскиот државен секретар Џон Кери не може да дојде на 30 мај. Конференцијата ќе се одржи летово. Оваа иницијатива е неопходна – изјави Оланд.

Конференцијата, која ја предложи Франција, треба да ги заживее мировните преговори.