Трамп се закани дека ќе ја прекине помошта за Палестинците


Вашингтон, 3 јануари, 2018 - 13:01 (META) 

Соединетите Американски Држави би можеле да ја прекинат помошта за Палестинците, кои, „повеќе не сакаат да разговараат за мир“ порача американскиот претседател, Доналд Трамп, пренесува „Би-би-си“.

Трамп на „Твитер“ напиша дека, „САД не добиле ниту признание, ниту почит за помошта од стотици милиони долари што годишно им ја даваат на Палестинците.“

Заканите на Трамп следуваат по острите реакции на Палестинците на неговата одлука да го признае Ерусалим за главен град на Израел.

Кратко време по објавувањето на одлуката на Вашингтон во декември, минатата година, палестинскиот претседател Махмуд Абас изјави дека нема да прифати никаков мировен план на САД за Блискиот исток.

Одлуката на Трамп, исто така, беше осудена и од Обединетите нации.

На 21 декември мнозинство од 128 земји-членки на Обединетите нации ја поддржаа резолуцијата со која се бара САД да ја повлечат одлуката за признавање на Ерусалим како главен град на Израел.


Колумбијците го отфрлија мировниот договор со ФАРК


Богота, 3 октомври, 2016 - 10:28 (META) 

Колумбијците на референдум ја отфрлија спогодбата за ставање крај на полувековните судири меѓу владата и бунтовничката група Револуционерни сили на Колумбија (ФАРК).

Според 99 отсто од пребројаните гласови, 50,24 отсто од гласачите се изјасниле против спогодбата, а 49,75 биле „за“.

Анкетата спроведена пред референдумот предвидуваше глатка победа на опцијата за ратификување на спогодбата.

Колумбиската влада и ФАРК минатата недела потпишаа историски мировен договор, со што и официјално е ставен крај на полувековниот судир во кој се убиени стотина илјади лица.

Спогодбата на церемонијата во Картахени, град на карипскиот брег на Колумбија, ја потпишаа претседателот на Колумбија, Хуан Мануел Сантос, и лидерот на ФАРК, Тимолеон Хименес, познат по прекарот Тимоченко. Договорот го потпишаа со пенкало изработено од куршум.

На потпишувањето на договорот присуствуваа 2.500 странски претставници.

Спогодбата има 297 страници, а тогаш е објавено дека мора да биде ратификувана на референдум на 2 октомври.

Во следните шест месеци бунтовниците ќе го предадат оружјето на набљудувачите под покровителство на ОН, додека формираат партија.

ФАРК ќе има загарантирани најмалку 10 места во конгресот.

Во судирите, според досегашните процени, загинаа 220.000 лица, додека милиони мораа да ги напуштат домовите.

Спогодбата следува по четиригодишни преговори, кои повеќепати беа на раб да се прекинат.