Со нова регулатива ќе се зголемува безбедноста на Интернетот


Скопје, 6 февруари, 2019 - 20:26 (META) 

Министерството за информатичко општество и администрација подготвува закон за безбедност на мрежи и информациски системи. Во образложението објавено на Единствениот национален електронски регистар (ЕНЕР) се вели дека мрежата и информациските системи, а пред сè интернетот, играат суштинска улога во олеснувањето на прекуграничното движење на стоки, услуги и луѓе.

„Поради таа транснационална природа, значителни нарушувања на овие системи, без разлика дали се намерни или ненамерни и без оглед каде се случуваат, може да влијаат и врз Македонија. Затоа, безбедноста на мрежните и информациските системи е од суштинско значење за непречено функционирање на внатрешниот пазар. Имајќи предвид дека во  Македонија отсуствува правна регулатива во оваа област, се наметна потребата за изготвување на овој закон. Дополнително, со истиот се транспонира Директивата (ЕУ) 2016/1148 на Европскиот парламент и на Советот од 6 јули 2016 година во однос на мерки за висок општ степен на безбедност на мрежа и информациски системи низ Унијата, односно НИС Директивата“, пишува во образложението.

Како главна цел на предлог-законот се наведува ефикасно справување со предизвиците на безбедноста на мрежите и информациските системи во Република Македонија, во смисла на заеднички минимални капацитети за градење и планирање, размена на информации, соработка и заеднички безбедносни барања од областа на ИКТ.


Фондацијата “Метаморфозис” и МИОА со ново видео го одбележуваат Денот на побезбеден интернет


Скопје, 5 февруари, 2019 - 13:15 (META) 

Во над 140 земји од светот денеска се одбележува меѓународниот Ден на побезбеден интернет под мотото „Заедно за подобар интернет“. Одбележувањето на овој ден претставува повик за акција кон сите засегнати страни, со заеднички сили да помогнат во креирањето на подобар интернет за сите, особено за младите.

Фондацијата “Метаморфозис” во соработка со Министерството за информатичко општество и администрација (МИОА) го одбележуваат денот со ново едукативно видео за подигнување на свесноста кај младите за потребата од побезбедно и поодговорно користење на онлајн технологиите и мобилните телефони.

Сите заинтересирани можат да се вклучат во кампањата и да ја изразат својата поддршка преку тоа што:

1.Ќе речат „не“ на кибер-насилството

Онлајн насилството е широко распространет проблем и сосема е сигурно дека сите оние што се активни на социјалните медиуми имаат посведочено или биле жртва на ваков вид насилство. Но, добрата вест е дека младите од Европа се организираат против онлајн насилството преку кампања наречена #Togetherforrespect (Заедно за респект).

2. Ќе ја заштитат нивната приватност онлајн

Приватноста онлајн можеби изгледа смешно од оваа перспектива, но заштитата на личните податоци е неопходна за да може безбедно и сигурно да се ползуваат благодатите на онлајн светот. Податоците на граѓаните константно се прибираат од страна на платформите за социјални медиуми и разни апликации кои се користат на дневна основа. Ако не се обрнува доволно внимание на поставките за приватност, злонамерни лица можат да добијат пристап до податоците на граѓаните и да ги искористат за наштетување репутацијата или уцени.

3. Ќе научат да размислуваат на критички начин

Измамите на интернет добиваат екстремни пропорции и за оние кои ќе наседнат може да има сериозни последици. Освен измамите, многу поширок е проблемот за дезинформациите и лажните вести. Поради тоа, развојот на вештините за медиумска писменост е апсолутно неопходен.

На оваа веб страница се прикажани сите активности кои што се случуваат насекаде низ светот каде луѓе со слични идеи и предлози се обидуваат да го направат интернетот побезбедно место за сите.

Дополнителни ресурси за начините за заштита на децата и младите на интернет се достапни на веб-страницата на Проектот за Заштита и безбедност на децата и нивните права на интернет – CRISP (Children’s Rights on the Internet – Safe and Protected) или на „Безбедно на интернет“.

Активностите за Денот на побезбеден интернет може да ги следите и на социјалните медиуми преку #SID2019 и #SaferInternetDay.


Владата го промовираше порталот за отворени податоци data.gov.mk


Скопје, 24 декември, 2018 - 16:11 (META) 

Министерството за информатичко општество и администрација денеска го промовираше новиот портал за отворени податоци каде што во моментов има објавени 111 податочни сетови, од 42 институции.

Според министерот за информатичко општество Дамјан Манчевски дел од податоците достапни на порталот се објавуваат за првпат, дел се и претходно објавени, но сега се достапни на едно место, систематизирани и во формат којшто е лесно разбирлив, но остава и простор за понатамошна анализа и дополнително користење.

– Она што сакаме да го постигнеме со отворањето на овој портал е да ја подобриме испораката на услуги и ефикасноста на јавниот сектор. Тој овозможува и зголемување на учеството на граѓаните при креирањето на политиките, но и при анализа на резултатите од она што ние го правиме. Наша главна заложба како министерство е да ги донесеме услугите до граѓаните и тоа е многу полесно отколку физички нив да ги носиме до институциите. Ова е само еден од механизмите како може тоа да го направиме – вели Манчевски.

Сајтот, како што рече министерот без ресор, задолжен за комуникации, отчетност и транспарентност, Роберт Поповски, треба да овозможи и поголема вклученост во градењето на политиките на државата, да помогне во борба против корупцијата, но и да обезбеди нови можности и за бизнис секторот …

Со достапност на податоците системот може подобро да функционира, вели амбасадорката на Велика Британија, Рејчел Галовеј, зборувајќи за британскиот пример.

– Порталот што го промовираме денеска би требало да го зголеми и олесни пристапот до информациите до граѓаните, а истовремено да ги вклучи и ангажира нив да придонесуваат во начинот на развојот на политиките – рече амбасадорката.


Голдстајн: Премногу администрација воопшто, но премалку на вистинското место со вештини


Скопје, 13 ноември, 2018 - 12:46 (META) 

Свесни сме за критиките кои се адресираат на вработените во јавната администрација. Наша заедничка цел мора да биде да ја подобриме сликата што јавноста ја има за начинот на којшто функционира јавната админстрација.

Ова денеска го истакна министерот за информатичко општество и администрација, Дамјан Манчевски на првата Годишната конференција на Мрежата за управување со човечки ресурси, на која присуствуваат шестотини претставници на одделенијата за човечки ресурси и државни секретари.

– Јас верувам дека функционирањето на оваа мрежа ќе придонесе кон подобрување на работата на јавната админстрација. Особено кога зборуваме за подобрување на испораката на услугите до граѓаните. Во исто време администрацијата треба да биде подготвена да се носи со предизвиците од пристапувањето во евроатланските структури – истакна Манчевски.

Тој додаде дека во буџетот за следната година е предвидено зголемување на плата на сите во администрацијата за пет проценти, а за некои професии ќе има и повеќе.

– Намерата ни е секоја година да има по едно вакво покачување и се надеваме дека ќе успееме во тоа. Ама затоа и бараме многу поголема одговорност, многу подобри услуги, со цел граѓаните да бидат позадоволни – додаде Манчевски.

Државниот секретар на МИОА, Јахи Јахија рече дека на државата и биле потребни над два милиони евра за воспоставување на информатички систем за човечки ресурси.

– Согласно Законот за вработени во јавниот сектор, МИОА е должно до 31 март секоја година да го објави Извештајот за вработени во јавниот сектор. За жал, до денес не можеме да го оствариме ова законско право, бидејќи голем број на институции не ја исполнуваат својата законска обврска. Како министерство го направивме она што е беше наша задача, преку обуки на вработените, интервенција на инспекторатот, измени на законите – рече Јахија.

Заменик шефот на Мисијата на ОБСЕ во Скопје, Џефри Голдстајн се осврна на важноста од реформите во јавната администрација.

– Реформата на јавната администрација е потребна за да се подобри животот на граѓаните и да се зголеми јавната доверба во државните институции во кои вие работите. Еден многу важен дел на реформата на јавната администрација е реформата на системот на човечки ресурси. За да стане поефикасна, државната администрација мора подобро да ги користи луѓето кои работат во неа.Гледајќи однадвор, ми изгледа дека државната администрација има истовремено и премногу и премалку луѓе. Премногу воопшто, но премалку на вистинското место со вистинските вештини. Затоа мислам дека процесот на систематизацијата на државната администрација е многу потребен – рече Голдстајн.


Манчевски: За сајбер-безбедноста соработката помеѓу јавниот и приватен сектор е важна


Скопје, 9 октомври, 2018 - 13:15 (META) 

Министерот за информатичко општество и администрација Дамјан Манчевски, денеска се обрати на отворањето на регионалната конференција на тема: „Сајбер безбедност: Соработка и размена на информации“, во организација на АЕК и Канцеларијата на ОБСЕ во Македонија.

„Сајбер-безбедноста не е само ИТ-тема. Од тука, за гарантирање на безбедноста соработката е клучна. Во наредниот период особено внимание ќе посветиме и на зајакнување на соработката помеѓу приватниот и јавниот сектор со подигнување на едно ново, партнерско ниво. Соработката со приватниот сектор ќе овозможи безбедна средина за размена на информации, истражување и развој. Обезбедувањето на безбедна инфраструктура за размена на информации ќе го стимулира претприемништвото, а со тоа ќе ја поддржи конкурентноста на сите домашни компании и ќе ги заштити нивните инвестиции“, заклучи министерот Манчевски.

Tим составен од стручни лица од МИОА, Министерството за одбрана и Министерството за внaтрешни работи, ја изработија Националната стратегијата за сajбер-безбедност 2018-2021.


Почнува расправата за новата стратегија за национална сајбер-безбедност


Скопје, 12 јуни, 2018 - 11:53 (META) 

Министерството за информатичко општество и администрација, Министерството за одбрана и Министерството за внатрешни работи заеднички изготвиле работна верзија на Националната стратегија за сајбер безбедност на Република Македонија. Расправата веќе почна по електронски пат, преку давање предлози, препораки и коментари на електронската адреса cyber_security@mioa.gov.mk, а утре ќе се одржи и првиот јавен настан од овој процес.

Во Клубот на пратениците во Скопје, со почеток во 10 часот, ќе се одржи првата јавна расправа на која ќе биде презентирана стратегијата. На настанот ќе бидат министерот за информатичко општество и  администрација, Дамјан Манчевски, министерката за одбрана, Радмила Шекеринска и министерот за внатрешни работи, Оливер Спасовски.

Во нацртот на 38 страници, се посочува дека е голема потребата од нов пристап кон сајбер-безбедноста, бидејќи постои огромна неподготвеност за справување со сајбер-заканите и кај граѓаните и кај фирмите, а заканите се сè побројни. Наспроти тоа, има недостиг на експерти и огромен проток на информации кои излегуваат од граѓаните или фирмите или доаѓаат до нив, и затоа стратегијата предвидува значително зголемување на капацитетите за заштита на податоците од лица и други субјекти со криминални намери со користење државни пари за развивање соодветна одбрана.

Според стратегијата, во првиот квартал на 2017 година, 73,6 отсто од домаќинствата имале пристап до интернет, а кај фирмите со 10 или повеќе вработени таа бројка била 91,2 отсто. Тоа наметнува потреба од подобро запознавање на корисниците со мерките на заштита, посебно во фирмите, од кои дел извршуваат работи за државата, па ризиците што ги имаат тие фирми значат и ризици од загрозување на податоци на државата. Исто така, се позастапен е и Интернет на нештата, односно поврзување на најразлични уреди на интернет, коишто може да бидат нападнати и така да се загрози не само нивното функционирање, туку и безбедноста на нивните сопственици.

Стратегијата за сајбер-безбедност предвидува засилени меѓусекторски мерки за справување со заканите, преку пет мерки. Тоа се зголемување на сајбер отпорноста и зголемување на сајбер-капацитетите, посодветна борба со сајбер-криминалот, потоа засилување на сајбер-одбраната и поголема соработка на институциите.

Исто така, предвидено е формирање на Национален совет за сајбер-безбедност и, како самостоен орган, Тело со оперативни капацитети за  сајбер-безбедност.


Веб-страницата на МИОА пристапна и за лицата со посебни потреби


Скопје, 7 јуни, 2018 - 11:22 (META) 

Министерството за информатичко општество и администрација од денеска e со нова веб-страница, која исполнува дел од стандардите за пристап до информации на лицата со попреченост.

„На овој начин го подобруваме пристапот на граѓаните до сите информации поврзани со работата на министерството. Покрај подобрување на визуелниот изглед и лесниот пристап до податоци, тоа што е ново на оваа веб-страницата и е исполнување на дел од стандардите за пристап до информации на лицата со попреченост. За целосен пристап до сите информации објавени на веб-страницата за лицата со посебни потреби, во тек е имплементација и на останатите меѓународно прифатени стандарди за пристап за лица со попреченост. Содржините на новата веб страна на МИОА се преведени и на албански јазик, и паралелно сите содржини ќе се објавуваат и на македонски и на албански јазик“, информираат од таму.


Манчевски: Работиме на нова законска рамка за поголема сајбер безбедноста


Скопје, 2 април, 2018 - 11:59 (META) 

Работиме на нова законска рамка што ќе овозможи поголема безбедност на интернет мрежите, информираше денеска министерот за информатичко општество и технологија, Дамјан Манчевски на отворањето на работилницата за „Национална рамка и стратегија за сајбер безбедност и функционирање на национален CERT/CSIRT“.

Тој додаде дека сајбер-нападите претставуваат заедничка закана за сите за потрошувачите, државите, бизнисите, економиите, занаетите, граѓаните, и тн.

– Како што и порано, за време на војна се склучувале сојузи за борба против непријателот, така и ние мора да се здружиме заедно – рече Манчевски.

Во рамките на посебната соработка договорена помеѓу МИОА, Министерството за одбрана и Министерството за внатрешни работи, а со поддршка на Светска банка, беше направена проценка на зрелоста на капацитетите за сајбер безбедност во државата од страна на експерти од Глобалниот центар за капацитети во областа на информатичката безбедност на универзитетот Оксфорд.

На Дигиталниот саем кој ќе се одржи на 18 и 19 април, ќе биде презентирани извештајот од проценката, кој ќе овозможи објективно разбирање за областите кои треба да се подобрат и активностите кои треба да се преземат во таа насока.


Вкупно 139.009 вработени во јавниот сектор


Скопје, 30 март, 2018 - 12:58 (META) 

Во државната администрација, во локалната самоуправа, во јавните претпријатија, во акционерските друштва во државна сопственост вкупно се евидентирани 139.009 вработени. Без привремените вработувања и без вработените во акционерските друштва, има 128.722 вработени во 1.299 институции, соопшти министерот за информатичко општество и администрација, Дамјан Манчевски, на денешниот брифинг.

Иако не е целосно функционален Регистарот на вработените во јавниот сектор, за чие воспоставување во 2014 и 2015 година се дадени 2,15 милиони евра, Министерството за информатичко општество и администрација (МИОА), бројките ги добило со вкрстување на податоците од Управата за јавни приходи (УЈП), Агенцијата за вработување, агенциите за привремени вработувања и Фондот за здравствено осигурување.

Граф

Без АРМ, МВР и Агенцијата за разузнавање, бројката на вработените од државата и локалните власти изнесува 109.304, додека во акционерските друштва во државна сопственост се вработени 8.633 луѓе од вкупната бројка.

Според податоците, од вкупната бројка од 139.009 луѓе кои добиваат плата од буџетот, 59,96 отсто се вработени на локално ниво, а 40,03 на централно. Од нив, 54 отсто се жени, а 46 отсто мажи.

По националност, 75,36 отсто се Македонци, 19,31 отсто Албанци, Турци се 1,84 отсто, Роми, 1,14 отсто. По образование, 42,45 се со факултетска диплома, со средно се 34,81 отсто, а со осново се 9,67 отст. Магистри се 4,45 отсто.

Најмногу вработени има во образованието – 32 отсто, во здравството се 18 отсто, а во државната управа се 15 отсто, додека во локалната власт се 5 отсто.

– Ова е првпат да се објави вкупната бројка на вработени во јавниот сектор, вклучително и оние привремено вработени и вработените во акционерските друштва во државна сопственост.  Притоа, со привремени вработувања сега се 1.624 луѓе, за разлика од април 2017 година, кога биле 2.064 – рече Манчевски.
Граф4

Тој и државниот секретар во МИОА, Јахи Јахија објаснија дека се очекува наскоро да профункционира целосно Регистарот на вработените во јавниот сектор, а според нив, доаѓањето до овие бројки не било лесно, затоа што голем број од корисниците на буџетот или не знаеле како да внесат податоци или пак не го сметале тоа за важно.

Како што рече Јахија, новите мерки да се ограничи исплаќањето на платата доколку не се достават податоците бил клучниот потег за да се дојде до податоците.

– Со молење, инспекции, стимулација и обука, притискавме да се достават податоци. Решението да се ограничи исплатата на платата е екстремно решение, но е единствениот начин – рече Јахија.

Граф2ж3

Според Манчевски, од стапувањето на новата власт, нема партиски вработувања и сега се вработува само според потребите на институциите, а не според потребите на партијата, поради што во текот на владеењето на ВМРО-ДПМНЕ се правеле и нелогични систематизации на работните места.

– Во текот на претходната власт, членовите на тогашните опозициски партии не смееја да помислат дека ќе бидат примени во јавниот сектор. За разлика од тогаш, сега шансите им се отворени да конкурираат, но истовремено се вработуваат и луѓе од ВМРО-ДПМНЕ – рече министерот.

Манчевски најави и дека во мај и јуни треба да почне создавањето на Централниот регистар на население, кој би профункционирал до крајот на годината.


Манчевски: Дигитализацијата во ИКТ-сферата е еден од приоритетите на ЕK


Скопје, 16 март, 2018 - 15:53 (META) 

Министерот за информатичко општество и администрација, Дамјан Манчевски, на настанот „Самит на малите земји – нови трендови во бизнисот“, ја отвори панел сесијата „Што ќе донесе дигиталната трансформација во секојдневието на бизнисот“.

Манчевски се осврна на дигиталната трансформација, на која што работи МИОА, со поддршка од бизнис-заедницата, регионот и Европската комисија.

– Дигитализацијата и реформите во ИКТ-сферата во Западен Балкан во моментот е еден од приоритетите на Европската комисија. Со воспоставување на единствен дигитален пазар од сите шест земји на Западен Балкан, се очекува да придонесе во развој на дигиталнотот општество, но и економски раст во регионот, зголемување на иновациите, системски реформи во администрацијата и институциите. Тоа ќе придонесе и до зголемување и подобрување на квалитет на животот на граѓаните во сите сфери – истакна Манчевски.

Тој додаде дека со цел да се постигне целосна дигиталната трансформација во моментов се работи на повеќе проекти од оваа област како што се  е-услуги за граѓаните, креирање на национален портал, портал за отворени податоци, отворање на технолошки парк, стратегија за широкопојасен интернет.

– Во креирање на тековни активности, но и идни планови на МИОА, активно се вклучени  ИКТ-компаниите. За целосна дигитална трансформација, и доближување на Македонија до Европската унија, потребни се не само јаки институции, туку и јак приватен сектор, силни компании кои заедно со нас ќе работат на ова поле – додаде Манчевски.