!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

„Повардарие“ ќе го исплати долгот кон лозарите до крајот на годината


Неготино, 1 ноември, 2017 - 14:18 (META) 

Винарската визба „Повардарие“ целосно ќе го исплати долгот за откупеното грозје кон лозарите до крајот на оваа година. Тоа е заклучено на денешниот состанок на лозарите со менаџментот на винарската визба, кој се одржа во Неготино, во присуство на претставници од Министерството за земјоделство, шумарство и водостопанство и на новиот градоначалник на Неготино, Тони Делков.  Средбата беше организирана од министерството.

Раководството на винарската визба уверило дека комплетно ќе бидат расчистени долговите кон лозарите за преземеното грозје за 2014, 2015 и за 2016 година, велејќи дека парите, околу еден милион евра, ќе бидат исплатени од продажбата во странство на резервите вино. Дека во визбата има доволно резерви вино, потврдиле и од Државниот инспекторат за земјоделство.

Министерството внимателно ќе ја следи состојбата со исплатите на лозарите, односно на 15 дена ќе проверува колку вино е извезено, колку пари се наплатени за тоа и дали им се префрлаат на лозарите.


Запленет тутун „вирџинија“ забранет за производство


Битола, 3 септември, 2017 - 11:55 (META) 

СВР Битола и Државниот инспекторат за земјоделство во координација со Министерството за земјоделство пронашле насади и обработка на тутун од типот „вирџинија“, кои не се пријавени и немаат договор со регистрираните откупувачи, а согласно Законот за тутун не смеат да се произведуваат.

Биле извршени претреси кај пет физички лица и едно правно лице од село Могила и биле одземени 24.826 килограми тутун „вирџинија“, а биле пронајдени шест ниви со насади од тутунот.

Државниот инспекторат за земјоделство петте физички лица ги казнил по 1.000 евра, а со 20.000 евра го казнил правното лице. Државниот инспекторат за земјоделство издал и три решенија за разорување ниви, а во постапка се издавање на уште три решенија за разорување ниви насадени со тутун од типот „вирџинија“.


Николовски: Ќе реагираме на поскапувањето на контролите за увоз на храна во Хрватска


Скопје, 3 август, 2017 - 16:45 (META) 

Со новиот правилник за увоз на овошје и на зеленчук што Хрватска го донесе на 15 јули, значително се зголемуваат трошоците при извоз на македонското свежо овошје и зеленчук, што ќе влијае врз зголемување на крајната цена на производите.

Оттука, министерот за земјоделство, шумарство и водостопанство, Љупчо Николовски, информираше дека Министерството за земјоделство, шумарство и водостопанство ќе достави нота до хрватското министерство за земјоделство и до Европската комисија.

– Со овој правилник трошоците за контрола на квалитет на овошјето и на зеленчукот се зголемуваат од досегашните 90 куни (12 евра) по производ, на 2.000 куни (274 евра) по производ. Со такви зголемени цени, македонското овошје и зеленчук ќе бидат неконкурентни на пазарот. Сметаме дека со носењето на овој правилник се воведува нетарифна бариера од страна на Република Хрватска за заштита на хрватскиот пазар од увоз на свежо овошје и зеленчук – рече Николовски.

Тој најави дека в понеделник надлежните министри на Република Македонија, Република Србија и на Босна и Херцеговина ќе се сретнат во Сараево за да изградат заеднички став и за заедничка реакција до хрватската страна.

– Република Хрватска, како земја членка на Европската Унија, треба да ја почитува Спогодбата за стабилизација и асоцијација (ССА) која Република Македонија ја има склучено со Европската Унија. Во согласност со Спогодбата, односно член 27, точка 1, укинати се царинските давачки и другите давачки што имаат ист ефект за увозот на земјоделските производи со потекло од Република Македонија – посочи македонскиот министер за земјоделство, шумарство и водостопанство.

Република Хрватска е значаен трговски партнер на Република Македонија во трговијата со земјоделско-прехранбени производи, односно втора од земјите членки на Европската Унија, бидејќи Македонија таму извезува земјоделско-прехранбени производи од околу 36 милиони евра годишно. Во однос на увозот од Хрватска, тој изнесува 37 милиони евра.

Вредноста на извозот на овошје и на зеленчук од Македонија во Хрватска е околу 5 милиони евра годишно. Најмногу се извезуваат свежи пиперки, зелка, домати, краставици, трпезно грозје и лубеници.

Од Република Хрватска најмногу се увезуваат месо од живина, шеќер, чоколади, цигари, сирење, конзервирана риба и други производи.


ВМРО-ДПМНЕ бара итна владина седница за обесштетување на овоштарите


Скопје, 16 јуни, 2017 - 15:23 (META) 

„Министерот на СДС, Љупчо Николовски, со денови се крие и ги одбегнува овоштарите кои се соочуваат со реални проблеми. Николовски го нема да се појави во Росоман каде што состојбата со производството на праски е алармантна, исто како и со речиси целокупното овоштарство во Македонија“, обвини денеска Ромео Тренов на прес-конференција во седиштето на ВМРО-ДПМНЕ.

– Владата на СДС покажа колку не го цени земјоделството и трудот на земјоделците. Владата на СДС покажа дека е глува на апелите за помош кои доаѓаа директно од земјоделците и од нивните здруженија. Оттука бараме министерот за земјоделство Љупчо Николовски да побара итна и вонредна владина седница со точка на дневен ред – стопроцентно обесштетување на овоштарите чиј род настрада од временските непогоди и дополнителна поддршка за да може да ја преживеат годината – рече Тренов.


Албанија го забрани увозот на живина од ЕУ поради птичји грип


Тирана, 23 ноември, 2016 - 20:22 (META) 

Албанија привремено го забрани увозот на живина од земјите на Европска Унија кои пријавиле случаи на птичји грип.

Министерството за земјоделство на Албанија денеска забрани увоз на пилешко месо од Австрија, Хрватска, Данска, Германија, Унгарија, Полска, Холандија и од Швајцарија, односно од земјите кои пријавиле слуачи на птици заразени со вирусот птичји грип.

Албанија, но и други европски земји, имаа епидемија на птичји грип пред десет години.


Николовски: Во Платежната агенција недостига софтвер од 778.000 евра


Скопје, 4 август, 2016 - 14:03 (META) 

Ревизорскиот извештај открива дека софтвер од 778.000 евра, за потребите на Платежната агенција, не е сметководствено евидентиран! Ова значи дека на повидок е нов скандал со одлевање стотици илјади евра народни пари за софтвери во Министерството за земјоделство и во Агенцијата за земјоделство и рурален развој, обвини денеска на прес-конференција Љупчо Николовски од СДСМ.

– Граѓаните слушнаа од ревизорскиот извештај дека биле вршени исплати на лица за кои нема решенија за субвенции или, обратно, токму поради неусогласеност на двата сектора во Агенцијата задолжени за тоа. И двата сектора имаат софтверски апликации, но нема интегрираност на податоците! А и покрај тоа што постои софтвер за контрола на терен по исплатите, според ревизорот, тој не функционира. Постои уште еден софтвер, во Министерството за земјоделство, преку кој треба да се дефинира пазарната цена на земјоделските производи, но и тој софтвер не функционира! Исто така, постои софтвер за следење на наплатата за закуп на земјиште, но според ревизорот, не се евидентирани голем дел од склучените договори за земјоделско земјиште – рече Николовски.

Тој додаде дека одговорност ќе има за сите злоупотреби на штета на граѓаните.


МЗШВ: Николовски шири клевети, манипулации и дезинформации


Скопје, 18 јули, 2016 - 10:51 (META) 

Со вчерашната изјава, Љупчо Николовски од СДСМ уште еднаш покажа дека нема никакви конструктивни идеи, туку воден од желбата постојано да биде присутен во медиумите, само шири клевети, манипулации и дезинформации, надевајќи се притоа на политички поени, се вели во реакцијата на Министерството за земјоделство, шумарство и водостопанство (МЗШВ) на вчерашната прес-конференција на Николовски.

„Уште еднаш ќе потсетиме дека покрај законската постапка која е спроведена во целост, министерот Михаил Цветков пред исплатата на средствата дополнително формираше комисија за проверка на изведени работи поврзани со чистењето на каналите за одводнување и за наводнување, во чиј состав, покрај членови од МЗШВ, има и членови од други надлежни државни институции. Дополнително формираната комисија беше на терен, состави писмен извештај поткрепен со фотодокументација, со што се потврдува дека сите економски оператори ги извршиле активностите во согласност со условите во договорите“, се вели во соопштението министерството.

Од МЗШВ велат дека Платежната агенција работи во согласност со важечките законски и подзаконски прописи и акти, што е потврдено од сите досегашни ревизии извршени од Европската комисија, надворешните независни ревизии, како и од државниот ревизор.


Николовски: Груевски бега од фер избори за да ја спаси сопствената кожа


Скопје, 11 април, 2016 - 12:48 (META) 

Љупчо Николовски, член на извршниот одбор на СДСМ и дополнителен заменик-министер за земјоделство во оставка, денеска на прес-конференција рече дека лидерот на ВМРО-ДПМНЕ, Никола Груевски, во обид да ја спаси сопствената кожа бега од фер и демократски избори и постојано го прекршува Договорот од Пржино.

Николовски вели дека криминалот на Груевски преку злоупотреби во државните институции е целосно потврден.

– Злоупотреби со земјоделските субвенции, наместени тендери, корупција, незаконски и фалсификувани договори, задоволување на бизнис-партнерите блиски до власта, а на штета на земјоделците, судир на интереси, непотизам, узурпирање на земјата на вистинските земјоделци и злоупотреба на ресурсите на министерството за земјделство. Ова е она што го откривме во овие четири месеци откако опозицијата влезе во оваа институција. Од овие причини Груевски не сака да има фер и демократски избори, затоа избирачкиот список не е прочистен и затоа нема реформи во медиумите. Лажните и измислени анкети што ги пласира власта нема да ја променат реалноста – изјави Николовски.

Тој потсети на сите случаи во кои незаконски им се помагало на „луѓе блиски до власта“. Дополнителниот заменик-министер рече дека за криминалот што го откриле во министреството за земјоделство следува одговорност и дека никој не може да им помогне на Никола Груевски и на неговите пулени.


Оризопроизводителите од Кочанско денеска повторно на протест


Кочани, 29 март, 2016 - 11:13 (META) 

Производителите на ориз од Кочанско денеска повторно ќе протестираат, незадоволни од откупната цената на оризот. Тие еден час, односно од 11 до 12 часот ќе ја блокираат едната коловозна лента на патот Штип – Кочани, кај селото Облешево.

Производителите на ориз, незадоволни од понудената, бараат цена од 50 денари за бел ориз и 25 денари за оризова арпа, како што претходно ветило Министерството за земјоделство, шумарство и водостопанство.

Јордан Манасиев од Здружението на производителите на ориз „Бело злато“ вели дека во петокот неуспешно завршиле двата одделни состаноци со ресорниот министер, Михаил Цветков.

– Делегација на производителите на ориз беа кај министерот, а таму биле и откупувачите, ама на одделен состанок. Откупувачите понудиле 40 денари за најквалитетниот бел ориз и 15 денари за арпа, што е неприфатливо за нас. Ако не интервенира министерството во откупот, ќе го радикализираме протестот – рече Манасиев.

Истовремено со претходниот протест кој се одржа пред десетина дена во Облешево, имаше и контра -протест на оризопроизводители, кои сметаат дека субвенциите и политиката на актуелната влада се доволно стимулативни. Притоа дојде и до тензии, но сè се заврши со вербални препукувања.

Манасиев вели дека и денеска не е исклучено да се појават контра – демонстранти.

– Очекуваме пак да има контра-протест. Навикнавме на такви работи од власта. Тие оризопроизводители можеби имаат наредба од власта и ние тука не можеме ништо. Ако решиле нека излезат на контра-протест – рече Манасиев.


Николовски: Пратеници од ВМРО-ДПМНЕ ќарувале земјоделски субвенции


Скопје, 4 декември, 2015 - 16:23 (META) 

Илија Србиновски, поранешен пратеник на ВМРО-ДПМНЕ и актуелен раководител на подрачната единица на Министерството за земјоделство, шумарство и водостопанство во Битола, скандалозно ја злоупотребува државната функција, обвини Љупчо Николовски, дополнителниот заменик-министер за земјоделство, шумарство и водостопанство, назначен од редовите на СДСМ.

– Семјството Србиновски буквално го има „освоено“ министерството. Таткото Илија, синот и снаата се вработени во оваа институција, а  сопругата Слободанка, која е сопственик на фирмата  ИЗ „Десил“, добива 45 хектари државна земјоделска површина под концесија. Случајот на Илија Србиновски е класичен пример на злоупотреба на државните институции во партиски цели пред избори. Ете како Никола Груевски ги наградува своите први јуришници: преку вработување, високи субвенции и државна земјоделска земја под концесија, за да може преку нив да ги уценува земјоделците. Досега овие функционери не се гонеа кога прекршуваат закони и не одговараат кривично за сторените дела –  вели Николовски.

Тој додава и дека има и документи за овие злоупотреби и за кршење на Законот за земјоделско земјиште.

– Дрскоста на раководителот на подрачната единица на МЗШВ во Битола, Илија Србиновски, само ја покажува моќта што му ја даваат претпоставените, наместо да го санкционираат. Последните поплави во Пелагониско, Србиновски ги има искористено за злоупотреба на буџетските средства наменети за исплата на штети. Според процената на комисијата на Општина Новаци, проценетата штета за исплата на фирмата на сопругата на Србиновски е 1.118.000 денари. Но, скандалозното е што според записникот од инспекторите на терен, овие површини се поплавени намерно, поради уривање заштитен насип на каналот од страна на Србиновски. Освен неговите површини за кои има договор, тој узурпирал и други 10 хектари државна земјоделска земја. Дополнително испитуваме колку точно земја обработува семејството Србиновски, колку субвенции има добиено и што сè има искористено од програмите на владата – вели Николоски.