!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Десетина затруени лица во болница, јаделе во „Сендвичара 7“ во Карпош


Скопје, 18 август, 2017 - 20:43 (META) 

Десетина лица се во болница откако, како што изјавиле се затруле со храна од познатата скопска сендвичарница „Сендвичара 7“ во Карпош, информира Министерството за здравство

„До завршување на вонредниот надзор бројката на лица со стомачни тегоби, проливи, гадење, повраќање и висока температура 39-40 степени изнесува: 9 лица згрижени на ЈЗУ УК за инфективни болести и фебрилни состојби, од кои 5 хоспитализирани и 4 амбулантски лекувани, а на инфективното одделение во ЈЗУ ГОБ „8-ми Септември” во моментот во дневна болница беа згрижени уште тројца пациенти“, стои во соопштението.

Иако во објектот се врши завршна подготовка на храна, која се доставува од централната кујна на синџирот сендвичарници, извршена е вонредна контрола и во локалот и и земени се брисеви од вработените и работните средини, како и мостри храна.

Наложена е вонредна дезинфекција, а објектот е времено затворен.


Тројца нови директори во здравството, разрешени голем број економски менаџери


Скопје, 10 август, 2017 - 15:45 (META) 

Министерството за здравство информираше дека се именувани тројца нови директори на здравствени установи. Нов директор на Геронтолошкиот завод е Салија Љатиф, на Институтот за белодробни заболувања кај децата Козле е Ангелчо Андоновски, а Филип Гучев е новиот прв човек на Универзитетската клиника за ревматологија. На првата функција во Психијатриската болница Бардовци и понатаму ќе биде досегашниот директор, Ќамиљ Ковачи.

Исто така, разрешени се економските директори во Клиничката болница Тетово, во Клиничката болница Штип и на универзитетските клиники за радиотерапија и онкологија, за кардиологија, за кардиохирургија, за клиничка биохемија, за неврохирургија, за дигестивна хирургија, за пластична хирургија, за торакална и васкуларна хирургија, за гастроентерохепатологија и на Универзитетска клиника ТОАРИЛУЦ.

Опозициската ВМРО-ДПМНЕ на прес-конференција обвини дека СДСМ и министерот Таравари преку именувањето директори на клиники прават фамилијарни бизнис-шеми.


Серија нови именувања на директори на клиники и на здравствени домови


Скопје, 4 август, 2017 - 13:55 (META) 

Министерството за здравство денеска ги соопшти имињата на новоназначените директори на клиники и на здравствени домови. Промените на директорските места почнаа кон крајот на јуни, речиси еден месец по стапувањето на должност на новиот министер за здравство, Арбен Таравари од Алијанса за Албанците, еден од трите клучни партнери во владината коалиција.

Нов директор на Институтот за трансфузиона медицина е Кочо Димитровски, а на чело на Клиничка болница Битола ќе застане Зоран Лазаров. Нови директори на општите болници во Кавадарци и во Велес се Диме Коцев и Димитар Стровјански.  Прв човек на Општа болница Гостивар стана Гојарт Сулејмани.

Во клиничкиот центар „Мајка Тереза“ во Скопје се именувани девет нови директори на клиники. На Дигестивна хирургија прв човек ќе биде Зоран Караџов, а во фотелјата на Детска клиника долгогодишната директорка Аспазија Софијанова ќе биде наследена од Катерина Ставриќ. Прв човек на Клиниката за психијатрија ќе биде Стојан Бајрактаров, на таа за неврохирургија – Владимир Рендевски, а на Максилофацијална хирургија – Славе Наумовски. На чело на Клиниката за пулмологија и алергологија застанува Дејан Докиќ, кој беше обвинет за примање мито, а на местото на Смиља Туџарова, долгогодишната директорка на Клиниката за пластична и реконструктивна хирургија доаѓа Софија Пејкова. Прв човек на Клиниката за торакална и васкуларна хирургија ќе биде Неџати Јакупи, хирург и поранешен министер за животна средина. На челото на Клиниката за  уво, нос и грло доаѓа Јане Нетковски

Маја Манолева е новата директорка на Заводот за физикална медицина и за рехабилитација – Скопје.

Од денеска директор на  Здравствен дом Битола е Весна Спировска, на Здравствен дом Штип  Снежана Трајковска, на Здравствен дом Крива Паланка директор ќе биде Бранко Стаменковски, во Кратово – Љупчо Бојаџиев, во Виница – Венцо Вијунов, во Пробиштип – Гоце Неделковски, а во Струмица – Љубица Митева.

За прв човек на Заводот за слух, говор и глас во Битола е назначена Дивна Најдовска.

Министерот за здравство, исто така, го разрешил економскиот директор на Клиниката за гастроентерохепатологија.


Министерството за здравство со препораки до граѓаните поради портокаловата фаза


Скопје, 3 август, 2017 - 14:55 (META) 

Министерството за здравство, во согласност со метео-алармот од Управата за хидрометеоролошки работи, соопшти дека почнувајќи од утре и во текот на викендот територијата на целата земја ќе биде зафатена со висока температура од портокалова фаза. Министерството препорачува во следните три дена (од петок до недела) од работни обврски да бидат ослободени бремените жени и лицата над 60-годишна возраст, додека сите други лица при појава на каков било здравствен проблем веднаш да се јават кај својот матичен лекар.

На работодавците им се препорачува да го реорганизираат работното време и да не се изведуваат активности на отворено во периодот од 11 до 17 часот, како и да обезбедат за своите вработени одмор под сенка и доволно течности на секои два часа.

Министерството за здравство препорачува да не се одржуваат спортски активности на отворено во периодот од 11 до 17 часот, а особено се препорачува на детските градинки да не ги изнесуваат децата на отворено и да не практикуваат физичка активност во истиот период.

Во следните три дена Министерство за труд и социјална политика со поддршка од Црвениот крст на Македонија ќе спроведува интензивни активности за згрижување на бездомните лица.

Министерството за здравство препорачува и граѓаните да ги почитуваат општите препораки за заштита од високата температура, како што се: заштита од директна сончева изложеност, избегнување престој на отворено во периодот од 11 до 17 часот, носење светла и лесна облека, консумирање лесна храна и течности и хигиенски начин на подготовка на храната, односно храната да се подготвува и да се консумира со повисок степен на внимание.

На хронично болните лица се препорачува редовно земање на препишаната терапија, а при појава на каков било здравствен проблем да се побара помош од матичен лекар.


Директорите на 33 клиники се сменети поради реваншизам и омраза, смета ВМРО-ДПМНЕ


Скопје, 31 јули, 2017 - 19:45 (META) 

Последната одлука за која денеска дозна јавноста со која биле разрешени 33 директори на клиники, болници и на здравствени домови е удар врз целокупниот здравствен систем во државата, изјави денеска Марија Андоновска од ВМРО-ДПМНЕ.

– Директорите се разрешени без основа и целосно спротивно на законот, што говори дека тоа не е направено врз основа на некој вредносен систем или какви било критериуми, туку само врз основа на реваншизам и на слепа омраза од власта. Оваа одлука ќе предизвика дисторзија на целиот здравствен систем и ќе доведе до намалување на капацитетите на овие здравствени установи, а со тоа и директна штета на граѓаните. Несомнено Министерството за здравство се претвора во министерство за скандали, негрижа и за неодговорност. Откако го разрешија директорот на Клиниката за кардиологија, докажаниот и реномиран експерт од таа област, Сашко Кедев, откако им се случи епидемија од најслаб облик хеморагична треска со две човечки жртви, за само 50 дена гледаме уште еден огромен скандал од ова министерство – вели Андоновска.

Според неа, разрешувањето на директорите е непрофесионален и неодговорен пристап во здравството, кој го урива целиот концепт на здравствена заштита и на грижа за здравјето и за животите на граѓаните.


Чакаровски: Денеска 33 здравствени установи ќе добијат нови директори


Скопје, 31 јули, 2017 - 16:52 (META) 

Министерството за здравство денеска ќе назначи нови директори на 33 здравствени институции, промените ќе продолжат утре, а до петок ќе се направат сите измени на директорските места во институциите под контрола на Министерството за здравство, порача денеска заменик-министерот за здравство Гоце Чакаровски.

-Ги работиме документите. Денес ќе назначиме директори на 33 здравствени институции. Утре ќе продолжиме со другите, до петок мислам дека ќе ги направиме сите промени – рече Чакаровски на трибината по повод Светска недела на доење.


Извршена е дератизација и дезинфекција во Симница по двата смртни случаи


Скопје, 30 јули, 2017 - 18:26 (META) 

Комисијата за заразни болести при Министерството за здравство на 26 јули одржала итна седница поради двата смртни случаи од вирусна хеморагична треска, соопшти денеска Министерството за здравство.

Во соопштението се наведува дека стручен тим извршил епидемиолошки увид, анкета на домаќинствата на починатите, притоа е извршена дезинфекција и дератизација во домовите и во околината на починатите лица, земени се мостри од водата за пиење, извршена е едукација за лични превентивни мерки и совет за јавување на лекар при појава на први симптоми на болест.

Од анкетата со семејствата, добиена е информација дека починатите и поголем дел од семејството работеле и често престојувале на свое приватно бачило. Експертски тим излегол на терен и го посетиле бачилото во месноста наречена Буковиќ, во близина на преминот Стража.

„На бачилото не се затекнати ниту лица ниту овци. Извршена е дезинфекција во затворениот објект, во отворениот објект и во неговата непосредна околина како во близина на магацинот. Исто така, дезинфекција беше направена и на пошироката околина во самиот ограден простор и околу него“, се вели во соопштението од Министерството за здравство.

Од министерството соопштуваат дека Институтот за јавно здравје подготвил брошура за здравствените работници, но и за општата популација за едукација во врска со вирусните хеморагични грозници. Брошурата е објавена на веб-страницата на ИЈЗ, а е доставена и до центрите за јавно здравје за споделување со матични лекари и со други здравствени работници.


Разрешени директорите на клиничките болници во Штип и во Тетово


Скопје, 17 јули, 2017 - 17:38 (META) 

Министерството за здравство донесе одлука за разрешување на медицинскиот директор на Клиничката болница во Штип, Александар Стојановски, како и за разрешување на економскиот директор во Клиничката болница во Тетово, Зоран Станковски.

„По извршената инспекција во Клиничката болница во Штип, воочени се одредени нерегуларности во работењето, неетичко однесување од дел од вработените, а воедно е утврдено дека хигиената во установата не е на задоволително ниво. Врз основа на констатираното, донесена е одлука за разрешување на медицинскиот директор на Клиничката болница во Штип и за нов директор е именуван доктор Ален Ѓорѓиев. Исто така, за нов директор на Центарот за јавно здравје во Штип е именувана доктор Марија Димитрова, а разрешен е и економскиот директор во Клиничката болница во Тетово Зоран Станковски“, информираат од Министерството за здравство.

Разрешувањата на клиниките вчера ги најави министерот за здравство Арбен Таравари и рече дека ќе бидат обелоденети и наодите на инспекциите во некои болници, а тогаш ќе има и казни.

– Ќе има казни за менаџери, за вработени, но тоа ќе биде како што ќе каже инспекторатот. Лошо е во Клиниката за гинекологија, а ни во штипската болница не е подобро, најдени се некои работи што не треба да ги има во болница. Засега е направена ревизија само на Министерството за здравство, а ќе направиме ревизии на клиниките кога ќе именуваме нови директори. Именувања ќе правиме и оваа недела, но полека, не брзаме, 70-80 отсто од клиниките во наредните недели ќе имаат нови директори – рече Таравари.


МТСП: Работодавците да ги почитуваат препораките за заштита од топлото време


Скопје, 1 јули, 2017 - 10:26 (META) 

Министерството за труд и социјална политика (МТСП) денеска ги повика работодавците да ги почитуваат и да се придржуваат до препораките за заштита на работниците во деновите со неповолни временски услови за работа, односно од топлотниот бран кој ја зафати земјава.

На работодавците, како што стои во соопштението од МТСП, им се препорачува да го реорганизираат работното време во насока на избегнување активности на отворено во периодот од 11 до 17 часот.

Од Министерството информираат дека Државниот инспекторат за труд, во текот на овој викенд ќе работи со дежурни екипи од 30 инспектори. Прекршувањата на препораките може да се пријават на телефонскиот број 075 402 856, додаваат од МТСП.

„Потсетуваме дека согласно акцискиот план за превенирање на последиците од топлотни бранови врз населението во Република Македонија, а со цел заштита на здравјето на луѓето, се препорачува од работни обврски да бидат ослободени бремените жени и хронично болните лица на возраст над 60 години“, стои во соопштението од Министерството за труд и социјална политика.

Министерството за здравство, исто така, препорачува да не се одржуваат спортски активности на отворено во периодот од 11 до 17 часот, а особено се препорачува на установите за згрижување на деца (детските градинки) да не ги изнесуваат децата на отворено и да не практикуваат физичка активност во истиот период.


Во наредните три дена да се ослободат од работа бремените жени и хронично болните


Скопје, 28 јуни, 2017 - 16:45 (META) 

Поради информацијата дека во наредните три дена земјава ќе биде зафатена од многу висока температура од портокалова фаза, Министерството за здравство препорачува од работни обврски да бидат ослободени бремените жени и хронично болните лица на возраст над 60 години.

Министерството на работодавците им препорачува да го реорганизираат работното време во насока на избегнување активности на отворено во периодот од 11 до 17 часот. Тоа препорачува да не се одржуваат спортски активности на отворено во периодот од 11 до 17 часот, а особено се препорачува на установите за згрижување на децата (детски градинки) да не ги изнесуваат децата на отворено и да не практикуваат физичка активност во тој период.

„За граѓаните од целата држава потсетуваме дека е потребно да ги почитуваат општите препораки за заштита од високата температура, како што се: заштита од директна сончева изложеност, избегнување престој на отворено во периодот од 11 до 17 часот, носење светла и лесна облека, консумирање лесна храна и течности, хигиенски начин на подготовка на храната и редовно земање на терапијата кај хронично болните лица“, велат од Министерството.