Државата со кампањи ќе ги убедува родителите да вакцинираат


Скопје, 12 октомври, 2018 - 11:16 (META) 

Министерството за здравство, со кампањи ќе се бори против антиваксерите. Планирано е да се преземат низа активности со кои ќе се едуцираат родителите за важноста на вакцинацијата и потребата од имунизација.

За „Мета“, министерот за здравство, Венко Филипче вели дека е подготвена комуникациска и едукативна стратегија со која преку социјалните медиуми, градинките и училиштата, ќе се допре до родителите.

– Сакаме да им посочиме проверени и научно потврдени извори на информации во врска со имунизацијата. Преку општините и локалната самоуправа се планираат јавни дебати и трибини каде што сме спремни да одговориме на прашањата на родителите. Исклучително важна ни е соработката со медиумите и на тоа посветуваме големо внимание. Тие се нашиот партнер и сојузник во правилниот начин на информирање, достапноста на точни и проверени податоци и секако објективна критика ни е потребна. Само со едукација и презентирање на точни факти можеме да ги победиме анти-вакциналните кампањи и да го подигнеме опфатот на имунизација – вели Филипче.

Инаку, како што веќе е познато, а потсетува министерот, две постари вакцини се заменети со нови и современи.

– За сето ова да го овозможиме го зголемивме буџетот за имунизација за 70 отсто. Факт е дека последните две-три години опфатот постепено опаѓа, како резултат на антивакциналните кампањи, што е глобален проблем, а не само кај нас. Со овој опфат не се обезбедува колективен имунитет и можно е појава на претходно искоренети заболувања. Токму затоа, имунизацијата е еден од приоритетите на Министерството за здравство, имајќи предвид дека инвестицијата во превентивата има докажана клиничка, социјална и фармакоекономска оправданост – додава Филипче.


Филипче: Квалитетот на вакцините е загарантиран, вакцинирајте ги децата


Скопје, 9 октомври, 2018 - 12:57 (META) 

Вакцинацијата е тема која секогаш предизвикува дискусија во јавноста. Од една страна, се антиваксерите кои не вакцинираат своите деца главно поради недоверба во здравствениот систем, а од друга страна, се оние родители кои редовно вакцинираат.

Во услови кога има тренд на намалување на бројот на деца кои се вакцинираат, разговаравме со министерот за здравство Венко Филипче, кој во ова интервју за „Мета“ открива дали ќе ја промени политиката околу задолжителноста на имунизацијата, за квалитетот на вакцините, а упатува и препораки за родителите.

Според последните бројки на Институтот за јавно здравје, има намалување на бројот на вакцинирани деца.

Имате ли идеја како да ја промените ваквата слика?

Имунизацијата е значајна здравствена, социјална и економска придобивка. Вакцините нѐ штитат од тешки заразни заболувања, а со тоа се создава колективен имунитет и заштита од епидемии на целата заедница. Токму во насока на потенцирање на важноста на имунизацијата на глобално ниво, на Министерскиот форум на министрите за здравство (во февруари годинава) заедно со министрите од 12 земји на Југоисточна Европа (ЈИЕ) ја потпишавме изјавата за намери за важноста на имунизацијата, која претставува основа врз која се зајакнуваат и зголемуваат заедничките активности, потребата од јакнење на системот за имунизација, партнерството и соработката, како интегрален дел од здравствениот систем на земјите од ЈИЕ. Процесот на имунизација е интегрален дел од добриот и функционален здравствен систем и е во согласност со Акцискиот план за вакцинација во Европа 2015-2020, како и Програмата на СЗО 2020. Согласно Акцискиот план, приоритетни области за дејствување, во кои е вклучена и нашата држава се набавка на квалитетни вакцини, ефикасна контрола врз процесот на имунизација, пристапност до вакцините и континуирана промоција и едукација на бенефитите од вакцинацијата. Сакам да потенцирам дека еден од главните приоритети на Министерството за здравство е комплетно осовременување на Календарот за имунизација, со воведување нови вакцини, кои заштитуваат од стрептокока и од рота вируси, кои се причинители на тешки заболувања проследени со компликации кои најчесто се јавуваат кај малите деца до 5 годишна возраст. Новиот календар е комплетно усогласен со препораките на СЗО, во областа на имунизацијата. Дополнително, две постари вакцини ги менуваме со нови и современи. За сето ова да го овозможиме го зголемивме буџетот за имунизација за 70%. Факт е дека последните две-три години опфатот постепено опаѓа, како резултат на антивакциналните кампањи, што е глобален проблем, а не само кај нас. Со овој опфат не се обезбедува колективен имунитет и можно е појава на претходно искоренети заболувања. Токму затоа, имунизацијата е еден од приоритетите на Министерството за здравство, имајќи предвид дека инвестицијата во превентивата има докажана клиничка, социјална и фармакоекономска оправданост.

Што сакавте да кажете во политичката кампања од неодамна, кога рековте – Во ЕУ за најквалитетни вакцини за сите деца?

Во врска со креативата која беше објавена на мојот „Фејсбук“ профил, поврзана со поддршка на референдумот, конкретно со мојата желба за влез на Македонија во ЕУ, би сакал да појаснам дека флоскулата „Во ЕУ за најквалитетни вакцини за сите деца“ значи дека со влез во големото семејство здравствениот сектор ќе биде на истиот колосек како и државите од ЕУ. Можеби зборовите не беа најсреќно одбрани и искомбинирани на креативата. Одговорно тврдам дека вакцините во Македонија се со висок квалитет и за тоа не станува збор. Станува збор за следење на напредокот, развојот и квалитетот на живот кој го имаат државите – членки на ЕУ, зад кои ние, во овој момент, каскаме.

Дали Министерството за здравство ќе ја менува политиката околу задолжителноста на вакцинацијата?

Согласно законската регулатива континуираната вакцинација кај децата од 0-18 години е задолжителна. Опфат над 95 отсто може да создаде колективен имунитет и заштита на населението од појава на заразна болест во епидемиска форма. Право на секое дете е да биде заштитено и вакцинирано против тешки заразни заболувања, обврска на родителот е да му го овозможи тоа право, а грижа на заедницата е навремено обезбедување квалитетни и безбедни вакцини.

Што им порачувате на родителите, дали вакцините во Македонија се безбедни?

Во целост се гарантира за квалитетот на вакцините, затоа што истите се од реномирани производители од земји на Европска Унија (Франција, Белгија, Бугарија) одобрени производители од страна на СЗО кои ги исполнуваат сите потребни стандарди. Вакцините од производител до краен корисник – децата, се транспортираат, складираат и чуваат на соодветна температура од 2-8 Целзиусови степени. Секоја пратка се прима и проверува од страна на претставници од Министерство за здравство и Агенција за лекови, а Агенцијата за лекови по опсежните анализи издава одобрение за пуштање во промет. Да напоменам дека овие вакцини се употребуваат и во земјите каде се произведуваат.


Вакцините во Македонија се безбедни, нема место за паника, вели Филипче


Скопје, 23 август, 2018 - 15:34 (META) 

Во Македонија се внесуваат безбедни и проверени вакцини. Нема место за паника. Вакцините се европски и сигурни, рече министерот за здравство, Венко Филипче и истакна дека вакцинацијата е најдобрата инвестиција во здравјето.

Министерот рече дека во календарот за имунизација за 2019 година воведени се уште две вакцини со европски и светски квалитет.

-Моментално во потполност се гарантира за квалитетот на вакцините, затоа што истите се од реномирани производители од земји на Европската Унија – Франција, Белгија, Бугарија)одобрени производители од страна на СЗО кои ги исполнуваат сите потребни стандарди – рече Филипче.

Според него, загрижувачки е податокот дека во земјата паѓа опфатот со вакцинација за одредена болест.


Приватните специјализанти не добивале пари оти не биле испланирани во буџетот


Скопје, 15 август, 2018 - 16:08 (META) 

Министерството за здравство соопшти дека конечно се обезбедени парите од државата наменети за приватните специјализанти што поминале на конкурсот во јануари годинава. Од таму велат дека тие досега не добивале пари оти не биле предвидени во буџетот.

„Сите приватни специјализанти (92. кандидати) кои се стекнаа со правото да добијат месечен паричен надоместок на последниот конкурс за приватни специјализации не биле искалкулирани во буџетот донесен при крајот на 2017 година. Од тие причини стручните служби работеа подолго време од вообичаеното со цел да обезбедат буџетски средства за сите колеги-специјализанти да добиваат редовен месечен надоместок за нивниот труд и работа“, велат од Министерството.

Но, за да почне исплатата на парите, кои ќе бидат исплатени од периодот од јуни годинава понатаму, ќе се почека да завршат процедури помеѓу Фондот за здравствено осигурување (ФЗОМ) и клиниките на кои што се специјализантите.


Министерство за здравство распиша тендер за инсулин за две години


Скопје, 15 август, 2018 - 13:46 (META) 

Министерството за здравство соопшти дека денеска е почната постапката за јавна набавка на инсулин, глукагон, инсулински игли и ленти за мерење шеќер и инсулински пумпи со потрошен материјал, за периодот септември 2018 – септември 2020 година.

„Постапката и процедурите се соодветно испланирани, согласно бројот и потребите на пациентите и населението кое директно или индиректно ги користат именуваните медицински препрати, уреди и потрошни материјали“, соопштија од министерството.

Пред распишувањето на тендерите биле консултирани граѓанските здруженија, а бил вклучена и Националната комисија за дијабетес.

Од Здравство се пофалија дека првпат по шест години ќе се воведат нови инсулини и ампуларна терапија. Истовремено, уверуваат дека во сите инсулински аптеки ќе има доволно инсулин се до потпишувањето на договорите со веледрогериите што ќе победат на тендерите.


Филипче најави осум централни лаборатории за крв и работа за сите лаборанти


Скопје, 5 јуни, 2018 - 15:27 (META) 

Министерот за здравство, Венко Филипче, на прес-конференција во Владата го претстави новиот систем на функционирање на oсум централни лаборатории. Според министерот, новиот систем ќе значи подобра услуга за граѓаните.

– Вкупно ќе има осум централни лаборатории од кои две во Скопје, една на Клинички центар, другата во ГОБ „8 Септември“, по една во Куманово, Штип, Тетово, Охрид и Струга – објасни Филипче.

Министерот за здравство истакна дека со овој начин на функционирање на лабораториите ќе се заштедат неколку милиони евра. Тој рече и дека ќе се намали бројот на апарати за анализи на крв од сегашните 300 на 120 и ќе се намалат и потребните количества реагенси.

Вработените, по најавите за централизирана набавка на реагенси, реагираа за најавените промени, бидејќи стравуваат за своите работни места. Но, Филипче на прес-конференцијата во Владата рече дека ниту еден здравствен работник во лабораториите нема да биде отпуштен и дека и со новиот систем ќе има работа за сите.


Министерството за здравство воведува вонболничка постоперативна грижа


Скопје, 4 мај, 2018 - 13:09 (META) 

Министерството за здравство почнува со нова системска мерка за развој на вонболничка, односно домашна постоперативна грижа, информираше денеска на прес-конференција државниот секретар во министерството, Владимир Милошев.

Тој рече дека сите јавни здравствени установи каде што се вршат хируршки интервенции се опфатени со овој проект.

– Целта на оваа мерка е грижа за пациентите во периодот до првата закажана постоперативна контрола во болничката установа, која најчесто се закажува еден месец после хируршката интервенција –  истакна Милошев.

Здравствени работници телефонски ќе контактираат со пациентот еднаш дневно, во првите три дена од отпуштањето од болницата, а потоа еднаш во неделата се до закажаната прва контрола.

– Во овој период пациентот ќе може да се јави за секоја промена на неговата здравствена состојба на определената медицинска сестра за добивање медицински совет на телефоните, кои ќе бидат јавно достапни на веб-страната на Министерството за здравство – додаде Милошев.


Министерство за здравство преку комитет ќе се бори против смртноста на новороденчињата


Скопје, 20 април, 2018 - 8:57 (META) 

Во Министерството за здравство вчера се одржала конститутивна седница на новиот состав на Комитетот за безбедно мајчинство, информираат од институцијата. Нов претседател на комитетот е доц. д-р Ана Данева Маркова од Универзитетската клиника за гинекологија и акушерство.

Една од првите задачи на овој комитет ќе биде изготвување на анализа на актуелната ситуација во оваа област и подготовка на акционен план. Ова тело, кое го советува министерот за здравство, ќе треба да даде препораки и предлог – мерките за унапредување на здравјето на мајките и децата, со посебен фокус на намалување на новороденечка смртност.

Членови на комитетот се лица со медицинска експертиза и долгогодишно искуство во областа на гинекологијата, акушерството, неонатологијата, педијатријата и сродни дисциплини, а целта е да се обезбеди сеопфатен пристап кон решавање на проблемите и координација на предложените активности и мерки.


Девет заразени со морбили во Македонија, се препорачува вакцинирање


Скопје, 15 март, 2018 - 16:18 (META) 

Комисијата за заразни болести при Министерството за здравство денеска одржа редовна работна средба, со цел, согледување на состојбата со морбили во соседството и во европскиот регион, како и состојбата со морбили во државата.

Од таму информираат дека, во Македонија оваа година досега се регистрирани девет случаи со морбили, од кои само четири се епидемиолошки поврзани.

„Службите за имунизација при Здравствените домови да ги интензивираат активностите за проверка на евиденцијата и изнаоѓање невакцинирани или непотполно вакцинирани деца, со цел нивна вакцинација. Здравствените работници да обратат посебно внимание на исипните трески кај пациентите и доколку се посомневаат за морбили, веднаш да пријават до надлежните служби“, се дел од заклучоците на Комисијата.

Се препорачува, лицата кои патуваат во земји каде има активни епидемии на мали сипаници да го проверат својот вакцинален статус и доколку не се вакцинирани, некомплетно вакцинирани или немаат доказ за прележана болест, соодветно ќе се вакцинираат.

„Препорака до родителите е навремено да ги вакцинираат своите деца, пред се поради заштита на нивното здравје, како и заштита на здравјето на најблиските и на пошироката заедница“, се додава во соопштението.


Тамара почина чекајќи милост од власта


Скопје, 10 февруари, 2018 - 19:02 (META) 

Тамара Димовска, 10-годишното девојче од Велес што почина точно пред три години и покрај ветувањата за соодветен третман од страна на тогашниот министер Никола Тодоров и раководство на Фондот за здравство, стана симбол за здравствените политики на тогашната власт. Нејзината смрт додека чекаше операција во Турција беше повод за големи протести пред Министерството за здравство.

Чекајќи операција заради деформацијата на `рбетот –  во Турција, оти во Македонија не профункционира Спиналниот центар – Тамара почина во својот дом во Велес на 9 февруари 2015 година. Во тоа време тогашната власт на ВМРО-ДПМНЕ уште трошеше милиони евра на проектите од „Скопје 2014.

Сумата од 100.000 евра не изгледа дека била некаков проблем. Доказ за тоа е на пример само за колонадата пред Македонска опера и балет (МОБ), во тоа време на владеење на коалицијата ВМРО-ДПМНЕ и ДУИ, се потрошени, како што наведе Призма, 1,4 милиони евра – за спас на 14 Тамари.

Два и пол месеци пред тоа, во ноември 2014, граѓаните уште организираа акции за собирање пари за нејзиното лекување во странство. Една година претходно вградената шипка во нејзиниот рбет била отстранета оти била премала за тогашната висина. Граѓаните порачуваа дека се потребни 30.000 евра за соодветен зафат во Хрватска, а 100.000 евра за операција во Турција или во САД.

Но,  Тамара не ги доби потребните документи за лекување во странство, а Фондот и Министерството за здравство ја одолговлекуваа процедурата за нејзина операција.

Како што подоцна ќе се открие, имало злоупотреби на случајот на Тамара заради промоција на Спиналниот центар, односно таа не била испратена во странство на товар на Фондот за здравствено осигурување на Македонија (ФЗОМ) со цел да биде оперирана во новиот центар и така да се создаде публицитет за тој проект.

ФЗОМ на 8 октомври 2014 година испратил допис со кој препорачува пациентите што боледуваат од сколиоза, кифоза или кифосколиоза да не бидат упатувани на лекување во странство бидејќи „се работи за заболувања при кои не постои итност за оперативно лекување“.

Дописот бил испратен до директорот на Клиниката за трауматологија, ортопедски болести, анестезија, реанимација, интензивно лекување и ургентен центар, како и до раководителите на Клиниката за трауматологија, Клиниката за ортопедски болести, Клиниката за анестезија, реанимација и интензивно лекување и на Ургентниот центар. Ова известување било упатено и до првостепената и до второстепената лекарска комисија кои одлучувале за случаите

На 1 јуни лани, десетина минути пред Тодоров да му ја предаде функцијата на новиот министер, Арбен Таравари, кон него пукаше дедото на Тамара.