Ќе се укинува додатокот за трето дете, но само за новите случаи


Скопје, 8 ноември, 2018 - 16:18 (META) 

Министерството за труд и социјална политика со новиот предлог-закон, со кој треба да се измени Законот за заштита на децата, предвидува додаток за секое родено дете во семејството, а во иднина повеќе да не се исплаќа надомест за мајките на трето дете во период од 10 години, ако го родат повеќе од 10 месеци по стапувањето на сила на новиот закон.

Како што објаснуваат од министерството, сите мајки на трето и четврто дете кои досега стекнале право на родителски додаток, ќе добиваат месечен надомест сè до истекувањето на рокот прецизиран во сегашниот закон – 10 години, односно 15 години од раѓањето. Додаток за трето дете во период од 10 години ќе добиваат и мајките што ќе родат трета рожба најмногу 10 месеци откако ќе стапи на сила новиот закон, а потоа ќе се доделува  само еднократен надомест за бебето, односно 60.000 денари. За четврто дете не е предвиден еднократен надомест, додека за првородено бебе по стапувањето на новиот закон на сила ќе се доделуваат 5.000 денари, а за второ дете 20.000 денари.

Од Министерството велат дека иако постоечкиот закон имал за цел да го зголеми наталитетот, тоа не се случило.

„Додаток за трето дете беше наменет кон зголемувањето на наталитетот, но податоците покажуваат дека самата мерка нема никаков ефект врз наталитетот. Стапката на наталитет опаѓа, од 13,3 во 2001 година до 11,1 во 2016 година“, се вели во соопштението.

Од таму велат дека поддршката за семејствата со минимални приходи и за оние кои се корисници на социјална помош, во иднина ќе се остварува преку надоместоците за  детски и на образовен додаток, чија крајна цел е да се намали детската сиромаштија.

Дополнително, според Министерството, досегашната практика е неправедна, оти родителски додаток за трето и четврто дете добивале и семејства кои се во многу добра економска ситуација.


Царовска: Со препознавање на ризикот, може да се спречат убиства на жени од нивните партнери


Скопје, 26 октомври, 2018 - 13:24 (META) 

Убиствата на жените предизвикани од семејно насилство може да се спречат со навремено препознавање на ризикот, за што е потребна посветена меѓуинституционална работа. За таа цел, по ратификувањето на Истанбулската конвенција,  Владата почна со усогласување на законодавството, воведување на управување со случаи и отворање шелтер центри за лица жртви на семејно насилство.

Ова го изјави министерката за труд и социјална политика, Мила Царовска, која денеска присуствуваше на презентацијата на Анализата на случаи на фемициди – убиства на жени во Македонија, подготвена од Националната мрежа против насилство врз жените и семејно насилство, со поддршка од УНДП.

Министерот за внатрешни работи Оливер Спасовски рече дека семејното насилство, особено од аспект на насилството мотивирано од родова омраза, како проблем, е многу повеќе од статистички бројки.

-Наша обврска е да изградиме општество кое ќе ја штити жената како столб на семејството – рече тој.

Според анализата, 80 отсто од убиените жени во Македонија биле жртви на нивните интимни партнери или машки членови на семејството.

Во изминатата година и половина  Министерството за труд и социјална политика повторно ги активираше четирите регионални центри за лица жртви на семејно насилство во Скопје, Кочани, Битола и во Свети Николе, а ја прошири и дејноста на Центарот за лица жртви на трговија со луѓе и со жртви на сексуално насилство, каде што згрижувањето трае до 6 месеци.

Во соработка со граѓанскиот сектор, во функција се ставени Центар за лица жртви на семејно насилство, Кризен центар 24/48 часа и Национална мобилна СОС линија. Министерството инвестира и во објект каде ќе биде сместен Центар за советување на жртви на насилство во Општина Куманово. Исто така, отворени се центри за жртви на сексуално насилство во состав на здравствени установи во Куманово, Тетово и Скопје.


Вторник е неработен ден за граѓаните од муслиманската вероисповед


Скопје, 14 август, 2018 - 12:06 (META) 

Министерството за труд и социјална политика соопштува дека согласно со Законот за празниците, 21 август 2018 година (вторник), Курбан Бајрам, првиот ден на Курбан Бајрам е неработен ден за граѓаните од муслиманската вероисповед во Македонија.

Истовремено, Министерството за труд и социјална политика на граѓаните од муслиманската вероисповед во Република Македонија им го честита празникот Курбан Бајрам.


По инспекцијата во гевгелиската градинка, директорката ќе го решава случајот


Скопје, 7 август, 2018 - 14:56 (META) 

Министерството за труд и социјална политика (МТСП) соопшти дека по извршената инспекција во градинката „Детска Радост“ во Гевгелија, директорката на установата ќе треба да утврди дали има прекршување.

Министерството вчера испрати инспекција во градинката по видеото објавено на социјалните мрежи, кое беше пренесено во медиумите, а во кое, наводно воспитувачка, вика и ги навредува децата.

Од МТСП велат дека се земени изјави од вработените и директорката и таа е задолжена да ја утврди фактичката состојба, а доколку најде докази дека е сторен некаков прекршок, да поднесе иницијатива за покренување на дисциплинска постапка или пријава за сторено кривично дело.


Конечно почна со работа малиот групен дом за деца во Тимјаник


Неготино, 20 јули, 2018 - 14:18 (META) 

Официјално со работа денеска почна новиот мал групен дом во Тимјаник, неготинско, чие отворање на почетокот на јуни беше одложено поради противењето на жителите.

Сега тоа е минато и во домот од денеска ќе бидат сместени четири деца од Специјалниот завод Демир Капија. На отворањето на домот присуствуваа министерката за труд и социјална политика Мила Царовска,  постојаната претставничка на ОН во земјава Луиза Винтон, претставникот на УНИЦЕФ Бенџамин Перкс и градоначалникот на Неготино, Тони Делков.

– Недоразбирањата во Тимјаник се надминати, а децата се преселени во малиот групен дом. Никогаш не се сомневав во хуманоста на нашите граѓани. Жителите ни дадоа поддршка на она што го правиме. Верувам Тимјаник ќе биде и ќе остане симбол на хуманоста на нашето општество, а жителите ќе се гордеат со тоа – изјави министерката Царовска.

Во новиот мал групен дом децата ќе имаат 24 часовна поддршка од лични асистенти, специјализирани индивидуализирани програми за работа и дефектолошки третмани. Близината на училиштето и локалната заедница ќе им овозможи на овие деца полесно и побрзо да се вклопат во општеството.

-Со отворањето на малиот групен дом денес правиме нов чекор кон трансформација на големите институции и обезбедување семејна грижа за секое дете. Заедно со Владата и другите наши партнери секој ден сме се поблиску до остварувањето на заложбата на Владата за ставање крај на институционалната грижа за деца помали од три години до 2020 година – изјави Бенџамин Перкс, претставник на УНИЦЕФ во Македонија.


Царовска: Заедно со жителите одлучивме дека во Тимјаник ќе има мал групен дом


Скопје, 26 јуни, 2018 - 14:45 (META) 

Министерката за труд и социјална политика Мила Царовска вчера повторно ги посети Неготино и Тимјаник и заедно со градоначалникот на општина Неготино Тони Делков се сретнала со локалните жители, при што е постигната согласност да се надминат недоразбирањата и жителите на селото повеќе не се спротивставуваат на отворање мал групен дом  за деца со попреченост.

– Никогаш не се сомневав во хуманоста на нашите граѓани и верував дека првата несакана епизода е само недоразбирање.Драго ми е што овој пат имавме многу конструктивна дискусија и жителите дадоа поддршка на она што го правиме. Јас верувам дека Тимјаник ќе биде симбол на хуманоста на нашето општество, а жителите ќе се гордеат со тоа – рече министерката Царовска.

Тензијата се крена на 10 јуни, ден пред најавеното сместување на четири деца од Специјалниот завод Демир Капија во селото Тимјаник, кога жителите на селото најавија протест поради таквата одлука, а исто така и посочија дека приоритет е изградба на детска градинка.


Првиот ден на Рамазан Бајрам, 15 јуни, неработен за сите граѓани на Македонија


Скопје, 8 јуни, 2018 - 13:22 (META) 

Министерството за труд и социјална политика соопштува дека, согласно Законот за празниците, 15 јуни 2018 година (петок), првиот ден на Рамазан Бајрам, е неработен ден за сите граѓани на Република Македонија.

Министерството за труд и социјална политика на граѓаните од муслиманска вероисповед им го честита Рамазан Бајрам.


МТСП: Самохраните родители со ниски примања нема да плаќаат за градинка


Скопје, 20 март, 2018 - 12:57 (META) 

Министерството за труд и социјална политика (МТСП) информира дека од денеска сите самохрани родители кои имаат плата и месечни приходи во износ до минималната плата утврдена со закон, ќе бидат ослободени од плаќање на партиципацијата за сместување на дете во детска градинка.

Тоа е овозможено со измените на Правилникот за условите, критериумите и начинот на остварување на правото на партиципација во трошоците за згрижување, воспитание, одмор и рекреација на деца во јавните установи за деца. Измененетиот правилник стапува на сила денеска, со неговото објавување во Службен весник на Република Македонија.


МТСП ќе поднесе кривична пријава против 11 лица за случајот со малолетничката од „25 мај“


Скопје, 23 февруари, 2018 - 14:27 (META) 

Врз основа на записникот и извештајот од извршениот вонреден инспекциски надзор од страна на Социјалната инспекција, од Министерството за труд и социјална политика информираат дека до Основното јавно обвинителство ќе биде поднесена кривична пријава против одговорните лица во Центарот за социјална работа – Скопје за ,,несовесно работење во служба“, како и против стручни лица вработени во Центарот, за кривично дело „запуштање на малолетно лице“ и за „несовесно работење во служба“.

„Оваа пријава ќе биде покрената против сите 11 лица кои биле задолжени да постапуваат и преземаат службени дејствија по предметот на малолетната Р.И. во периодот од 2012 – 2017 година. Исто така, од страна на инспекторите се поднесени 12 иницијативи за покренување дисциплинска постапка против стручни лица, согласно со Законот за работни односи. Поведени се и 13 постапки за сторени прекршоци од страна на стручните лица во постапувањето во овој случај, согласно со Законот за социјална заштита“, велат од МТСП.

Европскиот центар за правата на Ромите (ЕЦПР) го обелодени случајот со 13-годишното девојче, кое минатата недела било подложено на абортус, а забременило по сексуално злоставување како штитеничка на Домот за деца „25 Мај“.

Директорот на Заводот за згрижување на деца со воспитно – социјални проблеми и нарушено поведение „25 мај“, Стевчо Соколовски, на 19 февруари поднесе оставка од морални причини.


Директорот на домот за деца „25 мај“ поднел оставка од морaлни причини


Скопје, 19 февруари, 2018 - 14:28 (META) 

Директорот на Заводот за згрижување на деца со воспитно – социјални проблеми и нарушено поведение „25 мај“, Стевчо Соколовски, денеска поднесе оставка од морални причини, информираат од Министерството за труд и социјална политика од каде велат дека продолжуваат да го испитуваат случајот.

Од МТСП информираат дека Комисијата утврдила дека стручните служби и назначениот старател во неколку наврати ги алармирале надлежните институции за можна сексуална експлоатација на 13-годишната Р.И.

„Сега се истражуваат сите останати елементи за можно непостапување од страна на претходниот назначен старател на детето. Очекуваме МВР и ОЈО да преземат мерки согласно со нивната надлежност, со цел да се пронајдат и санкционираат лицата коишто ја злоупотребувале малолетната жртва. Во оваа прилика би сакале да потенцираме дека преку случајот на Р.И. се покажуваат аномалиите на разрушениот систем на социјална заштита, особено кога станува збор за деца во специфичен ризик. Евидентна е потребата од подобра координација меѓу сите институции и воспоставување систем кој вистински ќе ги заштити децата од социјален ризик“, велат од Министерството.

Оставката следува откако невладината Европски центар за правата на Ромите (ЕЦПР) го обелодени случајот со 13-годишното девојче, кое минатата недела било подложено на абортус, а забременило по сексуално злоставување како штитеничка на Домот за деца „25 Мај“.

Од Министерството потенцираат дека интензивно работат на процесот на деинституционализација и дека до средината на 2018 година, ќе започне трансформацијата на установите за згрижување деца во мрежа на мали групни домови.