Поништена постапката за субвенции за авиопревозници


Скопје, 6 август, 2018 - 11:29 (META) 

По предлог на Комисијата за спроведување на постапката за доделување на финансиска поддршка на авиопревозници, Министерството за транспорт и врски ја поништило постапката за доделување на финансиска поддршка.

На јавното отворање на барањата, на 27 јули, имало само една понуда, којашто не била доставено согласно условите, односно на трите запечатени внатрешни пликоа не би наведен полниот назив и адреса на авиопревозникот.

Поради тоа, постапката била прекината. Министерството за транспорт и врски соопшти дека наскоро повторно ќе го објави јавниот повик за доделување на финансиска поддршка на авиопревозници.


Распределени линиите за автобуски превоз во земјава и странство


Скопје, 23 јули, 2018 - 14:20 (META) 

Министерството за транспорт и врски ја завршило прелиминарната распределба на автобуски линии за 2018 година. Како што стои во соопштението, 91 апликација биле поднесени за нови или промена на веќе постоечки автобуски линии во меѓуопштинскиот и меѓународниот патен сообраќај. Од нив 26 апликации биле за вршење на меѓуопштинскиот превоз на патници и 65 апликации за меѓународен превоз на патници.

За меѓуопштински превоз на патници одобрени се 12 апликации, а за меѓународен превоз на патници одобрени се 35 апликации.

Прелиминарните листи може да се видат на веб-страницата на Министерството за транспорт и врски.


Бројот на патници во јануари е зголемен за 18,7 отсто во однос на истиот месец лани


Скопје, 20 февруари, 2018 - 14:53 (META) 

Во јануари годинава, од двата аеродроми превезени се вкупно 151.381 патници, што претставува зголемување од 18,7 отсто споредено со истиот месец лани, информираат од Министерство за транспорт и врски.

На скопскиот аеродром, регистрирани се вкупно 145.592 патници што во споредба со јануари 2017 година, кога биле превезени 123.118 патници, се забележува зголемување од 18,3 отсто.

На аеродромот „Св. Апостол Павле“ во Охрид, бројот на превезени патници е зголемен за 30,8 проценти во однос на бројот на патници во јануари, лани.


За пругата до Бугарија одобрени 71,5 милиони евра


Скопје, 8 февруари, 2018 - 13:55 (META) 

Министерството за транспорт и врски денеска соопшти дека е ревидирана и одобрена Секторската оперативна програма за транспорт 2014-2020, во рамките на ИПА 2 програмата, и со неа за железничка и патна инфраструктура се обезбедени се 127,2 милиони евра, од кои 108,1 милион евра се средства од ИПА 2 програмата, а 19,1 милион евра се средства од Буџетот на Република Македонија.

Вкупно 71,5 милиони евра треба да бидат искористени за изградба на дел од третата фаза на пругата кон Бугарија, односно на делницата Крива Паланка – граничен премин Деве Баир, а 48,7 милиони евра за изградба на втората фаза од експресниот пат Градско – Прилеп, односно за делницата Градско – Дреново.

Другиот дел од средствата е за реконструкција на делницата Куманово – Ранковце, како и за изградба на третата лента на делницата Плетвар на патниот правец Градско-Прилеп, како и за замена на заштитни огради на автопатот „Пријателство“, во должина од 100 километри.


„Македонија сообраќај“ нема лиценца, затоа не сообраќа на релација Скопје – Солун


Скопје, 4 февруари, 2018 - 16:32 (META) 

Министерството за транспорт и врски информираше дека превозникот „Македонија сообраќај“ не сообраќа на релацијата Скопје – Солун, бидејќи нема лиценца.

„На превозникот „Македонија сообраќај“, поради нередовно одржување на возната линија Скопје – Солун, пред повеќе од три години му е одземена дозволата за превоз на патници на линијата Скопје – Солун. По две жалбени постапки од страна на оваа компанија, Министерството за транспорт и врски, му ја одзема дозволата за вршење на превоз на патници на релација Скопје-Солун. Во период на водење на жалбената постапка, важноста на дозволата била продолжувана, бидејќи решението за одземање на дозволата не било правосилно, а дозволите важеле до 31 јануари 2017 година. Превозникот „Македонија сообраќај“ не аплицирал за нова дозвола“, се вели во соопштението на министерството.

Во него се додава дека, во овој момент тече жалбената постапка пред Управниот суд и се додека се води управната постапка, Министерството за транспорт и врски, согласно законските прописи, не може да преземе дејства. Партнер-фирмата од Грција редовно ја одржува линијата Скопје-Солун, а истата аплицирала за продолжување на важност на дозволата и ги има исполнето сите законски услови за тоа.

Министерството за транспорт и врски апелира до сите заинтересирани компании да се пријават на претстојниот повик за распределба на автобуските линии во внатрешниот и меѓународниот сообраќај, со цел да се обезбедат навремени и квалитетни сообраќајни услуги за граѓаните.


Сугарески и Гарет разговарале за економската соработка меѓу Македонија и Британија


Скопје, 2 февруари, 2018 - 12:11 (META) 

Министерот за транспорт и врски, Горан Сугарески денеска имал средба со амбасадорот на Велика Британија во земјава, Чарлс Гарет, на која го информирал за капиталените проекти што се реализираат во Македонија во делот на инфраструктурата.

„Амбасадорот беше запознаен со проектите што ќе се реализираат во следниот период во делот на патната инфраструктура, изградба на железницата на Коридорот 8, како и за проектите што ги реализира Министерството за транспорт и врски во комуналната инфраструктура и гасификацијата“, стои во соопштението од Министерството.

На средбата се разговарало и за актуелните состојби во соработката меѓу двете земји, при што акцентот бил ставен на зголемувањето на економската соработка меѓу Македонија и Велика Британија.


Министерството за транспорт и врски до утре исплати дел од платите во МЖ-Транспорт


Скопје, 13 декември, 2017 - 13:31 (META) 

Министерството за транспорт и врски (МТВ) денеска, најдоцна до утрешниот ден, ќе обезбеди дел од потребните пари за покривање на загубите за патнички сообраќај во Македонски Железници – Транспорт, но вработените треба во најбрз рок да овозможат повторно да профункционира железничкиот сообраќај.

Ова го соопштиле вицепремиерот за економски прашања Кочо Анѓушев и министерот за транспорт и врски Горан Сугарески  на денешната средба со менаџерскиот тим на МЖ Транспорт и со претставници на штрајкувачкиот одбор. Вработените втор ден штрајкуваат поради неисплаќање на вториот дел од платата за октомври.

„Министерството за транспорт и врски во рамките на своите надлежности и понатаму ќе продолжи со исплата на средства на име на трансфери и субвенции кон Железница, но потребно е да се создадат услови за нормално функционирање на железничкиот систем. Во случај на продолжување на блокада на железничкиот сообраќај ќе се доведе во прашање исплатата на заостанатите плати за сите вработени во железничките претпријатија“, стои во соопштението од МТВ.


Комуналната инфраструктура ќе се зголемува од 18 на 40 проценти


Скопје, 20 октомври, 2017 - 15:31 (META) 

Mинистерството за транспорт и врски почна со реализација на проектот за подобрување на водоводната и канализационата мрежа во општините во Македонија, информираат од таму.

За подигнување на квалитетот на комуналаната инфраструктура, министерството за транспорт и врски распиша осум јавни повици за изгрaдба или реконструкција на водоводните мрежи во повеќе места меѓу кои и во Гостивар, Ресен и во Виница.

Од таму информираат дека средствата за реализација на сите овие проекти веќе се обезбедени.

„Целта на Владата е во наредниот период ,од 18 отсто покриеност на територија на Макеоднија со комунална инфраструктура, таа да се зголеми на 40 проценти што е во функција на обезбедување на рамномерен регионален развој и баланс меѓу урбаните центри и руралните средини“, се вели во соопштението на Министерство за транспорт и врски.


ВМРО-ДПМНЕ: „Македонски железници“ нема пари за плата, а купува алкохол за 24.000 евра


Скопје, 25 септември, 2017 - 14:31 (META) 

ЈП „Македонски железници“ нема пари да исплати плата, но сепак извршило набавка на алкохолни пијалоци во вредност поголема од 24.000 евра, рече пратеникот на ВМРО-ДПМНЕ, Крсте Јовановски.

– Внимавајте, 24.000 евра за алкохолни пијалоци платени со државни пари, во исто време кога вработените мака мачат да добијат плата. Нема пари за пензии, за плати во „Колска“ и за други загубари, за субвенции, но има пари за алкохолни пијалоци. Јавноста заслужува одговори од Сугарески и од Владата предводена од Заев, зошто има пари за алкохолни пијалоци, а нема за субвенции, пензии, за нови патишта, нови проекти – рече Јовановски.

Тој порача дека ВМРО-ДПМНЕ бара веднаш да се поништи оваа набавка и парите да се пренасочат кон реализација на проекти за граѓаните.


Сугарески се пофали со 188 милиони евра грантови обезбедени за 100 дена


Скопје, 9 септември, 2017 - 17:10 (META) 

За само 100 дена успеавме да обезбедиме 188,4 милиони евра грантови – неповратни средства за подобрување на патната, железничката и на комуналната инфраструктура, рече министерот за транспорт и врски, Горан Сугарески, денеска во своето обраќање до јавноста по повод 100 дена на функцијата.

Тој рече дека би можел со часови да зборува за ситуацијата што го затекнала него и неговиот тим по стапувањето на функцијата, но нема намера да зборува за тоа.

– Но, денеска нема да зборувам за лажните ветувања на претходната влада, ниту пак ќе се жалам. Едноставно, тоа не сум јас и тоа не е мојот стил на работа. Заедно со мојот тим ги детектиравме аномалиите и се фативме во костец со проблемите. Се посветивме на наоѓање решенија, притоа не обрнувајќи внимание на критиките на тие што имаа 10 години на располагање да покажат што знаат и умеат. Не е наше да се занимаваме со тие што ја изгубија довербата на граѓаните и ги изневерија очекувањата, наше е да сработиме и да исполниме тоа што сме го ветиле – рече Сугарески.

Тој порача дека Република Македонија станала дел од Транспортната заедница, составена од земјите од Западен Балкан и ЕУ, како и со воведување нови авионски линии. Рече и дека е работено за успешно заокружување на проектот за легализација на дивоградби преку воведување на принципот на праведност и на достапност до сите граѓани еднакво.

Сугарески се пофали со 131 милион евра неповратни средства од ЕУ за доизградба на пругата кон Бугарија, односно 70 милиони евра на самитот во Трст за делницата од Бељаковце до Крива Паланка и преку Оперативната програма за транспорт 2014-2020 од Европската Унија, уште речиси 61 милион евра за последниот дел, односно делницата од Крива Паланка до Деве Баир.

– Со меморандумот што го потпишавме со Министерството за транспорт и комуникации на Бугарија се обврзавме и двете земји најдоцна до 2027 година да имаме изградено комплетно нова пруга со што ќе го засилиме економскиот развој на регионот – рече Сугарески.

Тој ја спомена и изградбата на пругата од Битола до Кременица, како и повеќе патишта, односно, како што рече, отстранети се проблемите и ќе продолжат изградбите на експресните патишта и автопатиштата, како и патишта од понизок ранг.