Дескоска: До утре ќе биде испратено барањето за екстрадиција на Груевски


Скопје, 20 ноември, 2018 - 10:49 (META) 

Барањето за екстрадиција на поранешниот премиер Никола Груевски со пропратната документација треба да бидат испратени во Унгарија денеска или најдоцна утре, најави министерката за правда Рената Дескоска одговарајќи на новинарски прашања пред почетокот на тркалезна маса за Предлог-законот за изменување и дополнување на Законот за извршување.

Покрај документација за предметот „Тенк“ во кој Груевски е осуден на двегодишна затворска казна, на унгарските власти ќе бидат доставени документи и за сите обвиненија и истражни постапки што се водат против него.

Таа смета дека има правен основ за екстрадиција на Груевски и очекува тој да биде екстрадиран.
Според неа, нема причина Унгарија да му додели статус на азил и очекува неговото барање да биде одбиено.


Бошњаковски: Се подготвува документацијата од 400 страници за екстрадиција на Груевски


Скопје, 15 ноември, 2018 - 13:26 (META) 

Започнат е процесот за екстрадиција на бегалецот Никола Груевски, рече портпаролот на Владата, Миле Бошњаковски на редовната прес-конференција во Влада.

– Министерството за правда ја собира потребната документација за случајот, која што е обемна на околу 400 страници. Кога ќе биде комплетирана и преведена ќе биде доставена до Унгарија. Тоа ќе се случи во текот на овие денови – рече Бошњаковски.

Тој потенцираше дека се утврдува начинот на кој Груевски ја напуштил државата и дали некој му помагал. Бошњаковски информираше дека внатрешната контрола на МВР истражува дали полициски службеници му помогнале на Груевски во бегството и најави подетални информации за кога ќе заврши истрагата.


Владата подготвува нов закон за СЈО, за Јавното обвинителство и за кривична постапка


Скопје, 15 ноември, 2018 - 10:00 (META) 

Коинциденција или не, Владата реши да менува три клучни закони од областа на кривичниот прогон токму на 13 ноември, денот кога поранешниот премиер Никола Груевски објави дека пребегнал во Унгарија, каде што бара политички азил.

Министерството за правда токму на овој ден објави дека подготвува предлог закон за Специјалното јавно обвинителство кој треба да биде готов до крајот на месецот.

„Целта на законот е да се изврши уредување на материјата за статусот, надлежностите и други прашања поврзани со Специјалното јавно обвинителство. Во текот на подготовката на законот ќе бидат вклучени судии, јавни обвинители, меѓународни организации и надлежни институции“, соопшти Министерството.

Истовремено, Министерство за правда подготвува предлог закон за јавното обвинителство. Во образложението се вели дека законот за кривичната постапка е донесен во 2010 година, а започна да се применува од 2013 година и дека со него биле воведени значајни новини кои во најголем дел се однесуваат на јавното обвинителство.

„Затоа е потребно Законот за јавното обвинителство да се усогласи со соодветните решенија пропишани во Законот за кривичната постапка. Целта на Законот е да се изврши усогласување со меѓународните стандарди и да се усогласи со соодветните решенија пропишани во Законот за кривичната постапка“, информираат од Министерството.

Освен овие два закони, во тек е подготовка и на предлог закон за кривичната постапка. Во образложението од Министерството за правда се вели дека во периодот на неговата примена биле лоцирани одредени недостатоци кои е потребно да се отстранат.

„Дополнително, потребно е усогласување на законот со најновите меѓународни стандарди во оваа област. Целта на Законот е да се изврши усогласување со меѓународните стандарди и да се надминат лоцираните слабости во неговата примена“, објаснуваат од Министерството.


Екстрадиција: Што треба и од кои земји може да се бара?


Скопје, 13 ноември, 2018 - 18:45 (META) 

Министерството за правда попладнево соопшти дека ќе чека официјално известување од Министерството за внатрешни работи (МВР) дека осудениот пратеник и експремиер Никола Груевски е во бегство, па дури ќе може да се помине кон постапката за екстрадиција. Но станува збор за малку подолга постапка

„Прво треба да добиеме известување од Министерството за внатрешни работи дека лицето е лоцирано, па дури потоа треба да се комплетира пакет документи, односно меѓународна потерница, правосилната пресуда од судот, извадок од Кривичниот законик за описот на делото и застареноста на кривичното гонење. Сите документи треба да се преведат на јазикот каде што е избегано осуденото лице“, велат од Министерството за правда за МИА.

Инаку, екстрадицијата е регулирана според глава 31 , „Постапка за екстрадиција на обвинети и осудени лица”, од Законот за меѓународна соработка во кривичната материја, како и од билатерални договори, кои се наведени на веб-страницата на Министерството за правда.

Македонија досега има склучено билатерални договори за екстрадиција со Албанија, Босна и Херцеговина, Хрватска, Словенија, Косово, Србија, Црна Гора, Италија и САД. Последниот ваков договор беше постигнат со Италија во јули предминатата година. Според а договорот за екстрадиција со САД е наследен од Конвенција за екстрадиција помеѓу Кралството на Србија и Соединетите Американски Држави од 12/25 октомври 1901 година.

До пред седум години, Македонија не можеше да предаде свои државјани на друга држава, бидејќи тоа не го дозволуваше членот 4, став 2 од Уставот. Со измените на Уставот во 2011 година и додавањето на амандманот 32 се овозможи екстрадицијата на македонски државјани на други држави.

Екстрадиција на лице врз основа на распишана меѓународна потерница се дозволува за кривични дела за кои според домашното законодавство е пропишана казна затвор од најмалку една година. Исто така екстрадицијата се дозволува заради извршување на правосилно изречена ефективна казна затвор, доколку лицето кое се бара има да доиздржи казна од најмалку четири месеци.

Ако против лице кое се наоѓа во странска држава се води кривична постапка во Република Македонија или кое е осудено од домашен суд, министерот поднесува барање за екстрадиција.

Кон барањето за екстрадиција  се приложуват:

1) податоци за утврдување на идентитетот на лицето чијашто екстрадиција се бара (опис, фотографија, отпечатоци од прсти и слично);
2) уверение или други податоци за државјанство;
3) обвинение, пресуда или одлука за притвор или на некој друг акт со исто правно дејствие, во оригинал или заверен препис во кој треба да биде назначено името и  презимето на лицето чијашто екстрадиција се бара;
4) опис на делото, законскиот назив на кривичното дело и докази за основано сомневање и
5) препис од одредбите на Кривичниот законик на Република Македонија кој треба да се примени или е применет спрема лицето чијашто екстрадиција се бара, а ако делото е сторено на територијата на трета држава, тогаш е потребен и препис од одредби на Кривичниот законик на таа држава.

Кога лицето чијашто екстрадиција се бара правосилно е осудено, како што е случајот со Никола Груевски, кој на Фејсбук денеска напиша дека е во Унгарија, надлежниот суд или казнено-поправната установа до Министерството треба да достават:

1) барање за екстрадиција;
2) правосилна судска пресуда;
3) налог за упатување на издржување на казната затвор или упатен акт;
4) наредба за издавање меѓународна потерница и
5) извод од текстот на Кривичниот законик на Република Македонија.


Министерството за правда почна постапка за екстрадиција на двајца обвинети во „Монструм“


Скопје, 24 август, 2018 - 11:04 (META) 

Од Министерството за правда до Основниот суд Скопје 1 утрово пристигнало писмо со известување дека и официјално е започната постапката за екстрадиција на двајцата обвинети во случајот „Монструм“, Африм Исмаиловиќ и Алил Демири кои се наоѓаат во Косово.

Во мај судењето за „Монструм“ почна од почеток, откако предметот го презеде Специјалното јавно обвинителство. Обвинетите за петкратното убиство кај Смилковското езеро што се случи на 12 април 2012 година, беа осудени на доживотни казни затвор за потоа Врховниот суд да утврди серија пропусти во водењето на постапките и да ги укине пресудите. Највисокиот суд ги ослободи од притвор осудените Агим Исмаиловиќ, Хаки Азири, Сами Љута и Фејзи Азири и им определи мерки на претпазливост, односно да не смеат да го напуштат градот во кој живеат, а имаат и обврска двапати неделно да се јават во Основниот суд Скопје 1.

По Алил Демири и Африм Исмаиловиќ имаше распишано меѓународна потерница. Тие со години се во бегство во Косово. Тамошните власти го одбија барањето за екстрадиција бидејќи тврдеа дека не биле доставени доволно докази што укажуваат на нивна вмешаност во случајот.


Во судовите функционирал двоен АКМИС – рачен и компјутерски


Скопје, 13 јули, 2018 - 10:33 (META) 

Извештајот за користењето на информатичкиот систем за автоматска прераспределба на предмети (АКМИС) открива дека тој во голема мерка не функционирал, како и дека повторно во движењето на предметите решавал човечкиот фактор, открива извештајот на Работната група формирана од Министерството за правда.

Актуелната министерка Рената Дескоска го објави извештајот на групата вчера и од него се гледа дека во Основен суд Скопје 1 (Кривичен суд), освен во 2013 година, не се правел годишен план за управување со движењето на предметите во судовите и спречување на создавање и намалување на нерешени предмети. Поради тоа дури 860 предмети не биле завршени, се констатира во извештајот за увидот извршен на 26 октомври минатата година, кој јавноста го дознава дури сега.

Во овој суд, инаку, завршија речиси сите случаи на Специјалното јавно обвинителство и тамошните судски совети решаваа за прифаќање на обвиненијата од СЈО.

При средбата со работната група, тогашниот в.д. претседател Стојанче Рибарев кажал дека во огромен дел распределбата на предметите се вршела рачно, односно како што тој го нарекол тоа „дупли АКМИС“. Тој на 3 јули минатата година формирал работно тело за управување со движење на предметите во Судот. Претходно немало такво нешто, но и откако Рибарев формирал своевидна комисија, не бил формиран Годишен план за управување со движењето на судот, ниту се донесени внатрешни процедури.

Работната група формирана од министерот за правда утврдила дека грубо била повредена и процедурата за донесување на Годишниот распоред за работа на Судот и тој бил често менуван.

Така, често одредени предмети се префрлале од еден на друг судија, а поради честото менување на годишниот распоред за работа, бил ограничен изборот на судии на кои автоматски ќе им се прераспредели предмет. Но честопати, како што се напоменува на повеќе места во извештајот, распределувањето сепак не било компјутерски, туку рачно.

АКМИСОТ не се користел за распределба на предмети на судиите на претходна постапка и на кривичните совети во одделите Кривично полнолетни и организиран криминал, каде што беа предметите од СЈО. АКМИС-от немал дури ни внесени  параметри за автоматска распределба според уписниците. Уписничарот вршел избор на стручен соработник кој треба да го направи изборот на кривичниот совет пред кој го изнесувал предметот.

Како што утврдила работната група, некои судии биле исклучувани од автоматската распределба на предмети по основа на известувања за отсуство по различни основи, најчесто во времетраење пократко од пет дена. Но и во овие случаие немало писмена одлука со наредба и образложение, туку само со параф на претседателот на судот и со телефонско јавување.

Уписниците најчесто се правеле на хартија, а електронските се речиси празни.

Работната група препорачува веднаш да се почне со целосна примена на АКМИС-от во Кривичен суд.

Исклучувањето на судии од автоматската распределба се вршела со наредба на претседателот на судот, заедно со наведени причини за исклучувањето и со барање итните предмети да бидат прераспределени на друг судија преку АКМИС.

Во 2017 година имало 200 случаи на изземање на судија, но тоа се правело на законска основа, се вели во извештајот на работната група. Причините биле блиски роднински врски со судија од првостепената постапка или со адвокат од првостепената постапка или кога судијата постапувал во првостепената постапка.

Работната група препорачува, поради бројот на изземања, предметите од основните судови да се распределуваат по случаен избор во сите апелациски судови.

И во Врховниот суд, слично како во скопска Апелација, имало изземања на судии поради истите причини како во второстепениот суд. Исто така, спротивно на правилата, автоматската прераспределба на предмети се одвивала повеќе пати во денот, наместо еднаш.

Работната група формирана од Правда препорачува веднаш да се преземат мерки за целосно да профункционира АКМИС-системот и да се зајакнат контролите.


Министерката за правда најави нов модел на антикорупциска комисија


Скопје, 3 јули, 2018 - 12:55 (META) 

Во Министерството за правда е формирана работна група којашто работи на измените на Законот за спречување корупција, а наскоро се очекува и нов модел на aнтикорпуциска комисија, соопшти министерката за правда Рената Дескоска на Втората сесија на Работната група – III (Првосудство и основни права – Поглавјето 23) од Националната конвенција за Европска унија во Република Македонија (НКЕУ-МК) која се одржа во Клубот на пратениците во Скопје.

-Идејата е новата комисија да биде составена од експерти, луѓе коишто немаат политичка афилијација, а тоа го сметаме за некој вид предност – знаењето, но и политичката неврзаност како предност во смисла на исполнувањето на овие задачи коишто оваа антикорупциска комисија треба да ги има. Во рамки на оваа работна група покрај моделот на антикорупциска комисија, се разгледуваат и надлежностите на овој орган бидејќи ефективни надлежности но и јасни законски норми ќе бидат секако придонес кон подобро вршење на активностите на овој орган во рамките на своите надлежности- потенцираше Дескоска.

Говорејќи на темата „Механизми за ефективна борба против корупцијата“, таа рече дека ќе се преиспита и законот за лобирање. Дескоска се осврна на реформите во судството при што истакна дека пред судството стојат две задачи: да се бори со корупцијата во другите органи, но и да се бори со корупцијата во своите редови.

-Корупцијата не е само примање на парични надоместоци или подароци, корупцијата е отсуство на сите видови влијанија во носењето на одлуките и тоа е особено битно за судството, бидејќи кај нив е изрично пропишано дека мора да судат врз основа на Уставот и законите во Република Македонија, што за жал не секогаш беше случај во изминатиот период – порача министерката за правда.


Советот за следење на правосудните реформи информиран за противењето на опозицијата


Скопје, 26 април, 2018 - 11:04 (META) 

На третата седница одржана вчера, членовите на Советот за следење на имплементацијата на Стратегијата за реформи на правосудниот сектор биле информирани дека некои решенија предложени од Министерството за правда за законските измени на Законот за судови, Законот за Судскиот совет на Република Македонија и Законот за Академијата за судии и јавни обвинители, се неприфатливи за опозицијата.

Заменик-министерот за правда, Оливер Ристовски, притоа нагласил дека на седницата на Собранието закажана за 2 мај, очекува измените на Законот за судови и Законот за судски совет да се најдат на дневен ред.


Пожар во канцеларија во Министерството за правда


Скопје, 10 април, 2018 - 17:44 (META) 

Пожар изби попладнево во канцеларија на најгорниот кат во Министерството за правда. Скопските пожарникари интервенираат гаснејќи го огнот и однадвор и внатре.

Пред објектот во строгиот центар на Скопје се собрани стотина граѓани кои ја набљудуваат акцијата на пожарникарите.

 

 


Караџовски не видел ништо „помпезно и страшно“ во извештајот за АКМИС


Скопје, 15 февруари, 2018 - 13:51 (META) 

Претседателот на Судскиот совет, Зоран Караџовски денеска изјави дека не му се јасни причините зошто извештајот на комисијата за АКМИ-системот (Автоматизиран компјутерски систем за управување со судските предмети) на Министерството за правда е класифициран, бидејќи, како што рече, во тој материјал нема „ништо помпезно и ништо страшно“.

Тој рече дека сè уште во фаза е постапката за добивање на безбедносен сертификат на оние членови на Судскиот совет кои го немаат, а одговарајќи на новинарско прашање кога извештајот ќе биде ставен на дневен ред на седница на Судскиот совет, зошто досега не е ставен и зошто има толку големи разлики во наодите Судскиот совет со оние што ги откри Комисијата на Министерството за правда.

– Во моментот таков безбедносен сертификат имаат шест членови на Судскиот совет. Мене не ми се јасни причините зошто е така класифициран тој материјал. Ништо помпезно, ништо страшно, како што се јавува во медиумите, во тој извештај нема. Јас имам безбедносен сертификат, јас го имам разгледано така што не сум убеден дека има многу разлики од она што ние досега, кога сме работеле, сме го констатирале. Сега нема да навлегувам понатаму, дополнително ќе добиете информација за тие предмети за кои се шпекулира – изјави Караџовски.

Според наодите на Комисијата, кои на прес-конференција ги презентираше министерот за правда, Билен Саљији на почетокот на декември, минатата година, во Кривичниот суд во Скопје не се користел модулот за автоматска распределба, туку таа се вршела рачно, а предметите биле распоредувани само со параф на претседателот на судот и со телефонско јавување во судската писарница.

Во Врховниот суд, АКМИС се применувал спротивно на судскиот деловник и наместо предметот да оди кај судија по случаен избор, него го добива очекуван судија.

На почетокот на овој месец државниот јавен обвинител, Љубомир Јовески потврди дека скопското јавно обвинителство отворило предистражна постапка во врска со извештајот за АКМИ-системот.