Се спремаат законски измени вакцините да станат услов за упис на училиште


Скопје, 11 јануари, 2019 - 10:04 (META) 

Државата ги разгледува сите правни аспекти и законски одредби за вакцинацијата како задолжителен услов за запишување во градинка и училиште. За „Мета“, во Министерството за здравство (МЗ) објаснуваат дека поради одредени отстапки, во моментов и децата што не се вакцинирани се примаат во училиште, но тоа не смее да продолжи како практика.

– Со оглед на фактот дека повеќе години наназад не се почитува условот да се достави вакциналниот картон при упис во градинка и во училиште, се разгледуваат правните можности да се направи законска измена и во моментов е во тек континуирана комуникација со претставници на Министерството за образование и наука (МОН) и Министерството за труд и социјална политика (МТСП). Невакцинирањето носи сериозни ризици од појава на епидемија, која може да има и фатални последици, а се превенира со вакцинација. Одржани се повеќе работни средби на работна група, со претставници од МЗ, МТСП и од Државниот санитарен и здравствен инспекторат (ДСЗИ). Со тоа што не се бараат вакцинални картони при упис и со севкупниот пад на опфатот на имунизација, се доведува во прашање намалувањето на колективниот имунитет, што е единствен услов за успешна превенција на овие инфективни болести. Во тој случај и вакцинираните деца ги доведуваме во опасност, а уште повеќе оние што поради возраста или здравствената состојба, не се вакцинирани – појаснуваат од МЗ.

Целта е интерресорски да се најде начин за долгорочно решение на овој проблем, бидејќи, како што велат во Министерството за здравство, не смее да се дозволи и понатаму пад на процентот на имунизирани.

По прогласувањето епидемија на морбили во Скопје, по препорака на Комисијата за заразни болести, во министерството уште еднаш потенцираат дека станува збор за болест што се превенира со вакцинација и апелираат до родителите да ги вакцинираат своите деца.

– Здравјето на граѓаните, а посебно на децата е врвен приоритет на  Министерство за здравство и треба да се има во предвид дека редовната имунизација создава колективен имунитет. Потсетуваме дека малите сипаници може да дадат тешка клиничка слика, како воспаление на белите дробови, воспаление на мозок, тешка дијареа и во одредени случаи и смрт, а вакцината е единствената безбедна и ефикасна мерка за спречување на епидемијата и заштита на децата од можните сериозни компликации на малите сипаници – потсетуваат од министерството.


Министерството за образование ги забрани екскурзиите кај депонијата со линдан


Скопје, 20 декември, 2018 - 15:04 (META) 

Министерството за животна средина и просторно планирање испратило допис до Министерството за образование и наука да не се организираат екскурзии во Пеленица, Драчево, местото за кое „Мета“ пишуваше дека има сомневање дека се наоѓа необележана депонија со канцерогениот линдан кој потекнува од фабриката ОХИС.

„Во Министерството за образование и наука, стигна допис од МЖСПП по кое ќе постапиме, односно ќе им наложиме на општините како основачи на училиштата, таму да не се одржуваат екскурзии“, велат од МОН за „Мета“.

Министерството за животна средина, вети дека до крајот на годината ќе го огради просторот во Драчево за кој постојат сомневања дека се наоѓа дивата депонија со 8.000 тони токсичен линдан.

Државната секретарка во МЖСПП, Ана Петровска, во разговор за „Мета“ рече дека ќе биде испратено укажување до Министерството за образование и наука во Пеленица да не се организираат ученички екскурзии додека не се утврди опасноста.

-Алармирано е и до владата и до нас како Министерство и во овој момент ќе се преземе акција согласно член 42 од законот за отпад кој што не овластува нас како надлежен орган, пред да се докаже опасноста, бидејќи уште не е докажана, а за да ја докажеме ќе ни треба и време и ресурси, барем да го оградиме просторот за кој што се претпоставува дека е локација. Таа е во ненаселен простор, но е близу некој манастир, каде што деца одат на екскурзија. Со други зборови, ние како орган, до крајот на годината, имаме обврска да го оградиме тој простор и да поставиме одредена табла – рече Петровска.

Линданот на оваа локација потекнува од фабриката ОХИС и таму го фрлале работници пред да се направат големата и малата депонија на територијата на фабриката каде што се проценува дека има помеѓу 40-50.000 тони контаминирана почва со линдан.


ОУ „Исмаил Ќемали” e преоптоварено со ученици и со недостиг на простор


Скопје, 21 ноември, 2018 - 11:48 (META) 

Основните училишта „Имри Елези” и „Петар Здравковски-Пенко“ во скопските општини Чаир и Бутел не се единствените што имаат проблем со преголемиот број на ученици.

Уште еден случај на прекршување на законот откри редакцијата на „Порталб“ во основното училиште „Исмаил Ќемали“ во населбата Топанско Поле. Во ова училиште речиси сите паралелки се многу блиску до законски утврдената граница за дозволен број на ученици по паралелка, а тоа е 34, додека неколку од нив дури и го надминуваат овој број.

Директорката на ова училиште, Бурбуќе Имери, вели дека најоптоварени паралелки се тие од петто одделение, каде бројот на ученици во секоја паралелка е над 34.

– Речиси сите паралелки се преполни, но најголемиот проблем е со петтите одделенија и дневниот престој, во кои има по 39 и 40 ученици – изјави Имери за „Порталб“.

Таа рече дека општина Чаир е запознаена со состојбата во ова училиште.

– Разговаравме со општината и ни ветија дека ќе ни помогнат и дека ќе бидеме нивни приоритет. Но дури и да се отворат паралелки и да се вработат наставници, немаме каде да ги носиме, бидејќи имаме недостиг на простории. Ќе треба да се изградат најмалку 7 училници за да се реши еднаш засекогаш нашиот проблем. Или да се изгради ново училиште во овој регион – изјави Имери.

Наставниците велат дека е прилично тешко да се работи со толку голем број ученици во една паралелка.

Дополнително и родителите бараат нов училиштен објект и соодветни услови за образование на нивните деца.

– Како што гледате и самите, ова училиште има премногу ученици, би било добро општината да преземе мерки и да изгради ново училиште и еднаш засекогаш да го реши проблемот во ова училиште – велат некои од родителите.


МОН: Дистрибуирани учебниците за основно, средношколците ќе ги добијат до 15 октомври


Скопје, 3 октомври, 2018 - 15:01 (META) 

Учебниците за основно образование кои се откупени од издавачките куќи, ги испорачуваат до училиштата, а дистрибуцијата заврши минатата недела, информираат во Педагошката служба при Министерството за образование и наука.

– Испораката на учебници за средно образование пак, очекуваме да заврши до средината октомври. Во процесот на испорака на учебници, им укажуваме на училиштата да внмаваат на роковите за пополнување на формулари за нарачка како и на тоа да ги читаат дадените упатства од страна на Педагошката служба – велат оттаму.

Има едно апсурдно правило според кое, министерството бара од училиштата, во мај да достават број на потребни книги за идната учебна година, иако во мај никој не знае колку точно нови ученици би се запишале за да се знае колку учебници ќе бидат потребни.

На прашањето дали се планира ваквата практика да се промени, од Педагошката служба велат дека станува збор само за првооделенците и тука имаат можност до 20 септември да го корегират бројот кој го пријавиле во мај.

– Се размислува и за законски измени, но секое пролонгирање на нарачката значи и пролонгирање на дистрибуцијата, така што треба внимателно да се размисли за ова проблематика – додаваат од таму.

До минатата година, немаше можност да се купи учебник во слободна продажба зашто авторските права ги има министерството. Од оваа година, тоа е овозможено.

Оваа власт ја продолжува политиката на бесплатни учебници за сите ученици. Како што за „Мета“ изјави неодамна заменик министерот Петар Атанасов, ќе се настојува тие да бидат што подобри во однос на квалитет.

-Моја интенција е да во пониските нивоа на образование учебникот да биде главно помагало, но во секоја наредна година, мора да се изнаоѓаат и нови алатки и извори на информации. Учениците неопходно е сами да учат да експериментираат и да истражуваат – рече тој.

disklejmer1-01


Ако имате раскасапен учебник, купете си нов во книжарница


Скопје, 21 септември, 2018 - 9:30 (META) 

Родителите на децата кои добиле искинати, мрсни и оштетени учебници, можат доброволно да си купат нови по книжарниците бидејќи нив ги има и во слободна продажба. Во Министерството за образование и наука информираат дека учебниците се јавно достапни.

„Согласно член 6 став 2 од Законот за учебници за основно и средно образование, издавачот во чија сопственост се одобрените учебници има право истите да ги пушти во слободна продажба и тоа со истата цена по која Министерството ги откупува. Исто така дел од учебниците може да се преземат и од веб-страницата www.e-ucebnici.mon.gov.mk“, велат оттаму.

Во МОН уверуваат дека динамиката на испорака на нарачани учебници по училиштата низ Македонија е при крај.

„Секоја учебна година, училиштата пополнуваат формулари во кои ја наведуваат потребната бројка за недостаток на учебници, согласно тоа се врши и дистрибуција на истите. Согласно динамиката за дистрибуција може да се каже дека истата е при крај. Од ова учебна година, сите ученици од прво, второ и трето одделение ќе имаат нови комплети учебници, секоја учебна година“, информираат оттаму.

Досега, секоја година во полн тираж се печатеа само оние што се третираат како работни учебници, односно оние учебници во кои има содржини кои ученикот ги потполнува, со пишување, боење, лепење и сечење.

„Учебници што се употребуваат во погорните одделенија се во употреба пет учебни години. Ученикот има обврска да ги чува учебниците, а во сите случаи кога училиштето пројавило интерес и доставило бројка на оштетени учебници, МОН истите ќе ги дистрибуира“, додаваат оттаму.

Инаку до лани, учебник не можеше да се купи во слободна продажба. Авторските права ги има министерството, а законски се овозможи нив да ги има во книжарници од оваа учебна година.


Коригирани сите математики од прво до деветто одделение


Скопје, 20 септември, 2018 - 11:11 (META) 

Сите учебници по математика од прво до деветто одделение имале грешки и биле коригирани. Новите изданија се распределуваат периодов по училиштата, заедно со другите учебници кои доцнеа и не беа пред учениците на почетокот на учебната година.

„Нови учебници се доставуваат по математика, по природни науки од прво до шесто одделение, по биологија од седмо до деветто одделение, по хемија од осмо до деветто одделение, а нови учебници по физика ќе имаат осмоодделенците и деветтоодделенците“, информираат за „Мета“ од Министерството за образование и наука.

Огромен проблем секоја година е тоа што во средното стручно образование нема учебни помагала. Затоа беше најавено дека се подготвуваат нови 31 учебник за во средно образование.

„Потребата за учебници се менува во зависност од реформите кои се спроведуваат во Центарот за средно стручно образование и обука и Бирото за развој на образованието, по изготвување на наставните програми. Во тек е процесот за изготвување на нови 31 учебник за стручно образование и статусот е секаде различен, односно некаде се` уште не е формиран авторски тим, некаде е формиран и се работи на подготовка на содржината, некаде содржината веќе се разгледува од рецензентска комисија. Исто така, ќе се коригираат и содржините на два учебника – Биологија за прва и Етика за трета година“, информираат оттаму.

Откако учебниците ќе ги одобри рецензентска комисија, Бирото за развој на образованието и Национална комисија за учебници за основно и средно образование, тие ќе бидат доставени до училиштата.

Во Педагошката служба при МОН, која е надлежна за учебниците, не откриваат детали за тоа, какви се` грешки се најдени во учебниците. Оттаму само кусо информираат дека грешките биле од различна природа.

„Има грешки од стручен, методолошки и технички аспект, но и од аспект на превод и адаптирање“, рекоа оттаму.


Турската амбасадорка го нарече колеџот „Јахја Кемал“ терористичка организација


Скопје, 8 мај, 2018 - 16:28 (META) 

„Ајде да се бориме против оваа терористичка организација“, со овие зборови за Приватното гимназиско училиште„Јахја Кемал“, турската амбасадорка  во Македонија, Тулин Еркал Кара, ја промовираше Фондацијата „Мариф“ вчера во Скопје, пишува „Portalb.mk“.

Покрај тоа, таа апелираше до родителите, децата да ги запишат во Фондацијата „Мариф“, „доколку во иднина не сакаат да бидат терористи“.

„Апелирам до сите вас и до јавноста, дојдете, сите заедно, нашите деца да ги регистрираме во училиштата на Фондацијата „Мариф“. Доколку ние како родители не сакаме нашите деца во иднина да бидат терористи, треба да ги насочиме во училиштата на „Мариф“, бидејќи „Јахја Кемал“ не не претставува нас. Дојдете да се бориме против оваа терористичка оргнизација, на суштински начин, и тоа да не остане само на декларативно ниво“, рече Кара.

„Порталб.мк“ побара реакција од Турската амбасада во Македонија за оваа изјава на амбасадорката Кара, но не доби одговори на прашањето: „Дали Амбасадата е со ист став како и амбасадорката Кара и дали тоа значи дека децата кои учат во колеџот „Јахја Кемал“ се терористи?

За изјавата на Кара, Министерството за образование и наука не сакаше да коментира, но тие објавија дека „Мариф“ не е училиште и не работи според законските одредби. За „Јахја Кемал“ и сите други училишта велат дека ако работат согласно законот, ќе работат непречено.

„Сите училишта регистрирани во Македонија мора да работат во согласност со законските одредби, а во таа смисла контролата на сите приватни и јавни училишта, како и во овој случај, Приватното гимназиско училиште „Јахја Кемал“ е иста и е иста како и за другите училишта. Фондацијата „Мариф“ не беше формирана според законските одредби во областа на образованието. Министерството за образование и наука не може да ги коментира изјавите на амбасадорот “, изјавија од МОН за „Порталб.мк“.

Владата пак, одби да одговори на прашањето „дали ќе бараат докази и аргументи од турскиот амбасадор во Македонија, Тилин Еркал Кара за нејзините изјави и дали исто така се согласуваат со истата изјава – дека „Јахја Кемал“ е терористичка организација?“
 

Skandal: Ambasadorja e Turqisë Kara: Kolegji Jahja Kemal është organizatë terroristeAmbasadorja e Turqisë në Maqedoni, Tülin Erkal Kara e quan kolegjin Jahja Kemal organizatë terroriste

VIDEO: Portalb.mk

Posted by Portalb on Tuesday, May 8, 2018

 

Зеријета Јајага е мајка на двајца ученици кои го посетуваат приватното училиште „Јахја Кемал“ и е огорчена од изјавата на амбасадорката Кара.

„Се чувствувам многу огорчено од говорот на омраза, кој го користеше турската амбасадорка. Бидејќи таа не не навреди само нас како родители, туку и децата ги нарече „потенцијални терористи“ . Јас сум мајка на две деца кои се школуваат во „Јахја Кемал“ и целосно тврдам дека најмалку моите деца се потенцијални терористи. Многу ја ценам работата и ангажирањето на наставниот кадар. Моето искуство како родител вели дека благодарение на посветеноста на наставник по математика Озгур девојките постигнаа многу добри резултати на натпреварот по математика „Кенгур“. Работата во ова училиште се цени“, изјави Јајага за „Порталб.мк“.

Zerijeta

Јајага исто така беше прашана дали за време на образованието на нејзините деца, открила некој радикализам во учењето, што учениците од колеџот би ги направило терористи.

„Во никој случај не сум открила дека се промовира каков било екстремистички или радикален дух. Мојот син расте и учи во класа со ученици од различно етничко потекло и се вреднуваат сите различности“, додаде таа.


Чакаровски: Ќе се усогласиме, вакцинирањето нема да биде услов за упис во училиштата


Скопје, 23 април, 2018 - 14:59 (META) 

Министерството за здравство нема да бара вакцинирањето да биде услов за упис во училиштата. Во постојан контакт сме со Министерството за образование, ќе ги усогласиме ставовите. Не е точно дека работиме на тоа дека децата нема да се запишуваат во градинка или во училиште ако не бидат вакцинирани. Ќе работиме на тоа на родителите кои се скептични да им укажеме дека кај нив не треба да постои страв дека вакцините се небезбедни.

Ова го изјави денеска заменик-министерот за здравство Гоце Чакаровски, пред почетокот на одбележувањето 65 години од основањето на Институтот за белодробни заболувања кај децата, во Козле.

Иако нагласи дека индивидуално право е на секој родител да одлучи дали ќе го вакцинира своето дете, напомена и дека како Министерство за здравство мора да водат сметка за колективната безбедност, бидејќи, како што посочи, едно невакцинирано дете, а инфицирано може да биде причина за инфективно заболување кај многу дечиња.

– Ќе ги убедиме родителите дека ќе увеземе најквалитетни вакцини. Наша работа е да ги увериме дека вакцинирањето на детето е позитивна работа – рече заменик-министерот за здравство.

Министерот за здравство Венко Филипче во саботата рече дека вакцинацијата ќе биде задолжителна за упис во училиште и во градинка. По бранот бурни реакции на социјалните мрежи, излезе со нов став, објаснувајќи дека може да биде оставено да решаваат родители, но со тоа се загрозува колективниот имунитет.

Според Законот за заштита на населението од заразни заболувања, имунизацијата е задолжителна, а според членот 67 од законот, родителот што нема да дозволи неговото дете да се вакцинира, ќе биде казнет со парична казна од 300 до 650 евра.

Според член 46, став 2 од Законот за основно образование, пак, образованието исто така е задолжително, односно секое дете има право на образование, но наведува и дека кога детето се запишува во училиште треба се да приложи потврда дека е вакцинирано.


МОН: ВМРО-ДПМНЕ предизвикува вештачки кризи во образованието


Скопје, 9 октомври, 2017 - 15:45 (META) 

ВМРО-ДПМНЕ манипулира со бројки на учебници кои недостигаат, а дали за тој број на учебници им се оштетени нивните бизнис-интереси, само тие си знаат, велат од Министерството за образование и наука (МОН) на изјавата од ВМРО-ДПМНЕ во врска со недостигот од учебници во основните училишта.

„Потсетуваме дека во согласност со законските норми, учебниците се чуваат и се користат неколку години, пренесувајќи се од генерација на генерација. Зошто во некои училишта учебниците кои се користеле минатата година не им се поделени на учениците оваа година? Очигледно е дека одредени директори по нарачка на ВМРО-ДПМНЕ сакаат да предизвикаат вештачка криза. Во прилог на ова е и фактот што Македонија се соочува со тренд на намалување, а не на зголемување на бројот на ученици, па невозможно е минатогодишните количества на учебници да не можат да ги задоволат потребите на оваа генерација ученици. Исто така, во согласност со законот, доколку одредени учебници се оштетени, тие се заменуваат со нови, па објавен е и ценовник за надоместок поради оштетување на учебниците“, пишува во реакцијата од МОН.

Оттаму информираат дека одредени училишта пријавиле недостиг од учебници поради оштетување, но ниедно од нив нема уплатено надомест за оштетените учебници.

„При споредба на бројот на побарувани нови учебници со бројот на ученици, воочени се нелогичности кои отворија сомневања за мотивите за тие побарувања. Затоа беа направени дополнителни анализи на побарувањата, при што се покажа дека дел од нив се нереални и ги потврдија сомневањата“, се додава во соопштението.
Од МОН апелираат до ВМРО-ДПМНЕ да се откаже од предизвикување вештачки кризи во образованието.


Новата учебна година ќе почне на 4 септември


Скопје, 30 август, 2017 - 12:18 (META) 

Новата учебна 2017/2018 година за јавните основни и средни училишта ќе почне в понеделник, 4 септември, информираше Министерството за образование и наука.

Календарите за организација на учебната 2017/2018 година во јавните основни и средни училишта ќе бидат објавени во „Службен весник на Република Македонија“, известуваат од МОН.