!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Нема загинати и повредени македонски државјани во нападот во Манчестер


Манчестер, 23 мај, 2017 - 13:00 (META) 

Министерството за надворешни работи на Република Македонија го осуди синоќешниот терористички напад во Манчестер, во кој загинаа 22 лица, а 59 се повредени.

Од МНР информираат дека меѓу загинатите и повредените, досега не се евидентирани македонски државјани.

Министерот во заминување Никола Попоски, упати писмо со сочувство до Државниот секретар на Комонвелтот на Обединетото Кралство на Велика Британија и Северна Ирска, Борис Џонсон.

„Со длабок шок и огорченост ја примив веста за ужасниот терористички напад во Манчестер во кој настрадаа поголем број деца и млади луѓе. Република Македонија стои, рамо до рамо, во одлучна солидарност со Обединетото Кралство, неуморна во борбата за заедничката одбрана на безбедноста и слободите на нашите граѓани. Само со заедништво и меѓусебна соработка нашите нации никогаш нема да потклекнат пред ова зло.“


И МНР се изјасни: Имало повод граѓаните така да реагираат, потсетуваат на лидерската


Скопје, 28 април, 2017 - 11:47 (META) 

Министерството за надворешни работи на Република Македонија преку соопштение силно го осуди секој акт на насилство, вклучително и вчерашниот насилен инцидент во Собранието на Република Македонија и порача дека тоа никако не смее да биде начин за справување со предизвиците.

„Обидот за избор на претседател на Собранието, надвор од процедурите пропишани со Уставот и со законите на Република Македонија, како и на деловникот во Собранието, беа повод револтирана група граѓани насилно да влезе во просториите на законодавниот дом. Тоа резултираше со неколку повредени лица, меѓу кои и членови на парламентот. Со интервенција на органите на редот, сите пратеници се безбедно евакуирани, а ситуацијата е смирена“, се вели во соопштението на Министерството за надворешни работи.

Од МНР потсетуваат дека претседателот Ѓорге Иванов повика за итно одржување лидерска средба на челниците на политичките партии за наоѓање решение за политичката криза и за смирување на тензиите.

Министерството за надворешни работи на Република Македонија апелира за поддршка на дијалогот меѓу политичките чинители во рамките на институциите, со целосно почитување на уставниот поредок.


Москва: ЕУ, НАТО и САД продолжуваат бесрамно да вршат притисок врз Иванов


Москва, 3 март, 2017 - 17:27 (META) 

Надворешното мешање во внатрешните работи на Република Македонија добива екстремни форми, се вели во денешната изјава на министерството за надворешни работи на Русија, во кое се обвинуваат Европската Унија и НАТО дека вршат невиден притисок врз претседателот на Македонија.

– Еврокомесарот Јоханес Хан, високиот претставник за надворешна и безбедносна политика на ЕУ, Федерика Могерини, генералниот секретар на НАТО, Јенс Столтенберг, и други претставници на т.н. „просветлена Европа“, продолжуваат бесрамно да вршат невиден притисок врз македонскиот претседател Ѓорге Иванов, барајќи од него премиерскиот мандат да го даде на опозицијата, која ја прифати ултимативната „албанска платформа“ – велат од руското МНР.

Оттаму нагласуваат дека важно е да се „сфати дека мерките формулирани во Тирана подразбираат федерализација на Македонија, прераспределба на власта и на државните симболи и водат до подривање на уставниот поредок со крајна цел – дезинтеграција на државата“.

Кон поведението на европските претставиниците, како што оценува руското МНР, се приклучил и претседателот на „самопрогласената држава Косово, Хашим Тачи, кој недвосмислено ги повика македонските Албанци „да ги преземат работите во свои раце“ што води кон создавање „Голема Албанија“, која претендира на делови од неколку балкански земји, вклучувајќи ја и Македонија“.

– Ова е уште еден доказ дека вештачки создадениот косовски субјект е еден од главните извори на нестабилност и главен носител на конфликтен потенцијал на Балканот. Македонците треба сами, без мешање однадвор, да решаваат за својата судбина – велат од министерството за надворешни работи на Русија.

Инаку, со заострувањето на состојбата во Македонија и со протестите околу доделувањето на мандатот за состав на нова влада, зачестија реакциите на официјална Москва.


МНР за „Мета“: Дачиќ се плаши изливите на шовинизам да ги насочи кон големите сили


Скопје, 21 јануари, 2017 - 12:10 (META) 

Министерот за надворешни работи на Србија, Ивица Дачиќ, се плаши своите изливи на шовинизам да ги изрази кој најголемите сили кои го признаа Косово, па затоа се конфротира со најмалите земји во Европа, велат за „Мета“ од Министерството за надворешни работи на Македонија, по последната изјава на шефот на српската дипломатија во која се прашува зошто Република Македонија членува во меѓународни организации под референца, а не под уставно име.

„Да го прашаме Дачиќ зошто вака не се пресметуваат со сите земји што го признаа Косово, како САД, Германија, Велика Британија, традиционално пријателската Франција, со Италија со која имаат заеднички седници на влада итн. Да ги прашаме зошто не направат исти гестови кон стотина земји во светот што го признаа Косово и зошто со колегите од сите овие земји Дачиќ остварува средби? Зошто преговараат со Европската Унија, каде повеќе од 80 отсто од земјите го признаа Косово? Зошто се труди да има добри државни и лични пријателски односи со Меркел, Оланд, Меј и со нивните министри за надворешни работи, земји кои во првата група го признаа Косово? Зошто токму сега, пред претседателските избори во Србија, му текна да се конфронтира само со најмалите земји во Европа, како Македонија или Црна Гора? Дали, можеби, Дачиќ се плаши истите негови изливи на шовинизам да ги изрази кон другите 134 земји, а особено кон најголемите сили? Дефинитивно, Дачиќ може да најде и подостоинствен начин да им се претстави на српските гласачи“, коментираат од македонското МНР.

Дачиќ вчера, по повод барањето на македонското МНР да не се користи референцата БЈРМ на патарините, затоа што е навредлива, изјави дека и за Србија е навредливо користењето на називот „Република Косово“. Тој притоа праша зошто Македонија не ги напушти Обединетите нации, Советот на Европа, ОБСЕ и состаноците со ЕУ, каде фигурира под референцата БЈРМ.

– Зошто седат под тоа име, а сега им е проблем признаницата на која истото го пишува? Србија не го сменила својот став за признавање на Македонија, но и за Србија е навредливо и срамно кога тие велат „Република Косово“ – рече Дачиќ.

Шефот на српската дипломатија на почетокот од годинава во интервју за новинската агенција „Бета“ рече дека Србија згрешила што ја признала Македонија под уставното име, бидејќи Македонија ја признала независноста на Косово. Тој рече дека во билатералните односи со Скопје ќе го употребува уставното име, но дека мултилатерално ќе ја користи кратенката БЈРМ, која ја употребуваат ЕУ и ОН.


Грција и Македонија одржаа нов состанок за мерките за градење доверба


Скопје, 24 ноември, 2016 - 15:40 (META) 

Грција и Македонија продолжуваат со состаноците за мерките за градење доверба. Како што информира грчкото министерство за надворешни работи, претставници на двете министерства вчера во Скопје го одржале петтиот состанок за мерките со кои двете држави работат на зајакнување на довербата и на соработката.

Претставниците на двете министерства се фокусирале на однапред договорени теми, како подоброто меѓусебно поврзување, зајакнување на полициската соработка, европските програми, културна и образовна соработка. Се разговарало и за подобра цивилна заштита, соработка меѓу јавната администрација, здравството, како и соработка меѓу дипломатските академии на двете министерства. Акцент бил ставен и на продлабочувањето на трговската соработка.

Следната средба за мерките за градење доверба ќе се одржи на почетокот на 2017 година во Атина.

Меѓу мерките за градење доверба, кои беа потпишани летото 2015 година, беше потпишан и меморандум за изградба на гасоводна врска меѓу двете земји.


МНР чека податоци од Париз за можни настрадани Македонци во Ница


Скопје, 15 јули, 2016 - 10:42 (META) 

Министерство за надворешни работи чека од француското МНР податоци во врска со тоа дали меѓу загинатите и повредените во нападот во Ница има македонски државјани.

Како што соопштија од МНР за „Мета“, во текот на денот се очекуваат повеќе детали.

Возач со камион синоќа влета на шеталиштето во Ница, за време на прославата на Денот на Бастиља, при што уби 84 лица, а повреди неколку десетици. Француските власти засега немаат податоци за националноста на загинатите и на повредените.

Засега никој не ја презеде одговорноста за нападот, кој го извршил Французин со потекло од Тунис.


Штајнмаер: Сè поголемата нестабилност ја оддалечува Македонија од ЕУ и од НАТО


Берлин, 28 април, 2016 - 20:37 (META) 

Се надевам дека политичките партии во Македонија разбираат дека сè поголемата нестабилност ќе го направи патот на земјата кон Европската унија и кон НАТО многу тежок, вели шефот на германската дипломатија, Франк Валтер Штајнмаер.

Пораката на Штајнмаер до партиите во земјава што го потпишаа Договорот од Пржино за излез од кризата, попладнево ја објави германското министерство за надворешни работи на својот твитер-профил.

Реакцијата на Штајнмаер и на Германија е една од ретките, ако не и единствената оваа недела, кога во земјава се зголемува неизвесноста во врска со политичката криза и секојдневно на улиците има протести против одлуката на претседателот Ѓорге Иванов за аболиција на функционери и на нивни блиски соработници.


Македонија и Грција ги продолжуваат разговорите за мерките за градење доверба


Скопје, 26 април, 2016 - 10:04 (META) 

Македонија и Грција одржаа нова рунда разговори околу мерките за градење доверба. Состанокот се одржа во Скопје, а делегациите на двете министерства за надворешни работи се фокусираа на различни прашања од билатерален интерес, како академската соработка, енергетски прашања, економија, продлабочување на соработката меѓу двете министерства.

Како што информираат од грчкото министерство за надворешни работи, разговорите се одржале во пријателска и конструктивна атмосфера. Подетално се разговарало за развивање на соработката и околу енергетските прашања, транспортната и патната мрежа, бегалското и миграциското прашање. Двете страни се фокусирале и на идеи за поголема соработка во рамки на европските програми ИПА2 и Инструментот за техничка поддршка и за размена на информации на Европската комисија (ТАИЕКС), како и за можноста за заеднички проекти во рамки на економијата, здравството, културна размена, јавна администрација, политичка заштита.

Една од клучните теми била и академската соработка, а како разултат на разговорите во рамки на мерките за градење доверба е потпишан и меморандум за разбирање меѓу охридскиот Универзитет „Св. Аполстол Павле“ и Универзитетот „Пиреја“ во Атина.

Следната рунда разговори околу спроведувањето на мерките е договорено да се одржи во јуни во Атина, во грчкото министерство за надворешни работи.

Разговорите околу мерките доаѓаат по период на тензична клима на индиректни конфронтации меѓу двете страни околу бегалската криза. Грција ја обвинуваше Македонија за неевропско однесување поради кревањето на оградата и затворањето на преминот за бегалците, додека македонската страна критикуваше дека Грција доцни со расчистување на Идомени, не ги брани добро границите и дозволува да се случат инциденти и илегално преминување на македонската страна.

Тензијата се намали на солунскиот Регионален самит за справување со бегалската криза, на кој двајцата шефови на дипломатиите, Никос Коѕиас и Никола Попоски, имаа и формална едночасовна тет-а-тет средба и неформални разговори за време на работната вечера, околу зајакнувањето на билатералната соработка.


Попоски: Дипломатите треба да се фокусираат на ЕУ, НАТО и на спорот за името


Скопје, 1 февруари, 2016 - 17:03 (META) 

Министерот за надворешни работи, Никола Попоски, денеска по протестот на Синдикатот на дипломатите реагираше дека со измените и со дополнувањата на законите од 2008 и од 2013 година се зајакнуваат критериумите за сите што сакаат да станат дипломати, така што зголемени се очекувањата за знаење и за стекнување нови вештини.

Според Попоски, во министерството работат совесни дипломати, одлични професионалци кои си го знаат занаетот и најдобро знаат како да ја претстават Македонија во светот.

„Во изминативе години, прво воведовме исполнување на многу високи стандарди на професионалност за сите што се вработени во МНР. Направено е на секое упатување на мандат да биде упатено лицето кое е најконкурентно за таа позиција и наметната е потреба за прилагодување кон современите потреби за занимавање со дипломатија од страна на сите“, рече Попоски.

Според него, фокусот на работата на сите дипломати треба да бидат предизвиците со кои се соочува Македонија последните години, како мигрантската криза, ЕУ и НАТО – интегративниот процес и спорот за името.


Дипломатите со предупредувачки протест пред МНР


Скопје, 1 февруари, 2016 - 12:40 (META) 

Синдикатот на македонската дипломатија денеска во 12.05 часот, пред Министерството за надворешни работи во Скопје одржа предупредувачки штрајк за, како што велат, проблемите што со години се таложат во оваа сфера.

Претседателот на синдикатот, Сашко Тодоровски, вели дека симболиката на овој протест е јасна.

– Денеска сакаме да го искористиме уставното право за да го изразиме незадоволството поради кое сме доведени во ваква состојба. Протест на дипломатите е преседан во 53-годишното постоење на оваа служба. Ние моравме да се одлучиме на ваков чекор затоа што на барањето за дијалог со Министерството за надворешни работи наидувавме на молк – рече Тодоровски.

Според него, има повеќе причини за овој протест, а една од нив е таа што економските промотори имаат поголемо овластување од дипломатските претставници.

– Кога економските промотори се пожалија на висината на надоместокот за сместување, Министерството им излезе во пресрет и веднаш со законски измени им дозволи неограничен лимит за надоместокот за сместување. Тоа не важни и за дипломатските претставници низ светот. Со тоа Македонија создава посебна дипломатска мрежа, која е паралелна со официјалната предводена од МНР – изјави Тодоровски.

За хаосот во МНР, вели тој, сведочат и многубројни нарушувања на нормалното функционирање на дипломати кои имаат стаж повеќе од десет години. Тој, исто така, посочи на нерегуларности кои се прават во дипломатско-конзуларните претставништва, меѓу кои се: дипломатите да не се пријавуваат во тамошното МНР, злоупотреби на функциите, како и најголемата злоупотреба – делење пасоши надвор од амбасадите. Тодоровски рече дека доколку нивните барања за враќање на стариот закон од 2006 година и дијалогот со надлежните од МНР не се остварат, ќе ги преземат сите мерки што подразбираат и порадикален пристап.

Поддршка на протестот му дадоа и претставници на дипломатскиот клуб.