Адеми: Поголем буџет за културни активности и нови вработувања во 2019 година


Скопје, 27 ноември, 2018 - 14:46 (META) 

Министерот за култура Асаф Адеми денеска на прес-конференција во Владата го претстави предлог-буџетот на Министерството за култура за 2019 година, за кој порача дека ќе овозможи услови за квалитетни културни содржини од сите области на културата, кои ќе бидат дисперзирани низ целата земја. Истовремено, тој најави и 107 нови вработувања во институции кои работат на полето на албанската култура и покачување за пет отсто во однос на септември годинава на платите на вработените во Министерството за култура и за вработените во културните институции.

На почетокот Адеми подвлече дека основна заложба и визија на Министерството за култура е тоа да биде отворено за граѓаните и да им служи на културните институции и културните работници во земјава, со нула толеранција за злоупотреби во министерството, но и во сите институции од областа на културата.

Предлог-буџетот на култура за 2019 година изнесува малку повеќе од 3,14 милијарди денари (51 милиони евра), од кои за работата на Министерството се наменети 215 милиони денари (3,5 милиони евра), односно околу осум отсто од вкупниот буџет.

Според министерот, во однос на претходните години, сега за финансирање културни активности се предвидени 32 милиони денари повеќе отколку во претходните години.

За Агенцијата за филм се предвидени 170 милиони денари, што е зголемување од над 13 отсто во однос на минатата година, а за 13 отсто се зголемени и средствата за фолклорната и сценско-уметничката дејност.

Во делот Капитални инвестициски проект планирана е реконструкција на центрите за култура во Гостивар, на театарот во Куманово, на театарот во Прилеп или доградба на објектот на ЦК Прилеп за потребите на театарот, реконструкција на ЦК Кочани (втора фаза). Предвидена е реконструкција на покривот на стариот дел од објектот на НУБ „Св. Климент Охридски“ – Скопје, како и нова транша пари за реконструкцијата на објектот на Албанскиот театар, но и за изградбата на објектот на театарот и библиотеката во Тетово, за театарот во Струмица како и за реконструкција на други објекти.

Обезбедени се и пари за 80 нови вработувања во НУ Ансамбл на албански ора и песни и 27 за новоформираниот Гостиварски театар.


Алаѓозовски: Повлечени 10 проекти од Годишната програма за култура за 2018


Скопје, 16 април, 2018 - 11:34 (META) 

Десет проекти од Годишната програма на Министерството за култура за 2018 година со вкупна вредност од осум милиони и 500.000 денари се повлечени по ревизијата на Комисијата од Министерството, информираше денеска министерот за култура Роберт Алаѓозовски при посетата на затворот Шутка.

– Во овој момент комисиите ги разгледуваат и одлучуваат по однос на приговорите. Начинот на којшто ќе можеме да одговориме на приговорите ќе зависи од достапните средства што ќе ги имаме на располагање – рече Алаѓозовски на новинарско прашање за проектите од Годишната програма за кои имаше реакции во јавноста и за кои беше побарана ревизија.

Во однос на најавата на градоначалникот на општина Центар Саша Богдановиќ за отстранување на четири споменици, министерот рече дека тоа е работа на општината и дека се работи за споменици од проектот Скопје 2014.


Поништен конкурсот за откуп на класични композиции за 2017 година


Скопје, 29 март, 2018 - 16:54 (META) 

Министерството за култура соопшти дека конкурсот за откуп на класични композиции за 2017 година, објавен на 6 април минатата година, се поништува поради административни пропусти во неговото спроведување. Конкурсот ќе биде повторен.

Министерството ќе поведе соодветни дисциплински постапки за службите задолжени за спроведување на конкурсот, за да се утврди одговорноста за направените пропусти.

Според соопштението, објавените резултати на 18 јануари годинава на официјалната веб-страница не биле тоа, туку само предлози на комисијата, кои не биле одобрени од министерот.


Алаѓозовски: Ќе ја тргнеме државната заштита на незаконски впишаните споменици


Скопје, 20 февруари, 2018 - 16:23 (META) 

Со усвојувањето на Стратегијата за развој на културата 2018 – 2022 и aкцискиот план, Владата отвори процес на темелни реформи,  преструктуирање и обнова на културниот систем во Република Македонија, порача министерот за култура на прес-конференција на која ги презентираше двата документа.

Тој најави и бришење од регистарот на сите незаконски впишани споменици.

– Во изминатите месеци спроведовме повеќе институционални акции, со кои го спречивме пропаѓањето на културниот систем во повеќе сегменти и непродуктивното трошење на парите на граѓаните. Поконкретно, изменивме четири закони, го запревме пропаѓањето на културното наследство, ги оневозможивме клиентелистичките привилегии и стопиравме да се одлеваат пари за „Скопје 2014“. Подготвивме буџет и спроведуваме активности со кои ги враќаме долговите за да спречиме огромни камати, ги санираме објектите на културата и овозможуваме проекти на голем број актери во културата – рече министерот за култура.

Како што најави Алаѓозовски, ќе се поддржат иницијативи за отворање нови културни установи или преземање на постоечките од страна на општините. Планирана е и анализа на состојбите во установите и Управата за заштита на културното наследство. Ќе се изработи стратегија за заштита и подготовка на нов закон за заштита на културното наследство.

Се планира и бришење на незаконски впишани споменици во регистарот.

– Во 2018 година ќе спроведеме и ревизија и бришење од регистарот на сите незаконски запишани споменици и објекти од т.н. проект „Скопје 2014“, кои по својата природа не можат да претставуваат културно наследство – рече министерот за култура, најавувајќи и поддршка на граѓанскиот и на независниот културен сектор,  интердисциплинарните уметности и културните и креативните индустрии.


СОНК: Државните пари се трошат нефукционално


Скопје, 13 февруари, 2018 - 14:04 (META) 

Самостојниот синдикат за образование, наука и култура на Република Македонија (СОНК), се огласи со реакција на распределба на буџетските пари во културата на граѓанските организации. Велат дека станува збор за нефукционално трошење државни пари во дел од проектите.

„Всушност со ништо не ја отсликуваат, презентираат или воздигнуваат културата во Република Македонија, особено не преку финансирање на проекти кои во најмала рака се сомнителни во оправданоста да бидат одобрени преку ова Министерство, како и проекти кои се поднесени од членови на комисии и кои одлучуваат за доделување на средства за туѓи, но и за свои апликации“, се вели во реакцијата.

Во писмото од Синдикатот се вели дека има огромно разочарување кај „културните работници кои се вработени во установите од културата, а кои реално се едни од најслабо платените работници во Јавниот сектор и очигледно се заборавени од страна на државата“.

СОНК апелира до Министерството за култура итно да продолжат преговорите за потпишување на колективниот договор, како и обезбедување на пари за негова реализација.

„Се чини дека Министерството за култура не е заинтересирано да го потпише и имплементира колективниот договор за култура, со тоа и да се надмине проблемот со различните плати во оваа дејност, воедно и да се подигне висината на платите на ниво со кое што на културните работници ќе им се врати достоинството на нивната професијата“, порачува Синдикатот.


Програмата за култура поголема отколку досега


Скопје, 10 февруари, 2018 - 14:30 (META) 

Министерството за култура на Република Македонија денеска, објавуваќи ги Годишната програма и резултатите од Годишниот конкурс за финансирање на проекти од национален интерес во културата за 2018 година, рече дека во програмата нема повеќе партиска, идеолошка или каква било друга негативна селекција.

Покрај тоа, годинава пристигнале барања за многу повеќе проекти од претходно, рече министерот Роберт Алаѓозовски.

– Имаме зголемен интерес за културни проекти,  правичност и диверзитет во распределбата и силна поддршка за уметниците и културните работници, согласно интересот на граѓаните. Обезбедивме силна поддршка за културни проекти кои градат едно општество за сите,  децентрализација на културата и еднаков пристап до неа, за сите граѓани подеднакво. За илустрација – во ликовната, музичката, фолклорната и драмската дејност, во 2016 година беа пристигнати 1.556, во 2017 година 1.593 проекти, а на годинашниот конкурс пристигнаа 2066 проекти – 500 проекти повеќе, или над 25% пријави повеќе! Тоа покажува дека е зголемена довербата во институцијата и успешноста во популаризацијата на конкурсот во јавноста – рече министерот Алаѓозовски.

Програмата овозможува простор за сите уметници и за сите манифестации што имаат повеќегодишна традиција. Зад одлуките за неизбор стојат автономно конкурсните комисии и нивните образложенија за неисполнување на критериумите и потфрлање на квалитетот, појасни Алаѓозовски.


Обвинителството се откажало од гонење на Богоевски за фрлање боја


Скопје, 17 јануари, 2018 - 20:52 (META) 

Oбвинителството се откажало од кривичен прогон на пратеникот Павле Богоевски за фрлање боја врз објектот на Министерство за култура во текот на протестите од Шарената револуција, објави на „Фејсбук“ адвокатското друштво „Давидовиќ и Јанковиќ“.

На денешното судско рочиште, како што напишаа тие, се утврдило дека никој нема право без одобрение на Заводот за заштита на спомениците на културата да презема какви било дејствија врз заштитениот објект, а уште помалку да го вештачи, а објектот веќе бил оштетен со неовластено варосување.

„Се утврди дека единствена надлежна и лиценцирана институција за утврдување на штета на вакви објекти е Заводот за конзервација. Тие формираа комисија и утврдија две работи- зградата на Министерството е без одобрение и проект искречена по нарачка на министерството и нанесена е огромна штета која при отстранување на бојата може да нанесе структурална штета на ѕидовите на зградата, и второ, бојата од Шарената револуција се мие со вода и сапун, штетата е 15.000 денари и најважно од се НЕ МОЖЕ ДА СЕ ОШТЕТИ ВЕЌЕ ОШТЕТЕНА ФАСАДА. Обвинителството го повлече обвинението“, напишаа адвокатите.


МРТ ќе ги поништи последните одлуки за субвенции за домашна музичка продукција


Скопје, 17 јануари, 2018 - 11:51 (META) 

Македонската радио-телевизија (МРТ) ќе ги поништи одлуките за избор и одлуките за неизбор по основ на Вториот и Третиот квартал од Конкурсот за поддршка на домашната музичка продукција за 2017 година, соопштија денеска од Министерството за култура.

„На вчерашниот состанок во Министерството за култура меѓу претставници на Министерството за култура и Македонската радио-телевизија заеднички беше констатирано дека актуелниот Закон за поддршка на домашната музичка продукција е тешко применлив и дека не ја исполнува функцијата за која е донесен. Исто така, констатирано е дека Македонската радио-телевизија, по спроведениот надзори по насоките дадени од страна на Министерството за култура ќе пристапи кон поништување на одлуките за избор и одлуките за неизбор по основ на вториот и третиот квартал од 2017 година“, информираат од Министерството.

Претставниците на Министерството за култура и МРТ се договориле во иднина заеднички да ги координираат активностите во насока на поддршка и развој на домашната музичка продукција.


Министерството за култура ќе ги преиспитува музичките субвенции на МРТВ


Скопје, 11 јануари, 2018 - 20:39 (META) 

Министерството за култура соопшти дека ќе ја преиспита законитоста на одлуките на Македонската радио-телевизија (МРТВ) од 5 јануари за доделените субвеници за поддршка на домашната музичка продукција.

Во врска со објавените резултати и одлуки на МРТВ по објавениот конкурс според Законот за поддршка на домашната музичка продукција, од Министерството информираат дека минатата година биле извршени јавни консултации со повеќе засегнати страни од кои произлегол заклучок дека законот треба да се укине.

„Министерството за култура подготви предлог–закон за престанување на важењето на Законот за поддршка на домашната музичка продукција, кој со допис го достави и побара мислење и од МРТВ. Во таа насока, на 27 декември Министерството за култура доби позитивен одговор од МРТВ, во кое се вели дека МРТВ ќе се ослободи од обврска која не влегува во нејзината основна дејност и работење утврдени со Законот за аудио и аудиовизуелни медиумски услуги“, стои во соопштението на Министерството.

Со овие одлуки на МРТВ, додаваат оттаму, се создаваат дополнителни непредвидени финансиски импликации и долгови врз буџетот за култура и посочуваат дека во моментов, Министерството за култура ги анализира финансиските импликации со кои ќе се оптовари буџетот.

„Министерството за култура до Владата веќе го поднесе предлог-законот за престанување на важењето на Законот за поддршка на домашната музичка продукција, со клучни аргументи дека овој Закон не придонесе за зголемување на квалитетот, ниту пак донесе до напредок и развој на музичката продукција и индустрија. За жал, повеќето од композициите воопшто не наидоа на прием ниту беа слушнати од поширока јавност, а ниту беа промовирани и емитувани интензивно на македонските радија и телевизии“, стои во соопштението.


Кривична пријава против Канческа – Милевска и нејзини поранешни соработници


Скопје, 28 декември, 2017 - 13:22 (META) 

Управата за финансиска полиција поднесе кривични пријави против поранешната министерка за култура, Елизабета Канческа – Милевска, нејзиниот заменик Драган Недељковиќ и против Ѓ.Т., државен советник за финансиски прашања и раководител на сектор за финансии во Министерството за култура, информираат од таму.

Кaнческа-Милевска и нејзините соработници се осомничени за кривично дело несовесно работење во службата и причинување штета на буџетот во износ од 2.770.640 евра.

„Во периодот од јули 2009 до февруари 2017, тројцата осомничени со пропуштање должен надзор, несовесно постапиле во вршењето на своите овластувања и должности, на начин што спротивно на член 581 став 2 од Законот за трговски друштва, кој децидно наведува странски друштва не можат да вршат дејност на територијата на Македонија се додека не организираат подружници, примиле времени ситуации – фактури од странскиот правен субјект „Светлост Театар“ ДОО Белград, кој не е регистриран даночен обврзник во Македонија“, се вели во соопштението на Управата за финансиска полиција.

Како што појаснуваат од таму, во фактурите, незаконски бил вкалкулиран дополнителен износ претставен како данок на додадена вредност (ДДВ) од 18 проценти, при што, министерот и заменик-министерот потпишале шеесет и четири решенија за исплата на средства, а раководителот на сектор за финансиски прашања потпишала налози за исплата на парични средства на штета на буџетот на Македонија, со кои извршиле плаќање во странство врз основа на 11 договори за извршување услуги, стоки и работи.

„Притоа, спротивно на член 14 став 2 од законот на ДДВ, извршиле противзаконска исплата на ДДВ надвор од границите на Македонија, иако извршените услуги, стоки и работи од страна на ‘Светлост Театар’ ДОО Белград се спроведени на територијата на Македонија“, се додава во соопштението на Управата.