!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Бектеши и Петкова во Бугарија разговараат за енергетско и за инфраструктурно поврзување


Софија, 24 октомври, 2017 - 14:34 (META) 

Министерот за економија, Крешник Бектеши, е во официјална посета на Бугарија, на покана на бугарската министерка за енергетика, Теменужка Петкова.

На средбата, двајцата министри ја истакнале добрата соработка помеѓу двете земји во областа на енергетиката, безбедноста на снабдувањето со енергија, диверзификацијата на енергетските извори, како и важноста на новите интерни врски и регионалната соработка.

„На состанокот беше особено истакнато преземањето на претседателство со Советот на Европската Унија од страна на Бугарија од 1 јануари 2018 година, со фокус на Западен Балкан, при што бугарската страна изрази подготвеност да ја поддржи Македонија во инфраструктурните инвестиции во областа на енергијата и нејзиниот пат кон интеграција во структурите на ЕУ“, информираат од Министерство за економија.

Според бугарската министерката за енергетика, за Балканскиот Регион голем проблем е недоволната инфраструктура, а Бугарија активно работи на надминување на овој недостаток.

За време на престојот на министерот Бектеши во Софија, се одржа и првиот состанок на работната група помеѓу македонските и бугарските делегации во рамките на меморандумот за соработка во областа на природниот гас, потпишан на 1 август во Скопје.

Тогаш се разговараше и за можностите за изградба на нова интерна врска меѓу Македонија и Бугарија на полето за природен гас, вклучувајќи ги и техничките, финансиските и регулаторните аспекти на нејзиното градење.


Заев би го вратил Таравари на министерската функција ако не стане градоначалник


Скопје, 15 септември, 2017 - 20:51 (META) 

Премиерот Зоран Заев е подготвен да го врати Арбен Таравари за министер за здравство ако тој изгуби во градоначалничката трка, без оглед што самиот си поднесе оставка. Гостувајќи во емисијата „Топ-тема“, Заев рече дека не е проблем Таравари да се врати ако загуби на изборите, оти демократијата подразбира право за битка за гласовите на граѓаните.

Тој нагласи дека, пред сè, локалните избори се битка на личности.

– Во овој човек гледам квалитетен министер. Оставете ги луѓето слободно да ги донесуваат одлуките. Мојата демократска поставеност како шеф на оваа влада има граници. Да не преминеме во диктаторство. Не би сакал да се откажам од квалитетен човек ако изгуби – порача Заев.

 


Таравари: Ако гостиварци не ми веруваат, се враќам на лекарската професија


Скопје, 10 септември, 2017 - 10:59 (META) 

Министерот за здравство во заминување, Арбен Таравари, во неделното интервју на „Радио Слободна Европа“ зборува за проблемите во ресорот што ги затекна и со кои се справуваше, како и за својата кандидатура за градоначалник на Гостивар.

– Сега е моментот да видам колку тежам и вредам во мојот град. Ако тие ми веруваат и ми дадат гласови, ќе знам дека вредам во политиката. Ако не ми дадат гласови и мислат дека не треба да продолжам во политиката, јас си имам златен занает – вели министерот за здравство во заминување.

Арбен Таравари, кој важи за истакнат стручњак во својата професија, верува дека во Министерството за здравство ќе има континуитет по него.

– Точно е дека нема да стигнам да ги видам првите резултати од тримесечното работење на директорите, меѓутоа јас мислам дека во Министерството ќе има континуитет и за тоа гарантирам, и во здравствените политики и во идеите што јас ги почнав во првите 100 дена, така што, кој било да е мој наследник, јас се надевам дека тој ќе продолжи по истиот пат, ќе се трасираат и ќе се очекуваат истите резултати што јас ги почнав во првите 100 дена, така што граѓаните нема да почувствуваат дека има некаква промена, само личноста ќе биде друга – вели Таравари.

Запрашан за смртните случаи во текот на неговото министерување, вклучително и за мртвороденчињата, Таравари вели дека комисијата формирана уште пред неговиот мандат, а потоа преоформена во нов состав, треба да даде решенија, односно препораки.

– Пред јас да дојдам за министер, имаше комисија која требаше да ги разгледува овие случаи и да направи одреден акциски план, меѓутоа, за жал, таа комисија не се имаше сретнато речиси две години. Сега направивме нова комисија која ќе се занимава само со смртта на доенчиња. Комисијата ќе даде одреден акциски план, кој Министерството ќе треба да го спроведе, сè со цел до 2021 година да имаме како предизвик да ја намалиме смртта на доенчињата до 20 отсто. Не само Министерството, туку и повеќе невладини организации во Македонија ни стојат на располагање за ова, бидејќи еден од индикаторите кој кажува колку е добра и стабилна здравствената политика во една држава е смртноста на доенчињата. Комисијата веќе е назначена, тие што поскоро треба да дадат одредени чекори и мерки што треба да ги преземеме ние како администрација за да ја достигнеме таа цел, да ја намалиме смртта на доенчињата за 20 отсто за четири години – вели министерот за здравство во неделното интервју за „Радио Слободна Европа“.


Николовски во Кавадарци вети дополнителни субвенции за лозарите


Кавадарци, 9 септември, 2017 - 19:59 (META) 

Mинистерот за земјоделство, шумарство и водостопанство, Љупчо Николовски, денеска соопшти дека на првата наредна седница Владата ќе донесе одлука за дополнителни директни плаќања за произведено и предадено грозје во домашните винарски визби.

Тој беше во Кавадарци на традиционалната манифестација во чест на грозјето и виното „Тиквешки гроздобер“.

– Висината на субвенцијата ќе биде определена на самата седница на Влада. Со оваа мерка ќе бидат опфатени сите земјоделски стопанства што до 15 септември пријавуваат површини за лозје и кои произведеното и предадено грозје ќе го дадат во домашните винарски визби – рече Николовски.

Како што рече, според податоците од Државниот инспекторат за земјоделство, заклучно со 5 септември откупени се околу 16 милиони килограми грозје, од кои најголемиот дел се од сортите вранец и смедеревка.

– Би сакал да им порачам на лозарите дека грозјето од годинешната реколта ќе биде целосно откупено од винарските визби, а исплатата за откупеното грозје ќе се реализира според законските одредби и прописи. Државниот инспекторат за земјоделство ги зајакнува контролите на откупните пунктови на грозје за да нема манипулации со откупните цени – рече министерот за земјоделство.

Порача дека уште во првите 100 дена на новата влада се зголемени субвенциите за одржување на лозови насади за 10 отсто по хектар, како и дека за одржување на површини со лозови насади по Програмата за 2016 година се исплатени 8,7 милиони евра, а за вкупно 13 винарски визби за откупено грозје се исплатени субвенции од 700.000 евра.


Сугарески се пофали со 188 милиони евра грантови обезбедени за 100 дена


Скопје, 9 септември, 2017 - 17:10 (META) 

За само 100 дена успеавме да обезбедиме 188,4 милиони евра грантови – неповратни средства за подобрување на патната, железничката и на комуналната инфраструктура, рече министерот за транспорт и врски, Горан Сугарески, денеска во своето обраќање до јавноста по повод 100 дена на функцијата.

Тој рече дека би можел со часови да зборува за ситуацијата што го затекнала него и неговиот тим по стапувањето на функцијата, но нема намера да зборува за тоа.

– Но, денеска нема да зборувам за лажните ветувања на претходната влада, ниту пак ќе се жалам. Едноставно, тоа не сум јас и тоа не е мојот стил на работа. Заедно со мојот тим ги детектиравме аномалиите и се фативме во костец со проблемите. Се посветивме на наоѓање решенија, притоа не обрнувајќи внимание на критиките на тие што имаа 10 години на располагање да покажат што знаат и умеат. Не е наше да се занимаваме со тие што ја изгубија довербата на граѓаните и ги изневерија очекувањата, наше е да сработиме и да исполниме тоа што сме го ветиле – рече Сугарески.

Тој порача дека Република Македонија станала дел од Транспортната заедница, составена од земјите од Западен Балкан и ЕУ, како и со воведување нови авионски линии. Рече и дека е работено за успешно заокружување на проектот за легализација на дивоградби преку воведување на принципот на праведност и на достапност до сите граѓани еднакво.

Сугарески се пофали со 131 милион евра неповратни средства од ЕУ за доизградба на пругата кон Бугарија, односно 70 милиони евра на самитот во Трст за делницата од Бељаковце до Крива Паланка и преку Оперативната програма за транспорт 2014-2020 од Европската Унија, уште речиси 61 милион евра за последниот дел, односно делницата од Крива Паланка до Деве Баир.

– Со меморандумот што го потпишавме со Министерството за транспорт и комуникации на Бугарија се обврзавме и двете земји најдоцна до 2027 година да имаме изградено комплетно нова пруга со што ќе го засилиме економскиот развој на регионот – рече Сугарески.

Тој ја спомена и изградбата на пругата од Битола до Кременица, како и повеќе патишта, односно, како што рече, отстранети се проблемите и ќе продолжат изградбите на експресните патишта и автопатиштата, како и патишта од понизок ранг.


Хан на средба со Димитров во Талин дал поддршка за владините реформи


Талин, 8 септември, 2017 - 14:39 (META) 

На маргините на неформалниот состанок на министрите за надворешни работи на земјите членки на Европската Унија и на земјите кандидати за членство во ЕУ во Талин, денеска шефот на македонската дипломатија, Никола Димитров, имал средба со еврокомесарот за проширување Јоханес Хан, соопшти македонското министерство за надворешни работи.

„На средбата шефот на македонската дипломатија го запозна еврокомесарот со досега постигнатото во првите 100 дена од Владата на Република Македонија, кој пак го поздрави напредокот и даде поддршка на процесот, како и на европските чекори и добрососедството на новата надворешна политика“, стои во соопштението.

Исто така, министерот Димитров учествувал и на работниот ручек со земјите кандидати, на кој се дискутирало за политиката на ЕУ за проширувањето и за статусот на реформи во земјите кандидати. Притоа Димитров разговарал со  колегите од Бугарија, Грција, Холандија, Велика Британија и од Словенија.

Неформалниот состанок беше организиран од високата претставничка за надворешни работи и за безбедносна политика на ЕУ, Федерика Могерини, и од министерот за надворешни работи на Република Естонија, Свен Миксер, а во неговата главна програма беа дискусии за спречувањето и за борбата против радикализацијата и насилниот екстремизам, како заеднички безбедносни предизвици за земјите членки на ЕУ и земјите кандидати.

– Интеграцијата на нашиот регион во ЕУ е исклучително важна за безбедноста на Европа. Насилниот екстремизам, радикализам и тероризам не познава граници. Затоа, нашиот заеднички одговор мора да биде единствен и целосно координиран – истакнал шефот на македонската дипломатија на состанокот.

Тој  изразил благодарност на естонското претседателство со Советот на ЕУ за поддршката кон политиката на ЕУ за проширувањето, додавајќи дека оваа политика на Унијата треба да се смета како комплементарно средство на нејзината безбедносна политика и ја реафирмира заложбата на Македонија за постигнување на суштински напредок во имплементацијата на реформите.


ВМРО-ДПМНЕ поднесе интерпелација и за Садула Дураку


Скопје, 11 август, 2017 - 15:33 (META) 

Пратениците од ВМРО-ДПМНЕ и од Коалицијата за подобра Македонија денеска поднесоа интерпелација за министерот за животна средина и просторно планирање, Садула Дураку.

Тоа е петтиот министер од владата на Зоран Заев за кого опозициската коалиција неделава поднесува интерпелација.

За интерпелацијата на Дураку, пратениците како причина го наведуваат тоа што тој е „виновен за крајната негрижа и неодговорност за животната средина“. На товар му ставаат дека „повеќе од три месеци граѓаните на Струга живеат во канцероген чад, граѓаните на Тетово и на Куманово мака мачат со дивите депонии, додека една третина од територијата на Република Македонија е во пламен и се кратат средства од буџетот за рехабилитација на деца кои биле жртви на загадувањата во нивните средини“.

– За сето ова ниту една институција не смогна сили да им излезе во пресрет на граѓаните бидејќи за Владата и за Министерството за животна средина и просторно планирање приоритет се партиските вработувања и назначувањето на неспособни и некомпетентни директори и функционери во институциите – рече пратеничката на ВМРО-ДПМНЕ, Лилјана Затуроска, образложувајќи ја интерпелацијата.


ВМРО-ДПМНЕ поднесе интерпелација за министерот Љупчо Николовски


Скопје, 7 август, 2017 - 14:50 (META) 

Пратениците на ВМРО-ДПМНЕ денеска во Собранието поднесоа интерпелација за работата на министерот за земјоделство, шумарство и водостопанство, Љупчо Николовски.

Пратеникот Зоран Илиоски рече дека интерпелацијата ја поднесуваат затоа што Николовски не успеал да излезе на крај со појавата на шумските пожари и дека за тоа треба да поднесе одговорност.

– Како резултат на несериозноста, неодговорноста и на некомпетентноста на министерот Љупчо Николовски, Република Македонија речиси еден месец е во пламен. На целата територија на Република Македонија се случуваат отворени пожари, односно опожарување на огромни површини високостеблеста формирана шума, со непроценливи последици од трајна загуба и деградирање на шумскиот појас, сериозни еколошки последици врз животната средина, уништување на приватната и на јавната сопственост и доведување во животна опасност на жителите на опожарените региони и населени места – рече Илиоски.

Според Илиоски, шумските пожари и локациите на шумските пожари се намерно предизвикани од страна на актуелната власт, за да се сврти вниманието на граѓаните на Република Македонија од погубните политики што ги спроведува актуелната Влада во досегашниот период.

– Николовски, немајќи капацитет да се справи со настанатата ситуација на терен, дозволи состојбата да ескалира во граници кога е мошне тешко да се контролира и истовремено штетите достигнаа алармантно ниво. Апсурдното однесување на министерот Николовски е до таа мера што му требаа 15 дена од појавата на пожарите на отворен простор и серијата од повеќе од 30 тековни активни пожари за конечно да ја преиспита и да предложи преиначување на одлуката за ограничена, односно делумна во целосна забрана за движење во шумите – додаде Илиоски.


Николовски најави 10 милиони евра за зголемени субвенции и за млади земјоделци


Скопје, 4 август, 2017 - 14:59 (META) 

Министерот за земјоделство, шумарство и водостопанство, Љупчо Николовски, попладнево ги образложи новите мерки што Владата ги донела за поддршка на земјоделците. Тие вклучуваат 10 милиони евра што ќе се распределат за зголемување на субвенции и за директна поддршка на млади земјоделци.

Мерките се предвидени со измените на Програмата за директна финансиска поддршка во земјоделство и на Програмата за рурален развој.

Измените на програмата за директни плаќања се по барање на земјоделските здруженија за зголемување на субвенциите за производителите на пченица, кои годинава имаа ниски приноси поради лошите временски услови, образложи Николовски.

– Земјоделците ќе добијат дополнителни 6.000 денари од хектар пченица, што се вкупно 2 милиони евра повеќе од субвенциите што ги добиваат сега. За јачменот е предвиден дополнителен 1 денар за килограм јачмен предаден кај регистрирани откупувачи. Ќе реагираме и кај лозовите и овошните насади каде што, исто така, годинава родот е преполовен. За таа цел 25.000 лозари и 15.000 овоштари ќе имаат зголемена субвенција од 10 отсто по хектар за да се надомести дел од штетата, главно поради измрзнувањето на насадите. За градинарите, исто така, одвоивме дополнителни 10 отсто од висината на сегашните субвенции по хектар, а за сточарите поддршката е преку зголемените субвенции за 10 отсто по хектар фуражни култури. Тоа се уште 2 милиони евра предвидени за реализација на овие мерки – рече министерот за земјоделство.

Тој нагласи дека се распишува и оглас за неповратна помош од 10.000 евра за млад земјоделец. Ќе се воведе и субвенција за подигнување повеќегодишни насади, со која ќе бидат опфатени и  земјоделците што извршиле есенско подигнување во 2016 година и на оние кои извршиле пролетно подигнување во 2017 година.

– Само овие две нови мерки, во согласност со програмата на Владата, ќе овозможат директен трансфер на 6 милиони евра, кои овојпат ќе завршат кај вистинските земјоделци до крајот на годината – рече Николовски.


ВМРО-ДПМНЕ: Таравари да се фати за работа наместо да испраќа честитки од хотели


Скопје, 28 јули, 2017 - 9:42 (META) 

Министерот за здравство, Арбен Таравари, наместо да прави стратегии за односи со јавноста и да испраќа честитки од луксузните хотели во САД, треба да се фати за работа и да го спречи ширењето на заразната болест во Гостиварско“, се вели во соопштението на ВМРО-ДПМНЕ.

Од партијата велат дека е време министерот за здравство да почне да работи за доброто на граѓаните, а не своето време да го поминува во одржување на „разно-разни средби со амбасадорите“.

„Директна одговорност за ова има министерот за здравство, Таравари, бидејќи причината за немањето дијагноза за причинител од која починаа две лица, а шест се во животна опасност е тоа што нема реагенс во Институтот за јавно здравје. Причината за можност за големи ризици и за нови загрозувања е фактот дека не воспоставиле карантин, а биле должни да воспостават“, велат од ВМРО-ДПМНЕ.