Бошњаковски: Кампањата на социјалните мрежи ќе чини 6,5 илјади евра


Скопје, 23 август, 2018 - 16:26 (META) 

Владата за кампањата за референдумот ќе троши пари од сопствениот буџет и од буџетот на Генералниот секретаријат на Владата, рече портпаролот на Владата, Миле Бошњаковски на денешната прес-конференција. Комуникацијата преку социјалните мрежи ќе се реализира со 400.000 денари (6,5 илијади евра) од тековниот буџет на Генералниот секретаријат, појасни тој.

Владиниот портпарол посочи и дека Владата ќе организира и прес-конференции, интервјуа, дебатни емисии, брифинзи, за што немало да се трошат пари.


Планот 18 на Владата се трансформираше во План за скрининг


Скопје, 26 јули, 2018 - 10:05 (META) 

Планот 18 на Владата, за кој јавноста слушна на крајот на мај, кога вицепремиерот за европски  прашања Бујар Османи го презентираше на евроамбасадорот Самуел Жбогар и претставници на Делегацијата на ЕУ во Македонија, како реформски план што ќе го наследи Планот 3-6-9, сега е на преработка.

Како што за „Мета“ објасни портпаролот на Владата, Миле Бошњаковски, по одлуката на Советот на министри на ЕУ, Македонија да ги почне пристапните преговори со ЕУ во јуни 2019 година, како и по почнувањето на процесот на набљудување, сега најновиот реформски план се менува и ќе се изготви нов текст.

„Планот 18 во моментов е во фаза на трансформација во План за скрининг и за исполнување на заклучоците од Советот на ЕУ. Владата работи на креирање на сеопфатен план за реформи кој опфаќаат три клучни столба а тоа се областите кои се спомнаа во заклучоците на Советот на ЕУ во Луксембург (судство, јавна администрација и разузнавачки служби), потоа препораките од Извештајот на ЕК и скринингот со кој се подготвуваме за почеток на преговорите во јуни 2019“, објасни Бошњаковски.


Владата го осудува говорот на омраза за жртвите во пожарот во Грција


Скопје, 25 јули, 2018 - 12:34 (META) 

Владата го осудува говорот на омраза за жртвите во пожарот во Атина на социјалните мрежи, одговори денеска порптаролот на Владата, Миле Бошњаковски на новинарско прашање, дали ќе се покрене одредена постапка против тие лица.

– Изразуваме жалење за жртвите во Грција. Говорот на омраза не е прифталив за Македонија како модерна држава чии што аспирации се членство во НАТО и ЕУ- одговори Бошњаковски.

На редовната прес-конференција во Владата тој беше прашан дали од Владата ќе побараат оставка од вицепремиерот Кочо Анѓушев за случајот со грантот од Фондот за иновативност и технолошки развој, на што Бошњаковски одговори дека Основното јавно обвинителство има оформено предмет и доколку има неправилности ќе има одговорност согласно законските прописи.

Во врска со актуелните политички процеси по лидерската средба, тој додаде дека сега тие се случуваат во Собранието и дека нема ништо ново од она што лидерите го соопштиле по средбата.


Бошњаковски: Нема промена на химната и на државните симболи


Скопје, 4 јули, 2018 - 13:46 (META) 

Не се водат, ниту ќе се водат разговори со Грција за промена на химната, ниту некои од македонските државни симболи, одговори денеска владиниот портпарол Миле Бошњаковски на новинарско прашање дали согласно Договорот со Грција ќе се менува и македонската химна или некој државен симбол.

-Ниту во минатото, ниту сега, ниту некогаш во иднина ќе се разговара за промена на химната на Република Македонија. Таа останува таква каква што е – рече владиниот портпарол.

Тој додаде дека нема разговори ниту за другите симболи, ниту било што надвор од тоа што било официјално кажано.

Портпаролот Мухамед Хоџа рече дека сите членови на Владата, вклучително и вицепремиерот Хазби Лика, ги реализираат своите обврски и задачи предвидени со законските прописи. Порталот „Сакам да кажам“ објави дека Лика не доаѓа на работа поради тоа што дошол во конфликт со лидерот на ДУИ Али Ахмети.

– Вицепремиерот Хазби Лика доаѓа на работа и секојдневно ги извршува своите обврски -рече Хоџа, објаснувајќи дека без проблеми се одвива и постапката за прераспределба на вработените во Секретаријатот за рамковен договор кои не одеа на работа.


Бошњаковски: Добивме признание дека сме земја на позитивни промени и реформи


Скопје, 27 јуни, 2018 - 13:49 (META) 

Одлуката на ЕУ Македонија да започне преговори за членство во јуни 2019 година, покажува дека Македонија е препознаена како земја на позитивни промени и динамични економски реформи, изјави денеска на прес-конференција владиниот портпарол Миле Бошњаковски, коментирајќи ја вчерашната одлука на Советот за општи работи на ЕУ да даде условена препорака за преговори во јуни 2019.

– Македонија е препознаена како земја на позитивни промени, на динамичен процес на реформи, на инклузивност и на општествен дијалог. Добивме признание дека сме земја во која има добра политичка волја да ги решава споровите со соседите и земја на граѓани кои покажаа дека имаат јасно изразена визија за европска иднина – рече Боњшаковски.

Тој потсети на придобивките кои земјава би ги добила со членството во ЕУ и во НАТО, а тоа се зголемени странски инвестиции, зголемена финансиска помош за земјава со што, како што кажа, ќе се придонесе за поквалитетен живот за граѓаните на Македонија.

– Со зачленувањето во ЕУ и НАТО, по принципот еднаков меѓу еднаквите, и принципот на солидарност, ќе имаме можност да влијаеме но и да донесуваме одлуки – можност којашто досега ја немавме. Со членството во ЕУ ќе влеземе во голем и развиен пазар, кој брои 500 милиони потрошувачи, со што се зголемуваат перспективите за економски раст, со што стануваме дел од најголемата светска економија – оцени Бошњаковски.

Одговарајќи на новинарско прашање зошто не се кажува дека посочениот датум е условен и зависи од исполнување на дополнителни услови, владиниот портпарол истакна дека датумот е кристално јасен. Да, рече Бошњаковски, тој е условен, но зборуваме за јуни 2019 година.

– Вчера бевме сведоци како речиси сите министри за надворешни работи на ЕУ се залагаа за сите нас граѓаните на РМ. Одлуката на Советот на министри на ЕУ е целосно јавна и транспарентна и може да ја види секој. Во неа јасно е наведено „отворање пристапни преговори во јуни 2019“, јасно во првиот пасус – рече Бошњаковски.

Во врска со тоа што ќе се преземе за исполнување на условите за почеток на преговори, тој истакна дека оваа Влада веќе работи на потребните реформи и оти ќе остане на тој курс и нема од него да отстапи до јуни 2019 година.


Бошњаковски: Грција и Македонија го прифаќаат терминот „Македонец“ и за двете земји


Скопје, 21 јуни, 2018 - 9:54 (META) 

Според договорот, Македонија и Грција го прифаќаат терминот „Македонец“ во двете земји согласно со културите на двете страни, вели портпаролот на македонската Влада, Миле Бошњаковски за грчката телевизија „Епсилон“, на прашањето дали граѓаните во Македонија ќе се нарекуваат Македонци или граѓани на Република Северна Македонија.

Како што јави дописничката на МИА од Атина, Бошњаковски објаснува дека според членот 7 од договорот, двете страни се согласни што значи терминот „Македонец за Грција и за нас, но и дека во нашите пасоши се одредува државјанството кое ќе биде заведено како „Macedonian/citizen of Republic of North Macedonia“.

– Перспективата дека во Грција постојат луѓе кои се чувствуваат како Македонци припаѓаат на еленската култура е 100 отсто прифатлив за нас. Во истиот член, грчката страна прифаќа дека постои момент кога термините „Македонец“ и „Македонија“ се прифатени за нашата култура, што е целосно различна од вашата култура. Ова е основата на договорот и јас не гледам никакви точки на конфликт – објаснува владиниот портпарол за грчката телевизија.


Спомениците ќе имаат натписи со појаснувања, химната останува иста, велат од Владата


Скопје, 13 јуни, 2018 - 13:06 (META) 

Државните институции, оние кои се финансираат од државата, ќе мора да се прилагодат и да го следат духот на договорот со Грција, одговори портпаролот на Владата Миле Бошњаковски на прашањето за евентуална промена на имињата на АРМ, МАНУ, МРТ, МНТ.

Тој информираше дека средбата на двајцата премиери Зоран Заев и Алексис Ципрас ќе се одржи викендов. За информациите за некои нови имиња или преселби на спомениците од проектот „Скопје 2014“, Бошњаковски рече дека спомениците остануваат таму каде што се и ќе претставуваат симбол на пријателството.

-На спомениците ќе се стават натписи со појаснување. На пример Воинот на коњ ќе се вика споменик на Александар Македонски со објаснување дека е симбол на хеленскиот антички период и останува како симбол на пријателството меѓу Македонија и Грција. Истото ќе важи и за споменикот на Филип 2 и Олимпија. Сите споменици ќе бидат обележани во насока на зајакнување на пријателството. Не се срамиме да ги нарекуваме спомениците такви како што се – вели Бошњаковски.

Тој рече дека основата на договорот е како Грција го толкува и поимува терминот Македонија.

– Се прави јасна дистинкција што е прифатливо за нас и што е прифатливо за нив. Ние сме Македонци. Официјалното ново име ќе биде преведено на сите јазици. Македонскиот јазик е утврден во ОН и тој останува таков, нема да постои фуснота во ОН. Во договорот постои член во кој велиме дека македонскиот јазик е дел од јужнословенските јазици. Останува македонскиот јазик – рече Бошњаковски.

Тој вели дека нема потреба од грижа, бидејќи граѓаните нема да мора да ги менуваат патните исправи веднаш туку по истекот на нивниот рок.

– Самиот договор е етапен договор, и тој треба да се имплементира во наредните 5 год. Трошоци за граѓаните нема да има, бидејќи нема да се менуваат сите патни исправи одеднаш, туку како им истекува рокот, ќе се менува патната исправа. Тоа се редовни трошоци, не се работи за вонредни трошоци. Оние патни исправи кои постојат, важат се до истекот – изјави Бошњаковски.

Портпаролот на Владата појасни дека државните симболи не беа дел од преговарачкиот процес и дека химната, знамето, грбот и другите симболи не се менуваат и додаде дека договорот ќе биде објавен откако ќе се разгледа и усвои на владина седница.


Владата без прецизен одговор за најавениот разговор помеѓу Заев и Ципрас


Скопје, 6 јуни, 2018 - 13:13 (META) 

Портпаролот на Владата, Миле Бошњаковски денеска на прес-конференција во Владата не прецизираше до каде се преговорите и дали е можна средба или телефонски разговор на премиерите на Грција и Македонија до крајот на неделава.

Бошњаковски не сакаше да даде ниту коментар на „Фејсбук“ статусот на Антонио Милошоски од ВМРО-ДПМНЕ кој напиша дека во четврток или петок ќе се случи средбата помеѓу Зоран Заев и Алексис Ципрас во Мала Преспа.

– Имаме официјална прес-конференција во Владата на РМ. Не си дозволувале да коментираме неофицијални информации без разлика од какви извори доаѓаат, сè додека немаат кредибилитет и легитимитет – рече Бошњаковски.

И на прашањето дали до крајот на неделата се очекува разговор или средба Заев-Ципрас, рече дека Владата останува на претходно кажаните ставови дека не навлегува во сферите на шпекулациите.

– Сметаме дека ова прашање е исклучително важно и тоа што претходно го најави премиерот останува како владин став и денеска – рече владиниот портпарол.

Премиерот Заев вчера изјави дека во прашање се денови кога ќе се случи телефонскиот разговор меѓу него и Ципрас и додаде дека во моментот сè уште се создаваат околностите тоа да се случи.

Македонскиот премиер не сакаше да шпекулира за прифатливите предлози околу името, ниту за тие содржани во пакетот на медијаторот Метју Нимиц. Процесот, според него е на самиот крај и изрази верување дека крајот ќе биде успешен.


Џезаир Шакири – Хоџа ќе добие надомест за ангажманот, нема постапка за друга функција


Скопје, 14 мај, 2018 - 10:47 (META) 

Шаќири ќе добие износ во пропорционален сооднос со траењето на неговиот договор, појасни Миле Бошњаковски, портпарол на Владата на прашањето од „Мета“ дали на Џезаир Шакири, алиас Командант Хоџа, ќе му биде исплатен надомест, односно плата за неговиот ангажман во Владата.

Од Владата пред една седмица потврдија дека поранешниот командант на ОНА  и човекот што важеше за „господар“ на Танушевци, и неколкупати по воениот конфликт во 2001 година даваше милитантни и радикалистички изјави, бил ангажиран како специјален советник на премиерот Зоран Заев како надворешен соработник од областа на внатрешната безбедност и борба против радикализмот. За тоа беше предвидена плата од 36.000 денари.

Но во петокот првин Заев, а потоа и Шакири, соопштија дека специјалниот советник ќе се повлече од функцијата поради бурните реакции во јавноста.

Од Владата ни одговорија и дека „во моментот не постои постапка за доделување на друга функција“.


Владата потврди дека Димитров и Коѕиас ќе се сретнат до крајот на месецов


Скопје, 20 април, 2018 - 14:12 (META) 

Владиниот портпарол Миле Бошњаковски потврди дека до крајот на месецов треба да има нова средба на шефовите на дипломатиите на Македонија и на Грција, Никола Димитров и Никос Коѕиас, но дека точниот датум се уште не е утврден.

– До крајот на месецот ќе има нова средба, а датумот се уште треба да биде потврден меѓу министрите за надворешни работи. Се уште сме големи оптимисти, како што најавија и премиерот и министерот за надворешни работи на Република Македонија, бараме и очекуваме да најдеме решение што ќе биде достоинствено за сите граѓани – рече Бошњаковски на денешната прес-конференција во Владата.

Во однос на ставот на грчкото МНР дека и покрај добиената препорака од ЕК за почеток на преговорите, сепак, конечната одлука за тоа ја носи Советот на ЕУ каде Грција повторно може да блокира ако не се најде решение за името, Бошњаковски рече дека Советот во наредните шест месеци треба да се произнесе, меѓутоа се останато во однос на преговорите за името продолжува со зацртаната динамика.

На прашање каде се разговорите помеѓу обвинетите од случајот „Монструм“ и Невзат Бејта, Бошњаковски рече дека како Влада нема да си дозволат да коментираат судска постапка што е во тек и потенцираше дека сите материјали и целосната надлежност се во рамки на судовите.

Одговарајќи дали премиерот Заев има намера да сведочи како што бараат семејствата во случајот „Монструм“, Бошњаковски уште еднаш повтори дека целосната надлежност за судскиот процес по предметот „Монструм“ е во рамки на македонскиот правосуден систем.

– Македонската Влада не се меша во работата на правосудството и ниту има намера на некој начин да интервенира. Тоа што го очекуваме е дека сите отворени прашања поврзани со овој случај на крајот од постапката ќе бидат соодветно одговорени и адресирани и дека целата македонска јавност ќе има транспарентно увид во конечната пресуда и во секоја одлука на Судот – додаде Бошњаковски.