Царовска: Работодавците што ќе ја зголемат минималната плата ќе добијат државна помош


Кочани, 1 август, 2018 - 15:32 (META) 

Министерката за труд и социјална политика, Мила Царовска денеска се сретна со менаџментот и вработените на текстилната фабрика „Голден текст“ во Кочани за да ги запознае со најновите мерки кои ги обезбеди државата за раст на платите.

„Со законските измени се предвидува работодавците што ќе им ја покачат минималната плата на вработените да добијат државна помош за зголемувањето на платите. Финансиската поддршка по работник изнесува 30 отсто од разликата помеѓу бруто платата на работникот во тековниот месец и просечната бруто плата на работникот исплатена во месеците октомври, ноември и декември лани, а најмногу до 1.200 денари по работник месечно“, изјави Царовска по средбата во фабриката.

Оваа мерка освен што обезбедува повисоки плати за работниците, истовремено е и одговор на барањето на работодавците за адресираниот проблем за т.н. уравниловка. Според работодавците има потреба од раст и на преостанатите плати блиски со минималната плата, за да не ги изгубат или демотивираат попродуктивните работници.

Средствата за исплата на финансиската поддршка се обезбедуваат од буџетот и ќе се исплаќа за периодот јули 2018 година-декември 2019 година.


Царовска: Сите 25 деца од „25 Мај“ од денеска живеат во мали групни домови


Скопје, 27 јули, 2018 - 16:18 (META) 

Сите 25 деца од Јавната установа за згрижување деца со воспитно социјални проблеми „25 Мај“ од денеска ќе живеат во мали групни домови, информираат од Министерство за труд и социјална политика.

На тој начин, како што информираат од МТСП, продолжува процест на деинституционализација и големите и нехумани институции за неколку години ќе бидат заменети со грижа во заедницата.

– Подготвена е нова програма за работа со овие деца, постоечкиот кадар помина низ практична обука, а се обезбедија и нови 18 вработувања. Целосно ги прилагодуваме условите согласно потребите на оние за кои треба да се грижиме, наместо да ги прилагодуваме луѓето на системот. Посветено работиме за обезбедување еднакви можности, хумани и достоинствени услови за раст и развој за децата сместени во институциите. Деинституционализацијата е трајно решение во оваа насока – рече министерката Мила Царовска на отворањето на еден од домовите.

Претставникот на УНИЦЕФ, Бенџамин Перкс изјави дека за жал, секогаш ќе има ситуации кога не е можно, не е безбедно, или не е во најдобар интерес на детето да живее со своeто биолошко семејство.

– Грижата во згрижувачко семејство е најдобрата алтернатива на големата институција, но семејното опкружување, исто така, може да се добие во мал групeн дом каде децата го добиваат чувството на припадност, стабилност и поддршка што им е потребно. Да не заборавиме и на возрасните во институциите – тие исто така заслужуваат живот во заедницата. Сите агенции на Обедините нации во земјата се посветени на поддршка на деинституционализацијата за сите деца и возрасни кои живеат во институции да можат да го уживаат своето право на достоинствен живот – додаде Перкс.


Конечно почна со работа малиот групен дом за деца во Тимјаник


Неготино, 20 јули, 2018 - 14:18 (META) 

Официјално со работа денеска почна новиот мал групен дом во Тимјаник, неготинско, чие отворање на почетокот на јуни беше одложено поради противењето на жителите.

Сега тоа е минато и во домот од денеска ќе бидат сместени четири деца од Специјалниот завод Демир Капија. На отворањето на домот присуствуваа министерката за труд и социјална политика Мила Царовска,  постојаната претставничка на ОН во земјава Луиза Винтон, претставникот на УНИЦЕФ Бенџамин Перкс и градоначалникот на Неготино, Тони Делков.

– Недоразбирањата во Тимјаник се надминати, а децата се преселени во малиот групен дом. Никогаш не се сомневав во хуманоста на нашите граѓани. Жителите ни дадоа поддршка на она што го правиме. Верувам Тимјаник ќе биде и ќе остане симбол на хуманоста на нашето општество, а жителите ќе се гордеат со тоа – изјави министерката Царовска.

Во новиот мал групен дом децата ќе имаат 24 часовна поддршка од лични асистенти, специјализирани индивидуализирани програми за работа и дефектолошки третмани. Близината на училиштето и локалната заедница ќе им овозможи на овие деца полесно и побрзо да се вклопат во општеството.

-Со отворањето на малиот групен дом денес правиме нов чекор кон трансформација на големите институции и обезбедување семејна грижа за секое дете. Заедно со Владата и другите наши партнери секој ден сме се поблиску до остварувањето на заложбата на Владата за ставање крај на институционалната грижа за деца помали од три години до 2020 година – изјави Бенџамин Перкс, претставник на УНИЦЕФ во Македонија.


Царовска: Заедно со жителите одлучивме дека во Тимјаник ќе има мал групен дом


Скопје, 26 јуни, 2018 - 14:45 (META) 

Министерката за труд и социјална политика Мила Царовска вчера повторно ги посети Неготино и Тимјаник и заедно со градоначалникот на општина Неготино Тони Делков се сретнала со локалните жители, при што е постигната согласност да се надминат недоразбирањата и жителите на селото повеќе не се спротивставуваат на отворање мал групен дом  за деца со попреченост.

– Никогаш не се сомневав во хуманоста на нашите граѓани и верував дека првата несакана епизода е само недоразбирање.Драго ми е што овој пат имавме многу конструктивна дискусија и жителите дадоа поддршка на она што го правиме. Јас верувам дека Тимјаник ќе биде симбол на хуманоста на нашето општество, а жителите ќе се гордеат со тоа – рече министерката Царовска.

Тензијата се крена на 10 јуни, ден пред најавеното сместување на четири деца од Специјалниот завод Демир Капија во селото Тимјаник, кога жителите на селото најавија протест поради таквата одлука, а исто така и посочија дека приоритет е изградба на детска градинка.


Царовска: Ќе побараме стан за семејството со трите деца што настрадаа во пожар


Скопје, 25 јуни, 2018 - 14:21 (META) 

На семејството чии три деца минатата седмица загинаа во пожар во нивниот субстандарден дом во Велес, социјалните работници му нуделе сместување под кирија уште пред да се случи трагедијата, но, одбивало. Дали постои евентуален пропуст во нивната работа, испитува социјална испекција која во петокот и денеска е во велешкиот Центар, вели министерката за труд и социјална политика Мила Царовска.

Таа рече дека имала средба со родителите на починатите деца кои, како што рече, добиле еднократна парична помош и поддршка. Тие ја информирале министерката дека пред две три години кога биле доделувани социјални станови, тие не добиле на користење таков стан, а пак бил доделен стан на лица што биле станбено обезбедени.

– Тие сакаат државен стан. Им ветив дека заеднички ќе поднесеме барање до Комисијата за државни станови да разгледаме дали во Велес има постоечки стан или друг објект во кој тие натаму можат да бидат сместени. Во државата нема станови кои можат да бидат доделени на ниту едно лице, така ниту ним, туку да можат во него да живеат- рече Царовска одговарајќи на новинарски прашања на прес-конференцијата на која беше презентиран Предлог законот за спречување и заштита од дискриминација.

Во новиот текст на Законот за првпат сексуалната ориентација и родовиот идентитет се воведуваат како основи за дискриминација. Во поимникот се вметнуваат нови термини, меѓу кои „лице со попреченост“, „соодветно приспособување“ и „пристапност до инфраструктурата, добрата и услугите“. Понатаму, се додава нов облик на дискриминација – сегрегацијата, како и „инструкцијата” за дискриминација.


Годишната програма за вработување ги опфаќа младите и социјално ранливите лица


Скопје, 25 април, 2018 - 13:20 (META) 

Министерството за труд и социјална политика, Агенцијата за вработување и УНДП денеска потпишаа договор за Годишната програма за вработување 2018, за која се предвидени 8,3 милиони долари.

Премиерот Зоран Заев рече дека се таргетирани 16.259 лица, но најголем бенефит ќе имаат младите бидејќи имат можност да конкурираат за работни места со плата во износ поголем од 18.000 денари.

Постојаната амбасадорка на ОН во Македонија, Лујза Винтон рече дека недостатокот на пристојна работа е предизвик за развој на државата и дека 50 отсто од младите постојано си заминуваат. Истовреме пак, растечките приватни бизниси имаат недостиг од обучен кадар.

– Со Годишната програма е предвидено отворање 980 мали бизниси, од кои 50 на лица со попреченост, како и ангажирање лица во 45 до 50 општини кои ќе им помагаат на деца од предучилишна возраст, лица со попреченост и постари лица – рече Винтон.

Министерката за труд и социјална политика, Мила Царовска додаде дека активните мерки за вработување се прилагодени на потребите на работодавачите, но и на профилот на младите и ранливите групи.

– Тоа што е различно од претходните оперативни планови и што дава подобар ефект е тоа што мерките се прилагодени на потребите на работодавачите, на потребите и квалификациите на младите и ранливите групи и има можност за поврзување на мерките, што досега не беше случај. Дадовме можност мерките да ги користат и социјални претпријатија, но и граѓанските организации, бидејќи знаеме дека голем број млади луѓе се неформално вработени во овие организации и сега имаме можност за нивна формализација. И ниту една од овие мерки не значи ослободување од придонеси за здравствено и социјално осигурување, затоа што ние сме одговорна Влада, која што се грижи за иднината на фондовите и за идните генерации – рече Царовска.

Директорката на Агенцијата за вработување Билјана Јовановска рече дека сите невработени лица имаат еднаков пристап до мерките и Програмата за вработување предвидени со Оперативниот план иако на младите им се дава предност и тие треба да бидат застапени со најмалку 30 отсто.Таа информираше дека интересот за мерките е голем, посебно за субвенциите за вработување, програмата за самовработување и обуката за побарувачки занаети.


Царовска: Нема зголемување на старосната граница за пензионирање


Скопје, 13 април, 2018 - 12:03 (META) 

Нема да има зголемување на старосната граница за пензионирање, а пензиите се стабилни и безбедни, рече денеска министерката за труд и социјална политика Мила Царовска, која на прес-конференција во Владата информираше за сработеното во изминатите 11 месеци.

– Работиме на стабилизација на системот за пензии, затоа што знаеме дека за 10 години ВМРО-ДПМНЕ за трипати го зголеми долгот на пензискиот фонд. Редовно ги усогласуваме пензиите, за разлика од ВМРО-ДПМНЕ, кое две години не предвиде средства. Но, размислуваме и за идните пензионери и наскоро ќе излеземе со планот за стабилизација на ПИОМ. И, повторувам, дека покачувањето на старосната граница нема да има, иако тоа излезе од многу места како информација – рече Царовска.

Во однос на стечајците, таа рече дека 453 стечајни работници добиле позитивни решенија според Законот за стечајци, а со донесувањето на новиот закон за минималната плата, повеќе  од 90.000 граѓани добиле повисока плата, со што се изедначени примањата за сите работници во државата во текстилната и кожарската индустрија.

Ообезбедени се средства за 138 нови вработувања во центрите за социјална работа и се вработени 486 лица на неопределено време во градинките, отворени се три нови регионални преноќувалишта за бездомни лица и е завршена реконструкцијата на 30-те центри за социјална работа кои опслужуват повеќе од 200.000 граѓани.

Покрај капиталните и проектите за детска заштита, се подготвуваат нови закони за социјална заштита и за работни односи, се работи и на нов европски закон за недискриминација.

 


Според Рангелова министерката Царовска е најслабата алка во Владата


Скопје, 11 април, 2018 - 14:41 (META) 

По паузата од еден час, пратениците на СДСМ и ВМРО-ДПМНЕ продолжија со расправата по интерпелацијата поднесена од ВМРО-ДПМНЕ но и со меѓусебни расправања дали оваа владејачка коалиција добро ја води државата или не.

Пратеничката на ВМРО-ДПМНЕ, Даниела Рангелова, рече дека на оваа влада и на премиерот Зоран Заев треба да му се изгласа недоверба затоа што дозволил Мила Царовска да го води Министерството за труд и социјална политика.

– Министерката Мила Царовска ја препознаваме по бројните скандали, со многу малку работа, многу одржани прес-конференции, малку проекти, празни ветување и немање грижа на совест. Прва причина поради која треба да си замине е поради ужасот кој што се случи во домот за штитеници „25 мај“. Владата треба да си оди затоа што не ја смени министерката Царовска затоа што три девојчиња беа силувани а министерката не презема одговорност. Немате умеење, немате желба за работа, имате само страст за власт. Оставка веднаш. Вие не сте способни ни во градинка да одите а камоли министерство за водите – рече Рангелова.

На ова реплицираше министерката Царовска која рече дека таа во МТСП наследила уништен систем од претходната влада и дека сите центри кои биле под надлежност на ВМРО-ДПМНЕ не само што биле уништени туку и покрадени.

Рангелова ја обвини Царовска дека лаже и дека не си ја врши својата работа затоа што на секој семафор има Ромчиња што просат и ја праша дали таа на работа патува со авион.

Расправата по интерпелацијата поднесена од ВМРО-ДПМНЕ ќе трае до полноќ, а пред гласањето, во 23.20 часот се очекува свое обраќање да има и премиерот Зоран Заев.


Царовска: Минималната плата се исплаќа и не влијае негативно на бизнисот


Скопје, 27 март, 2018 - 15:10 (META) 

Министерката за труд и социјална политика, Мила Царовска, ја посети фабриката „Окитекс“ и се сретна со сопственикот, Миле Миленковски како и со претседателот на Синдикатот од текстилната, кожарската и чевларската индустрија, Љупчо Радовски.

Миленковски посочил дека законот за минимална плата дал резултат, но смета дека треба модернизација на оваа индустриска гранка. Оваа компанија е една од оние кои исплаќаат минимална плата без поддршка од државата.

Според синдикалниот претставник Радовски, законот се применува во целост.

На средбата, Царовска изјавила дека просечната плата во производство на облека се зголемила за 16 проценти, а во текстилната индустрија за 24 проценти, односно за 3.870 денари.

– Тоа покажува дека законот си ја заврши својата работа затоа што по статистика, 90 илјади граѓани добија покачување и земаат над 12 илјади денари плата. Со тоа добивме и покачување на просечната плата во Македонија за 5,6 отсто. Покачувањето се одвива без поголема поддршка од буџетот, односно само мал процент од фирмите аплицираат за субвенции. Ова покажува дека фирмите се во кондиција и можат да ја исплаќаат мининмалната плата, а тоа не се одразува негативно на самиот бизнис – изјави Царовска.


„Марш за женските права“: Преку родовата рамноправност до силна држава


Скопје, 8 март, 2018 - 14:20 (META) 

Околу 1.000 жени, девојки и активисти се собраа денеска на вториот „Марш за правата на жените” кој се одржа по повод Меѓународниот ден на жената. Од маршот, кој почна во Жена парк, преку плоштадот Македонија, Камениот Мост и заврши на плоштадот Филип Втори беше испратена порака дека родовата еднаквост е важен фактор кон постигнување на демократско и еднакво општество.

Целта на маршот, како што посочија организаторите, била да се подигне свеста на јавноста, но и на носителите на одлуки, за нееднаквата положба во која се наоѓаат жените во нашето општество во 2018 година.

– Во 2018 година во Република Македонија имаме највисока доенечка смртност во Европа. Причините за тоа не треба да се бараат кај жените, туку во системот за здравствена заштита и здравствените услуги кои им следуваат, но секоја година се повеќе и повеќе се скратуваат, во тоа што повеќе од 175.000 жени немаат гинеколог во својата општина, и во тоа што на повеќе од 80 отсто од жените Ромки им наплаќаат ехо прегледи кои треба да им бидат бесплатни. Товарот на неплатените домашни обврски сè уште во голема мера паѓа на грбот на жените, и додека во другите европски земји овие разлики во учеството во домашната работа се намалуваат, кај нас огромните разлики остануваат константни – изјави Снешка Илиќ од невладината „Реактор“.

Министерката за труд и социјална политика, Мила Царовска рече дека владата вистински се залага и активно вложува во родовата рамноправност.

– Наместо подароци и прослави денеска сметам дека секоја жена и секој маж треба длабоко да се запраша, што во минатата година направил за родовата рамноправност и што ќе направи во наредната. Само така ќе постигнеме едно еднакво општество кое што ќе биде инклузивно – рече Царовска.

Вицепремиерката и министерка за одбрана Радмила Шекеринска потенцираше пак, дека само со силни жени со права, права што ги штитат жените, ќе има силна правна држава.

– Како нова влада, покажавме дека на прашањата на женската рамноправност водиме различни политики. Денеска во на овие теми разговараме без комплексот дали правата на жените ќе значат намалување на важноста на семејството или на традиционалните вредности. Покажавме дека сметаме на жените и покажавме дека правата на жените се и наши права – рече Шекеринска.

Активистките на денешниот марш го осудија и насилството врз жените, за кое велат дека во нашето општество се толерира, поттикнува и прикрива, а ако излезе на виделина, неадекватно се осудува и казнува.

За крај, тие побараа родово сензитивни политики повикувајќи на солидарност кон сите жени, и потсетувајќи дека родовата еднаквост е важен фактор кон постигнување на демократско и еднакво општество.