Царовска денеска даде исказ во Обвинителство за скандалот со пензиите


Скопје, 8 февруари, 2019 - 14:55 (META) 

Во врска со кривичната пријава поднесена против непознат сторител за кривично дело  – Злоупотреба на службена положба и овластување од член 353 од Кривичниот законик која се однесува на невршење на распределба на осигуреници во вториот столб од пензискиот систем и неисплата на придонеси во приватните пензиски фондови, надлежен јавен обвинител од Основното јавно обвинителство Скопје денеска го испита подносителот на кривичната пријава, министерката за труд и социјална политика Мила Царовска, соопштија од ОЈО.

„Во својот исказ таа изнесе одредени сознанија во врска со наводите во пријавата без притоа да посочи можен сторител на кривичното дело со утврден идентитет. Надлежниот јавен обвинител побара од подносителот на пријавата дополнително да достави определени материјални докази кои ги спомена во својот исказ.Основното јавно обвинителство Скопје продолжува со преземање други дејствија за проверка на наводите во пријавата. Надлежниот јавен обвинител од Државниот завод за ревизија ќе ги побара изготвените извештаи за извршена ревизија во Фондот за пензиско и инвалидско осигурување во критичниот период, а на распит ќе биде повикан и претставник на Фондот за да даде свое појаснување во врска со наведеното во пријавата“, се вели во соопштението.


Царовска: Започна уплатата за првите 4.926 оштетени панзиски осигуреници


Скопје, 29 јануари, 2019 - 14:15 (META) 

Започна првата уплата од државата кон двете приватни пензиски друштва за оштетените осигуреници на кои со години не им биле плаќани придонеси во вториот пениски столб. Со првата уплата се опфатени 4.926 осигуреници и истата треба да заврши до крајот на месецот, соопшти министерката за труд и социјална политика, Мила Царовска.

Уплатите за другите осигуреници ќе се случуваат во наредните месеци и треба да завршат до средината на годината, со што сите 12.000 осигуреници ќе бидат целосно обесштетени. За оваа намена Владата обезбеди 19 милиони евра од државниот буџет. Согласно со новата законска регулатива, исто така во тек е трансферот на 11.319 членови од вториот кон првиот пензиски столб.

Обештетувањето на осигурениците и сите други мерки предвидени со пензиската реформа беа тема на работниот состанок на министерката за труд и социјална политика Мила Царовска и директорите на ПИОМ, МАПАС и приватните пензиски друштва.

-Засега реформата тече според предвидената динамика, без никакви потешкотии при спроведувањето. Во измината година докажавме дека пензиите растат и тоа ќе биде случај и оваа година. Пензионерите може да бидат апсолутно спокојни. Реформата која ја правиме е избалансирана, до неа дојдовме преку темелни анализи грижејќи се да не оштетиме никого. Со неа го намалуваме дефицитот во ПИОМ за две милијарди годишно, но без радикални мерки како замрзување на пензии или покачување на старосната граница – изјави министерката Царовска по состанокот.

Министерството за труд и социјална политика вчера до Основното јавно обвинителство поднесе кривична пријава против непознат сторител за скандалот со неуплатените придонеси. Со кривичната пријава е поднесена и документација од темелната анализа на пензискиот систем со која беа откриени неправилностите.


Царовска: Високи 95 отсто искористеност на Оперативниот план за вработување лани


Скопје, 23 јануари, 2019 - 12:22 (META) 

Оперативниот план за активни програми и мерки за вработување и услуги на пазарот на трудот за 2018 година има високи 95 проценти реализација, информираше министерката за труд и социјална политика Мила Царовска. Со него биле опфатени вкупно 6,374 лица, од кои 3.359 или 53 проценти млади лица до 29 години.

Царовска како посебно значајна ја потенцираше вклученоста на жените во активните програми и мерки кои водат до намалување на невработеноста и зголемување на вработливоста.

„Оперативниот план за активни програми и мерки за вработување и услуги на пазарот на трудот за 2018 година претставува одличен пример за родова еднаквост, во него 54 проценти односно 3.456 лица од учесниците во активните програми и мерки за вработување беа жени, што за нас претставува посебен успех и голем придонес за поголема инкузивност на жената на пазарот на трудот“, изјави Царовска.

Директорката на Агенцијата за вработување, Билјана Јовановска информираше дека преку учество во програмата Самовработување, сопствен бизнис отвориле 1.191 лица, мерката Субвенционирање на плати овозможила да се вработат 759 лица, а преку учество во мерката Вработување и раст на правни субјекти биле вработени 347 лица.

Голем интерес имало и за обуките за стекнување на вештини кои се барани на пазарот на трудот, наменети за доквалификација на невработените лица.

Една од најбараните била програмата Практиканство и во неа се вклучиле 1.263 невработени лица до 34 годишна возраст. Одлични резултати покажала и програмата Општинско-корисна работа, во која учествувале 703 лица, кои обезбедуваат социјални услуги во 56 општини во државата, најмногу како образовни и лични асистенти.

Носител на Оперативен план за активни програми и мерки за вработување и услуги на пазарот на трудот 2018 е Министерството за труд и социјална политика, а имплементатор е Агенцијата за вработување. За негова реализација биле потрошени 975.240.683 денари.


Царовска: Децата од домот „11 Октомври“ преселени во мали групни домови


Скопје, 21 јануари, 2019 - 15:03 (META) 

Децата во Домот за деца без родители „11 Октомври“ во Скопје, од пред неколку дена се сместени во четири мали групни домови и згрижувачки семејства.

Министерката за труд и социјална политика Мила Царовска и претставникот на УНИЦЕФ во Македонија, Бенџамин Перкс денеска ги посетија децата кои што од неодамна се сместени во една од куќите во Скопје.

„Како што ветивме, до почетокот на второто училишно полугодие го трансформиравме и домот „11 Октомври“. При тоа водевме сметка децата да останат во близина на училиштето кое што го посетуваат и да не ги разделуваме децата кои што се братчиња и сестрички. Процесот на деинституционализација тече подобро од очекуваното, досега бројот на деца сместени во институции се намали за 60 проценти. Нашите заложби како Влада се до 2020 година да нема повеќе деца под 18 години во големите институции. Секое дете заслужува да расте со семејство, да чуствува вистинска грижа и топлина. Продолжуваме да работиме на отворање на мали групни домови, каде децата имаат услови за живот како во вистински семеен дом. Ги охрабрувам и сите оние кои се заинтересирани да станат згрижувачи да го направат овој чекор и да го отворат својот дом и срце за нов член на семејството“, изјави Царовска.

Процесот на деинституционализација МТСП го спроведува во партнерство со УНИЦЕФ, УНДП и Делегацијата на ЕУ во Македонија.

„Многу земји од ЕУ, преку систематски реформи и кампањи за промена на ставовите, прераснаа во места каде што сместувањето на деца во институции веќе не се прифаќа. Со затворањето на претпоследната институција за деца во земјата се доближуваме до остварување на таа иста цел“, рече Бенџамин Перкс, претставник на УНИЦЕФ.

Пред околу четири месеци целосно беше трансформиран и домот „25 Мај“ и сите 25 деца сега живеат во пет мали групни домови во Скопје и се вклучени во редовниот образовен процес. Исто така, до крајот на минатата година од Специјалниот завод „Демир Капија“ беа извадени сите деца до 18 години и сместени во мали групни домови каде што добија 24 часовен надзор, и индивидуализирани програми и дефектолошки третмани.


ВМРО-ДПМНЕ обвини, а сите демантираа дека имало местење тендери за партнерот на Царовска


Скопје, 3 јануари, 2019 - 15:21 (META) 

Опозициската ВМРО-ДПМНЕ денеска обвини дека фирмите на Горан Георгиев, неформалниот сопруг на министерката за труд и социјална политика Мила Царовска, во четири очи добиле три договори во милионски износ за набавки дронови. Обвинувањата беа демантирани и од Министерството за труд и социјална политика и од МЕПСО, а и од фирма на Георгиев.

ВМРО-ДПМНЕ обвини дека Царовска во анкетниот лист не го пријавила имотот на нејзиниот партнер, иако според законите, била должна тоа да го направи.

– Невенчаниот сопруг на Царовска, Георгиев, е неколкукратен добитник на милионски тендери од институции со кои раководи СДСМ. Како што објавија медиумите фирмата на неформалниот сопруг на Царовска добила 1,5 милиони денари на име набавка на дронови. Дали милионските тендери се причината поради која Царовска не го пријавува имотот на нејзиниот невенчан сопруг? Дали преку невенчаниот сопруг на Царовска се прекршува законот за да се добиваат државни пари во четири очи без распишани тендери? Дали на тие сметки се таложат парите кои јавноста не треба да ги гледа, а ги плаќа од свој џеб? – праша на прес-конференција Маја Славева од ВМРО-ДПМНЕ.

Министерството за труд и социјална политика ги демантираше овие наводи, велејќи оти е неточно дека Царовска согласно законите морала да го пријави имотот на Георгиев, притоа цитирајќи законски членови. Сепак, иако не постои обврска, министерката наскоро во Анкетниот лист во Антикорупциска ќе го додаде имотот на нејзиниот неформален партнер.

„Иако законски не е обврзана, министерката Царовска заради транспарентност кон јавноста околу имотот на неформалниот сопруг во најбрз можен рок ќе го пријави во анкетниот лист во Државната комисија за спречување на корупција. Тој во своја сопственост има една гаража од 25 м2 и една парцела земја во кочанско од 1.000 м2“, се вели во демантот.

На прес-конференцијата и на написот на „Лидер“ реагираше и државната компанија МЕПСО, која беше обвинета дека со фирмата „Флај Кем ДООЕЛ“ на Георгиев незаконски и без тендер склучила договор.

„Договорот за набавка на стоки „Специјални летечки уреди (дронови) за извршување вонредни прегледи на далекуводи“ е склучен откако во целост е спроведена соодветна транспарентна постапка за јавна набавка согласно со Законот за јавни набавки. Имено, договорот со правното лице „Флај Кем ДООЕЛ“ е склучен откако е објавен тендер на кој на е-аукција компанијата дала најповолна цена за набавка на 4 дронови и за обука на лица од МЕПСО за управување со тие уреди. Дополнително аргумент во полза на тоа дека е добиена поволна понуда е тоа што планираната вредност на набавката била 922.500 денари, а набавката е реализирана за вредност од 779.980 денари со вклучен ДДВ“, порача МЕПСО.

Со речиси идентична реакција се огласи и „Флај Кем ДООЕЛ“.

„На секоја од трите наведени јавни набавки кои се посочуваат, нашата компанија уредно учествуваше на електронска аукција согласно законот. Лагата е дотолку поголема ако се земем предвид фактот дека на секоја од трите електронски аукции учествуваа по повеќе компании. За ова тврдење во прилог на овој демант ги доставуваме официјланите документи од електронските аукции. Истите може да се проверат со секоја од институциите поединечно“, стои во реакцијата од фирмата.


Практичната работа на студентите на Филозофски факултет ќе се унапреди


Скопје, 11 декември, 2018 - 11:23 (META) 

Министерството за труд и социјална политика денеска потпиша Меморандум за соработка со Филозофскиот факултет при Универзитетот „Св. Кирил и Метoдиј“ во Скопје, со кој ќе се унапредува практичната работа на студентите.

„Практичната работа е неопходен дел од секој квалитетен образовен процес. Образовниот систем, во соработка со сите државни институции, приватниот и граѓанскиот сектор, треба целосно да ги подготви студентите за тоа што ги чека во реалноста. Ова е периодот кога треба да им помогнеме да созреат, да работат на својот личен и професионален развој. Само на овој начин можеме да очекуваме вистински квалитетен кадар, подготвен за сите предизвици надвор од академската клупа“, изјави министерката за труд и социјална политика, Мила Царовска.

Двете институции ќе соработуваат во повеќе области на социјалната политика, детската и семејна заштита, работните односи, образовна вклученост, специјална едукација и родова еднаквост, како и во однос на активности против дискриминација, овозможување еднакви можности и помагање на процесот на европска интеграција.

Ќе се спроведат повеќе активности, меѓу кои заеднички научни истражувања, организирање и спроведување на обуки, тркалезни маси, дебати, конференции и слично.

Во рамки на оваа соработка Министерството за труд и социјална политика ќе обезбеди практична работа на студентите од Филозофскиот факултет, стручно менторство за време на практичната работа и пристап до податоците потребни за научно-истражувачката дејност на Филозофскиот факултет при Универзитет „Св. Кирил и Метoдиј“ Скопје.


МТСП: До крајот на годината 60 отсто од децата извадени од институциите


Скопје, 10 декември, 2018 - 10:44 (META) 

Министерството за труд и социјална политика известува дека планот, ниту едно дете под 18 години во Македонија да не биде сместено во социјална установа до 2020 година, чекор по чекор станува реалност.

На крајот на 2018 година во нашите социјални установи ќе бидат сместени за 60 отсто помалку деца одошто во август 2017 година.

„Секое дете заслужува семејство и затоа го менуваме начинот на кој како држава се грижиме за децата кои имаат потреба од долгорочна социјална грижа, со ова на секое дете му овозможуваме услови за правилен раст и развој, што е основно човеково право“, истакна министерката за труд и социјална политика, Мила Царовска.

Од МТСП информираат дека од повторното интензивирање на деинституционализацијата во август 2017 година, вкупно 161 дете претходно сместени во социјалните институции се згрижуваат надвор од установите.

„Во Специјалниот завод Демир Капија веќе нема ниту едно дете под 18 години, а децата сместени во Јавната установа за згрижување деца со воспитно-социјални проблеми и нарушено поведение „25 Мај“ се згрижени во пет мали групни домови во Скопје. До крајот на првото училишно полугодие, сите 30 деца моментално сместени во Домот за деца без родители и родителска грижа „11 Октомври“, исто така, засекогаш ќе ја напуштат установата и ќе живеат во мали групни домови во Скопје и во Штип или во згрижувачки семејства во Скопје. За сите институции е воведен административен мораториум на приемот на нови корисници, со исклучок на Домот за доенчиња и мали деца Битола којшто обезбедува згрижување на новороденчиња“, информираат од МТСП.


Царовска: Со препознавање на ризикот, може да се спречат убиства на жени од нивните партнери


Скопје, 26 октомври, 2018 - 13:24 (META) 

Убиствата на жените предизвикани од семејно насилство може да се спречат со навремено препознавање на ризикот, за што е потребна посветена меѓуинституционална работа. За таа цел, по ратификувањето на Истанбулската конвенција,  Владата почна со усогласување на законодавството, воведување на управување со случаи и отворање шелтер центри за лица жртви на семејно насилство.

Ова го изјави министерката за труд и социјална политика, Мила Царовска, која денеска присуствуваше на презентацијата на Анализата на случаи на фемициди – убиства на жени во Македонија, подготвена од Националната мрежа против насилство врз жените и семејно насилство, со поддршка од УНДП.

Министерот за внатрешни работи Оливер Спасовски рече дека семејното насилство, особено од аспект на насилството мотивирано од родова омраза, како проблем, е многу повеќе од статистички бројки.

-Наша обврска е да изградиме општество кое ќе ја штити жената како столб на семејството – рече тој.

Според анализата, 80 отсто од убиените жени во Македонија биле жртви на нивните интимни партнери или машки членови на семејството.

Во изминатата година и половина  Министерството за труд и социјална политика повторно ги активираше четирите регионални центри за лица жртви на семејно насилство во Скопје, Кочани, Битола и во Свети Николе, а ја прошири и дејноста на Центарот за лица жртви на трговија со луѓе и со жртви на сексуално насилство, каде што згрижувањето трае до 6 месеци.

Во соработка со граѓанскиот сектор, во функција се ставени Центар за лица жртви на семејно насилство, Кризен центар 24/48 часа и Национална мобилна СОС линија. Министерството инвестира и во објект каде ќе биде сместен Центар за советување на жртви на насилство во Општина Куманово. Исто така, отворени се центри за жртви на сексуално насилство во состав на здравствени установи во Куманово, Тетово и Скопје.


Социјалната помош од следната година трипати повисока


Скопје, 18 септември, 2018 - 14:38 (META) 

Трипати поголема социјална помош за најголем дел од семејствата во социјален ризик, преквалификација и доквалификација на работоспособните приматели со цел да можат да се вратат на пазарот на труд и да излезат од сиромаштија, како и олеснување на пристапот до детски додаток, предвидува реформата на социјалниот систем што треба да почне да се применува од 1 јануари наредната година, соопштија на прес-конференција премиерот Зоран Заев и министрите за труд и социјална политика и за финансии Мила Царовска и Драган Тевдовски,

Според најавите, четириричлено семејство, со едно работонеспособно лице ќе добива 11.700 денари, а семејство со двајца возрасни и две деца 10.600 денари.

– Четиричлено семејство со две возрасни деца и едно лице кое е неработоспособно месечно ќе добива 11.700 денари. Трите лица влегуваат во системот на активација, односно поддршка за подготовка за вработување. Типично четиричлено семејство со две малолетни деца ќе добива 10.600 денари од кои денес 70 отсто од овие лица имаат 3.029 денари, и тоа ги доведува во дополнителен ризик. Разликата е над 7.000 денари или 300 отсто – рече министерката Мила Царовска.

Таа рече дека ќе се зголеми и опфатот на детскиот додаток.

-Детски додаток сега примаат многу малку деца, вкупно 3.200 деца. Ваков додаток примаат само оние семејства кои имаа приход до 10.000 денари. Со реформата овој додаток ќе го примаат 73.500 деца – рече Царовска.

Во иднина детски и образовен додаток ќе добиваат и семејствата со едно вработено лице, односно оние кои примаат минимална плата.

– Семејствата со минимална плата од 12.165 денари во наредните години ќе имаат месечен приход од 15.465 денари. Во овие приходи влегуваат детскиот додаток од 1.600 денари и образовниот додаток од 1.700 денари. Оние пак со право на минимална гарантирана помош ќе земаат 10.600 денари, во кои влегуваат детскиот образовниот додаток, како и енергетскиот додаток – рече Царовска.


Царовска: Работодавците што ќе ја зголемат минималната плата ќе добијат државна помош


Кочани, 1 август, 2018 - 15:32 (META) 

Министерката за труд и социјална политика, Мила Царовска денеска се сретна со менаџментот и вработените на текстилната фабрика „Голден текст“ во Кочани за да ги запознае со најновите мерки кои ги обезбеди државата за раст на платите.

„Со законските измени се предвидува работодавците што ќе им ја покачат минималната плата на вработените да добијат државна помош за зголемувањето на платите. Финансиската поддршка по работник изнесува 30 отсто од разликата помеѓу бруто платата на работникот во тековниот месец и просечната бруто плата на работникот исплатена во месеците октомври, ноември и декември лани, а најмногу до 1.200 денари по работник месечно“, изјави Царовска по средбата во фабриката.

Оваа мерка освен што обезбедува повисоки плати за работниците, истовремено е и одговор на барањето на работодавците за адресираниот проблем за т.н. уравниловка. Според работодавците има потреба од раст и на преостанатите плати блиски со минималната плата, за да не ги изгубат или демотивираат попродуктивните работници.

Средствата за исплата на финансиската поддршка се обезбедуваат од буџетот и ќе се исплаќа за периодот јули 2018 година-декември 2019 година.