!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Најмалку 19 мигранти загинале во бродска несреќа во Црното Море


Истанбул, 22 септември, 2017 - 19:49 (META) 

Рибарски брод кој превезувал мигранти денеска потонал во Црното Море во близина на турскиот брег. Во несреќата загинале најмалку 19 лица, а 11 се водат како исчезнати, соопштила турската крајбрежна стража, јавуваат агенциите.

Како што е соопштено, најмалку 40 мигранти биле спасени од бродови на крајбрежната стража и од трговски бродови кои биле во близина.

Од крајбрежната стража сооштиле дека испратиле авион и два брода откако трговски брод пријавил дека има повик за помош.

Засега нема информации од каде потекнуваат мигрантите и каде оделе. Сепак, како што пренесуваат агенциите, мигрантите во последно време сè почесто се убидуваат од Турција преку Црното Море да стигнат во Романија, земја-членка на Европската Унија.


ВМРО-ДПМНЕ: Одлуката за блокада на референдумите за мигрантите е скандалозна


Скопје, 22 септември, 2017 - 18:02 (META) 

Државниот инспекторат за локална самоуправа донесе крајно недемократска и скандалозна одлука со која се спречува одржување на референдуми и со тоа ја попречува демократијата во државата, реагираат од ВМРО-ДПМНЕ.

„Државниот инспекторат за локална самоуправа е институција под контрола на Зоран Заев која очигледно по диктат мора да го блокира и оневозможува одржувањето на локалните референдуми за градењето на мигрантски населби и кампови кои ги планира владата согласно акцискиот план и стратегијата која ја донесоа. Референдумот е граѓанско и пред се уставно загарантирано право кое гледаме дека Заев од петни жили се обидува да го оспори“, стои во соопштението на ВМРО-ДПМНЕ.

Од опозициската партија велат дека одржувањето на референдумите во неколку општини во ист ден со локалните избори е „единственото логично и рационално решение, бидејќи на тој начин се намалуваат трошоците за одржување и нема ништо спорно во таа одлука на општинските совети“.

„Уставниот суд мора веднаш да го отфрли ова решение на државниот инспекторат. Никој не смее да им забранува на граѓаните да се произнесат за ова крупно општествено прашање во ист трошок со локалните избори“, порачуваат од ВМРО-ДПМНЕ.


Ќе нема референдуми за мигрантите на денот на локалните избори


Скопје, 22 септември, 2017 - 15:52 (META) 

Државниот инспекторат за локална самоуправа донесе одлука да ги запре решенијата за организирање локални референдуми во општините против населување мигранти на денот кога се закажани и локалните избори – 15 октомври.

Ова денеска на прес-конференција го соопшти државниот инспектор за локална самоуправа, Рахим Муслиу, кој додаде дека ќе поведе и постапка пред Уставниот суд за утвдување на законитоста на иницијативите на општините за одржување референдуми за мигранти.

Причина за ваквата одлука, како што рече Муслиу, е членот 22 од Законот за локална самоуправа според кој, како што рече, никаде не е наведено дека општините имаат надлежност за мигрантите и за нивното населување.

Тој информираше дека решение досега е донесено за 12 општини (Кочани, Штип, Гевгелија, Кавадарци, Неготино, Велес, Битола, Прилеп, Радовиш, Аеродром, Гази Баба и Охрид), кои доставиле до инспекторатот извештај од јавното општинско гласило во кое е објавен референдум, а се очекува да бидат доставени уште два извештаи, од Карпош и од Ѓорче Петров.

Муслиу рече дека одлуката ќе биде доставена до Министерството за локална самоуправа, државниот секретар за локална самоуправа и до градоначалниците и советите на 12-те општини. За одлуката градоначалниците имаат обврска да ги известат и општинските изборни комисии.

Инаку, барањата за одржување на референдуми на локално ниво на денот на локалните избори е точка на дневен ред на денешната седница на Државната изборна комисија (ДИК).


ВМРО-ДПМНЕ: ДИК да не подлегнува на притисоците на СДСМ


Скопје, 16 септември, 2017 - 11:52 (META) 

Државната изборна комисија (ДИК) не смее да дозволи да подлегне под притисоците на СДСМ и нејзина должност е да ги спроведе локалните референдуми за мигрантите, велат од опозициската ВМРО-ДПМНЕ.

Во спротивно, додаваат од партијата, претседателот на ДИК, Александар Чичаковски, и сите членови кои ќе гласаат против спроведувањето на референдумите ќе одговараат кривично.

– СДС ги контролира сите државни апарати и се обидува на секој начин да го спречи демократското право за спроведувањето референдум за прашањата што ги засегаат граѓаните. ДИК мора да ги распише референдумите во повеќе од 10 општини низ цела Македонија кои ги собраа потребните потписи за распишување референдум, на кои граѓаните ќе се изјаснат дали се за или против населување мигранти во нивната општина – изјави денеска Милош Милошевски од ВМРО-ДПМНЕ пред просториите на ДИК.


И во Карпош ќе има референдум за населувањето мигранти


Скопје, 5 септември, 2017 - 17:41 (META) 

Советот на Општина Карпош денеска на 73. седница едногласно ја прифати предлог-одлуката за распишување на референдум на локално ниво, на кој жителите на општината ќе се изјаснат во врска со населувањето мигранти на територија на Општина Карпош.

Во согласност со одлуката, локалниот референдум ќе го спроведе Општинската изборна комисија на Карпош и општинските избирачки одбори.

Советниците, исто така, утврдиле дека не постојат услови за спроведување на одлуката на Министерството за труд и социјална политика, според која се воведува двосменско работење во градинките. Со одлука на Советот, градинките во Карпош ќе продолжат да работат според старото работно време, односно до 18 часот.

Градоначалникот на Карпош, Стевчо Јакимовски, оцени дека идејата е добра, но дека потребно е да се направат суштински измени за таа да профункционира, односно да се вработи дополнителен стручен и технички кадар, а Општината да обезбеди поголеми финансиски средства за да ги покрие дополнителните трошоци.


Советот на Општина Битола референдумот за мигрантите го закажа за 15 октомври


Битола, 4 септември, 2017 - 17:47 (META) 

Со 15 гласа „за“ и со 9 „против“, Советот на Општина Битола денеска ја изгласа одлуката за распишување референдум на кој битолчани ќе го искажат својот став околу нацрт-стратегијата за мигранти.

Жестока дебата се отвори за датумот на одржување на референдумот. Опозицијата имаше предлог референдумот да се одржи на 1 октомври, меѓутоа владејачкото мнозинство во битолскиот совет не го прифати предлогот и реферндумот ќе се одржи на 15 октомври, на денот на локалните избори.

Министерката за труд и социјална политика, Мила Царовска, ненајавено се појави во Советот на Општина Битола за време на дебатата за референдумот.

Таа во изјава за медиуми рече дека ВМРО-ДПМНЕ лаже и шири ксенофобија.

– ВМРО-ДПМНЕ лаже, шири ксенофобија и лажни вести. Ниту ќе се населуваат бегалци во Македонија, ниту се градат станови во Македонија. Нека кажат со кој документ владата се обврзала да потроши финансиски средства или направила проектни документи за изградба на станови. Референдум на истиот ден на локалните избори не смее да ни се случува зашто тоа е нарушување на процесот на избор на градоначалник или градоначалничка на Битола – рече Царовска.


Заев: ВМРО-ДПМНЕ манипулира со становите за бегалци поради страв од пораз на изборите


Велес, 2 септември, 2017 - 18:03 (META) 

Референдумите од неколку општини за изградба на станови за бегалци најавени за денот на локалните избори се политичка манипулација за одвлекување на вниманието на граѓаните во пресрет на изборите, изјави денеска премиерот Зоран Заев, како одговор на новинарско прашање при неговата посета во Велес.

– Македонија не е толку добра земја за бегалците да останат овде. Дај боже да е добра земја, тогаш ќе имаат аспирации да останат. Ова е политичка манипулација од страна на нашиот политички опонент, кој сака да го одвлече вниманието на граѓаните во пресрет на локалните избори. Тоа го прават затоа што се исплашени дека ќе ги загубат и општините – изјави Заев.

Премиерот рече дека ако преку мнозинството во поголемиот дел од општините биде спроведен референдум за забрана за отворање кампови во Македонија, на нив ќе гласа и СДСМ, со што 100 проценти ќе се покаже дека ќе нема кампови.


Спасени 300 мигранти кај Либија


Триполи, 29 август, 2017 - 16:23 (META) 

Либиската крајбрежна стража спасила повеќе од 300 мигранти во море, западно од Триполи, соопшти портпаролот на либиската морнарица.

Крајбрежната стража утринава спасила 140 илегални мигранти западно од Триполи и уште една група од 164 мигранти во близината на Сабрата, меѓу кои имало седум жени и шест деца, рече портпаролот.

Како што соопшти тој, мигрантите се од Подсахарска Африка, Египет, Мароко и од Тунис.


Германија и Египет постигнаа договор за намалување на приливот на мигранти


Берлин, 28 август, 2017 - 17:56 (META) 

Германија и Египет постигнаа договор за намалување на приливот на мигранти од таа северноафриканска земја.

Портпаролот на германската влада Штефан Зајберт изјави дека Египет според новиот договор ќе добие дополнителни средства за програми кои имаат за цел на луѓето да им помогнат да пронајдат подобро вработување, како и за школување на Египќани во Германија.

Германија исто така на Египет ќе му помогне да ги подобри условите во центрите за сириските бегалци и другите раселени во земјата.

Двете земји се договорија дека ќе се борат против криумчарење на мигрантите.

Овој договор е дел од широките напори на Германија да соработува со земјите во борбата против причините за неконтролираната миграција.


Мини самит во Париз за мигрантската криза


Париз, 28 август, 2017 - 13:27 (META) 

Лидерите на седум африкански и европски земји се состануваат денеска во Париз на мини самит за да разговараат за предизвиците кои ги носи мигрантската криза во Европската Унија.

Францускиот претседател Емануел Макрон ги повика колегите од Нигер и Чад како и премиерот на либиската влада, односно лидерите на државите кои се на главната транзитна рута за мигранти кои идат кон Европа.

Германската канцеларка Ангела Меркел, шпанскиот и италијанскиот премиер Маријано Рахој и Пауло Џентилони и високата претставничка на ЕУ за надворешна политика и безбедност Федерика Могерини ќе се придружат на денешните преговори.

Европските земји сакаат да понудат развојна помош и финансиски средства на африканските партнери во замена за помош во ограничување на приливот на економски мигранти и баратели на азил.

Според податоците на Обединетите нации, вкупно 125.000 мигранти оваа година го поминале Средоземното море по морски пат, од кои најголем број најпрво пристигнале во Италија по што заминале во други членки на ЕУ.

Се проценува дека 2.400 мигранти го загубиле својот живот на таа рута.