!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Напредокот во спроведувањето на реформите – основа за преговорите со ЕК


Скопје, 16 ноември, 2017 - 15:46 (META) 

Реформите на македонското правосудство треба внимателно да бидат испланирани врз основа на анализите и на оценките, а консултациите да бидат транспарентни и да вклучуваат повеќе фактори. Треба да се одвојат и доволно пари на самиот почеток на реформите за да може да дојде до нивно целосно спроведување, е една од пораките од ЕУ искажана на 12. состанок на Подкомитетот за правда и внатрешни работи во рамките на Договорот за стабилизација и придружување.

Состанокот се одржал завчера и вчера во Скопје, извести Делегацијата на Европската Унија.

На состанокот се разговарало за состојбите со судските реформи, темелните права, антикорупциските политики, внатрешните работи и граничната контрола, азилот и миграциите, во функција на услогласување до легислативата на ЕУ (acquis), според поглавјата 23 и 24, како и за спроведувањето на Спогодбата за стабилизација и придружување во погоренаведените области.

„При дискусиите, особено внимание е посветено на реформските приоритети и на препораките на Високата експертска група за владеењето на правото, како и на мерките од владиниот план „3-6-9“. Напредокот во спроведувањето на мерките пропишани во овие документи ќе ги постават основите за понатамошните разговори со Европската комисија“, се вели во заедничкото соопштение што го испрати Делегацијата на ЕУ во Скопје.

На состанокот Европската комисија понудила помош во ревидирање на материјалите. Се дискутирало и за постигнувањето правна одговорност за кривичните дела што произлегуваат од содржината на прислушуваните разговори, односно за „бомбите“.

Европската комисија констатирала напредок во медиумската сфера и ѝ порачала на власта да продолжи со сеопфатни консултации за тековните реформи и да промовира поттикнувачка средина за слободата на изразувањето.


Полска ја победи ЕУ, тврди премиерката Шидло


Варшава, 14 ноември, 2017 - 17:02 (META) 

Полската премиерка Беата Шидло изјави дека нејзината Влада победила во спорот со ЕУ околу мигрантите, тврдејќи дека Унијата дури и го сменила својот став по тоа прашање.

Според Шилд, ЕУ го сменила ставот благодарение на влијанието на одлучниот и непоколеблив на Полска.

– Денеска во Европа на Полска се гледа како на земја ослободена од тероризам – вели Шидло.

Полска одби да прими бегалци според обврзувачкиот план на ЕУ за релокација на бегалци. Варшава како аргумент наведе дека со прифаќањето на муслиманските мигранти ќе се загрози безбедноста на земјата и нејзиниот католички идентитет.


Полицијата откри 13 мигранти кај Струмица


Струмица, 11 ноември, 2017 - 16:55 (META) 

Тринаесет мигранти синоќа се откриени при мешана полициска контрола од граничниот премин „Богородица“, соопшти МВР.

Синоќа во 20,00 часот од страна на патрола од униформирани полициски службеници од полициската станица за гранично преминување и граничен надзор „Богородица“ и униформирани полициски службеници од Република Хрватска на автопатот Гевгелија – Скопје во близина на бензинската пумпа од правец кон село Удово биле забележани две сомнителни патнички моторни возила, „опел вектра“ со штипски регистарски ознаки и „форд мондео“ со гевгелиски регистарски ознаки.

Како што се навеедува во соопштението, патролата им дала светлосен и звучен знак на возилата да застанат, но тие со зголемена брзина се упатиле по регионалниот пат кон Струмица. На раскрсницата кај село Раборци го промениле правецот на движење по што се упатиле кон село Попчево. Во 20,45 часот на шумскиот пат во близина на браната во село Водоча, возачот на возилото „форд мондео“ излегол од возилото додека истото било во движење и се качил во „опелот“, кој бил во близина, и со голема брзина се упатиле кон село Водоча-Струмица.

При претресот на возилото „форд мондео“ пронајдени се 10 мигранти и уште тројца мигранти кои биле во непосредната околина. Тие се однесени во полициската станица за граничен надзор и граничен премин „Богородица“ за понатамошна постапка.


Спасовски: Брзата размена на информации е клучна за откривање на шверцот со мигранти


Скопје, 27 октомври, 2017 - 11:30 (META) 

За нашите служби да бидат ефикасни во откривањето на организираните криминални групи за криумчарење мигранти, најважна е брзата и непречена размена на информации, рече министерот Оливер Спасовски, во своето обраќање на Министерскиот форум на ЕУ и на Западен Балкан за правда и за внатрешни работи што се одржува во Софија.

– Нашата соработка е правно е регулирана. Тоа што треба вистински да направиме е нашиот ентузијазам да го насочиме кон вистинска полициска соработка на дневна основа, не само на регионално ниво, туку и со земјите кои се крајна дестинација на мигрантите. Патот на движењето на мигрантите од моментите кога тие влегуваат во нашите земји, па сè до нивното конечно пристигнување во посакуваните западноевропски земји може да даде многу одговори, што, пак, ја даваат целосната слика за криминалната мрежа – рече Спасовски.

Тој нагласи дека криминалците постојано го менуваат начинот на дејствување и дека новите форми на шверц не вклучуваат единствено криумчарење мигранти, туку и оружје и дрога.

Спасовски смета дека е потребно преструктуирање за разоткривањето на организираните криминални групи да биде поуспешно.

На Министерскиот форум на ЕУ и на Западен Балкан, кој почна вчера во Софија, учествуваат министрите за правда и за внатрешни работи на Естонија, Бугарија и на Австрија, еврокомесарот за правда, потрошувачи и за родова еднаквост Вјера Јоурова, еврокомесарот за миграции, внатрешни работи и за државјанството Димитрис Аврамополус и нивните колеги од Западен Балкан.


Анкета: Младите ги стигматизираат бегалците поради засилени национални чувства и страв од тероризам


Скопје, 26 октомври, 2017 - 14:03 (META) 

Стравот и предрасудите кон луѓето од исламска вероисповед се најголем извор на стигматизација кон бегалците и кон мигрантите кај младите луѓе од осум европски земји, четири од Западен Балкан, меѓу кои и Македонија, и четири земји членки на ЕУ, покажува интернет-анкетата на Институтот за демократија „Социетас цивилис“, изработена во рамки на проектот „Поттикнување на промена на стигматизирачки ставови“.

Наодите покажуваат дека стравот и предрасудите кај младите луѓе се зголемуваат во најголем дел поради засилувањето на националните чувства и загриженоста поради тероризмот во светот. Ваквиот однос и чувства се поизразени кај младите што живеат во рурални средини, отколку кај тие од градски средини. Притоа, контактот со бегалците го намалува нивото на исламофобија и на стигма на младите кон овие луѓе.

Исламофобијата кај младите луѓе на вкупниот примерок на скала од 1 до 5 е оценета со средна оценка од 2,75. Младите луѓе од Западен Балкан се помалку исламофобични отколку нивните врсници од Европа. Нивото на исламофобија кај младите луѓе во Западен Балкан е 2,5, а за младите луѓе од европските земји нивото е 2,9.

Според истражувањето, просечното знаење за исламската религија е релативно ниско, односно на скала до 6, тоа е на ниво 2,2.

Анкетата покажува дека младите луѓе во Западна Европа имаат поголема веројатност да поддржат насилни протести, додека младите луѓе од Западен Балкан обично се склони кон „нарушување на редот“.

Младите луѓе од земјите од Западен Балкан сметаат дека најголема безбедносна закана е организираниот криминал, потоа тероризмот и, на трето место, емиграцијата.


Тринаесет мигранти од Ирак откриени во камион на граничниот премин Богородица


Гевгелија, 22 октомври, 2017 - 14:46 (META) 

Полициска екипа и службеници на Царинската управа синоќа, околу 20.45 часот, на граничниот премин Богородица, при контрола на камион со бугарски регистарски ознаки, управуван од 45-годишен грчки државјанин, откриле група од 13 мигранти од Ирак, соопшти денеска Министерството за внатрешни работи.

Мигрантите, како што информира МВР, биле пронајдени во специјално направен бункер во предниот дел на приколката, веднаш зад кабината на возилото.

Регионалниот центар за гранични работи Југ при МВР до Основното јавно обвинителство за гонење организиран криминал поднел кривична пријава против грчкиот државјанин С.А., поради сомневање дека криумчарел мигранти.


ЕУ најави помош за Италија за намалување на бројот на мигрантите


Брисел, 20 октомври, 2017 - 10:04 (META) 

Претседателот на Европскиот совет, Доналд Туск, соопшти дека Европската Унија договорила зголемување на финансиската помош за Италија за напорите да се спречат мигрантите да дојдат до Европа преку Средоземно Море.

Туск рекол дека ЕУ обезбедила „доволно финансии“ за Италија и дека Европската комисија ќе обезбеди парите да одат за борба против „илегалната миграција“.

Тој додаде дека постои „вистинска шанса“ да се затвори централната средоземна рута.

Италија годинава успеа да го намали бројот на мигрантите кои илегално пристигнуваат на нејзиниот брег, со испраќање морнарица на либискиот брег за да ѝ помогне на локалната крајбрежна стража.


Возило со 14 мигранти откриено кај селото Удово


Валандово, 9 октомври, 2017 - 13:31 (META) 

Полициска екипа од Валандово вчера на бензинската пумпа кај селото Удово, пронашла автомобил, марка „ауди а6“ со скопски регистарски ознаки, во кое имало 14 мигранти од Пакистан, информира МВР.

По извршениот увид, автомобилот и мигрантите биле преземени од екипа од полициската станица од граничниот премин Богородица, а за случајот бил известен јавен обвинител. По негова наредба, возилото било задржано во полициската станица на преминот Богородица, а мигрантите биле однесени во Прифатниот центар за странци во Скопје.

Инаку, како што информираат од МВР, регистарските таблички на возилото биле од товарно возило „застава“.

Се преземаат мерки за целосно расчистување на случајот, велат од полицијата.


Груевски: Мигранти ќе се сместуваат долж јужната граница и ќе чекаат државјанства


Струга, 28 септември, 2017 - 19:14 (META) 

Додека бевме на власт, од нас беше побарано да примиме 150.000 мигранти и да им дадеме државјанства. Ние не се согласивме на тоа, но некој друг се согласи и затоа ја направија Стратегијата за бегалци, изјави лидерот на ВМРО-ДПМНЕ, Никола Груевски на митингот во Вевчани.

Тој рече дека затоа во 20 општини граѓаните барале да се одржи референдум за мигрантите, а власта тоа го забранила.

– Владата со декрет го забрани референдумот зашто народот ќе ја кажеше вистината дека нивните општини немаат економска моќ и капацитет да вдомат 150.000 лица. По локалните избори се планира да се направат бегалски кампови долж јужната граница за да се сместат мигрантите додека не им се дадат државјанства – рече Груевски.

Тој додаде дека власта на секој можен начин оди против волјата на граѓаните, затоа што како што кажа, не е донесена од народот.

– Освен навреди и омаловажување, тие не нудат ништо или нудат нешто апстрактно. На пример, нудат живот како да сме сите мртви, нудат воздух како да го немаме итн. Не случајно, во овој период толку криминалци се пуштија од затвор. Опонентите се слаби и исплашени. Тие знаат дека по регуларен пат изборите ќе ги изгубат, па затоа се надеваат дека ќе победат со криминалци. Но, нема да дозволиме да ни ја украдат победата – додаде Груевски.

Груевски кажа дека за овие четири месеци додека власта на секој чекор работела незаконски, се однесувала насилно и работела против волјата на народот, во ВМРО-ДПМНЕ работеле на зацврстување и реорганизација на партијата.


Најмалку 19 мигранти загинале во бродска несреќа во Црното Море


Истанбул, 22 септември, 2017 - 19:49 (META) 

Рибарски брод кој превезувал мигранти денеска потонал во Црното Море во близина на турскиот брег. Во несреќата загинале најмалку 19 лица, а 11 се водат како исчезнати, соопштила турската крајбрежна стража, јавуваат агенциите.

Како што е соопштено, најмалку 40 мигранти биле спасени од бродови на крајбрежната стража и од трговски бродови кои биле во близина.

Од крајбрежната стража сооштиле дека испратиле авион и два брода откако трговски брод пријавил дека има повик за помош.

Засега нема информации од каде потекнуваат мигрантите и каде оделе. Сепак, како што пренесуваат агенциите, мигрантите во последно време сè почесто се убидуваат од Турција преку Црното Море да стигнат во Романија, земја-членка на Европската Унија.