Владата предлага кризната состојба на границите да продолжи до јуни 2019


Скопје, 30 октомври, 2018 - 13:23 (META) 

Владата предлага, кризната состојба на јужната и на северната граница да биде продолжена до 30 јуни 2019 година, со цел, превенирање и спречување влез и транзитирање мигранти на територија на Македонија.

Предлог-одлуката за изменување на Одлуката за одобрување на продолжување на рокот за постоење на кризна состојба заради зголемен обем на влез и транзитирање на мигранти низ територијата на Македонија е веќе доставена до Собранието, каде треба да биде разгледана на матичната комисија и да биде изгласана на пленарна седница.

Целта за продолжување на одлуката е да се обезбеди континуитет во вршењето на активностите од страна на силите на Армијата и на безбедносните сили на Министерството за внатрешни работи, во функција на обезбедување, заштита и чување на државната граница.

Кризната состојба поради наплив на мигранти на македонската граница беше воведена летото во 2015 година, и од тогаш се продолжува.


Лажни вести за мигрантите потпалуваат омраза во Србија


Белград, 24 октомври, 2018 - 9:47 (META) 

Комесаријатот за бегалци и миграции на Србија предупреди вчера дека на социјалните мрежи се шири лажна вест за наводен напад од група мигранти врз 17-годишна девојка во центарот на Белград.

„Ова не е прв случај на ширење на лажни вести на социјалните мрежи за мигрантите во Србија. Социјалните мрежи се користат како место за непопречено излевање омраза и ксенофобија кон овие луѓе, а главното оружје се токму лажните вести – од тоа дека на мигрантите им се делат пари, по 10 евра дневно на рака, до тоа дека се потпишуваат договори за нивно трајно населување во Србија“, соопшти српскиот комесаријат.

Српското Министерство за внатрешни работи завчера ја демантираше информацијата објавена на социјалните мрежи, дека група мигранти во центарот на Белград, пред очите на бројни минувачи, силувале 17 годишна девојка, и наведе дека на подрачјето на Белград не е евидентиран таков случај.

Министерството нагласи и дека полицијата, по налог на Вишото јавно обвинителство за високотехнолошки криминал, ќе изврши службени разговори со лицата што овие тврдења ги објавиле на социјалните мрежи.


Откриени седум мигранти кај Смоквица


Гевгелија, 5 октомври, 2018 - 11:20 (META) 

Вчера во 20.30 часот на клучката во село Смоквица полициски службеници запреле автомобил „фолксваген голф“ со скопски регистарски ознаки, управувано од Н.Р.(45) од с.Арачиново, скопско, информираат од МВР.

Притоа, во возилото биле затекнати седум мигранти, од кои шест од Авганистан и еден од Шри Ланка. Н.Р. бил приведен и предаден на полициски службеници од Полициската станица Гевгелија за понатамошна постапка.

Се преземаат мерки за расчистување на случајот.


Србија и Фронтекс ја парафираа спогодбата за заштита на надворешните граници на ЕУ


Белград, 20 септември, 2018 - 13:08 (META) 

Србија денеска ја парафираше спогодбата со Европската агенција за гранична и крајбрежна заштита (Фронтекс) за унапредување на безбедноста на надворешните граници на ЕУ, како и за управување со миграциите. Потпис на спогодбата ставија министерот за внатрешни работи на Србија, Небојша Стефановиќ и европскиот комесар за внатрешни прашања и миграции Димитрис Аврамопулос.

Аврамопулос објасни дека спогодбата ќе му овозможи на Фронтекс да спроведува гранични проверки на територијата на Србија и ќе дава поддршка при спроведувањето гранична контрола, но нема да презема задачи или надлежности од српските сили.

Стефановиќ појасни дека Србија е вистински посветена на спротивставување на сите облици на криминал и дека за државата е важно во соработка со сите меѓународни партнери да стори се што е потребно за нејзините граѓани да бидат безбедни. Спогодбата треба да биде ратификувана во српскиот парламент за да стапи на сила.


Наскоро спогодба на Србија со Фронтекс


Белград, 18 септември, 2018 - 16:19 (META) 

Сем Фабрици, шефот на делегацијата на ЕУ во Србија денеска најави дека наскоро во Србија ќе стаса еврокомесарот за миграции Димитрис Аврамопулос и оти претпоставува дека тој со Србија ќе потпише статусна спогодба за Фронтекс, граничната служба на ЕУ.

Повикувајќи се на изјава на Аврамопулос, „Дојче веле“ вчера пренесе дека со Србија, Македонија и Албанија веќе се постигнати соодветни спогодби за помош од припадниците на Фронтекс на граничните полиции на трите земји. Еврокомесарот за проширување Јоханес Хан потврди дека се преговара за пристап на Фронтекс на териториите на Србија и Македонија, додека, според тврдењата од Брисел, тоа е завршено.

На прашање дали тоа значи дека Фронтекс во Србија ќе ги штити границите на ЕУ од мигрантите, Фабрици порача дека таа спогодба не треба да се поврзува со такви приказни и ги замоли новинарите да почекаат на 20 септември во Белград да дојде еврокомесарот Аврамопулос и да им ги објасни деталите на спогодбата.

Премиерката на Србија, Ана Брнабиќ ги повика новинарите да не шират трачеви и рече дека никогаш не станувало збор за отворање центри за мигранти поради кои Фронтекс би ги бранел границите на ЕУ, додавајќи дека Србија е во специфична ситуација, бидејќи мигрантите од оваа земја доаѓаат од ЕУ за да продолжат кон други земји на ЕУ.

Претседателот на Европската Комисија, Жан Клод Јункер изнесе план за засилување на Фронтекс, кој наместо 1.500 припадници, до 2020 би требало да има персонал до 10.000.

Припадниците на Фронтекс, според „Дојче веле“ би требало да бидат поставени на меѓудржавните граници во ЕУ и да помогнат со патроли и контрола на личните документи, а Фронтекс ќе дејствува и на територијата на трети земји, што го подразбира и Западен Балкан, како територија низ која минува балканската рута.

Според новиот план, силите на Фронтекс би биле опремени со авиони, бродови и оружје. Во практика, како што пренесуваат изворите на „Дојче веле“ тоа би значело дека некоја членка на ЕУ што очекува пристигнување на голем број мигранти, би побарала помош од Фронтекс, кој потоа би ја презел комплетната процедура на постапување за азил, но конечната одлука сепак би останала на суверената држава.


Австрија ќе ги штити границите, по договорот за мигрантите во германската влада


Виена, 3 јули, 2018 - 10:03 (META) 

Австриската влада соопшти дека е подготвена да преземе мерки за заштита на границите, по договорот во германската влада со кој се предвидува рестрикција за влез на мигранти во Германија.

„Доколку германската влада го потврди договорот, ќе бидеме приморани да преземеме мерки за да ги спречиме непријатностите на граѓаните во Австрија“, се наведува во соопштението.

Во него се додава дека Австрија е подготвена да ги штити границите, посебно на југот, со Италија и Словенија.

Германскиот министер за внатрешни работи Хорст Зехофер, кој е во судир со канцеларката Ангела Меркел околу мигрантската политика, изјави дека постигнал договор со неа околу ова прашање.

Постигнатиот компромис предвидува дека во иднина, оние кои бараат азил, а доаѓаат во Германија ќе бидат испратени во транзитни центри на границите, а не по центрите ширум земјата.

Откако барањата ќе бидат разгледани, мигрантите ќе бидат префрлени во други земји на ЕУ каде што најпрво стигнале. Тој трансфер ќе биде организиран во рамките на договорите со тие земји.


Во Грција четирипати повеќе мигранти од истиот период лани


Атина, 25 април, 2018 - 11:45 (META) 

Бројот мигранти кои пристигнуваат на грчките острови сега е за четири пати поголем од истиот период лани. Според грчките власти, на Лезбос, каде што е најголемиот камп за мигранти, лани дневно во просек пристигнувале по 54 мигранти, а сега над 200 секој ден.

Од март годинава грчките острови и северна Грција беа сведоци на пристигнувањето на голем број бегалци од Блискиот Исток, чиј број е значително повисок во споредба со истиот период минатата година.


Хелсиншки комитет: Бегалската криза не е завршена, да се следи ситуацијата на терен


Скопје, 18 април, 2018 - 11:27 (META) 

Бегалската криза не смее да се смета за завршена, иако бројот на бегалци и мигранти кои лани влегоа во Македонија е намален во споредба со 2016 година. Државата мора да продолжи да ги гради своите капацитети за да може непречено да ги гарантира основните човекови права и слободи на бегалците и мигрантите на нејзината територија, како и итно да престане со нелегалното, групно „депортирање“ на овие луѓе кон соседните земји. Ова се дел од заклучоците кои Хелсиншкиот комитет за човековите права на Македонија ги истакна во Годишниот извештај за 2017 за утврдените состојби и почитувањето на правата на бегалците, мигрантите и барателите на азил кои транзитираа низ земјава.

Во рамки на дискусијата за истражувањата беше разгледано и прашањето за продолжување на кризната состојба на јужната и северната граница во земјава. Препораката е дека Собранието треба да прогласи продолжување за да се следи ситуацијата на терен, да се подобри состојбата на транзитните кампови како и третманот на бегалците.

Хелсиншкиот комитет истакнува дека официјалната статистика на институциите покажува оти во Македонија во 2017 година, бројката на бегалци и мигранти во прифатните кампови не надминал 200 лица.

Во текот на минатата година низ Македонија поминале бегалци од повеќе земји, при што најбројни биле луѓето од Авганистан, Сирија, Пакистан, Иран и Ирак. Поретко се среќавале бегалци и мигранти со потекло од Мароко, Алжир, Либија, Палестина, а кон крајот на 2017 биле регистрирани неколку турски државјани кои бегале од политички прогон.

Хелсиншкиот комитет препорачува да се воспостави систем на навремено регистрирање на сите бегалци и мигранти што транзитираат низ земјава, за да може да се следи нивното движење и да се зголеми заштитата на нивните човекови права. Да се гарантира правото на барање азил за сите бегалци, мигранти и странци задржани на територијата на Македонија без условување од страна на државните органи, да се обезбеди надзор и поголема заштита за малолетниците без придружба кои транзитираат низ земјава, а обвинувањата за употреба на прекумерна сила од страна на полициските службеници темелно да се истражат и евентуалните прекршители на законските овластувања да сносат одговорност.

Дополнително, Хелсиншкиот комитет укажува дека неопходно е да се влијае врз јавното мислење за бегалската криза, со оглед на тоа дека минатата година е забележано високо ниво на ксенофобија помеѓу граѓаните, нетолеранција кон бегалците и говор на омраза.


Мигрантските рути се затворени, владите во регионот ќе разменуваат информации


Скопје, 4 април, 2018 - 13:55 (META) 

Регионалната иницијатива за миграција, азил и бегалци (МАРРИ) ги поддржува шесте влади од Западен Балкан, Албанија, Босна и Херцеговина, Косово, Македонија, Црна Гора и Србија во усогласување на правната рамка со законодавството на Европска Унија, во изградбата на институции и персонал, како и размена на информации за мигрантите кои поминуваат низ овие држави.

На денешната презентација на МАРРИ, беше истакнато дека како делуваат на повеќе подрачја како азил, интегрирано гранично управување, визен режим, интеграција на бегалците, борбата против трговијата со луѓе.

– Ги поддржувме шесте влади за подобро да управуваат со миграцијата. Тоа е условено со евроатлантската перспектива на државите од регионот, а како членки на Обединетите Нации, одредени документи се обврзувачки. Државите исто така треба да имаат побрза соработка во размената на комунакции – изјави директорката на МАРРИ, Тамара Ругоша.

Иако рутата за мигрантите е затворена, сепак тие користат илегални премини преку државите од регионот за влез во државите од Европската Унија. Притоа, додаде Ругоша, постои опасност од нелегална трговија со луѓе, криумчарење на деца, трговија со органи.

Во следните две години, како предизвик за МАРРИ меѓудругото ќе биде и подигање на свеста во регионот од опасноста за криумчарење. Па оттука, граничните служби, посебно на аеродромите, ќе бидат обучувани од страна на Европската гранична служба, Фронтекс за препознавање на деца кои се жртви на криумчарење.

– Во моментов рутите се затворени, но опасноста од Блискиот Исток се уште ја има. Затоа овој период е потребно да превенираме. Кога беше кризата, на македонската и на српската граница имаше по 20.000 мигранти, а тоа навистина е тешко да се изменаџира. Властите овде и во Србија покажаа дека имаат капацитет за справување, но тој треба да се подобри и да биде поефикасен. Ние сме овде и да ги поврземе владите со донаторите, за тие да не трошат пари од буџетот. Имав информација дека вашата држава, ја чинело 50.000 евра дневно за регистрација, сместување, организација на мигрантите. Тоа е голем притисок – додаде Ругоша.

Во 2015 и 2016 година, низ територијата на Западен Балкан поминале еден милион бегалци.


Израел го суспендира планот за испраќање илјадници мигранти од Африка на Запад


Тел Авив, 3 април, 2018 - 10:21 (META) 

Израелскиот премиер Бенјамин Нетанјаху ја суспендираше спогодбата со Агенцијата за бегалци на ОН (УНХЦР) за преселба на илјадници мигранти од Африка во западните земји, и тоа неколку часа откако беше објавено склучувањето на спогодбата.

Според спогодбата, голем дел од 16.000 Африканци што бараат азил во Израел треба да бидат испратени во западните земји, а не вратени во матичните земји. Но, Нетанјаху, вчера, неколку часа по спогодбата, на „Фејсбук“ напиша дека таа ќе биде ставена на чекање.

Голем дел од мигрантите се во Тел Авив, а според најновото обраќање на израелскиот премиер ќе бидат исселени од таму и испратени во села и други заедници.