!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Едно лице загина во експлозија во близина на метро-станица во Стокхолм


Стокхолм, 7 јануари, 2018 - 16:44 (META) 

Едно лице загина во експлозија во близина на метро-станица во Стокхолм, соопшти полицијата. Во експлозијата, која се случила во јужниот дел на градот, повредена е уште една жена.

Засега не се знае дали се работи за терористички напад, бидејќи полицијата се уште го истражува случајот.

Метро-станицата е затворена, а истражен тим го проверува местото за да утврди, дали се поставени и други експлозивни направи.


Полицијата уапси 18-годишно момче за нападот во лондонското метро


Лондон, 16 септември, 2017 - 12:42 (META) 

Британската полиција утрово уапсила 18-годишно момче под сомневање за поврзаност со бомбашкиот напад што вчера се случи во метро-станицата Парсонс грин, во југозападен Лондон, јавува „Би-би-си“.

Засега нема информации за индентитетот на момчето, а полицијата неговото апсење го опишала како значајно.

Момчето било уапсено во пристанишниот град Довер и е задржано во локалната полициска станица.

„Имаме важно апсење во истрагата утрово. Иако сме задоволни од напредокот, продолжуваме со истрагата, а нивото на опасност и понатаму останува критично“, изјавил Нил Басу, координатор на антитерористичките единици на полицијата.

Во детонацијата на импровизираната експлозива направа поставена во метрото повредени беа 29 лица.


Британската полиција трага по бомбашот одговорен за нападот во метро-станицата


Лондон, 16 септември, 2017 - 10:48 (META) 

Во тек е потрага по лицето одговорно за бомбашкиот напад што вчера се случи во метро-станицата Парсон грин во југозападниот дел на Лондон, во кој 29 лица беа повредени, јавува „Би-би-си“.

Полицијата соопштила дека трага по осомничените и дека стотици полицајци ги прегледуваат снимките од безбедносните камери од метро-страницата.

Заканата од терористички напад во Велика Британија е подигната на највисоко – критично ниво, што значи дека постои реална опасност од нов напад.

Милитантната група Исламска држава соопшти дека стои зад експлозијата на бомбата во метро-станицата што се случи вчера утро.

Помошник-комесарот на лондонската полиција, Марк Роули, изјавил дека ИД „рутински“ ја презела одговорноста за нападот, независно од тоа дали имала или не претходна врска со лицата вмешани во случајот.

Тој побарал од јавноста да остане будна, но додал дека луѓето не треба да бидат вознемирени.


Експлозија во метро-станица во Санкт Петербург


Санкт Петербург, 3 април, 2017 - 16:00 (META) 

Десет лица загинаа, а повеќе од 50 се повредени во експлозија во метро-станица во Санкт Петербург, јавува агенцијата ТАСС, повикувајќи се на полициски извори.

Агенцијата јавува дека на една метро-станица одекнала експлозија и дека има многу повредени. Експлозијата одекнала во еден од вагоните на возот, додека тој се движел меѓу две станици.

Засега не се знае причината за експлозијата.

„Спутник“ јавува дека експлозијата се случила на сината линија на метрото и дека три станици се затворени.


Експлозија во Москва, најмалку двајца повредени


Москва, 22 декември, 2016 - 10:00 (META) 

Најмалку две лица утринава се повредени во експлозија во подвозник во близина на метро-станица во јужниот дел на Москва, јавуваат руските медиуми, повикувајќи се на извори на службата за вонредни ситуации.

Во експлозијата две лица се повредени, од кои едно потешко.

Полицијата го забранила пристапот до местото на експлозијата, а влезот на метро-станицата е затворен.


Маж со нож нападнал четири лица во метро-станица во Франкфурт


Франкфурт, 30 октомври, 2016 - 1:19 (META) 

Непознат маж со нож нападнал четири лица на метро-страница во Франкфурт, Германија.

Повредените се префрлени во болница и не се во животна опасност.

Полицијата го блокирала тој дел на градот, а напаѓачот се бара, пренесуваат германските медиуми.

Мотивот за нападот засега не е познат.


26 загинати и 136 повредени во нападите во Брисел – ИД ја презеде одговорноста


Брисел, 22 март, 2016 - 13:30 (META) 

Вкупната потврдена бројка на загинати во нападите на аеродромот и на метро-станиците во Брисел се искачи на 26, a повредени се 136 лица. Одговорноста за нападот ја презеде Исламска држава.

ИД своето соопштение го објави преку својата новинска агенција „Амак“, јавуваат египетските медиуми. Либанската милитантна група Хезболах соопшти дека Европа се наоѓа во вкрстениот оган на „одредени режими“, исто како што тоа се случува во Сирија и на Блискиот Исток.

Бриселскиот метро-оператор СТИБ-МИВБ на „Твитер“ потврди дека 15 лица биле убиени, а 55 повредни во експлозијата што се случи на метро-станицата Малбек.

Белгиската министерка за здравство, Махје де Блок, потврди дека има 11 лица загинати во нападот на аеродромот „Завантем“ и 81 повреден. Бриселскиот аеродром ќе биде затворен до утре во 6 часот наутро.

Федералниот обвинител Фредерик ван Лео изјави дека еден бомбаш самоубиец активирал експлозив на аеродромот во одделот за патници во делот за полетување. Втората експлозија на аеродромот е најверојатно од автомобил бомба, но тоа сè уште не е потврдено.

Станицата Малбек се наоѓа во близина на зградата на Европската комисија и на Европскиот совет. Европската комисија јави дека минува на портокалово ниво на тревога, што значи дека пристап во институциите на ЕУ имаат само вработени лица.

Белгиските власти прогласија највисоко четврто ниво на сигурност во целата земја по експлозиите на аеродромот и на метро-станиците. Знамињата во Брисел се спуштени на половина копје, во знак на жалост за жртвите.

Поради моменталната безбедносна ситуација во Брисел, властите го затворија целиот јавен превоз.

Безбедносните мерки се заострени во цела Белгија, Франција, Лондон и во Њујорк.

Од македонската амбасада во Брисел за „Мета“ велат дека во градот постојано се слушаат сирени на полициски возила и на возила за итна помош.

Во Белгија живее бројна македонска заедница, но од амбасадата велат дека засега немаат информации за повредени или загинати Македонци во експлозиите.

Минатата недела во Брисел беше уапсен и еден од главните осомничени за терористичките напади во Париз, Салах Абдеслам.


Нема информации за повредени македонски државјани во експлозиите во Брисел


Брисел, 22 март, 2016 - 10:36 (META) 

Серија експлозии од утринава се случија во Брисел, Белгија, во кои, според последните информации, најмалку 17 лица загинаа, а десетици се повредени.

Две експлозии рано утрово имаше на бриселскиот аеродром „Завентем“, а некои медиуми пишуваат за експлозии што се случиле и во неколку метро-станици во Брисел.

Белгиските власти потврдија дека сите метро-станици, целиот јавен транспорт, музеите и зградите на Европската Унија се затворени.

Како што велат за „Мета“ од македонската амбасада во Брисел, низ градот постојано се слушаат сирени на полициски возила и на возила за итна помош.

Во Белгија живее бројна македонска заедница, но од амбасадата велат дека засега немаат информации за повредени или загинати Македонци во експлозиите.

Од амбасадата информираат дека експлозијата на метро-станицата Маалбек се случила на само 200 метри од објектот на македонската амбасада.

Тие имаат информации и за бомба на метро-станицата Шуман, која е во близина на зградата на Европската комисија.