!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Постои отворен прозорец за разговори за името, рекол Коѕиас по средбата со Гутереш


Њујорк, 18 септември, 2017 - 12:30 (META) 

Македонија и спорот за името биле една од темите на кои вчера во Њујорк разговарале шефот на грчката дипломатија, Никос Коѕиас, и генералниот секретар на Обединетите нации (ОН), Антонио Гутереш.

Како што соопшти грчкото МНР, во врска со спорот за името и разговорите со посредство на посредникот Метју Нимиц, Коѕиас рекол дека „постои отворен прозорец за можности“ да се разговара за прашањето за името по завршувањето на локалните избори во Македонија и доколку „соседната земја го напушти иредентизмот“.

– На состанокот беше присутен и господинот Нимиц, кој завчера во Лондон се сретна со Василакис (грчкиот пратеник во разговорите за спорот за името, Адамантиос Василакис) Како што знаете, соседната земја во октомври има локални избори. Верувам дека по изборите постои прозорец за можности за дискусија за прашањето за името, ако се напушти иредентизмот – изјавил Коѕиас по средбата со Гутереш.

Во соопштението, што по средбата го издаде прес-службата на ОН, се наведува дека генералниот секретар на ОН, Антонио Гутереш, ги „поздравил обновените напори за наоѓање решение за спорот за името и го уверил грчкиот министер за надворешни работи во посветеноста на ОН да ги поддржи двете земји во овој контекст“.


Заев очекува од Нимиц нови предлози за името до крајот на годината


Драч, 26 август, 2017 - 15:34 (META) 

Премиерот Зоран Заев денеска во Драч изјави дека очекува од специјалниот претставник на Обединетите нации во разговорите за прашањето за името меѓу Грција и Македонија, Метју Нимиц, да добие нови предлози до крајот на годинава.

– Очекувам до крајот на годината да има нови идеи од Нимиц за решавање на овој проблем. Убеден сум дека позитивниот амбиент што постои во целиот регион и позитивниот однос на Македонија со сите земји од регионот може само да бидат од полза за решавање на вака чувствително прашање, рече Заев, одговарајќи на новинарско прашање дали на неформалната средбата на премиерите од Западен Балкан во Драч била понудена помош за решавање на спорт со Грција.

Прашан за законот за употребата на јазиците, Заев рече дека значењето законот се гледа во тоа што тој е дел од владината програма.

– Владата го донесе законот. Ќе се разговара за законот во септември во Парламентот. Очекувам, и уште еднаш ја покануваме опозицијата да учествува во тоа. По гласањето на законот, Венециската комисија и нашите институции ќе имаат можност да дадат коментар за него. Новиот закон ги поврзува нашите граѓани и сакаме да го подобриме законот бидејќи е право на нашите граѓани на начин за градење на едно општество за сите граѓани во нашата земја, рече Заев.


Постои нов импулс за решавање на спорот за името, оцени Нимиц


Брисел, 19 јули, 2017 - 10:24 (META) 

Специјалниот претставник на Обединетите нации во разговорите за прашањето за името меѓу Грција и Македонија, Метју Нимиц, оцени дека постои „нов импулс“ во напорите за наоѓање решение за проблемот.

– По неколкугодишен парламентарен ќор-сокак, имаме нова влада во Скопје, која е сака да ја реактивира надворешната политика во регионот, а очигледно спорот за името е голема пречка на патот за интегрирање во ЕУ и за членство во НАТО. Ова прашање е високо на агендата на новата влада и затоа сметам дека тоа е нов импулс – вели Нимиц во интервју за Независната балканска новинска агенција (ИБНА), дадено по средбата со шефот на грчката дипломатија, Никос Коѕиас.
На прашањето кои се следните чекори, посредникот вели дека во следните неколку месеци ќе биде во контакт со двете страни и дека ќе се развие план како да се придвижат преговорите напред.

Тој повтори дека не дал никакви предлози и дека сега е време да се разговара за основните концепти, пред да се дадат предлози.

Нимиц минатиот месец за време на посетата во Скопје рече дека не треба да се очекуваат драстични промени во следните неколку месеци бидејќи сега не е време за финални предлози.


Коѕиас имал „интересна и сериозна“ средба со Нимиц


Брисел, 17 јули, 2017 - 18:17 (META) 

„Имав многу интересна и сериозна средба со господинот Нимиц, кој неодамна престојуваше во Скопје. Тој ме информира за климата таму“, изјави грчкиот министер за надворешни работи, Никос Коѕиас, по денешната средба со посредникот Метју Нимиц во Брисел.

– Го информирав за тоа што ние мислиме по средбите што ги имавме со новата влада на нашиот северен сосед. Се согласивме да останеме во контакт и да бараме начини со кои можеме да отвориме процес за пронаоѓање решение – рекол Коѕиас.

На новинарско прашање дали Грција има индикации за добра волја од страна на Владата во Скопје, шефот на грчката дипломатија одговорил дека „има комуникација“.

– Комуникативно – да, а суштински дали има, треба да покажат – изјавил Коѕиас.


Нимиц и Коѕиас во Брисел ќе разговараат за спорот за името на Македонија


Брисел, 17 јули, 2017 - 10:02 (META) 

Специјалниот пратеник на ОН во спорот за името меѓу Грција и Македонија, Метју Нимиц, денеска во Брисел ќе се сретне со шефот на грчката дипломатија, Никос Коѕиас.

Како што претходно соопшти канцеларијата на Нимиц, на средбата, која е на барање на официјална Атина, ќе биде разговарано за можноста за напредок во преговорите за спорот за името.

Средбата доаѓа по последната посетата на Нимиц на Скопје, по која тој требаше да замина за Атина, но поради вклученост на Коѕиас во решавањето на кипарското прашање, средбата беше одложена.

За време на посетата на Скопје, Нимиц изјави дека не очекува во следните неколку месеци драстични промени во решавањето на спорот, затоа што допрва ќе се разгледуваат ставовите на двете страни и додаде дека не е време сега да се излезе со дефинитивен предлог.

Шефот на грчката дипломатија во Брисел, исто така, ќе учествува во Советот за надворешни работи на ЕУ, на кој треба да се дискутира за примената на стратегијата на ЕУ за надворешната и безбедносната политика и за миграциите, како и за други теми.


Нимиц и Коѕиас задутре ќе се сретнат во Брисел


Њујорк, 15 јули, 2017 - 18:19 (META) 

Посредникот Метју Нимиц, специјален пратеник на генералниот секретар на ОН за преговорите за спорот за името меѓу Македонија и Грција, и грчкиот министер за надворешни работи, Никос Коѕиас, ќе се сретнат утре во Брисел.

Како што извести канцеларијата на Нимиц, средбата е на барање на Грција. Според соопштението од ОН, целта на средбата, која следи по посетата на Нимиц на Македонија, е да се дискутира за пронаоѓање можност за напредок во преговорите за спорот за името.

Коѕиас во Брисел ќе учествува во Советот за надворешни работи на ЕУ, на кој треба да се дискутира за примената на стратегијата на ЕУ за надворешната и безбедносната политика и миграциите, како и на други теми.


Коѕиас обвинува дека меѓународната заедница ја разгалила Македонија


Атина, 12 јули, 2017 - 17:05 (META) 

Грчкиот министер за надворешни работи, Никос Коѕиас, во интервју за грчката телевизија „Антена“, ја обвини Македонија за иредентизам, неподготвеност, но и за разгаленост од меѓународната заедница.

– Бев, како што знаете, двапати во Скопје, разговаравме за прашањето, беа неподготвени. Дојдоа во Грција, пак неподготвени. Разгалени се од меѓународниот фактор. Овде си имаме работа со иредентизам кој не треба да го оставиме да се прошири на Балканот, но и генерално, не треба да го дозволиме национализмот во регионот – рече Коѕиас.

Коѕијас најави дека в понеделник во Брисел ќе се сретне со посредникот во спорот за името, Метју Нимиц, кој минатата недела беше во официјална посета на Македонија.

Утре во Солун грчкиот премиер Алексис Ципрас ќе ги пречека српскиот претседател Александар Вучиќ и бугарскиот премиер Бојко Борисов. Ципрас и Вучиќ ќе учествуваат на грчко-српскиот Совет за соработка, по што ќе дадат и заедничка изјава.

По средбата со српскиот претседател, Ципрас попладнето ќе се сретне и со бугарскиот колега, по што е најавена е заедничка средба на лидерите на Грција, Бугарија и на Србија. По средбата, за која засега во грчките медиуми не се наведува за што ќе се разговараа, исто така е најавена заедничка прес-конференција.


Посредникот Нимиц се сретна со Груевски и со Ахмети


Скопје, 3 јули, 2017 - 17:37 (META) 

Претседателот на опозициската ВМРО-ДПМНЕ, Никола Груевски, и лидерот на ДУИ, Али Ахмети, денеска се сретнаа со посредникот на ОН во спорот за името, Метју Нимиц.

На средбата во седиштето на ВМРО-ДПМНЕ, покрај Груевски присуствувале и членовите на извршниот комитет на партијата, Антонијо Милошоски и Никола Тодоров.

„Целта на посетата на Нимиц е запознавање со општата атмосфера во државата во однос на спорот со Република Грција што ќе му помогне во иднина за евентуално пристапување со нови идеи и размисли кои би помогнале во процесот“, се наведува во соопштението од ВМРО-ДПМНЕ.

Лидерот на ДУИ, Али Ахмети, средбата со посредникот Нимиц ја оцени како охрабрувачка и посочил дека и Албанците во земјава ќе дадат свој придонес за надминување на пречките за членство во НАТО и во Европската Унија.

– Многу е значајно да најдеме решение за овој проблем што веќе дваесет години е нерешен. Исто така, тоа е и порака за сите граѓани на Република Македонија, затоа што посетата на господинот Нимиц значи дека ова прашање е на значајно место на агендата за конечно решение и тоа сега ќе зависи од сите политички актери – вели Ахмети.


Заев – Нимиц: Постои позитивна клима за развој на добрососедските односи


Скопје, 3 јули, 2017 - 12:44 (META) 

На денешната средба на премиерот Зоран Заев со специјалниот претставник на Обединетите Нации во разговорите меѓу Македонија и Грција, Метју Нимиц, бил споделен ставот дека постои позитивна клима за нов импулс во развојот на добрососедските односи, преку чекорите за зголемување на довербата меѓу државите, што може да придонесе и за продолжување на процесот на преговори, соопшти Владата на РМ.

Според официјалното соопштение, посредникот Нимиц ги поздравил демократските промени во Македонија и му честитал на премиерот Заев за неговите отворени проактивни политики.

– Јас и Владата на Македонија сме определени кон чекори што ги решаваат проблемите на граѓаните на Република Македонија. За тоа водиме инклузивни политики и така ќе биде и со решавањето на ова прашање, што ќе го водиме исклучително транспарентно, а не затворено како досега. Само преку државен консензус, со опозицијата во Собранието, со претседателот на државата и со граѓаните на Република Македонија е можно да се напредува во поглед на ова прашање – рекол  Заев.

На средбата заеднички е заклучено дека евро-атлантските интеграции се потребни за стабилноста и за безбедноста на целиот Западен Балкан, но и дека тоа ќе придонесе за потребниот економски развој на државите и за подигнување на квалитетот на живот на граѓаните.


Нимиц – Димитров: Сега не е време да се излезе со дефинитивен предлог


Скопје, 3 јули, 2017 - 11:34 (META) 

„Не разговаравме за нови предлози за името ниту, пак, дојдов со конкретен предлог. Разговаравме за самиот процес и за тоа како да се интензивира“, изјави за медиумите специјалниот пратеник на ОН за спорот за името меѓу Македонија и Грција, Метју Нимиц, по средбата со шефот на македонската дипломатија, Никола Димитров.

На прашање дали постои одреден напредок, поместување во позициите на Грција, Нимиц рече дека потребни се конструктивност и разбирање од двете страни за решавање на проблемот, односно неопходно е страните да се сослушаат една со друга.

Нимиц рече дека не треба да се очекуваат значајни промени во решавањето на спорот во следните неколку месеци, затоа што сега допрва ќе се разгледуваат ставовите на двете страни и додаде дека не е време сега да се излезе со дефинитивен предлог.

Тој рече дека по посетата на Скопје, сепак нема да замине за Атина бидејќи грчкиот министер за надворешни работи имал неодложни обврски поврзани со кипарското прашање.