Во Виена почна средбата на Димитров и Коѕиас со медијаторот Нимиц


Виена, 25 април, 2018 - 17:07 (META) 

Во Виена денеска продолжуваат разговорите за спорот за името меѓу министрите за надворешни работи на Република Македонија и Грција, Никола Димитров и Никос Коѕиас, под покровителство на медијаторот Метју Нимиц. Средбата се одржува во канцелариите на ОН.

Засега нема информации до кога ќе трае средбата и дали по средбата ќе има изјави за медиумите.
Двете министерства и македонското и грчкото, на нивните официјални „Твитер“ профили објавија фотографии од средбата.

Премиерот Зоран Заев денеска на новинарско прашање изјави дека очекува напредок во преговорите меѓу двете земји.

– Има напредок кој ни дава причина да веруваме дека може да се направи исчекор и сега, во Виена, да ја искористиме секоја можност за приближување кон конечното решение. Верувам дека креативноста на двајцата министри, тимовите зад нив и јас и Ципрас од другата страна даваме поддршка и охрабрување за да се изнајдат конструктивни и креативни решенија кои буквално ќе ги задоволат двете страни во нивните очекувања и ќе бидат достоинствени за двете земји и нивните граѓани – рече Заев.


Нимиц, Димитров и Коѕиас денеска се среќаваат во Виена


Скопје, 25 април, 2018 - 9:36 (META) 

Министрите за надворешни работи на Македонија и на Грција, Никола Димитров и Никос Коѕиас денеска во Виена ќе се сретнат со Метју Нимиц, посредникот во преговорите за името под покровителство на ОН.

Како што соопштија од седиштето на ОН во Њујорк, Нимиц ќе им „асистира на двете страни во изнаоѓање заедничко прифатливо решение за прашањето со името“.

Иако вчера еврокомесарот Јоханес Хан изрази оптимизам дека во следните две седмици може да се реши проблемот со името, премиерот Зоран Заев рече дека посакува, но не верува дека спорот со Грција ќе биде решен за две недели.

По изјавата на Хан реагираше и официјална Атина. Грчкото министерство за надворешни работи преку соопштение го повика еврокомесарот да престане да дава погрешна слика за преговорите, оти не ги разбира, а со такви изјави и ги поткопува.


Димтров, Коѕиас и Нимиц в среда ќе се сретнат во Виена


Скопје, 23 април, 2018 - 16:17 (META) 

Министерот за надворешни работи, Никола Димитров ќе се сретне со министерот за надворешни работи на Грција, Никос Коѕиас, заедно со посредникот Метју Нимиц, на 25 април (среда попладне) во Виена, информираат од МНР.

Минатата недела, Коѕиас во интервју за грчкото радио „24/7“, во однос на разговорите и точките за кои се преговара, рече дека идентитетот е прашање на самоопределување, а за националноста ќе се користи новото име, односно во пасошите ќе стои „државјанин на таа и таа земја, државјанин на името за кое што ќе постои договор“.


Димитров, Коѕиас и Нимиц за пет дена на нова средба во Виена?


Атина, 20 април, 2018 - 9:48 (META) 

Медијаторот Метју Нимиц и министрите за надворешни работи на Македонија и Грција, Никола Димитров и Никос Коѕиас, наредната недела на 25 април ќе одржат нова средба во Виена, објавија грчките медиуми, пренесува МИА.

На оваа средба, според грчките медиуми, ќе се направат напори да се надминат разликите од средбата во Охрид. За десетина дена по оваа, најверојатно ќе следува уште една средба, како што најави Коѕиас од Охрид, на 4 и 5 мај во Солун.


Нимиц им пишал на Димитров и Коѕиас во пресрет на нивната средба во Охрид


Њујорк, 11 април, 2018 - 12:36 (META) 

Медијаторот во решавањето на спорот за името, Метју Нимиц им испратил писмо на шефовите на дипломатиите на Македонија и Грција, Никола Димитров и Никос Коѕијас, во кое ја опишува актуелната ситуација во преговорите за името, односно точките за кои има согласување и точките за кои има разлики, онака како што тој ги формулирал за време на разговорите во Виена. Дописот на министрите им е испратен во пресрет на нивната нова средба во Охрид, вечерва и утре.

Информацијата за писмото ја објавија весникот „Катимерини“, радиото „Атина984“ и информативниот портал „Њуз247“, повикувајќи се на свои извори.

Грчкото МНР, ниту ја потврдува ниту ја демантира веста во грчките медиуми дека Нимиц испратил допис до Димитров и Коѕијас, јави дописникот на МИА од Атина.

„Според одредени извори, последниот допис на Нимиц ги одразува кристализираните ставови на американскиот дипломат за прашањето, како што тие беа формулирани по последната негова повеќечасовна средба со министрите за надворешни работи на Грција и ПЈРМ во Виена (30-31 март). Истите извори споменуваат дека Нимиц стигнал до точките што треба да бидат параметри на решението“, пишува „Катимерини“.

Радио „Атина984“, пак, објави дека станува збор за претходно одредена и предвидена процедура на медијаторот.

„Двајцата министри се очекува да одговорат на прашалникот што им беше доставен од специјалниот медијатор и да го имаат пополнето до нивната следна заедничка средба“, објави атинското радио.


Нимиц е оптимист за иднината, според Димитров имало условен напредок


Виена, 30 март, 2018 - 16:46 (META) 

После денешната, речиси осум часовна средба, помеѓу министрите за надворешни работи на Македонија и Грција, Никола Димтров и Никос Коѕиас, медијаторот на ОН Метју Нимиц рече дека е оптимист за иднината, објави телевизија „Телма“.

-Ова е една од серијата средби со цел да го решиме таканаречениот спор за името. Имавме средби цел ден и тоа беше еден продуктивен состанок, што ме наведува да бидам оптимист за иднината. Додека ние имавме средби, имаше паралелни средби на дипломати и експерти од двете земји, кои работат на некои од помалку контроверзните аспекти од договорот, особено фокусирани на иднината на односите меѓу двете земји. Серијата на средби ќе продолжат во иднина, поставивме еден работен пат, и можам да кажам дека, без навлегување во детали, ги адресиравме тешките прашања, сè уште постојат тешки прашања кои треба да се решат, но според моето мислење и долго искуство, постои многу позитивно чувство – рече Нимиц.

Медијаторот додаде дека и двајцата министри се фокусирале на долгорочните односи, на стабилноста во регионот, на важноста од добри односи помеѓу двете земји и изрази надеж дека ќе продолжат да работат со позитивен пристап.

Министерот за надворешни работи, Никола Димитров по средбата со Коѕиас и Нимиц во Виена, оцени дека средбата била продуктивна и дека има условен напредок.

– Разговаравме за сите отворени прашања и можам да кажам дека има условен напредок, бидејќи како одиме напред, доаѓаме до тешки прашања. Работевме по логиката што е најважно за двете земји и дали може да ги покриеме и две страни, но не зачудува дека колку се приближуваме кон решението, има повеќе потешкотии – рече Димитров после средбата.


Димитров и Коѕиас на нова рунда преговори во Виена


Виена, 30 март, 2018 - 9:34 (META) 

Министрите за надворешни работи на Македонија и на Грција, Никола Димитров и Никос Коѕиас, денеска во Виена ќе имаат средба со медијаторот на Обединетите нации за спорот со името, Метју Нимиц.

„Средбата е дел од напорите на ОН за посредување меѓу двете земји за наоѓање заедничко прифатливо решение за прашањето за името“, соопшти прес-службата на ОН.

Медијаторот Нимиц на Димитров и Коѕиас ќе им престави правна форма, документ со празни места за спорните прашања, објави грчката новинска агенција АНА-МПА.

Агенцијата пишува дека според досегашните информации, Нимиц ќе биде тој што прв ќе се обрати и ќе го претстави правниот документ, врз база на кој ќе се достави можниот иден договор на двете страни во ОН, со празни места за спорните прашања, како што е името. Потоа ќе следи претставување на ставовите на двајцата министри за надворешни работи и преговори за позициите, пишува грчката новинска агенција и додава дека преговорите во Виена се очекува да траат долго, ако се суди според минатиот состанок што траеше седум часа.

Средбата закажана за 09:30 часот, според информациите на АНА-МПА, ќе се одржи во Министерството за надворешни работи на Австрија, а не во седиштето на ОН, бидејќи канцелариите се затворени поради католичкиот Велигден.

Во однос на вчерашната работна вечера на двајцата министри за надворешни работи, Никола Димитров и Никос Коѕиас, грчката новинска агенција објави дека траела три часа и поминала во добра клима.

Грчките медиуми се воздржани во коментарите. Според „Катимерини“, средбата во Виена е „клучна“, а „Иефимерида“ смета дека “нема големи очекувања“ од оваа рунда преговори.


Димитров: Нашата платформа се разликува од грчката, нема поместување од минатата средба


Скопје, 20 март, 2018 - 16:43 (META) 

Одговарајќи на новинарски прашања, министерот Никола Димитров не сакаше да коментира за точките на грчката нацрт-платформа за решавање на спорот, а за македонската платформа рече дека се разликува од грчката.

– Грчката нацрт сподогоба е предмет на анализа во овој период, не знам колку ќе биде корисно да коментирам за содржината. Имаме и наша нацрт-спогодба за која не зборувавме оти, учејќи од самиот процес, научивме дека е подобро да сработиме, по потоа да обелодениме. Убедени сме дека елементите од нашата нацрт-спогодба ќе бидат корисни и во рамките на главниот процес, тој што се води со посредништво на медијаторот Метју Нимиц – рече Димитров.

Тој објасни дека најсуштинската работа што се случила од неговото вклучување во преговорите како министер за надворешни работи е средбата што тој и неговиот грчки колега Коѕиас ја имале со посредникот Нимиц во Виена, иако на неа не е постигнат значителен напредок.

– Се обидуваме за неколку месеци да направиме огромни скокови. Еден од главните предизвици е да се изгради доверба, да се убедат двете јавности, а притиснати сме и од европската агенда – рече Димитров.

Во однос на роковите, тој рече дека ни следните преговори со Нимиц во Виена на 30 март не се зацртани како момент на постигнување спогодба.

– Ние в петок ќе го отвориме тој процес, ќе го продолжиме со медијаторот Нимиц. Ова не е строго пропишан процес – рече шефот на македонската дипломатија.


Заев: Нацрт-спогодбата со Грција содржи само технички аспекти, за деталите ќе разговараме


Скопје, 20 март, 2018 - 16:21 (META) 

Премиерот Зоран Заев, за посетата на министерот за надворешни работи на Грција, Никос Коѕиас изјави дека ваквите билатерални средби може да бидат само од помош на преговарачкиот процес кој се води под водство на ОН со Метју Нимиц.

Тој додаде дека средбата е возвратна на посетата на нашиот министер Никола Димитров кој ја направи летово во Солун.

– Оваа средба е важна затоа што имаме слетување на нашиот аеродром од страна на министерот за надворешни работи на Грција. Тоа за мене е и мерка на градење на доверба. Тоа е исчекор за пријателството кое го создаваме. Знам дека ќе има и работна вечера заедно со министерот и тимовите на двете страни, ќе има билатерални состаноци и на работни групи во МНР, но ќе има состанок со мене и со други високи политички претставници во државата – одговори Заев на новинарско прашање.

Премиерот додаде дека формулациите за името, употребата, широчината, идентитетските прашања, кодовите се уште се на маса за преговори и тие се оставени како празни полиња, како што се оставени и од грчка страна.

– Деталите нема да ги кажам заради тоа што, деталите се од технички аспект на организирање на структура на меѓународен договор. Знаете дека нема ништо ново од последната средба од Виена, односно нема помрднување во позициите, а согласно тоа, не може да биде ништо ставено во какви било документи кои се на маса за разгледување – додаде Заев.

Тој објасни дека во однос на името „Горна Македонија“ со Грција немаат зборувано за која точно географска одредница се работи.

– Немаме разговарано за конкретно име ниту од наша ниту од нивна страна – додаде Заев.


Коѕиас в четврток слетува на „Скопје“


Скопје, 20 март, 2018 - 13:20 (META) 

Грчкиот министер за надворешни работи Никос Коѕиас в четврток ќе пристигне во официјална дводневна посета на Македонија, извести македонското Министерство за надворешни работи.

Посетата на Коѕиас в четврток ќе почне со неговото слетување на меѓународниот аеродром „Скопје“, само повеќе од месец откако со одлука на македонската влада името на овој аеродром беше сменето од „Александар Велики“ во „Скопје“.

На 30 март, петок, тој  со својот македонски колега Никола Димитров ќе бидат во Виена, каде ќе се сретнат со личниот пратеник на Генералниот секретар на ОН и посредник во преговорите за името, Метју Нимиц.