!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Меј ја обвини Москва за мешање во британските избори


Лондон, 14 ноември, 2017 - 10:17 (META) 

Премиерката на Велика Британија, Тереза Меј ја обвини Москва дека се мешала во британските парламентарни избори, што се одржаа на почетокот на јуни, оваа година и дека вршела кибер-шпионажа, пренесува „Би-би-си“.

Во обраќање пред бизнисмените на собир во Лондон, Меј рекла дека владата на рускиот претседател, Владимир Путин се обидува да ги „поткопа слободните општества“.

Меј истакнала дека Русија „посејала лажни приказни“ за да го „ожнее неединството на Западот“.

Британските медиуми коментираат дека ваквите наводи на британската премиерка се во голема спротивност со оние на американскиот претседател, Доналд Трамп, кој минатата недела изјави дека му верува на својот руски колега, Владимир Путин, кој повторно истакна дека Русија не се мешала во претседателските избори во САД, минатата година.

Инаку, шефот на британската дипломатија, Борис Џонсон следниот месец треба да ја посети Русија.


Хан бара промена на политиката на ЕУ кон Турција


Брисел, 22 август, 2017 - 13:22 (META) 

Еврокомесарот за проширување и добрососедска политика, Јоханес Хан смета дека Европската Унија треба да го промени односот на Унијата кон Труција, која е земја-кандидат за членство во ЕУ, откако турскиот претседател Реџеп Таип Ердоган неодамна ги повика Турците кои живеат во Германија да не гласаат за двете владејачки партии на претстојните парламентарни избори.

Ердоган минатата недела изјави дека германските граѓани со турско потекло на изборите не треба да гласаат за Христијанско-демократската унија (ЦДУ) на канцеларката Ангела Меркел, за Социјалдемократската партија (СПД) на Мартин Шулц или за Зелените, бидејќи овие партии покажале анти-турски став.

„Верувам дека дојде време членките да ги разгледаат стратешките импликации од ваквото однесување. Кревањето на раменици не е долгорочна политичка стратегија“, изјавил Хан за германскиот дневен весник „Зидојче цајтунг“.

Хан својот став го оправдува со мешањето на Ердоган во кампањата за парламентарните избори во Германија, како и со барањето на Анкара за екстрадиција на германско-турскиот писател Доган Аканли.


Руското МНР иронично му забележа на Столтенберг за изјавата по средбата со Заев


Москва, 15 јуни, 2017 - 16:42 (META) 

Портпаролката на руското министерство за надворешни работи, Марија Захарова, на денешниот брифинг за новинарите иронично ја искоментира изјавата на генералниот секретар на НАТО, Јенс Столтенберг, по средбата со македонскиот премиер Зоран Заев, во понеделникот оваа недела во Брисел.

Захарова се осврна на изјавата на Столтенберг, во која тој рече дека секое мешање однадвор во внатрешните политички процеси на некоја земја е неприфатливо, додавајќи дека токму грубото мешање на Западот предизвикало длабока криза во Македонија.

– Посветивме внимание на изјавата на генералниот секретар на НАТО, Јенс Столтенберг, од 12 јуни, околу исходот од средбата со премиерот на Република Македонија, Зоран Заев. Челникот на НАТО истакна дека секое мешање однадвор во внатрешните политички процеси е неприфатливо. Да зборуваме отворено, досега не сме слушнале генералниот секретар на НАТО, Jенс Столтенберг, толку остро да ги критикува Вашингтон, раковдството на Европската Унија, Берлин, Тирана, самиот себе и неговата организација. Токму грубото мешање на Западот предизвика длабока и долготрајна криза во Република Македонија. Оваа криза доведе до сериозна деградација на ситуацијата во оваа земја. Ѝ даваме целосна поддршка на оценката на Столтенберг. Би било убаво западните држави да почнат да ги користат ваквите ставови во практика – вели Захарова.

Инаку, премиерот Заев, во понеделникот беше во прва официјална посета на Брисел, каде покрај генералниот секретар на НАТО, имаше средби и со високата претставничка за надворешна политика и за безбедност на ЕУ, Федерика Могерини, еврокомесарот за проширување, Јоханес Хан, и со претседателот на Европскиот совет, Доналд Туск.


Коми: Нема сомнеж дека Русија се мешала во изборите во САД


Вашингтон, 8 јуни, 2017 - 21:12 (META) 

Немам сомнежи дека Русија се мешала во претседателските избори во Соединетите Американски Држави, но нема докази дека успеала да ги намести гласовите, изјави поранешниот директор на Федералното биро за истраги (ФБИ), Џејмс Коми на денешното сослушување пред комисијата за разузнавачките служби на американскиот Сенат.

„Русија се мешала во нашите избори и тоа го правеле со цел и на многу софистициран начин и во тоа нема никаков сомнеж“, неколку пати повтори Коми во текот на сослушувањето.

Поранешниот директор на ФБИ рече дека неговите разговори со американскиот претседател Доналд Трамп биле многу вознемирувачки и дека здравиот разум му говорел дека Трамп барал нешто за возврат за да го задржи на местото директор на ФБИ.

Тој рече дека Трамп не бил под истрага додека тој бил директор на ФБИ, но истакна дека поранешниот советник за национална безбедност на американскиот претседател, Мајкл Флин бил во „законска опасност од кривичен прогон“.

На прашање од сенаторот од таборот на демократите, Марк Ворнер околу водењето на белешки од сите средби со Трамп, од првиот до деветиот, Коми рече дека бил загрижен оти тогаш избраниот претседател би можел да лаже.

„Знаев дека би можело да дојде ден кога моите белешки би можеле да бидат важни за да ја заштитам службата и себе“, рече Коми.

Тој истакна дека откако бил отпуштен од ФБИ побарал од негов пријател да ја сподели со медиумите содржината од белешките бидејќи сметал дека нивното објавување ќе доведе до поставување на специјален обвинител за случајот.

Коми истакна оти верува дека е отпуштен поради истрагата за мешањето на Русија во претседателските избори. Тој, исто така, рече дека администрацијата на Трамп го омаловажила него и ФБИ со изјавата дека оваа институција е во хаос.

„Иако, според законот не е нужно да постојат било какви причини за смена на директорот на ФБИ , администрацијата на Трамп се одлучи да ме клевети мене и, што е уште поважно ФБИ, со тврдењата дека оваа организација е во хаос, дека е лошо водена и дека вработените изгубиле доверба во директорот. Тоа беа чисти лаги“, рече Коми.


Новиот шеф на ФБИ најави продолжување на истрагата за руското мешање во изборите


Вашингтон, 11 мај, 2017 - 21:12 (META) 

Федералното биро за истраги (ФБИ) ќе ја продолжи истрагата околу наводните врски помеѓу Русија и изборниот тим на Доналд Трамп и по разрешувањето на досегашниот директор на ФБИ, Џејмс Коми, изјави денеска неговиот наследник, Ендрју Мекејб, пред комитетот за разузнавање на Сенатот, пренесува „Би-би-си“.

Мекејб пред комитетот на Сенатот изјави дека разрешувањето на Коми не влијаело на работата на ФБИ, додавајќи дека неговиот досегашен шеф имал „широка поддршка“ внатре во агенцијата.

Изјавите на Мекејб се во спротивност со тврдењата на официјалните претставници на Белата куќа, според кои Коми бил разрешен бидејќи ФБИ ја изгубило довербата во него, односно дека неговата стручност била доведена во прашање поради начинот на кој го водел случајот за електронската пошта на кандидатката за претседател на Демократската партија, Хилари Клинтон. Од друга страна, пак, критичарите го обвинуваат американскиот претседател, Доналд Трамп, дека го разрешил Коми поради водењето на истрагата за руското мешање во претседателските избори.

„Директорот Коми имаше широка поддршка во ФБИ и сè уште ја има. Можам искрено да ви кажам дека големо мнозинство вработени имаат длабока и позитивна врска со директорот Коми“, рекол Мекејб пред комитетот на Сенатот.

За испитувањето на наводите за влијанието на Русија во американските претседателски избори, тој истакнал дека станува збор за „многу значајна истрага“.

Мекејб, исто така, нагласил дека нема да доставува информации до Белата Куќа за статусот на истрагата и дека ќе го извести Сенатот за секој обид за мешање во случајот.


Руско МНР: Демонстрантите им се спротивставија на „натрапниците“


Москва, 28 април, 2017 - 16:40 (META) 

Руското министерство за надворешни работи денеска изрази загриженост за вчерашните насилства во Собранието, а причината за нив ја лоцираше во „обидот на опозицијата преку грубо кршење на процедурите да избере претседател на Собранието“. Како резултат на тоа, велат од министерството, се случил „метеж во кој беа инволвирани демонстранти кои им се спротивставија на ‘натрапниците’, од кои дел беа хоспитализрани“.

Руското МНР оценува дека „инцидентот бил претходно планиран“ и дека е уште еден показател за надворешното мешање во внатрешните работи на Македонија.

„Официјални претставници на Европската Унија, амбасадори на неколку европски земји и на Соединетите Американски Држави, веднаш го поздравија „новиот претседател“ на Собранието, кој, патем, е поранешен командант на проалбанската Ослободителна национална армија. Овој координиран одговор е индикација дека инцидентот бил претходно планиран со премолчана согласност од „надворешните куратори“ на опозицијата во Македонија. Ова уште еднаш ја потврдува тезата дека главна причина за актуелната политичка криза во Република Македонија е големото мешање во внатрешните работи на земјата“, велат од МНР на Русија.

Оттаму додаваат дека „понатамошниот развој на сценаријата за редефинирање на земјата врз основа на т.н. тиранска платформа можат да доведат до понатамошно зголемување на тензиите, што води кон конфликт, вклучително и на етничка основа.

„Ако се потсетиме дека истиот ден францускиот суд, и покрај потерницата на Србија преку Интерпол, го ослободи косовскиот Албанец Рамуш Харадинај, тогаш очигледни стануваат големоалбанските намери на Западот. Во оваа ситуација, адекватното решение се наоѓа само во внатремакедонски дијалог во рамките на Уставот и на законите. Неопходно е да се запре секој надворешен притисок и да се овозможи на одговорните политички сили во Република Македонија самите да го одредат понатамошниот развој на земјата“, велат од руското МНР.


ВМРО-ДПМНЕ предложи „патоказ“ за надпартиски договор за решавање на кризата


Скопје, 28 март, 2017 - 15:46 (META) 

Да се постигне надпартиски договор за секое идно решавање на внатрешните разлики само во рамките на институциите, без мешање на странски фактори, побара денеска ВМРО-ДПМНЕ. Образложувајќи го предлогот, Антонијо Милошоски, член на извршниот комитет на партијата и пратеник, побара внатрешно обединување и одлучно отфрлање на сите обиди за ревизија на Охридскиот рамковен договор.

Прес-конференцијата на Милошоски доаѓа десетина дена откако партискиот лидер, Никола Груевски, најави дека наскоро ќе биде подготвен политички документ за излезе од кризата, кој ќе им биде понуден на сите политички партии. Иако Милошоски зборуваше за „патоказ“, а не за политички документ, сепак неговата содржина соодветствува на документот што го најави Груевски, во интервјуот за „Канал 5“.

Милошоски на прес-конференцијата посочи дека за излез од кризата и за помирување е неопходен дијалог „единствено од избрани претставници на избори во рамки на Собранието на Република Македонија“, во кој би се изнашле „заеднички именители за позициите по прашањата што ги предлага ВМРО-ДПМНЕ“.

– Создавање на надпартиски договор за секое идно принципиелно решавање на внатрешни разлики, во рамки само на институциите на државата, без странски агенди или претставници, и единствено од страна на легитимно избрани претставници на македонските граѓани. Внатрешно обединување против вмешување во внатрешните работи на Република Македонија, од страна на странски политичари или држави кои се косат со концептот на почитување на суверенитетот или се спротивни на принципот за  добрососедски односи. Заеднички да отфрлиме планови и платформи или агенди кои се надвор од нашето уставно уредување или се спротивни на македонските стратегиски и државни интереси. Или, со други зборови, заеднички да создаваме планови, платформи и агенди што се во интерес на уставното уредување на Република Македонија и на стратешките интереси на државата. Осуда на секој директен или индиректен ревизионизам на Охридскиот рамковен договор, кој е целосно вграден во Уставот на Република Македонија и нашето уредување – рече Милошоски, изнесувајќи ги точките од „патоказот“.

Милошоски порача дека е потребно сите релевантни политички чинители да се обединат и да постигнат договор за пет тези:

  1. Да се усогласиме дали важноста на политичката практика за коалицирање на победник со победник е фактор на дополнителна стабилност во државата
  2. Дали се прифатливи странските агенди во внатрешно-политички цели
  3. Дали при конституирање на Собранието, сегашното, но и во секој иден состав, позицијата претседател на Собранието на Република Македонија логично би ѝ следувало на политичката коалиција или партија што победила на изборите или треба да биде предмет на надгласување?
  4. Дали се сите политички актери согласни со задржувањето на мултикултурниот модел на македонското општество со еднаква промоција на сите заедници или се поддржува промена на овој модел во двонационален, на сметка на повеќето не мнозински заедници?
  5. Дали врвен приоритет во овој момент останува стабилизирањето на земјата, институциите, економијата и европските реформи за евроинтеграции како обединителна сила за сите граѓани или, пак, сите овие приоритети треба да се заменат со редефинирање на односите помеѓу заедниците и државното устројство на Република Македонија?

Зетот на Трамп денеска ќе сведочи пред Конгресот за улогата на Русија во изборите


Вашингтон, 28 март, 2017 - 10:09 (META) 

Зетот и близок соработник на американскиот претседател Доналд Трамп, Џаред Кушнер, денеска ќе биде сослушан од претставничкиот дом на Конгресот, во рамките на истрагата за евентуална вмешаност на Русија во претседателските избори во САД, соопшти Белата куќа.

Како што јавуваат светските медиуми, за денеска е предвиден нов состанок на Комисијата за безбедност на претставничкиот дом на американскиот Конгрес, кој го испитува наводното мешање на Русија во предизборната кампања за претседателските избори во САД, одржани на 8 ноември мината година.

Триесет и шестгодишниот Кушнер ја играше клучната улога на посредник на тимот на Трамп со странски земји, за време на предизборната кампања. Тој беше вклучен во организирањето на состанокот со јапонскиот премиер Шинзо Абе и со претседателот на Мексико, Енрике Пељ Нието.

Кушнер денеска треба да биде сослушан за контактите со руски функционери.


Иванов – Нишани: Потребно е намалување на тензиите и внимателна реторика


Баку, 16 март, 2017 - 21:01 (META) 

Претседателот на државата, Ѓорге Иванов, денеска имал средба со својот албански колега, Бујар Нишани, во Баку, Азербејџан, на која го повторил ставот дека „начинот на кој се донесе пост-изборната платформа на партиите од албанскиот политички блок и изјавите кои следеа од страна на високи функционери на Република Албанија претставуваат мешање во внатрешните работи на Република Македонија“.

– Ваквото мешање во внатрешните работи на Република Македонија е поттик за реализирање на големо-националистички идеи, тензии и претставува негативен пример не само на Балканот, туку и пошироко. Потребно е намалување на тензиите во регионот и внимателна реторика – порачал македонскиот претседател, стои во соопштението од неговиот кабинет за средбата.

Иванов посочил дека Албанија е пријател и ќе остане пријател на Република Македонија и за таа цел потребни се понатамошни конкретни заемни чекори за нормализирање и за унапредување на билатералните односи.

– Македонското национално малцинство во Република Албанија и албанската етничка заедница во Република Македонија треба да бидат фактори на зближување и на збогатување на соработката, а не извор на тензичност – рекол Иванов, додавајќи дека само со дијалог можат да се бараат решенија и да се надминуваат разликите за одредени прашања.

Претседателот на Албанија на средбата истакнал дека обидите за префрлање на кризата од политичко на етничко ниво, може да има сериозни последици за сите, соопштиле од прес-службата на Нишани, јавува дописникот на „Мета“ од Тирана.

Нишани на состанокот го уверил Иванов дека Албанија никогаш не се мешала, ниту се меша во внатрешни работи на други држави. Сепак, тој додал дека Албанците кои живеат во Македонија се составен дел на земјата и дека Албанија ќе ги поддржи нивните „легитимни барања за целосно почитување и за имплементација на Охридскиот рамковен договор“.

Средбата на двајцата претседатели била реализирана на маргините на петтиот Глобален форум во Баку на тема „Иднината на меѓународните односи: Моќ и интереси“.


Русија: Доста е странско мешање во Македонија


Виена, 16 март, 2017 - 17:06 (META) 

Русија повикува да се запре странското мешање во внатрешните работи на Македонија, рече рускиот амбасадор во ОБСЕ, Александар Лукашевич.

– Потребно е да се запре странското мешање во внатрешните работи на Македонија и да се почитуваат правата на македонските граѓани самостојно да одлучуваат за својата судбина, во согласност со основите демократски принципи. Ги повикуваме сите политички сили во Македонија и надворешните посредници од ЕУ и од САД да го следат патот за решавање на внатремакедонската ситуација низ дијалог во контекст на постоечките законски демократски процедури, со почитување на постапките и на одлуките на легитимната власт, водејќи се од подобрување на стабилноста и општествената хармонија во Македонија – се наведува во текстот од говорот на Лукашевич на заседавањето на советот на ОБСЕ, кој е објавен на веб-страницата на Министерството за надворешни работи на Русија.

Рускиот дипломат истакнал дека и покрај волјата на македонскиот народ, некои сили се обидуваат, користејќи го албанското малцинство, на власт во Скопје да доведат политичари кои изгубиле на изборите.

– На внатрешно-политичкиот процес му даваат меѓуетничка боја, наметнувајќи ја „тиранската платформа“ – отворено провокативен документ кој има цел да го подрие уставното уредување на Македонија со директно учество на претседателот на албанската влада – вели Лукашевич.

Постојаниот претставник на Русија во ОБСЕ додаде дека предизвикување на меѓуетничките тензии во Македонија е исклучително опасно, не само за земјата туку и за целиот регион.