Меѓународна оценка на мерките против загадувањето: Буџетот ви е несоодветен и немате контрола врз мерките


Скопје, 4 февруари, 2019 - 9:51 (META) 

Индустријата е најголемиот загадувач во Македонија, се вели во Заедничкиот ревизорски извештај за квалитет на воздухот на EUROSAI – Европската организација на врховни ревизорски институции, потоа следува загадувањето предизвикано од загревањето на домаќинствата и помали фирми, додека автомобилите се оценети како средни загадувачи, а отпадот, земјоделието и останатите фактори се оценети како помали загадувачи.

Извештајот на ова меѓународно ревизорско тело, составено од 15 врховни ревизорски институции од Европа, заедно со Европскиот суд на ревизори, што го објави Државниот завод за ревизија се однесува на квалитетот на воздухот на Албанија, Бугарија, Естонија, Грузија, Унгарија, Израел, Косово, Молдавија, Полска, Романија, Словачка, Шпанија, Швајцарија, Македонија и Холандија.

Во Извештајот стои дека дека системот за управување со квалитетот на воздухот во Македонија не е правилно организиран и координиран: „Беа формирани Интерсекторска работна група за квалитет на воздухот и Комисија за здравје и животна средина за да се подобри интерсекторската соработка, но координацијата помеѓу институциите е незадоволителна и не постои систем за следење на спроведувањето на секоја мерка“. Во извештајот се вели и дека „инспекциите за животна средина се спроведуваат без никаква координација на централно и локално ниво“.

Наодите од националните ревизии покажуваат дека владите на Албанија, Косово, Македонија, Романија и Шпанија целосно не имплементирале ниту национална стратегија, ниту национален план. Во случајот со Македонија, каде што не е соодветно имплементирана владината политика за квалитет на воздухот на национално или локално ниво, Извештајот на меѓународната ревизија заклучува дека Националниот план за заштита на амбиентниот воздух е комплексен и покрива различни области, но не постои систем за следење на спроведувањето насекоја мерка. Планот не содржи показатели за мерење на ефективноста на спроведување на политиката што го отежнува следењето на мерките за постигнување на целите на владата и политиките за борба против загадувањето на воздухот.

За меѓународните ревизори буџетот на Македонија за спроведување на политиките за подобрување на квалитетот на воздухот е несоодветен. Според податоците на Државниот завод за статистика за периодот на ревизија, инвестицијата за подобрување на квалитетот на воздухот од државниот буџет е мал и претставува само 0,1% од БДП. Од планираното финансирање за годишната работна програма на државниот систем за автоматски мониторинг, одобрени се само 31-42%, што е недоволно за мерењето на загадувањето да се одвива непречено, прецизно и ефикасно.

Како резултат на тоа, нема редовно одржување, не се купуваат резервни делови за мерните станици, не се набавуваат лабораториска опрема и хемиски реагенси, не се спроведува лабораториска акредитација ниту обука на персоналот. Фактот дека работната програма не е целосно финансирана ја поткопува континуираната работа на системот за мониторинг”.

Наодите од националните ревизии покажуваат дека системите за мониторинг во најмалку девет земји, односно Албанија, Бугарија Грузија, Израел, Косово, Македонија, Молдавија, Романија и Словачка, не генерираат целосни и/или веродостојни податоци.

Меѓународните ревизори и препорачуваат на Владата да ги ажурира сите релевантни законски и подзаконски акти заради целосна хармонизација на националното законодавство со Директивата на ЕУ за квалитет на амбиентниот воздух, да воспостави систем на размена на податоци, но и да наметне санкции на централно и локално ниво за непочитување на политиките кои се однесуваат на квалитетот на воздухот и на граничните вредности на одредени загадувачи на воздухот.

Меѓу препораките е и македонската Влада да обезбеди буџет за работа и одржување на сите мониторинг станици за квалитет на воздух и да предвиди буџет во планските документи, но и да ја подобри мрежата за следење на квалитетот на воздухот со соодветно преместување на станиците и нивно континуирано одржување, да формира централизиран систем за автоматизирано собирање и обработка на податоци, како и мерење во реално време и известување за квалитетот на воздухот.


Укинати интервентните мерките против загадувањето во Струмица


Скопје, 23 јануари, 2019 - 12:07 (META) 

Престануваат да важат интервентните препораки и мерки кои беа активирани при надминувањето на прагот на алармирање во Струмица, соопшти владината прес-служба.

„Ве информираме дека согласно податоците од ДАМСКВ на 22.01.2019 година, среднодневните концентрации на ПМ10 се под дефинираниот праг на алармирање од 188 микрограми на кубен метар, и епизодата од два последователни дена е прекината во Струмица“, се вели во соопштението на Владата.

Со тоа, како што се додава, редовните мерки против аерозагадувањето дефинирани во Програмата за чист воздух и пропратниот оперативен план за имплементација продолжуваат да се имплементираат согласно Планот за чист воздух на Владата.


Од утре нема да важат мерките за заштита од загадувањето што ги воведе Владата


Скопје, 22 јануари, 2019 - 12:17 (META) 

Мерките и препораките за заштита од загадувањето што ги воведе завчера Владата, од утре престануваат да важат бидејќи концентрациите на ПМ10 честичките се под дефинираниот праг на алармирање од 200 микрограми на еден кубен метар, соопштија денеска од Владата.

Во соопштението се наведува дека прагот за алармирање на суспендирани честички со големина до 10 микрометри (надминување на вредноста од 188 микрограми на еден кубен метар во текот на два последователни денови) и добиената временска прогноза од Управата за хидрометеоролошки работи, е надминат на мерното место Струмица, за каде остануваат во сила мерките и препораките.

Се укинуваат мерките за ослободување од работни обврски на бремените жени, лицата постари од 60 години, како и лицата со хронична астма и други хронични респираторни болести, прележан миокарден инфаркт, мозочен удар и други кардиоваскуларни или онколошки болести без разлика на возраста, со препорака на матичен лекар, намалената употреба на службени возила, ограничувањето на градежните работи, реорганизирање на работното време на отворено, да не се организираат спортски и други културни манифестации на отворено.


Мерките против загадување уште се на сила, рано е да се видат ефектите, велат надлежните


Скоје, 21 јануари, 2019 - 15:44 (META) 

Во Скопје и денес важат забраните и ограничувањата на Градот Скопје и на Владата, кои стапија на сила вчера, а кои произлегуваат од итните мерки за намалување на загадувањето на воздухот по добиеното известување од страна на Министерството за животна средина дека квалитетот на воздухот последователно два дена е надминат над законски пропишаниот минимум, односно над 188 микрограми на кубен метар на мерните станици во Карпош, Центар и Ректорат.

„Прерано е да се зборува за искористеноста и за ефектите од мерките кои ги објави Град Скопје, потребно е да се анализираат поголем број на параметри од повеќе институции, како што се ЈСП, приватните превозници, податоци од ЦУКС за фрекфентноста на сообраќајниците и слично, а треба да бидат земени во предвид и други фактори како што се продолжениот распуст на учениците, зимските одмори и слично. Градот Скопје ги засили инспекциските служби на сите инсталации кои се во наша надлежност (Б еколошка дозвола), а ги задолжи јавните претпријатија да ги засилат активностите за чистење и миење на улиците“, велат од Службата за информирање на Градот.

Исто така, прекинати се сите градежни активности на градилиштата под своја надлежност, поточно таму каде Град Скопје се појавува како инвеститор како што се проширувањата на булевар Босна и Херцеговина и втората фаза од проектот за пробивање на булеварот Христијан Тодоровски Карпош.

Скопските општини Центар и Аеродром денес објавија дека ги прекинуваат сите градежни активности на градилиштата под своја надлежност и ги интензивираат инспекциските надзори над субјектите кои управуваат со отпадни гуми и отпадни масла. Овие мерки ќе важат додека е висок степенот на загадување на воздухот.


Владините мерки против загадувањето стартуваат со замена на неефикасните печки


Скопје, 16 јануари, 2019 - 14:10 (META) 

Владата во текот на месецов стартува со реализација на програмата за справување со загадувањето преку директна помош на семејствата со полош социјален статус за замена на нивните неефикасни печки со енергетски поисплатливи и еколошки поприфатливи системи на греење, најави на денешната средба со претставниците на граѓанскиот сектор заменик министерот за животна средина, Јани Макрадули.

Владата планира во 2019 преку 90 проценти од предвидените средства да потроши за замена на нееколошки начини на греење во домаќинствата, институциите и јавните установи во Скопје, но и низ неколку таргетирани градови како Куманово, Тетово и Битола.

За разлика од досегашните повици за субвенционирање на печки на пелети на Министерството за економија и на општините и Градот Скопје, според Макрадули, овој зафат нема да се базира на принципот „прв дојден прв услужен“, туку ќе се раководи од висината на семејните приходи и ќе почне од зоните на ниска емисија какви што се населбите Лисиче и Шуто Оризари, за да се покаже дека ваквите методи носат резултати.

Заменик-министерот Макрадули најави во текот на јануари поврзување на дел од јавните установи и институции на топлификационата мрежа во Скопје кои досега биле загревани со мазут, при што го наведе примерот на студентскиот дом Кузман Јосифовски Питу каде до сега за греење се трошеле преку седум милиони денари за набавка на мазутот, додека со приклучувањето на градската мрежа трошоците за греење би изнесувале околу пет милиони при што, освен намалените емисии на чад ќе има и значителен финансиски ефект.

Тој, исто така го наведе примерот на градинката Кочо Рацин под Панорама, каде, наместо 16 илјади евра за мазут, за 12 пати ќе бидат помали трошоците за греење со поставени инвертори.

Зазеленување на дворовите на градинки, училишта и болници кои граничат со сообраќајници со садници на автохтони дрва произведени од страна на студентите на Земјоделскиот факултет во Скопје со цел подигање на заштитна зелена бариера е уште една од мерките за борба против загадувањето кои ќе почнат да се реализираат во наредните месеци, најави на денешната средба Макрадули.

Меѓу првите објекти опфатени со оваа програма ќе се сади во дворот на градинката во општина Гази Баба на влезот во Скопје, а потоа и помеѓу Клиничкиот центар и улица Водњанска во Скопје.

Заменик министерот за животна средина најави и измени во законската регулатива за да се реализираат планираните активности во напуштањето на еколошки загадувачките начини на загревање – преку донесување забрана за користење јаглен за греење и измени во законот за градење.


ВМРО-ДПМНЕ: Власта не даде ниту денар за подобар квалитет на воздухот


Скопје, 11 декември, 2018 - 9:38 (META) 

СДСМ потроши седум милијарди евра, пари на граѓаните, без да вложи денар за намалување на аерозагадувањето, а сега безобразно и без срам бара донации од бизнисмените за борба против загадувањето на воздухот, порачува ВМРО-ДПМНЕ.

„СДСМ нема план како да ја извади државата од црнилото во кое ја потона. Скопје со денови е најзагаден град во Европа и помеѓу десетте најзагадени во светот. Во европскиот врв на најзагадени градови се и Битола и Тетово, ништо почист не е воздухот ниту во Струмица, Кочани и Тетово. Едноставно кажано Македонија се гуши, а власта не презема ништо, ниту денар од 7 милијарди евра буџет од две последователни години не е инвестиран во подобрување на квалитетот на воздухот, па сега наместо мерки и проекти, власта бара донации од бизнисмените, кои веќе еднаш дале пари во буџетот преку даноците, пари од кои дел требало да завршат и за подобрување на квалитетот на воздухот“, порачува најголемата опозициска партија.
ВМРО-ДПМНЕ предлага четири мерки за подобрување на состојбата со амбиенталниот воздух.

„1. Во услови на загаденост над Мерните дозволени концентрации, во тек над 7 последователни дена, да се овозможи бесплатен градски превоз додека трае загадувањето.
2. Инспекциските служби, како на државно, така и на локално ниво, да работат во зимски услови 24 часа и јавно, секој ден со име и презиме, да ги обзнанат најголемите загадувачи и, согласно тоа, мерките кои ги презеле.
3. Да се чистат сите диви депонии, особено да се инспектираат секојдневно оние локации каде што се пали отпадот со намера и да се изречат казнени мерки.
4. Да се овозможи целосна бесплатна здравствена заштита на граѓаните, посебно на децата и хронично болните, за кои е констатирано дека причината е загадувањето“, се вели во соопштението од партијата.


Бошњаковски: Од УХМР најавија ветер, затоа не беа активирани мерките за загадувањето


Скопје, 10 декември, 2018 - 16:42 (META) 

Иако загадувањето го надмина прагот на алармирање, мерките не беа активирани поради прогнозата за засилен ветер, вели портпаролот на владата Миле Бошњаковски кој на „Твитер“ сподели информации добиени од Министерството за животна средина.

Од здружението „Скопје смог аларм“, објавија дека минатата недела имало ПМ10 загадување над 200 микрограми на кубен метар на четири мерни станици во Скопје во четири различни денови, но дека мерките не биле активирани.

Бошњаковски потврдува дека на 3 и 4 декември биле надминати среднодневните концентрации на ПМ10 над 200 микрограми – односно на 03 декември била измерена концентрација од 206.88 микрограми во Карпош и 233.08 во Ректорат, а на 4 декември концентрација од 229.6 во Карпош и 283 во Ректорат.

Но, мерките не биле активирани затоа што од УХМР бил најавен засилен северен ветер.

„Прагот на алармирање на ПМ10 се смета за надминат доколку се измерени среднодневни концентрации од 200 микрограми во текот на два последователни дена и е добиена прогноза од УХМР за стабилна временска состојба. Меѓутоа на 4 и 5 декември беа добиени прогнози од УХМР во текот на 5 декември и наредните денови ќе дува засилен северен ветер што придонесе за значително намалување на концентрациите на ПМ10 уште во текот на утринските часови на 5 декември и поради тоа не беа активирани мерките“, пишува во одговорот од Министерството кој го сподели Бошњаковски.


Филипче: Внесувајте храна богата со витамини за заштита од загадувањето на воздухот


Скопје, 7 декември, 2018 - 15:36 (META) 

Сите институции се насочени кон спроведување на мерки коишто ќе придонесат за намалување на загаденоста на воздухот, рече Министерот за здравство, Венко Филипче кој заедно со Драган Ѓорѓев од Институтот за јавно здравје денеска одржаа прес-конференција на којашто ги посочија препораките и советите на здравствените власти за заштита на граѓаните од загадувањето на воздухот.

Филипче советува да се ограничи движењето и активностите на отворен простор на најранливата популација (деца, повозрасни и хронично болни лица), како и за лицата коишто работат на отворено. Тој потенцира храната треба да биде богата со витамини и антиоксиданси, а хронично болните редовно да ја земаат препишаната терапија од својот лекар.

Ѓорѓев вели дека е клучно сите граѓани да го подобрат својот имунитет.

-Ефектите на здравјето, прво се на респираторниот систем, значи заштита на белодробниот систем, астматичарите било на која возраст треба да се и се под опсервација за зачестените астматични напади во овие услови. И секако избегнување на масовни собири, каде што во услови на аерозагадување концентрациите се високи во надворешен и внатрешен простор – исто така е една од препораките во овој период – вели Ѓорѓев.

Преку Системот „Мој термин“, здравствените власти веќе имаат доволно податоци во однос на бројот на ранливи категории на граѓани, а Филипче вели дека се прави план на кој начин и кому ќе бидат поделени 50 илјади заштитни маски.


За власта „Планот за чист воздух“ ќе донесе резултати, опозицијата му предвидува дебакл


Скопје, 27 ноември, 2018 - 16:32 (META) 

Загадувањето на воздухот е проблем на сите и тој мора да се решава заеднички со низа мерки затоа што е проблем на цела заедница беше заклучокот на јавната расправа во Собранието за загадувањето на амбиенталниот воздух.

Дебатата започна со политички препукувања помеѓу власта и опозицијата, на што еко-активистите порачаа дека на граѓаните им е преку глава од меѓусебните обвинувања на надлежните и префрлање на топката.

Пратеникот Влатко Ѓорчев од ВМРО-ДПМНЕ, кој е еден е од пратениците кои што ја иницираа јавната расправа, рече дека Македонија во 2018 година била најзагадена земја во Европа, според податоците кои вчера ги објави „Еуроњуз“.

– Тоа е констатирано и потврдено наспроти сите програми и ветувања на оваа власт. За потврда на ова доволно е да го вдишете скопскиот воздух. Планот за чист воздух на владата ќе доживее дебакл, ќе биде фијаско, ништо нема да се исполни. Налепниците за возилата се дискриминирачки и стигамтизирачки за граѓаните. Стотици луѓе нема да можат да одат на доктор, на работа, најсиромашните ќе бидат најпогодени. Скопје го има најнеспособниот градоначалник во историјата – рече Ѓорчев.

Податоците дека Македонија е најзагадена земја во Европа не се однесуваат на 2018 година туку на 2015 и 2016 година кога на власт беше ВМРО-ДПМНЕ, го коригираше заменикот-министер за животна средина Јани Макрадули.

– Овој проблем може да се реши само заеднички. Популизмот и кревањето паника не помага. Дека е загадено е загадено, дека е штетно е штетно, но меѓусебните обвинувања не помагаат. Буџетот од 1,5 милиони евра за 2019 година не е доволен но со него може да се направи многу. Планот за чист воздух е реален и знам дека ќе донесе резултати – вели Макрадули.

Градоначалникот на Град Скопје, Петре Шилегов констатираше дека е лошо кога со политиканство се пристапува на ваков фундаментален проблем.

– Пратеникот Ѓорчев имаше неписмен говор без елементарно познавање на проблемот. Наследив запустен град, без стратегија и концепт за решавање на овој проблем. Град Скопје имаше тројца инспектори, но 19 обезбедувачи и 11 шофери. Сега со 18 инспектори го засиливме инспекцискиот надзор. Подготвуваме 12 кривични пријави за организирање на диви депонии, сериозно е намален бројот на отворени огнови, изготвуваме закон за комунална полиција. Стратешки погрешен беше пристапот со набавката на автобусите, а 90.000 стари возила се влезени во Македонија и сега го дишеме тоа – рече Шилегов.

Од еколошките организации велат дека буџетот од 1,5 милиони евра за 2019 година е несериозен и недоволен за процесот на решавање на овој проблем и дека е несразмерен во однос на висината на еколошките даноци кои ги плаќаат граѓаните.

Стојан Нешовски од „Еко свест“ вели дека од еколошките такси во 2015 година биле собрани 15 милиони евра. Според него, неопходно е да се донесе закон за енергетска ефикасност, да се воведе целосна забрана за греење на јаглен, пластика и масла, да се воведат најстроги мерки за градежништвото, построги казни и зачестени контроли.

– За поздравување е еко-налепницата во сообраќајот, но спроведувањето на мерката е погрешно. Треба да се започне со автобусите, такси возилата, транспортните возила – вели Нешовски.

Еко-активистиката Билјана Стојанова вели дека не треба да се стимулираат печки на пелети затоа што и пелетите се направени од дрво, а притоа нема информација со какви хемикалии се премачкани. Таа апелираше да се воведат субвенции за вградување на плин во автомобилите.

– И прекинете со препукувањата. Ни се смачивте и на нас и на граѓаните – апелираше таа.

Професорот Драган Ѓорѓев од Институтот за јавно здравје апелираше сите да почнат да ги менуваат навиките затоа што проблемот е на целата заедница.

– Помеѓу 30-35 отсто од смртните случаи во Македонија се последица на аерозагадувањето, а канцерогените заболување се повеќе се зголемуваат. Не очекуваме дека за 2 години ќе се намали 50 отсто од загадувањето. Не поставувајте таргети, ни треба прогрес – порача Ѓорѓев.


Владите свесно го избегнуваат решавањето на еколошките проблеми во име на социјалниот мир


Скопје, 22 ноември, 2018 - 16:44 (META) 

Интервју со Радован Никчевиќ, експерт за поврзување о Советот за регионална соработка на Западен Балкан за климатските промени, каде ги води секторите за енегргија и кологија, за соработката на Балканот и што ја отежнува, како и за за приоритетите на владите во овој сектор.

Со Никчевиќ разговаравме на министерскиот состанок за акција за човековата околината и климата кој се одржува во Скопје.

Господинот Свилановиќ денес изјави дека парите не смеат да бидат изговор за владите ништо да не превземаат во доменот на екологијата. Дали мислите дека се работи само за недостиг на пари или постои и недостиг на волја?

– Недостиг на пари постои, но ситуацијата е доста комплексна. Процесот на имплементација на мерките за заштита од последиците на емисии на штетни гасови и од климатските промени обично доцни зад ЕУ. Често се случува, додека ние тука работиме на имплементацијата на одредени прописи во националните законодавства, ЕУ да подготвува нови, апдејтирани документи. Освен тоа просторот на Западен Балкан е доста фрагментиран со шест недоволно силни економии со сопствени правни рамки и ја отежнува меѓусебната соработка, а ни фали и искуство во имплементација на големи проекти. Токму тоа ние во регионалната работна група за животна средина се обидуваме да го подобриме.

Во Македонија и во регионов, енергетиката почива на термоцентрали. Скапо и неефикасно производство на електрична енергија, а од друга страна енормно загадување како во случајот со РЕК Битола. Како да се натераат владите да се откажат од сегашното потпирање врз јагленот и да градат капацитети на обновливи извори на енергија?

DSC_0401

– Директивата за обновлива енергија, која е вградена во правните рамки на економиите на Западен Балкан е основ по кој се утврдени целите за користење на обновлива енергија до 2020 година. Сите земји работат на таа проблематика, со различен успех, па така Црна Гора, Босна и Херцеговина и Албанија веќе ги остварија поставените цели за 2020 година. Откако ЕК во 2016 година го објави таканаречениот Зимски пакет, во ЕУ се работи на остварување на таргетот од 32 проценти производство на енергија од обновливи извори до 2030 година, додека намалувањето на стакленичките гасови е зацртано да достигне до 40 проценти, енергетската заедница на Западен Балкан сега работи и на таргетите за нашиот регион. Токму тоа ќе биде и главната тема на министерскиот состанок кој за една недела ќе се одвива повторно тука, во Скопје. Потпирањето на јагленот, во овој регион досега главно го диктираа условите на пазарот, бидејќи, за жал цената на енергијата од обновливите извори не беше конкурентна. Единствениот начин да се зголеми учеството на струјата од обновливи извори е со државна поддршка, со субвенции и со тнр.фид-ин тарифи за покривање на разликата во цени и стимулирање на инвеститорите да градат такви капацитети. Но, тука работите полека се менуваат. Цените на фотоволтаиците и на ветрогенераторите постојано паѓаат и стануваат конкурентни, а со процесот на аукции јакне конкуренцијата, цените од ваквата струја паѓаат и со самата економија на обемот се менуваат и условите на пазарот. Потребно е сите повеќе да работиме на проекти за „декарбонизација“ на енергетскиот сектор, преоѓање од користењето на необновливи извори односно фосилни горива за производство на електрична енергија и намалување на потрошувачка на енергија во јавниот сектор и во транспорт, кои се енормни потрошувачи или „буре без дно“.

Значи треба да чекаме нашите влади пазарот да ги тргне од „сонот за јагленот“?

– За жал, нашите влади имаат некои други приоритети, како на пример зачувување на социјалниот мир и економски развој додека заштитата на животната средина се потиснува на маргините за некои подобри времиња кои никако да дојдат. Тоа ние тука се обидуваме да го промениме.

Колку значат за една земја-кандидат како Македонија документите на ЕУ за климатски промени и за енергетската политика кога е таа заглавена со теми како термоцентрали и ендемско загадување?

– Ние самите ги превземаме и ги транспонираме во нашите национални законодавства во процесот на пристап кон ЕУ, а дел од тие прописи стануваат задолжителни за нас преку одлуките на министерскиот совет на Енергетската заедница на Западен Балкан во која членуваат и Украина, Молдавија и Грузија како се потписнички на Спогодбата за енергетската заедница. Но, токму тоа делумно прифаќање на прописи на ЕУ некогаш се прави несмасно. Илустративен беше примерот со воведувањето на таканаречените штедливи сијалици како дел од мерките за зголемување на енергетската ефикасност па така на пазарот на Западен Балкан осамнаа милиони такви сијалици кои навистина штедат преку 75 проценти енергија, но делот од прописите кои се однесуваат нив, а се дел од заштитата на животната средина, а тоа е едукација на корисниците и процедурите и соодветниот третман на отпадот од нив. А, каде е тука еколошката димензија ако таквите сијалици и нивниот опасен отпад во кој има жива, завршат во контејнер и на депонија?

Како можеме да воведуваме стандарди на ЕУ за заштита на животната средина кога некои базични предуслови не сме исполниле, да речеме место третман на отпад имаме нерегуларни депонии, на кои дури живеат и луѓе, шета стока? Цинично е законодавците во нашите земји да се занимаваат со нешто како штедливи сијалици ако не функционираат темелите на заштита  на животната средина …

– Мислам дека се свесни за ова и свесно ги избегнуваат обврските се додека тие можат да се избегнуваат, за жал. Поглавјето 27 за екологија е најскапото. Еве, темата за третман на отпадот – во нашите земји можете да сретнете корпи за селектирање на отпад и тоа убаво изгледа, но жално е што потоа ќе дојде камионот за собирање на отпад и содржината од сите три корпи ќе ги истури на куп и ќе ги однесе на градската депонија. Нема рециклирање,што е срж на системот за селекција. Во сите земји на западниот Балкан  работите, генерално, така стојат.

Ајде што не се рециклира за заштита на природата, зошто никој на овие простори не размислува дека третманот на отпад е и профитабилен бизнис?

– Мислам дека иницијалните инвестиции за такво нешто се превисоки бидејќи не се во прашање само постројките туку и воспоставувањето на целиот тој ланец.

МЖСПП беше ко-претседавач на денешната конференција, но дома овој владин ресор доживува сериозни критики за справувањето со загадувањето. Програмата за справување со аерозагадувањето содржи повеќе козметички отколку суштински мерки и мизерно мал буџет за реализација …

– Проблемот со аерозагадувањето во Македонија и во регионов уште лани на конференцијата во Бон беше препознаено како исклучително сериозен проблем. Но,освен Тетово, тука се уште шест градови од Западен Балкан. Нема друг излез освен да почнеме со сериозно намалување на употребата на фосилните горива и со примена на современи технологии кои овозможуваат поцелосно согорување, вградување филтри … Во спротивно – не ни се пишува добро.