ВМРО-ДПМНЕ обвини, а сите демантираа дека имало местење тендери за партнерот на Царовска


Скопје, 3 јануари, 2019 - 15:21 (META) 

Опозициската ВМРО-ДПМНЕ денеска обвини дека фирмите на Горан Георгиев, неформалниот сопруг на министерката за труд и социјална политика Мила Царовска, во четири очи добиле три договори во милионски износ за набавки дронови. Обвинувањата беа демантирани и од Министерството за труд и социјална политика и од МЕПСО, а и од фирма на Георгиев.

ВМРО-ДПМНЕ обвини дека Царовска во анкетниот лист не го пријавила имотот на нејзиниот партнер, иако според законите, била должна тоа да го направи.

– Невенчаниот сопруг на Царовска, Георгиев, е неколкукратен добитник на милионски тендери од институции со кои раководи СДСМ. Како што објавија медиумите фирмата на неформалниот сопруг на Царовска добила 1,5 милиони денари на име набавка на дронови. Дали милионските тендери се причината поради која Царовска не го пријавува имотот на нејзиниот невенчан сопруг? Дали преку невенчаниот сопруг на Царовска се прекршува законот за да се добиваат државни пари во четири очи без распишани тендери? Дали на тие сметки се таложат парите кои јавноста не треба да ги гледа, а ги плаќа од свој џеб? – праша на прес-конференција Маја Славева од ВМРО-ДПМНЕ.

Министерството за труд и социјална политика ги демантираше овие наводи, велејќи оти е неточно дека Царовска согласно законите морала да го пријави имотот на Георгиев, притоа цитирајќи законски членови. Сепак, иако не постои обврска, министерката наскоро во Анкетниот лист во Антикорупциска ќе го додаде имотот на нејзиниот неформален партнер.

„Иако законски не е обврзана, министерката Царовска заради транспарентност кон јавноста околу имотот на неформалниот сопруг во најбрз можен рок ќе го пријави во анкетниот лист во Државната комисија за спречување на корупција. Тој во своја сопственост има една гаража од 25 м2 и една парцела земја во кочанско од 1.000 м2“, се вели во демантот.

На прес-конференцијата и на написот на „Лидер“ реагираше и државната компанија МЕПСО, која беше обвинета дека со фирмата „Флај Кем ДООЕЛ“ на Георгиев незаконски и без тендер склучила договор.

„Договорот за набавка на стоки „Специјални летечки уреди (дронови) за извршување вонредни прегледи на далекуводи“ е склучен откако во целост е спроведена соодветна транспарентна постапка за јавна набавка согласно со Законот за јавни набавки. Имено, договорот со правното лице „Флај Кем ДООЕЛ“ е склучен откако е објавен тендер на кој на е-аукција компанијата дала најповолна цена за набавка на 4 дронови и за обука на лица од МЕПСО за управување со тие уреди. Дополнително аргумент во полза на тоа дека е добиена поволна понуда е тоа што планираната вредност на набавката била 922.500 денари, а набавката е реализирана за вредност од 779.980 денари со вклучен ДДВ“, порача МЕПСО.

Со речиси идентична реакција се огласи и „Флај Кем ДООЕЛ“.

„На секоја од трите наведени јавни набавки кои се посочуваат, нашата компанија уредно учествуваше на електронска аукција согласно законот. Лагата е дотолку поголема ако се земем предвид фактот дека на секоја од трите електронски аукции учествуваа по повеќе компании. За ова тврдење во прилог на овој демант ги доставуваме официјланите документи од електронските аукции. Истите може да се проверат со секоја од институциите поединечно“, стои во реакцијата од фирмата.


МЕПСО ќе вложи 1,1 милиони евра во модернизацијата на трафостаницата „Прилеп“


Прилеп, 12 декември, 2018 - 13:12 (META) 

Прилеп и неговата околина ќе добијат стабилно и сигурно снабдување со електрична енергија во наредните 20 години со модернизацијата на трансформаторската станица „Прилеп 1“ во која МЕПСО вложува 1,1 милиони евра.

По тој повод денеска во трансформаторската станица „Прилеп 1“ договор за модернизација склучија Сашо Василевски, генералниот директор на МЕПСО, и Бранислав Лековиќ, претставник на конзорциумот изведувачи „Кончар КЕТ“ од Хрватска и домашната компанија „Елтек“.

Модернизацијата на трафостаницата вклучува промена со нова на високонапонска опрема што е во функција 40 години. Станува збор за вградување на нови прекинувачи, разделници и мерни трансформатори и нова опрема за контрола и далечинско управување со трафостаницата, нов системи за мерење електрична енергија и нов систем за релејна заштита.

– МЕПСО за жителите и компании во Пелагонија сега вложува 6 милиони евра. Станува збор за три инвестиции во преносната мрежа во Пелагонија. Овде во оваа трафостаница вложуваме 1,1 милиони евра, уште 1 милион евра сега вложуваме во трафостаницата „Битола 2“, а склучивме договор вреден 3,9 милиони евра за изградба на нов далекувод што ќе ќе поврзе оваа со трафостаницата „Битола 1“  – потенцираше Василевски.

Ова е трет договор за модернизација на постројки во преносната мрежа во кој учествува „Кончар КЕТ“ во рамки на овој инвестициски циклус на МЕПСО.

Модернизацијата на оваа трафостаница и на далекуводот што ги поврзува Прилеп и Битола ќе се реализира за година и половина, а модернизацијата на трафостаницата „Битола 2“ ќе биде готова за 2,5 години.

ТС „Прилеп 1“ претставува централна напојна точка за регионот на северна (горна) Пелагонија и регионот на Мариово. Истата е поврзана на електропреносниот систем преку 110 киловолтни далекуводи со трафостаници во Битола и во Кавадарци, а со неа се поврзани и три трафостаници на дистрибутивниот систем преку кој се напојува со електрична енергија градот Прилеп, неговата околина и Мариово.


МЕПСО потпиша договори со пет компании за нови инвестиции во преносната мрежа


Скопје, 6 ноември, 2018 - 13:52 (META) 

МЕПСО денеска во Владата потпишa договори со пет компании за нови инвестиции во преносната мрежа во вкупен износ од 18 милиони евра.

Станува збор за модернизација и возобновување на преносната мрежа со што ќе се обезбеди стабилно и квалитетно снабдување со електрична енергија за граѓаните и бизнисот на долг рок, и ќе придонесе кон енергетски и економски развој на земјата.

– Крајниот бенефит од овие нови инвестиции во висина од 18 милиони евра во преносната мрежа на електроенергетскиот систем ќе ги почувствуваат компаниите, граѓаните и идните генерации преку навремено, брзо, квалитетно и стабилно снабдување со електрична енергија. Истовремено со реализација на овие нови инвестиции на МЕПСО ќе се отвори можност за намалување на трошоците на работење, со што ќе се создадат услови и за намалување на крајната цена што ја плаќаат граѓаните и компаниите бидејќи очекувањата се дека ќе се намали преносната такса која ја добива АД МЕПСО – порача премиерот Зоран Заев.

Далекуводите кои се изградени пред 60 години, како и трафостаниците кои се исто така застарени, а се од особено значење за пренос на електрична енергија, ќе бидат обновени со нова опрема.

-Реализацијата на договорите кои денес се потпишуваат, ќе се одвива преку заем од ЕБОР, кој е земен уште во 2013 година. Станува збор за вкупни средства во висина од 23 милиони евра, од кои многу мал дел досега се реализирани, а денес се потпишуваат договори за вкупно 18 милиони евра. Минатата влада го земала заемот во 2013 година, во меѓувреме плаќала камати, а не реализирала проекти. Во последната година новото раководство на МЕПСО, објави нови тендери за сите проекти, кои беа заглавени и не имплементирани – потенцираше вицепремиерот Кочо Анѓушев.

Компании коишто денеска потпишаа договори за реализација на инвестиции од 18 милиони евра во преносната мрежа се „Далековод“ и „Кончар“ од Хрватска, „Енергомонтажа“ од Србија, „Бенинг ПСАМ“ од Македонија и „Доко“ од Албанија.


МЕПСО вложува 4,6 милиони евра во трафостаницата „Дуброво“


Битола, 24 септември, 2018 - 13:45 (META) 

МЕПСО започна со модернизација на трансформаторската станица „Дуброво“ при што ќе биде заменета со нова опрема што е во функција од 1977 година до сега.

„Овој комплексен проект опфаќа замена на примарна опрема (прекинувачи, разделници, струјни и напонски мерни трансформатори) како и ревитализација на секундарната опрема на 400 киловати и на 110 киловати напонско ниво која вклучува: испорака и инсталација на системи за релејна заштита, далечински надзор и за управување како и системи за AC/DC развод и нов систем за мерење електрична енергија“, се вели во соопштението на МЕПСО.

Ревитализацијата на ТС „Дуброво“ планирано е да трае три години. Реализацијата на овој проект ќе обезбеди зголемена сигурност и доверливост во работењето со високонапонската опрема, мониторинг во реално време, навремено детектирање и превенција на дефекти и оптимализација во управувањето со електропреносниот систем.

„Трансформаторската станица „Дуброво“ од системски аспект е еден од најважните енергетски јазли во македонскиот електропреносен систем затоа што го поврзува најголемиот производствен капацитет РЕК „Битола“ со најголемиот конзумен регион Скопје. Во оваа трансформаторска станица се вмрежуваат и интерконективните 400 киловолтни далекуводи кои нашиот систем го поврзуваат со електропреносните системи на Бугарија и на Грција“, се додава во соопштението на МЕПСО.


Билен Саљији стана заменик-генерален директор на МЕПСО


Скопје, 11 јули, 2018 - 13:44 (META) 

Поранешниот министер за правда, Билен Саљији е избран за заменик генерален директор и за член на Управен одбор на МЕПСО, потврдија од компанијата.

Саљији беше министер за правда од јуни 2017 година до март годинава кога си поднесе оставка поради одлуката во случајот со малиот Алмир иако се појавија информации дека неговото име беше прво на списокот на премиерот Заев при реконструкцијата на владата.

Во периодот од 2011 до 2017 година бил директор на Државниот инспекторат за шумарство и ловство. Саљији има положено правосуден и нотарски испит. Од 2009 до 2011 бил директор во ЈКП „Врапчиште“, Општина Врапчиште, а од 2005 до 2009 година бил советник за односи со јавноста во Општина Врапчиште


Електропреносните систем-оператори ќе формираат едeн пазар за струја на ЈИЕ


Струга, 11 мај, 2018 - 15:42 (META) 

Единствен пазар на електрична енергија во земјите од регионот на Југоисточна Европа (ЈИЕ) и негова интеграција во Пан-европскиот пазар на електрична енергија е заедничката цел на компаниите преносни систем-оператори од девет држави учесници на Форумот под мотото „Границите да станат мостови“, што во организација на МЕПСО денеска се одржува во Охрид.

Форумот на преносни систем-оператори под мотото „Границите да станат мостови“ свечено го отворија премиерот Зоран Заев, вицепремиерот Кочо Анѓушев и Сашо Василевски, генералниот директор на МЕПСО. Организацијата на овој форум е поддржана и од Бен Ворхорст, претседател на Собранието на Европската асоцијација на електропреносни систем-оператори (ЕНТСО-Е).

– Овој собир овде во Охрид е од исклучителна важност ако се има предвид целта на форумот: Креирање на единствен пазар на електрична енергија и негово вклучување во пан-европскиот пазар на електрична енергија.  Toa е најдобар начин за зголемување на транспарентноста и конкурентноста меѓу сите учесници на пазарот: производители, снабдувачи и трговци затоа што за сите важат истите услови односно правила – истакна во своето обраќање премиерот Заев.

Вицепремиерот Анѓушев потенцираше дека стремежот посебно на малите земји како што е Република Македонија е во регионално поврзување на  пазарот на електрична енергија и инвестиции во енергетиката, а се со цел бенефитот да го почустваваат граѓаните преку пониски цени на електричната енергија.

– Само со градење на капацитети во делот на производството а посебно каде што вие управувате во делот на преносните линии, односно на далекуводите кои што се на високо напонско ниво, над 110 киловолти, можеме да гарантираме сигурност за нашите граѓани – порача вицепремиерот Анѓушев.

Целта на форумот е јакнењето и унапредувањето на меѓусебната соработка на преносните систем-оператори. Во него учествуваат највисоки претставници, односно генерални директори, извршни директори, претседатели на управни одбори на операторите на електропреносните системи: МЕПСО од Македонија, ОСТ од Албанија, ЕМС од Србија, ЕСО од Бугарија, КОССТ од Косово, НОС од Босна и Херцеговина и високи претставници на управите на систем-операторите од АДМИЕ од Грција, ХОПС од Хрватска и ЕЛЕС од Словенија.


ОЈО ќе го истражува ревизискиот извештај на МЕПСО за 2016 година


Скопје, 4 април, 2018 - 13:51 (META) 

Основното јавно обвинителство (ОЈО) ќе го разгледува ревизорскиот извештај на МЕПСО за 2016 бидејќи Владата во него забележала две спорни ситуации, информираше денеска на прес-конференција владиниот портпарол Миле Бошњаковски.

– Првата се однесува за купување на имот. Во 2011 МЕПСО добила понуда да купи имот од 2.178 квадратни метри по цена од 3,7 милиони евра. МЕПСО ја одбива таа понуда, а две години подоцна друго правно лице го продава на МЕПСО за цена од 4,8 милиони евра – рече владиниот портпарол Миле Бошњаковски.

Втората информација, посочи тој, се однесува од времето на двоење на Електростопанство на Македонија, кога дел од мрежата во сопственост на МЕПСО не бил впишан во катастар како дел од имотот на компанијата.

– Овие објекти ЕВН ги има издадено под закуп и има земено хипотекарен кредит. Во ревизорскиот извештај е наведено дека оваа ситуација мора да се расчисти, односно дека имотот е во сопственост на државата – изјави Бошњаковски.

Прашан за кое раководно лице во МЕПСО станува збор, тој рече дека се работи за 2016 година, но точните имиња не ги знае. Одлуката извештајот да биде испратен до ОЈО ја донесе Владата на вчерашната седница.


Македонија и Грција ќе ја олеснуваат трговијата со струја


Атина, 15 март, 2018 - 13:45 (META) 

Македонскиот електропреносен систем оператор (МЕПСО) и грчкиот електропреносен систем-опратор (АДМИЕ) ќе работат на опциите за да ги зголемат прекуграничните капацитети за пренос на електрична енергија, со што, ќе ја олеснат трговијата со електрична енергија и ќе ја зголемат сигурноста во работењето на соседните системи.

Ова го заклучија генералните директори на двете компании, Сашо Василевски и Манос Манусакис на официјална билатерална средба помеѓу двата систем-оператори одржана денеска во Атина, за прв пат од 2007 година.

„На средбата беше констатирано дека приоритет на двете земји е зголемување на далукуводните капацитети за пренос на електрична енергија. Заради тоа, во најскоро време ќе се формираат работни групи кои на техничко ниво ќе понудат решенија за зголемување на капацитетите, а ќе се избере најповолно решение за двата системи кое ќе биде одобрено од менаџментите на двете компании. Овој проект финансиски може да биде поддржан од двете земји или од фондови на Европската унија. На средбата беше договорено во текот на мај да се оствари уште една средба на највисоко ниво на која ќе се утврдат нови детали за подобрување на соработката меѓу систем-операторите на двете земји“, информираат од МЕПСО.


Измените на Законот за аудио и аудиовизуелни медиумски услуги денеска на владина седница


Скопје, 20 февруари, 2018 - 10:02 (META) 

Во 12 часот Владата ќе ја одржи својата редовна 55-та седница на која ќе биде разгледан Предлог законот за изменување и дополнување на Законот за аудио и аудиовизуелни медиумски услуги, како и Предлог законот за изменување и дополнување на Законот за основање на Јавно претпријатие Македонска радиодифузија.

На предлог на Министерството за правда, пред владините министри денеска ќе се најде и Предлог законот за бесплатна правна помош.

Владата ќе ја разгледа и информацијата за реализација на Националната стратегија за земјоделството и руралниот развој за периодот 2014-2020 година.

На денешната седница ќе бидат разгледани финансискиот план на Централниот регистар за 2018 година, Годишната инвестициска програма во 2018 година и програмата за инвестиции за периодот 2019-2022 година на АД МЕПСО.

Министерството за внатрешни работи на денешната седница ќе ја презентира информацијата за спроведување на мерките за ограничување и забрана на сообраќајот во услови на надминување на прагот на алармирање и зајакнување на контролата на издувните гасови од возилата при нивна регистрација во техничките станици.


МЕПСО ќе гради нов далекувод од Штип до Пробиштип


Скопје, 28 декември, 2017 - 11:33 (META) 

МЕПСО ќе инвестира 2,45 милиони евра во изградба на нов 110-киловолтен далекувод што ќе ги поврзува Штип и Пробиштип, информираат од компанијата.

Генералниот директор на МЕПСО, Сашо Василевски и Ерион Муши, претставникот на конзорциумот изведувачи „Пинг гао груп“ од Кина и „Ндрекај“ од Албанија го потпишаа договорот за изградба на новиот далекувод.

„Далекувод што ќе ги поврзе трансформаторските станици „Штип“ и „Пробиштип“ ќе биде долг 27,2 километри. Овој линиски енергетски објект ќе се гради на истата траса на која сега поминува 110-киловолтен далекувод што ги поврзува двете трансформаторски станици и е во функција 45 години, од 1972 година. Изградбата на новиот далекувод ќе трае 12 месеци“, информираат од МЕПСО.

Во соопштението се додава дека, овој проект значајно ќе го зголеми капацитетот на преносната мрежа во источниот регион, а особено е значајно подобрувањето на условите за снабдување со квалитетна електрична енергија за Пробиштип, Злетово, Кратово и Крива Паланка.

Изградбата на нов далекувод меѓу Штип и Пробиштип е дел од проектот за ревитализација на преносната мрежа што опфаќа изградба на вкупно шест далекуводи од мрежата на МЕПСО.