!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

„Самит 100“ и Коморски инвестициски форум потпишаа меморандум за соработка


Скопје, 17 октомври, 2017 - 12:09 (META) 

Во рамките на „Самит 100“, вчера беше потпишан меморандум за соработка помеѓу регионалната платформа „Самит 100“ и Коморскиот инвестициски форум на шест земји од Западен Балкан (WB6 CIF).Форумот е тело за регионална соработка на коморите од Македонија, Србија, Албанија, Косово, Босна и Херцеговина и од Црна Гора и e формиран на маргините на Самитот во Трст за Западен Балкан.

Според потписниците на меморандумот, претседателот на управниот одбор на „Самит 100“, Живко Мукаетов, и претседателот на Стопанската комора на Србија, Марко Чадеж, целта е да се обединат силите од приватниот сектор и силните регионални компании да работат заедно на спроведувањето на договорените проекти од Берлинската иницијатива.

„Годинава во Скопје, регионалната соработка на „Самит 100“ е официјализирана преку потпишување меморандум за меѓусебно разбирање и за соработка на нашата платформа со Коморскиот инвестициски форум на Западен Балкан 6. Меморандумот се однесува на поттикнување на деловната соработка и на унапредување на конкурентноста на регионалната и на националните економии“, рече Мукаетов.

Темите за кои се дискутира на овој самит се продлабочување на поврзаноста во регионот преку соработка, побрза трговија со стоки и со услуги, транспорт, енергија и брендирање на потеклото.

„Сакаме да помогнеме во остварување на тие задачи, придонесувајќи во отстранувањето на царинските бариери, синхронизирање на документацијата, но и синхронизирање на другите процедури. Наша задача е да ја задржиме оваа тема високо на агендата и мислам дека таквата подготвеност сега постои, но не смееме да се опуштиме. Ова е прашање на опстанокот на нашиот регион“, заклучи Чадеж.

Денеска на „Самит 100“ ќе дискутираат премиерот Зоран Заев и премиерите на Албанија, Еди Рама, на Црна Гора, Душко Марковиќ, и претседавачот со советот на министри на Босна и Херцеговина, Денис Звиздиќ.


Договорен меморандум за разбирање за рестартирање на „Југохром“


Скопје, 10 октомври, 2017 - 20:42 (META) 

Владата на денешната 31. седница го усвои предлогот за потпишување меморандум за разбирање, кој треба да придонесе за надминување на состојбите поврзани со работењето на „Југохром“, соопшти владината прес-служба.

„Владата на Република Македонија го донесе ова решение со единствена цел – надминување на проблемите во оваа компанија кои доведоа до запирање на нејзиното работење откако нејзината управа не ги обезбеди неопходните еколошки стандарди пропишани за овој тип индустрии. По повеќе средби и разговори меѓу претставници на компанијата, на синдикатот на „Југохром“ и на граѓанските еколошки организации, донесен е заеднички заклучок дека сите наведени субјекти се заинтересирани за продолжување со работа на компанијата“, стои во соопштението.

Од владината прес-служба наведуваат дека управата на „Југохром“ изразила подготвеност да прибави еколошка интегрирана дозвола А во согласност со законот, а претставниците на синдикатот исто така искажале спремност веднаш да се вклучат во процесот на работењето.

Како што се наведува во соопштението, невладините организации не се противат на повторното рестартирање на работата на комбинатот по инсталирање на соодветни заштитни филтри и опрема што ќе го спречи загадувањето на животната средина.

Владата на Република Македонија, исто така, изразила подготвеност преку надлежните органи, веднаш по исполнувањето на условите, да ја издаде еколошката дозвола потребна за продолжување со работа на комбинатот.

Меморандумот за разбирање ќе го потпишат управата на компанијата, синдикатот и Владата на Република Македонија.


Сугарески информираше за деталите за изградбата на железничката мрежа со Бугарија


Скопје, 5 август, 2017 - 12:58 (META) 

Министерот за транспорт и врски, Горан Сугарески, денеска информираше за деталите од меморандумот за разбирање помеѓу Македонија и Бугарија за развој на железничката мрежа.

Тој истакна дека потпишувањето на овој меморандум е услов за одржлив економски пораст и развој во регионот.

– Со меморандумот се обврзуваме во наредниот период да ја доизградиме и да ја модернизираме пругата до границата со Бугарија, а исто така владата на Бугарија се обврза да ја доизгради пругата до нашата граница, со што целосно ќе го заокружиме железничкото поврзување. Вкупната должина што треба да се доизгради до границата со Бугарија е околу 89 километри. Изградбата претходно е поделена на три делници и ние како Влада ќе се движиме во рамките на таквите планови бидејќи постапките за сите три делници се веќе почнати – изјави Сугарески.

Тој додаде дека делницата Куманово – Бељаковце е во фаза на реализација, а средствата во висина од 46 милиони евра се обезбедени од Европската банка за обнова и развој.

– Пругата требаше да биде готова уште минатата година, но поради одредени проблеми со проектната документација и нерешените имотно-правни односи, градбата е пролонгирана до 2018 година. Во делот од Бељаковце до Крива Паланка во должина од 34 километри, во завршна фаза е постапката за изработка на техничката документација. Постапката за изведувач е почната и се очекува до средината на идната година да имаме избрано градежна фирма што ќе го гради овој дел од пругата. Според планираното, оваа делница ќе биде завршена до 2021 година. И за изградбата на оваа делница, средствата се веќе обезбедени од Европската банка за обнова и развој во висина од 145 милиони евра – додаде Сугарески.

За третата секција од Крива Паланка до границата со Бугарија во должина од 24 километри, во завршна фаза е изработката на проектната документација. Се проценува дека изградбата би чинела помеѓу 350 и 400 милиони евра.

– Бугарија со меморандумот се обврза модернизација на железничката линија од Софија до Ѓуешево да биде завршена до крајот на 2026 година (веќе постои пруга на оваа линија), а делот од Ѓуешево до граница со Македонија да биде завршена до крајот на 2027 година – изјави Сугарески.


Разрешувањето на Зврлевски стигна на дневен ред – утре ќе почне расправата


Скопје, 11 јули, 2017 - 17:59 (META) 

Точката за разрешувањето на државниот јавен обвинител Марко Зврлевски дојде на дневен ред пред пратениците, но претседателот на Собранието, Талат Џафери, ја прекина седницата и продолжението го закажа за утре во 11 часот.

Откако со 91 гласа „за“, и без ниту еден против и воздржан беше усвоена одлуката за давање согласност на општите акти на Народниот правобранител, Џафери ја отвори петтата точка од дневниот ред на шестата пленарна седница. Собранискиот спикер побара предлагачот на барањето за разрешување на Зврлевски, како и пратениците да се пријават за збор, но исто така порача да не се злоупотребува меморандумот на Собранието.

– Се злоупотребува меморандумот на Собранието. Тој во соодветна процедура може да го користат само надлежни органи. Без да именувам, ќе кажам да не се злоупотребува, за да не дојдеме во ситуација да се именуваме поединечно и да не се доведува администрацијата да направи нешто што не треба да се направи. Затоа сега укажувам вака општо – рече Џафери, пред да го закаже продолжението за утре.


Пензионерите од Охрид се незадоволни од одлуките на централното раководство


Охрид, 7 декември, 2016 - 14:52 (META) 

Претставници на пензионерите кои се противат на меморандумот за соработка со ВМРО-ДПМНЕ, попишан од претседателот на Сојузот на здруженијата на пензионерите на Македонија, Драги Аргировски, денеска одржаа заедничка средба со раководството на Здружението на пензионери за Општина Охрид и за Дебрца.

Во писмениот поднесок и непосредниот разговор, тие нагласија дека меѓу широкото членство на пензионери присутно е огромно незадоволство и отпор кон постапките и одлуките на централното раководство во Скопје, а за што како пензионери се информирани од медиумите.

Десет илјади пензионери од Охрид бараат одговор на прашањето дали претходно, во однос на потпишување на меморандумот, биле информирани и дали дале согласност органите на Здружението, како и двајцата делегати во собранието на Сојузот?

Доколку Здужението не било информирано и не дало согласност, претставниците на незадоволните пензионери побараа, најдоцна до почетокот на изборниот молк, Здружението јавно да се огради од меморандумот за да се избегнат понатамошни штети.

Тие предочија дека раководството на Сојузот сè повидливо ги напушта основните принципи и статутарната поставеност, со што ја губи независноста и самостојноста.

Раководството на Здружението вети дека сите барања на незадоволните пензионери, ќе бидат разгледани на органите, на предновогодишното собрание, закажано за крајот на месецов.


Протече документ од британската влада, Лондон нема план за Брексит, јавува „Би-би-си“


Лондон, 15 ноември, 2016 - 10:44 (META) 

Британската влада нема сеопфатен план за излегувањето на земјата од Европската Унија, а поради поделбата што постои во кабинетот, преговарачката стратегија можеби нема да биде усвоена во следните шест месеци, покажува меморандумот кој протече од кабинетот, јавува „Би-би-си“.

Во меморандумот, кој е доставен до „Тајмс“ и во кој „Би-би-си“ има увид, се предупредува дека британската влада работи на 500 проекти поврзани со Брексит и оти веројатно ќе ѝ бидат потребни дополнителни 30.000 вработени.

Сепак, нема заедничка стратегија за излегување од ЕУ, „поради внатрешната поделба во кабинетот“, се наведува во протечениот документ.

Портпаролот на британската влада рече дека тоа не е владин извештај и оти не ја признава содржината на документот, истакнувајќи дека владата е фокусирана на активности во врска со Брексит.

Во протечениот меморандум, кој го составил неименуван консултант и кој датира од 7 ноември, се нагласува дека ќе бидат потребни уште шест месеци за владата да одлучи што сака да постигне со Брексит или да се усогласи во поглед на приоритетите.

Во извештајот, насловен „Нови информации за Брексит“, се критикува премиерката Тереза Меј поради склоноста да „влетува во одлуки и детали за сама да ги реши работите“, наведуваат „Би-би-си“ и „Тајмс“.

„Тајмс“ наведува дека документот на виделина ја изнесува поделбата меѓу министерот за надворешни работи, Борис Џонсон, министерот за Брексит, Дејвид Дејвис, и министерот за меѓународна трговија, Лајам Фокс, од една страна и канцеларот Филип Хамонд и министерот за економија, Грег Кларк, од друга страна.

Британскиот весник известува дека во меморандумот се наведува како секое министерство правело план за евентуалните последици од Брексит, како и план за излегување на крај со „најлошиот случај“.
Премиеркта Меј се надева дека ќе го активира членот 50 од Лисабонскиот договор, што е почеток на формалниот двогодишен процес за излегување од ЕУ, до крајот на март 2017 година, но „Би-би-си“ тврди дека меморандумот покажува колку Брексит ќе биде „комплексен, тежок и полн со предизвици“.


Српските и руските безбедносни служби ја зајакнуваат соработката


Белград, 26 октомври, 2016 - 19:24 (META) 

Николај Патрушев, висок руски функционер за безбедност, кој денеска престојува во Србија, предложи идната година Русија и Србија да потпишат меморандум за соработка на полето на безбедноста.

Со овој меморандум, според Патрушев, ќе се воспостави редовна комуникација на безбедносните служби на двете земји.

На состанокот со министерите за внатрешни работи и за одбрана, Небојша Стефановиќ и Зоран Ѓорѓевиќ, како и со раководителите на службите за безбедност и полиција на Србија, Патрушев истакнал дека меморандумот не би имал правно обврзувачки карактер ниту, пак, статус на меѓународен договор, но ќе создаде услови кои се неопходни за редовни консултации кои ќе бидат од заеднички интерес.

Патрушев денеска во Белград разговарал и со претседателот на Србија, Томислав Николиќ, и со шефот на дипломатијата, Ивица Дачиќ.


Бугарија и НАТО ќе потпишат меморандум за сајбер-безбедност


Брисел, 26 октомври, 2016 - 14:48 (META) 

За време на денешниот состанок на министрите за одбрана на НАТО, кој се одржа во Брисел, бугарскиот министер за одбрана, Николај Ненчев, ќе потпише меморандум за сајбер-безбедноста помеѓу Бугарија и НАТО.

Документот се однесува на приоритетот за градење заштита на националните мрежи од сајбер-напади. Главната цел на договорот е да се креира механизам за соработка со НАТО, како и да се обезбеди експертска и методолошка асистенција од НАТО доколку е потребно.

Генералниот секретар на НАТО, Јенс Столтенберг, пред состанокот рече дека треба се зајакне соработката со ЕУ за прашања како сајбер-безбедноста и хибридните закани.

– Гледаме како Русија поддржува одредени групи кои се обидуваат да влијаат на внатрешните политички дебати во неколку земји во Европа, но НАТО нема да се бори против пропаганда со пропаганда. Најдобриот одговор се фактите и отворените демократски дискусии. Во оваа област соработуваме со ЕУ за да размениме информации – рече генералниот секретар на НАТО.

САД, Канада, Германија и Велика Британија ќе ги презентираат деталите од состанокот за четирите баталјони кои ќе бидат испратени во Источна Европа како дел од санкциите против Русија.

– Исто така, ќе одлучиме и што е потребно за да се зајакне присуството на НАТО во Црното Море – додаде Столтенберг.


Македонските и украинските компании ќе имаат поголема можност за соработка


Скопје, 14 септември, 2016 - 10:37 (META) 

Сојузот на стопански комори (ССК) денеска организира Македонско-украински бизнис-форум, на кој ќе присуствува висока официјална и бизнис-делегација од Стопанската комора за трговија и за индустрија на Украина.

Целта на форумот е подобрување на економската соработка меѓу двете земји, остварување директни контакти со компаниите од Украина за воспоставување конкретни деловни односи, како и за зголемување на продажбата на домашните производи и услуги.

Присутни ќе бидат претставници на украински компании од автомобилскиот сектор, производството на сточна храна и на соја, медицината, градежништвото, енергетиката, производството на јаглен, официјални претставници на ССК, како и претставници на македонскиот бизнис-сектор.

На форумот ќе биде потпишан и меморандум за соработка.


Мисијата на ОБСЕ во Скопје и Општина Центар потпишаа Меморандум за соработка


Скопје, 2 јули, 2016 - 10:40 (META) 

Мисијата на ОБСЕ во Скопје и Општина Центар потпишаа Меморандум за спроведување на проектот „Поддршка на институции и структури за младински политики“.

ОБСЕ ќе го поддржи зајакнувањето на капацитетите на Локалниот младински совет, како и на младинските структури. Со тоа ќе се придонесе за зголемување на младинското учество во донесувањето одлуки на локално и на национално ниво. За таа цел ќе се спроведат две обуки.

Мисијата на ОБСЕ, за потребите на Канцеларијата за млади на Општина Центар, ќе донира и ИТ-опрема и изработка на веб-страница за зголемување на информирањето на младите и за подобар пристап до информации.