!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Нема информации за настрадани македонски државјани во земјотресот во Мексико, соопшти МНР


Скопје, 20 септември, 2017 - 17:49 (META) 

Македонската амбасада во Соединетите Американски Држави до овој момент нема сознанија за македонски државајни погодени од земјотресот во Мексико, соопшти попладнево Министерството за надворешни работи.

„Македонската амбасада во САД е во контакт со мексиканските институции за какви било нови информации. Македонски граѓани кои евентуално се погодени од земјотресот во Мексико, можат да ја контактираат македонската амбасада во САД на следниве телефонски броеви: 00 1 202 390 7418 и 00 1 202 667 0501“, стои во соопштението на МНР.

Во катастрофалниот земјотрес, со магнитуда од 7,1 степен според Рихтеровата скала, кој вчера го погоди централниот дел на Мексико, според последните податоци, загинале 216 лица во главниот град Мексико Сити и во државите Пуебла, Мексико и Морелос.


Ревидирана бројката на загинати во земјотресот во Мексико


Мексико Сити, 20 септември, 2017 - 14:32 (META) 

Мексиканската служба за цивилна заштита ја ревидираше бројката загинати во вчерашниот катастрофален земјотрес од најмалку 248 на 216 жртви. Земјотресот со интензитет од 7,1 степен по Рихтеровата скала урна десетици згради и зароби многу луѓе под урнатините.

Според најновите податоци, најмалку 216 луѓе загинале во главниот град Мексико Сити и во државите Пуебла, Мексико и Морелос, велат властите.

Епицентарот на земјотресот бил на 4,5 километри на североисток од градот Сан Хуан Рабозо и 55 километри на југзапад од градот Пуебла, според Геолошкото биро на САД.


Силниот земјотрес во Мексико уривал згради и уби речиси 250 луѓе


Мексико Сити, 20 септември, 2017 - 9:37 (META) 

Силниот земјотрес што вчера го погоди централниот дел на Мексико уби најмалку 248 луѓе и урна десетици згради во главниот град Мексико Сити.

Во вчерашниот потрес што се случи во 13.14 минути по локално време, најмалку 21 дете загинаа, а други триесетина, како и осум возрасни, се водат како исчезнати откако нивно училиште се урна.

– Во основното училиште „Енрике Ребсамен“ загинаа 25 лица, од кои 21 дете – изјави мексиканскиот заменик-министер за образование, Хавиер Тревињо.

Потресот со интензитет од 7,1 степен според Рихтерова скала предизвика големи штети и во други градови. Земјотресот удри кратко откако многу луѓе учествуваа во вежба за случај на земјотрес, а се случи точно 32 години откако катастрофален земјотрес уби околу 10.000 луѓе во Мексико Сити. Мексико е земја со чести земјотреси, а пред 12 дена потрес со сила од 8,1 степен според Рихтеровата скала уби најмалку 90 луѓе на југот на земјата.

Епицентарот на вчерашниот земјотрес беше близу Атенсинго во државата Пуебла, на околу 120 километри од Мексико Сити, а се случил на длабочина од 51 километар, соопшти Геолошкото биро на САД.

Според националниот координатор за цивилна заштита, во Мексико Сити бројката на загинати изнесува 117, во државата Морелос загинале 72 луѓе, во Пуебла 43 лица, во државата Мексико – 12, во Гуереро тројца и во Оаксака има една жртва.

Спасителски екипи и доброволци цела ноќ со копачи, лопати и со голи раце пребаруваа во урнатините на зградите за да спасат затрупани луѓе.

Градоначалникот на Мексико Сити, Мигел Анхел Мансера, рече дека 44 згради се урнати или оштетени додека некои се зафатени од пожари. Станува збор за шесткатни згради, една фабрика и еден супермаркет.
Околу два милиона луѓе во главниот град се без струја и телефонски врски. Властите предупредуваат да не се пуши на улица бидејќи можно е да има штети и продупчувања на цевките за гас.

Претседателот на Мексико, Енрике Пења Нието, за денеска свика итна седница на националниот Комитет за вонредни ситуации.

Вчерашниот земјотрес се случи само неколку часа по завршувањето на комеморацијата во сеќавање на жртвите од земјотресот со интензитет од 8 степени според Рихтер, што го погоди Мексико Сити во 1985 година, а во кој животот го загубија повеќе од 10.000 лица.


Силен земјотрес во Мексико


Мексико Сити, 19 септември, 2017 - 21:33 (META) 

Земјотрес со интензитет од 6,8 степени според Рихтеровата скала е регистриран денеска во централната мексиканска сојузна држава Пуебла, сопшти сеизмолошката агенција на Мексико.

Земјотресот се случува десетина дена по претходниот катастрофален што одзеде повеќе десетици жртви.

Засега нема информации за жртви или предизвикани материјални штети од новиот земјотрес.

Мексиканските медиуми јавија дека земјотресот бил почувствуван и во главниот град Мексико Сити, каде голем број жители во паника ги напуштале своите домови и работни простории.


Бројот на загинатите во Мексико се зголеми на 90 лица


Мексико Сити, 11 септември, 2017 - 10:38 (META) 

Повеќе од 90 лица загинаа во силниот земјотрес што во петокот го погоди југот на Мексико, соопштија утринава властите.

„Бројот на загинатите е повеќе од 90 лица, од кои 71 се од државата Оахака, 15 во државата Чијапас и четири во државата Табаско“, стои во соопштението на мексиканската цивилна заштита.

Епицентарот на земјотресот, со магнитуда од 8,2 степени Рихтеровата скала бил во близина на границата на Мексико и на Гватемала, на длабочина од 35 километри. Поради земјотресот, чиј епицентар бил во Пацификот, беше прогласена и тревога за цунами, но таа подоцна беше укината.

Ова е насилен земјотрес во последните 100 години во Мексико, а се почувствувал и во главниот град, каде жителите излегле на улица од страв од уривање на зградите.


Мексико погодено од ураганот Катја еден ден по земјотресот што уби 61 човек


Мексико Сити, 9 септември, 2017 - 13:23 (META) 

Еден ден откако доживеа разорен земјотрес од 8,2 степени по Рихтеровата скала, Мексико вчеравечер беше погодено од уште една природна катастрофа, ураганот Катја.

Мексиканскиот претседател Енрике Пења Нието прогласи тридневна жалост поради катастрофалниот земјотрес, кој ја погоди земјата вчера ноќта и во кој загинаа 61 човек. Претседателот изјави дека земјотресот бил со интензитет од 8,2 степени според Рихтеровата скала и оти бил најсилниот во Мексико во изминатите сто години.

Бројот на загинатите во најсилниот земјотрес што го погоди Мексико во последните 100 години се зголеми на 61 лице, а едно лице загинало и во Гватемала.  Земјотресот  можеше да се почувствува сè до главните градови на Мексико и на Гватемала, но најголемите штети ги направи на јужниот брег на Мексико, погодувајќи ги државите Табаско, Чијапас и Оаксака, кои се сметаат за најсиромашни и за најмалку развиени во земјата. Таму во моментов се одвива голема операција на спасување.

Поради земјотресот, чиј епицентар бил во Пацификот, 120 километри од брегот на Мексико, беше прогласена и тревога за цунами, но таа подоцна беше укината.

Вчеравечер, додека земјата сè уште се соземаше од шокот од земјотресот, ураганот Катја ја погоди  Теколутла, а се очекува да донесе врнежи од 25 до 30 сантиметри воден столб на квадратен метар во северните држави Веракруз, на истокот на државата Хидалго и во Пуебла.

Се очекува тоа да предизвика поплави и одрони на земјиште, поради што луѓето што живеат на падини се повикани да се евакуираат.


Бројката загинати во земјотресот во Мексико се зголеми на 32 лица


Мексико Сити, 8 септември, 2017 - 18:41 (META) 

Бројката на загинати во катастрофалниот земјотрес во Мексико, кој со магнитуда 8,2 степени според Рихтеровата скала е најсилниот земјотрес во Мексико во последните 100 години, достигна 32 лица, соопштија властите во земјата.

Епицентарот на земјотресот беше на пацифичкиот брег на Мексико. Земјотресот бил посилен од оној што во 1985 година го погоди главниот град на Мексико, но предизвика многу помала штета.

Зелено-сина светлина која го осветли небото над градот Мексико веднаш по земјотресот од 8,2 степени по Рихтеровата скала ги преплаши уште повеќе жителите на овој град. Иако науката нема официјално објаснување, најверојатно се работи за природен феномен.

Сеизмологот Стивен Хикс истакнува дека врската помеѓу мистериозната светлина и земјотресот никогаш официјално не е докажана и дека најверојатно се работи за експлозија на генератори и системи за напојување.


Најмалку шестмина загинати во земјотресот во Мексико


Мексико Сити, 8 септември, 2017 - 12:59 (META) 

Во најсилниот земјотрес што во последниот век го погодил Мексико, засега бројката на загинати изнесува шест лица, но се стравува дека набргу би можела да се зголеми.

Се вршат масовни евакуации, а издадени се и предупредувања за цунами во регионот, по земјотресот со магнитуда од 8,4 степени според Рихтер, кој се случи околу полноќ по локално време на 165 километри од  Мексико Сити.

Во државата Чиапас има четворица загинати, а во државата Табаско две деца ги изгубија животите, потврди гувернерот на покраината, Артуро Нуњез. Тој рече дека едно дете загинало кога поради потресот се урнал ѕид, а едно бебе го загубило животот во детска болница кога поради прекин на струја, престанал да работи инкубаторот во кој било.


Земјотрес од 8 степени во Мексико, најмалку двајца загинати


Мексико Сити, 8 септември, 2017 - 10:11 (META) 

Во земјотресот со интензитет од 8 степени по Рихтеровата скала што денеска го погоди Мексико, загинаа најмалку две лица.

Пацифичкиот центар за предупредување потврди дека е регистрирано цунами, при што најголемиот бран бил 0,7 метри.

Епицентарот бил на 123 километри југозападно од градот Пихихапан на длабочина од 33 километри. Потресот бил почувствуван и во главниот град Мексико Сити.


Пронајдени човечки коски во масовни гробници во Мексико


Мексико Сити, 17 август, 2017 - 14:54 (META) 

Повеќе од 600 фрагментирани човечки коски се пронајдени во масовни гробници вон мексиканскиот град Тихуана, во близина на границата со САД.

Државното Здружение на исчезнати лица „Долна Калифорнија“ соопшти дека масовните гробници се лоцирани откако трговците со дрога во затвор дале информација за локацијата.

Досега се пронајдени меѓу 600 И 700 делови од човечки коски, а форензичарите велат дека за најмалку еден месец ќе заврши комплетната истрага.

Повеќе од 186.000 лица се убиени и уште 30.000 лица се исчезнати во Мексико од 2006 година, откако владата ја вклучи војската во борбата против организираниот криминал.