!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Гутереш: Раселувањето на Рохинџа-муслиманите е етничко чистење


Њујорк, 13 септември, 2017 - 19:28 (META) 

Генералниот секретар на Обединетите нации (ОН), Антонио Гутереш, денеска ги повика властите во Мјанмар да ги прекинат воените операции и да стават крај на насилството кон муслиманите Рохинџа, нагласувајќи дека целата ситуација го дестабилизира регионот.

Гутереш истакна дека раселувањето на речиси една третина од вкупната популација на муслиманскиот народ Рохинџа во Мјанмар може да се нарече етничко чистење.

Околу 370.000 муслимани Рохинџа изминатите неколку дена побегнаа од Мјанмар во Бангладеш.

„Хуманитарната ситуација е катастрофална“, изјавил Гутереш и побарал од меѓународната заедница помош за раселените во храна, лекови и вода.


Меѓународната заедница загрижена поради актуелната ситуација на Косово


Приштина, 13 август, 2017 - 16:41 (META) 

Амбасадорите на Франција, Германија, Италија, Велика Британија и САД се загрижени поради актуелната ситуација на Косово. Ставот на амбасадорите денеска го соопшти американската амбасада во Приштина.

„Косово се соочува со многу предизвици, како актуелни, така и долгорочни, вклучувајќи ја програмата со ММФ, енергетската ситуација, но исто така и потребата за економски развој, јакнење на владеењето на правото, европската перспектива и односите со Србија. Граѓаните на Косово заслужуваат парламент и влада која може да ги исполни овие предизвици“, стои во соопштението.

Во него се наведува дека одговорност на косовските лидери е да ги формираат овие институции на власта и да ги спроведат неопходните реформи за да нема блокади во иднина.

„Се надеваме дека косовските лидери, како во политиката, така и во граѓанското општеството, ќе го преземат водството во решавањето на ова прашање, вклучително и давањето на конкретни предлози. Првиот и важен принцип е избраните пратеници во парламентот на Косово да присуствуваат на седниците на парламентот и да овозможат да почне неговата работа“, се наведува во соопштението што го објави амбасадата на САД во Косово.


Биљали: Очекувам брз прием на Македонија во НАТО, а потоа решавање на спорот за името


Скопје, 13 август, 2017 - 12:14 (META) 

Меѓународната заедница ќе инсистира Македонија првин да добие покана за членство во НАТО, без да има промена на името, а потоа да се даде рок за преговори за изнаоѓање решение за спорот со Грција, вели универзитетскиот професор Мерсел Биљали во неделното интервју за македонскиот сервис на „Радио Слободна Европа“.

– Колку што јас имам информации, меѓународната заедница или главните креатори на НАТО ќе инсистираат на некакво соломонско решение, Македонија да добие покана за членство во НАТО без да има промена на името, па потоа да се даде некој рок,  да се даде можност да се преговара. Од прилика така ќе оди и интеграцијата во ЕУ и не мислам дека толку брзо ќе ѝ се даде толку големо значење на неминовна промена на името кое може да има негативни ефекти кај нас – вели Биљали.

Во врска со имплементацијата на Охридскиот рамковен договор, од чие потпишување денеска се одбележуваат 16 години, тој вели дека недостасува срповедување на практичниот дел од договорот, за што дел од вината ја лоцира кај албанскиот субјект.

– Од нормативен аспект многу е имплементирано, меѓутоа во практичниот дел многу работи останаа неимплементирани. За жал тука вината е и кај самиот албански субјект. Наша рак рана е партизацијата на институциите и на општеството како целина. Наместо Рамковниот договор да стане инструмент на една граѓанска рамноправност на луѓе со еднакви можности, стана инструмент на партизирани односи и партиски интереси – вели Биљали.


Коѕиас обвинува дека меѓународната заедница ја разгалила Македонија


Атина, 12 јули, 2017 - 17:05 (META) 

Грчкиот министер за надворешни работи, Никос Коѕиас, во интервју за грчката телевизија „Антена“, ја обвини Македонија за иредентизам, неподготвеност, но и за разгаленост од меѓународната заедница.

– Бев, како што знаете, двапати во Скопје, разговаравме за прашањето, беа неподготвени. Дојдоа во Грција, пак неподготвени. Разгалени се од меѓународниот фактор. Овде си имаме работа со иредентизам кој не треба да го оставиме да се прошири на Балканот, но и генерално, не треба да го дозволиме национализмот во регионот – рече Коѕиас.

Коѕијас најави дека в понеделник во Брисел ќе се сретне со посредникот во спорот за името, Метју Нимиц, кој минатата недела беше во официјална посета на Македонија.

Утре во Солун грчкиот премиер Алексис Ципрас ќе ги пречека српскиот претседател Александар Вучиќ и бугарскиот премиер Бојко Борисов. Ципрас и Вучиќ ќе учествуваат на грчко-српскиот Совет за соработка, по што ќе дадат и заедничка изјава.

По средбата со српскиот претседател, Ципрас попладнето ќе се сретне и со бугарскиот колега, по што е најавена е заедничка средба на лидерите на Грција, Бугарија и на Србија. По средбата, за која засега во грчките медиуми не се наведува за што ќе се разговараа, исто така е најавена заедничка прес-конференција.


СДСМ: Граѓаните и меѓународната заедница го осудуваат неодговорното однесување на Груевски


Скопје, 31 март, 2017 - 9:47 (META) 

Неодговорното однесување на Никола Груевски и на пратениците од ВМРО-ДПМНЕ, кои со денови си зборуваат сами со себе, доби осуда и од демократскиот свет, велат од СДСМ.

„На Груевски, преку резолуцијата усвоена од Европската народна партија, јасно му беше ставено на знаење дека нема толеранција за корумпирани политичари и за корупциски скандали. ЕПП ги осуди и провокациите и агресивното однесување кое претставува закана за мирот и за стабилноста и истовремено повика на воздржаност од етнички провокации. И германскиот Бундестаг упати порака до Груевски и до Иванов дека мора да се почитува парламентарното мнозинство и дека нови избори не се опција“, стои во соопштението на партијата.

Од СДСМ истакнуваат дека меѓународната заедница дава поддршка на огромното мнозинство од 700.000 граѓани кои гласаа за промени и ја очекуваат новата реформска влада.

„Секој ден изгубен во меѓусебни реплики на пратениците од ВМРО-ДПМНЕ е ден без зголемена минимална плата на 12.000 денари, без евтина тарифа на струјата, без укината радиодифузна такса, без укинато екстерно тестирање и без решен статус на стечајните работници. Граѓаните и меѓународната заедница очекуваат веднаш да биде избран претседател на Собранието, за тој да го извести Ѓорге Иванов дека треба да му го даде мандатот на претседателот Зоран Заев и да биде формирана новата реформска влада“, велат од СДСМ.


Зврлевски: Неопходни се законски измени за контрола на прислушувањето


Скопје, 28 март, 2017 - 11:28 (META) 

Нелегалното следење на комуникациите доведе до голема општествена криза во Република Македонија, но ова не е првпат системите за следење на комуникациите да бидат злоупотребени во земјава, изјави републичкиот јавен обвинител Марко Зврлевски, на конференција на тема „Следење на комуникации – законска рамка и искуства, улогата на јавниот обвинител“, која денеска се одржува во Скопје.

– Системите за следење на комуникациите како средство се користат и се злоупотребуваат и од други земји. Токму поради тоа улогата на јавните обвинители треба да стане поизразена, за да се намалат ваквите злоупотреби – рекол Зврлевски, пренесува „Телевизија 24“.

Токму поради овие причини, нагласил Зврлевски, потребни се измени на законското решение со кое се регулира следењето на комуникациите. Според него, иако е предвидено главниот збор да го има јавниот обвинител, тоа е само на хратија, бидејќи системите за следење на комуникацијата и понатаму остануваат единствено во рацете на Министерството за внатрешни работи.

Зврлевски смета дека според законските измени што ги предлага и меѓународната заедница, треба да се воведат силни контролни механизми на употребата на средствата за следење на комуникациите.

На меѓународната конференција присуствуваат јавни обвинители и нивни заменици од Албанија, Косово, Русија, Турција, Бугарија, Словенија, Хрватска и од Босна и Херцеговина.


Георгиевски: Уставниот суд и народот на избори да судат за владата на СДСМ, а не Иванов


Скопје, 9 март, 2017 - 14:44 (META) 

Платформата на албанските партии е негирање и дерогирање на Охридскиот рамковен договор, a приказната дека тој останал отворен и сега се довршуваат отворените прашања е лажна, напиша на „Фејсбук“ поранешниот лидер на ВМРО-ДПМНЕ и актуелен претседател на ВМРО – Народна партија, Љубчо Георгиевски.

„Охридскиот договор е затворен и оверен од меѓународната заедница. За жал, и двете партии наместо да ја одбијат платформата како беспредметна, и двете влегоа во суштинска дебата и така ѝ дадоа легимитет, прво ВМРО-ДПМНЕ, а потоа и СДСМ без задршка“, вели Георгиевски.

Тој истакнува дека претседателот на државата, Ѓорге Иванов, вторпат го погазува Уставот на Македонија, македонската и европската демократска практика и дека мора да го даде мандатот на тие партии што обезбедиле мнозинство.

„Уставот е недвосмислено јасен, тој мора да го даде мандатот на тие партии што обезбедиле мнозинство. Во спротивно, тој ризикува да ја воведе Македонија во меѓународна изолација, да ги запали етничките страсти и да ја суспендира демократијата. Доколку новата влада на СДСМ носи непринципиелни и неуставни закони, постои Уставен суд кој ке ги поништува истите, а народот веќе во мај на локалните избори со историски пораз ќе ги казни“, вели тој.

Георгиевски вели дека ВМРО-ДПМНЕ не смее да ги урне сите мостови кон албанските политички партии и дека не смее да стане непријател на земјите од евроатланската заедница.

– Не смее да си игра со стабилноста и со безбедноста на земјата. По никоја цена не треба да ги одложува локалните избори, бидејќи има шанса за голем триумф како прв чекор кон новото демократско враќање на власт“, заклучува поранешниот лидер на ВМРО-ДПМНЕ.


Спасовски: Со писмото Иванов си бара оправдување пред себе и пред јавноста


Скопје, 7 март, 2017 - 15:45 (META) 

Иванов не може да го спаси Груевски преку кршење на Уставот, а Груевски не може да се спаси од одговорност преку провоцирање насилство и создавање поделби помеѓу граѓаните, изјави денеска на прес-конференција генералниот секретар на СДСМ, Оливер Спасовски.

Тој уште еднаш го повика претседателот на државата, Ѓорге Иванов, да му го даде мандатот на СДСМ за формирање влада.

– Граѓаните се длабоко загрижени. Домашната и меѓународната јавност испратија многу сериозни предупредувања. Груевски и Иванов да не си играат со оган и да не предизвикуваат атмосфера на омраза и конфликт во Македонија – рече Спасовски.

Прашан како СДСМ го коментира денешното писмо на Иванов до Европскиот совет, САД, НАТО и до Турција, Спасовски рече дека нема како поинаку да се коментира, „освен како едно оправдување кое си го бара претседателот пред себе и пред македонската јавност“.

Одговарајќи на новинарско прашање, тој рече и дека СДСМ прави сè да не дозволи да ескалира состојбата, поради тоа што ескалацијата најмногу ќе ѝ одговара на ВМРО-ДПМНЕ и на нејзиното раководство и дека „доделувањето на мандатот за формирање на владата ќе значи прв чекор кон решавање на кризата и кон намалување на тензиите“.


Вучиќ: Јас да дадам изјава како Хашим Тачи, странците би ме обесиле на Теразије


Белград, 3 март, 2017 - 16:13 (META) 

Премиерот на Србија, Александар Вучиќ, денеска ја обвини меѓународната заедница за двојни стандарди бидејќи, како што изјави, не ги третира на ист начин изјавите на водечките политичари од Србија и од другите земји во регионот.

По состанокот со високата претставничка за надворешна и за безбедносна политика на Европската Унија, Вучиќ се осврна на изјавата на претседателот на Косово, Хашим Тачи, кој рече дека Албанците во Македонија треба да ја земат судбината во свои раце и оцени дека слична изјава од страна на Вучиќ не би била толерирана од меѓународната заедница.

Тој потсeти дека во Босна и Херцеговина или во Црна Гора има околу 30 отсто српско население и праша каква би била реакцијата на меѓународната заедница доколку тој изјави дека Србите во овие земји треба да ја земат судбината во свои раце.

– Да кажев јас дека Србите во Босна треба да ја земат судбината во свои раце, ќе ме обесеа на Теразије – рече Вучиќ, додавајќи дека очигледно станува збор за двојни стандарди, на кои ѝ укажал и на Могерини, за време на средбата, на која во најголем дел се разговарало за ситуацијата во регионот.

Вучиќ рече и дека некои политичари од соседните земји „не се однесуваат цивилизирано“ и дека е загрижен бидејќи нема никакви реакции, додавајќи дека во случај тој да даде такви изјави, на Србија ќе ѝ воведат санкции.


По одлуката на Иванов, Беса бара интервенција од меѓународната заедница


Скопје, 1 март, 2017 - 19:37 (META) 

Отако Ѓорге Иванов изјави дека нема да го даде мандатот, ова е вознемирувачки момент за државата, се вели во соопштението на Движењето Беса.

– Всушност, Иванов е најголемиот прекршител на Уставот, и тогаш кога неуставно му го довери мандатот на претседателот на ВМРО-ДПМНЕ и тогаш кога не му го довери мандатот на претседателот на СДСМ. Ова е алармантно, бидејќи тој ја претставува највисоката институција во земјата и во име на таа институција, само што не повика на линчување на Албанците од Македонија, само затоа што Албанците потпишале една заедничка декларација на албанските политичките партии од Македонија – велат од Беса.

Тие ја повикуваат меѓународната заедница, Соединетите Американски Држави и Европската Унија, како што велат, да го имаат предвид овој потенцијален ризик за албанската заедница во Македонија и да интервенираат за враќање на правната држава, како и за враќање на државата на евроатлантскиот пат.

Тие ги повикаа граѓаните да бидат умерени и мирни, и како што велат, Беса ќе биде заштитник на албанските интереси во Македонија.

– Имајќи го предвид тоа што се случува денеска, ова е уште еден аргумент дека спасот на ова земја е само нејзиното редифинирање во согласност со мултиетничката реалност на земјата – додаваат од Беса.