!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Заев: Ќе бараме меѓународна истрага и за Никола Младенов


Скопје, 24 ноември, 2017 - 13:58 (META) 

Граѓаните бараат одговор дали е убиен новинарот Никола Младенов, а ние бараме меѓународна истрага затоа што општеството е премногу исполитизирано и граѓаните немаат доверба во домашните институции, рече премиерот Зоран Заев, на прашањето на пратеникот Африм Гаши од Беса, дали Владата ќе побара меѓународни истраги за одредени случаи.

Заев рече дека за случаите „Смиљковско Езеро“, „Никола Младенов“, „Диво Насеље“ и „Сопот“ суштината е да се обезбеди меѓународна истрага за граѓаните да можат да ја дознаат целата вистина.

– Меѓународна истрага бараме за да има меѓународен претставник, кој ќе гарантира дека фактите што се презентираат во јавноста се навистина такви. Ако во процесот како за „Диво Насеље“ сега направиме меѓународна истрага, тоа ќе го дерогира правосудството и може да значи нарушување на независноста на судството и на процесот на жалбената постапка. Граѓаните не коментираат за високите казни туку затоа што бараат одговори, како, на пример, зошто групата влегла Куманово, дали некој нешто им кажал, дали намерно се случи тоа во сензитивен период. Владата бара меѓународна истрага затоа што од тоа на одредени луѓе им зависи дали ќе останат во Македонија или ќе ја напуштат – додаде Заев.


Се бараат начини за меѓународна истрага за „Диво насеље“, потврди Заев


Скопје, 10 ноември, 2017 - 14:45 (META) 

Владата и претставници на меѓународната заедница бараат начин за спроведување на меѓународна истрага за неразјаснетите околности поврзани со настаните во кумановско Диво Насеље од 9 и 10 мај 2015 година, потврди премиерот Зоран Заев на денешната прес-конференција.

– Чекор кој што досега е направен е информирање на претставници на меѓунардната заедница околу чекорите и варијантите како тоа би се извело. Знаете дека и во владината програма е запишано дека треба да се расветлат сите работи кои што се неразјаснети. Сакаме да нема дилеми и дебати за се она што е неразјаснето, а е од интерес на граѓаните, а овој случај, и тоа како, е од интерес на граѓаните. Верувам дека ќе ги најдеме начините со меѓународната зедница како да се оформи меѓународна истрага – рече Заев.

Судскиот процес за случајот „Диво насеље“ заврши на 2 ноември, годинава, кога Кривичниот суд изрече осудителни пресуди за 34 обвинети за тероризам и терористичка организација, од кои осуммина добија доживотни, а 26 долгогодишни затворски казни – од 12 до 40 години, а четири лица беа ослободни од обвиненијата.

Адвокатите на обвинетите, но и коалициониот партнер во владата – ДУИ, веднаш побараа меѓународна истрага, која треба да ги разјасни дилемите околу организаторите и мотивите за настаните во Куманово, кои и натаму предизвикуваат контроверзи во јавноста поради наводна вмешаност и на официјални претставници на највисоките државни институции во комуникација со учесниците во настанот.


Ахмети: Меѓународна истрага и анкетна комисија во Собрание за случајот „Диво Насеље“


Скопје, 6 ноември, 2017 - 19:14 (META) 

Претседателот на Демократската унија за интеграција, Али Ахмети, на средба со францускиот амбасадор во земјава, Кристијан Тимоние, му кажал дека очекува за случајот „Диво Насеље“ да биде вклучена меѓународна истрага, да биде формирана анкетна комисија во Собранието и да има целосно расветлување на вистината.

Како што се наведува во соопштението на ДУИ, соговорниците разговарале за локалните избори, политичката ситуација, реформските процеси во Македонија, како и за евроатлантската интеграција на земјата.

„Во однос на реформите, Ахмети рече дека ДУИ останува посветена да ги води реформите во Собранието и во Владата, како услов за продолжување на реформскиот процес со истиот интензитет по завршувањето на изборите. Ахмети говореше и за интензивирање на напорите за надминување на споровите со соседите и за отворање на нашиот пат кон Брисел. Периодот пред нас припаѓа на спроведувањето на политиките кои се поддржани од граѓаните“, се вели во партиското соопштение.


ДУИ бара меѓународни експерти и сеопфатна истрага за „Диво Насеље“


Скопје, 2 ноември, 2017 - 16:29 (META) 

ДУИ со соопштение информираше дека останува на ставот за „вклучување на меѓународни експерти во сеопфатната истрага за обелоденување на сите нејаснотии за случајот Куманово“, откако денеска во Основниот суд Скопје 1 беа изречени пресудите за обвинетите триесетина лица во случајот „Диво Насеље“.

„Судскиот процес и доказите на протагонистите изнесоа на површина дилеми околу организаторите и мотивите на овој тежок случај. Затоа граѓаните треба да ја дознаат целата вистина. Дел од доказите и материјалите со кои граѓаните имаа можност да бидат запознаени преку медиумите, алудираат на наводна вмешаност и на официјални претставници на највисоките државни институции во комуникација со протагонистите на настанот“, велат од ДУИ.

Од партијата го повикаа МВР да вклучи меѓународни експерти во истрагата за случајот и да воспостави комуникација и соработка и со властите на Косово и на Албанија за размена на информации заради целосно расветлување на случајот.


Спасовски: Владата ќе побара меѓународна истрага за „Диво Насеље“


Скопје, 20 септември, 2017 - 16:40 (META) 

Владата ќе бара дополнителна – меѓународна истрага за настаните во Диво Насеље од 9 и 10 мај 2015 година, за да се дознае вистината за овој настан, изјави денеска министерот за внатрешни работи, Оливер Спасовски во касарната „Ѓорче Петров“, каде беше извршено примопредавање на донација од Словачка за граничната полиција.

– Во однос на кумановските настани ќе кажам две работи, прва работа е дека тој случај добива некаква судска разврска, меѓутоа ние како Влада презедовме обврска дека ќе направиме дополнителна и тоа меѓународна истрага, се со цел на еден соодветен начин јавноста да ја дознае вистината за овој настан и за она што се случувало во делот на кумановските настани и согласно на таа истрага да имаме една постапка во која што ќе веруваат мнозинството граѓани на Република Македонија – изјави Спасовски.

Инаку, судскиот процес за случајот „Диво Насеље“ е во завршна фаза и наскоро се очекува пресуда за 37-те обвинети за тероризам и терористичка организација.

Во настаните во Куманово загинаа осум припадници на безбедносните сили, а околу 40 беа повредени. Целиот случај го следат многу контроверзи кои сè уште не се разјаснети.