!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

ЗНМ: Менаџментот на МПМ, наместо да ја реши кризата, се пресметува со новинарите


Скопје, 21 април, 2017 - 13:10 (META) 

Здружението на новинарите на Македонија (ЗНМ) денеска изрази загриженост поради опасноста „Медиа принт Македонија“ (МПМ), која поседува четири весници, еден магазин и еден интернет-портал, да оди под стечај.

ОД ЗНМ велат дека намерата на сопствениците и на менаџерите на МПМ не е да ја решат кризата во компанијата, туку полека да ги згаснат весниците преку постојано отпуштање на новинарите, што, како што нагласуваат од Здружението, не претставува само кршење на работничките права на новинарите, туку е и удар врз слободата на медиумите.

„Обидите за преземање на дел од вработените во новата сестринска фирма преку огласи, претставуваат понижување за новинарите и опасност за отпушање на неподобните. Менаџментот нема храброст да признае дека неуспехот на компанијата е негов неуспех. Наместо да ги отстранат причините што ја произведоа кризата, тие брутално се пресметуваат со новинарите“, стои во соопштението на ЗНМ.

Оттаму велат дека драстичното намалување на тиражите на весниците и на приходите од огласи се случило поради „погрешните политики на менаџментот на компанијата, кои преку послушни уредници некритички ги поддржуваа политиките на владејачката партија ВМРО-ДПМНЕ“.

„Тивкото пропаѓање на МПМ е најдобар пример дека партискиот печат во Македонија нема иднина. Само слободното и професионалното новинарство може да создаде самоодржливи медиуми, кои одговорно ќе ја одиграат својата улога во демократијата, да ги информираат граѓаните и да ја контролираат власта“, нагласуваат од ЗНМ.

Здружението се солидаризира со Самостојниот синдикат на новинари и медиумски работници (ССНМ) во неговите барања да се почне дијалог помеѓу синдикатот и менаџментот на МПМ заради наоѓање одржливо решение во интерес на сите.


СЈО истражува во МПМ


Скопје, 17 февруари, 2017 - 11:56 (META) 

Тим на Специјалното јавно обвинителство (СЈО) денеска влегол во „Медиа принт Македонија“ (МПМ) дознава „Призма“. Целта на СЈО била да истражуваат дел од финансиското работење на оваа издавачка куќа, која под своја капа ги има весниците „Дневник“, „Утрински весник“, „Вест“, „Македонски спорт“, магазинот „Теа“ и интернет порталот „Телеграф“.

Сопственик на МПМ остана само поранешниот шеф на макдонската дипломатија и претседател на 66. Генерално собрание на ООН, Срѓан Керим, додека неговите партнери „Интернет груп“ од Србија и македонскиот бизнисмен Јордан Камчев веќе не се дел од сопственичката структура. Денеска, пак, новинарите од трите дневни весници на МПМ почнаа да штрајкуваат поради задоцнети плати.


„Орка Холдинг“ и „Интернет груп инвестмент“: Ги продадовме уделите во „Графички центар“


Скопје, 16 февруари, 2017 - 18:42 (META) 

Компаниите „Орка Холдинг“, и „Интернет груп инвестмент“ доцна попладнево соопштија дека ги продале своите удели во „Графички центар – Скопје“ сопственикот на „Медиа Принт Македонија“ (МПМ).

Во соопштенијата од двете компании се наведува дека одлуката за продажба на уделите била донесена од Управните одбори на фирмите, на 12 декември 2016 година, а биле спроведени од Централниот регистар на Република Македонија на 15 февруари 2017 година.

Уделите двете компании ги продале по „номинална цена“.

Од компаниите велат дека сите обврски што ги иамле кон вработените заклучно со 31 декември 2016 година се подмирени, а во наредните денови „ќе се подмират и обврските кон платите за месец јануари 2017 година“.

МПМ e издавач на дневните весници „Дневник“, „Утрински весник“, „Вест“, „Македонски спорт“, порталот „Телеграф“ и магазинот „Теа модерна“.

Информацијата од двете компании, за продажбата на уделите, доаѓа еден ден пред најавениот штрајк на новинарите и медиумските работници во „Дневник“, „Утрински весник“ и „Вест“, поради неисплатени плати.


ССНМ: Новинарите од „Вест“ се приклучија на штрајкот во МПМ


Скопје, 6 февруари, 2017 - 13:24 (META) 

Новинарите и медиумските работници од редакцијата на дневниот весник „Вест“ донеле одлука да се приклучат на штрајкот што минатата недела го најавија нивните колеги од „Утрински весник“ и од „Дневник“, на издавачот „Медиа принт Македонија“ (МПМ), соопшти денеска Самостојниот синдикат на новинари и медиумски работници (ССНМ).

Новинарите на „Вест“, како што соопшти ССНМ, денеска формирале штрајкувачки одбор и го известиле менаџментот дека заедно со колегите од другите изданија на МПМ почнуваат со прекин на работата на 17 февруари. Нивните барања се исто така итна исплата на платата за декември и исплата на платата за јануари најдоцна до 15 февруари.

Одлуката за штрајк во МПМ денеска добила поддршка и од Меѓународната и од Европската федерација на новинари.

„Ова е целосно неприфатливо. Како можат колегите да си ја вршат работата кога не се платени? Читателите и другите членови на новинарската заедница треба да ја поддржат оваа борба бидејќи се кршат правата на работниците и се загрозува правото на јавноста за пристап до информации. Ние се солидаризираме со нашите колеги“, навеле од двете новинарски организации, информира ССНМ.