Турнати две статуи на народни херои во Маврови Анови


Гостивар, 22 јуни, 2018 - 12:28 (META) 

Засега непознати лица турнале и ничкосале две статуи на народни херои од Втората светска војна во Маврови Анови, соопшти Министерството за внатрешни работи (МВР).

Случајот вчера го пријавил 74-годишен маж во Полициското одделение Маврово. Турнати биле статуите на народните херои Чеде Филипоски и Злате Малакоски.

Полицијата вели дека се врши истрага.


Најмногу снег во Лазарополе и Маврово


Скопје, 10 декември, 2017 - 10:28 (META) 

Врнежите од снег ноќеска во некои делови од земјава оставија снежна постилка утрово, соопшти Управата за хидрометеролошки работи (УХМР).

Висината на снежната покривка изнесуваше 1 сантиметар во Дебар и Скопје – Петровец, 2 во Претор и Крива Паланка, 4 во Крушево и Пожаране, 5 во Маврово и Ѓуриште и 7 сантиметри во Лазарополе.

Изутринава снег со послаб интензитет паѓаше во Пожаране над Полошката котлина.


Три пожари активни во Маврово, повторно гори и кај манастирот Трескавец


Маврово, 28 август, 2017 - 17:01 (META) 

Три шумски пожари се активни во националниот парк „Маврово“.Најголем и со фронт на ширење од над седум километри е пожарот во реонот на Аџина Река на Шар Планина, а пожар има и во близина на караулата „Победа“ и месноста Стрезимир.

Во овој пожар досега се изгореле околу 300 хектари високо планински пасишта и стебла на смрека, ела и молика. Во гаснење на пожарите ангажирани се речиси сите вработени во паркот, но ветрот го отежнува локализирањето.

Вчера, на територијата на паркот беа регистрирани два шумски пожари, во близина на селото Скудриње и Рибница. Овие пожари се локализирани.

Пожар има и во близина на манастирот Трескавец кој е локализиран и манастирот е безбеден за верниците кој го посетуваат за време на празникот. Заради крајно непристапниот терен, но, и заради силината на огнот, синоќа, како и утринава интервенирале и неколку хеликоптери и канадери од АРМ, па пожарите се ставени под контрола.

Надлежните апелираат за максимално внимание, бидејќи, како што посочуваат, се поизвесно е дека пожарите намерно се предизвикуваат.

– Пожарот кај Дабница кој беше намерно запален го ставивме под контрола, но повторно беше запален и зеде огромен замав, па денеска попладне опожари и неколку викендички, овошни и лозови насади во населбата Заград. Во овој момент имаме три активни пожари, во пределот на Трескавец од западната страна, кај Горно село, каде се соочуваме со непристапен терен за гаснење, во Гостиражни, Небрегово и во делот на Сивец. Помош побаравме од ТППЕ – Битола кои ни пристигнаа со неколку пожарникари и возила. Одговорно тврдам дека овие пожари се намерно подметнати, бидејќи се видени лица како палат и бегаат – вели командирот на ТППЕ Прилеп, Станко Колески.


Изгаснат пожарот кај Рибница, но се уште гори кај Аџина Река


Скопје, 27 август, 2017 - 14:48 (META) 

Изгаснат е еден од двата пожара во националниот парк „Маврово“, соопштија од Дирекцијата за заштита и спасување, додавајќи дека другиот пожар се уште е активен.

Вработени во паркот се на терен, но засега нема информации како оди справувањето со вториот пожар.

Од Дирекцијата соопштија дека вчера околу 13 часот бил забележан чад и оган во атарот на Рибница и на две локации во месноста „попова ливада“ и „рибничка скала“. Пожарот зафатил нискостеблеста шума, смреки и папрати, како и букова шума.

Петнаесет вработени во паркот го гаснеле пожарот што зафатил површина од над 200 хектари, а на помош бил повикан и авион од ДСЗ. По неколкучасовната борба, пожарот синоќа бил изгаснат, а дежурни лица ја следат ситуацијата на терен. Во моментов, се уште е активен пожарот во регион на Аџина Река.

Засега не се знае што ги предизвикало пожарите, а властите потсетуваат дека предизвикувањето пожар во национален парк подлежи на кривичен прогон.


Општина Маврово – Ростуше им наплаќа на викендичките за чистење снег


Тетово, 1 март, 2017 - 16:14 (META) 

На сопствениците на викендички од Маврово почна да им се наплаќа и за чистење снег, надоместок кој е дел од сметката на Јавното комунално претпријатие на Општина Маврово – Ростуше. Покрај вообичаените пресметки за вода и за ѓубре, додадена е нова – за чистење снег, во износ од 600 денари. Сопствениците сметаат дека чистењето на снегот е обврска на локалните власти.

– Непријатно се изненадивме кога ги добивме сметките. Моето семејство со децении има викендичка во Маврово и досега немало вакво нешто – се пожалија сопственици на викендички.

Од Општина Маврово – Ростуше велат дека одлуката да се наплаќа за чистење снег, била изгласана на седница на совет.

– Некои реагираат, не сакаат да плаќаат, но секогаш има такви примери. Ни се случува да се бунат и за сметките за отпад – изјави директорот на комуналното претпријатие „Маврово“, Васе Ѓорѓиевски.

Со наплатата за отстранување на снегот на сметката на комуналното претпријатие месечно ќе легнат 630.000 денари. Овие дополнителни издатоци граѓаните ќе треба да ги плаќаат само во зимските месеци.


Еколошка катастрофа: Пластични шишиња и отпад го покрија Дебарско Езеро


Дебар, 16 ноември, 2016 - 17:18 (META) 

На Дебарско Езеро му се заканува еколошка катастрофа. Целата површина е покриена со пластични шишиња и отпад, барем според она што може да се види од фотографиите што ги испрати активистот за заштита на животната средина, Гоце Љубиноски.

– Фотографијата од загаденоста на Дебарско Езеро е направена денеска. Утре ќе имаме состанок во нашето друштво, а во наредните денови за ова ќе реагираме до надлежните институции – вели Љубиноски.

Тој е активист во невладината организација за заштита на животната средина „Центар за одржлив развој на заедницата – Дебар“, која досега спрoвела неколку акции против изградба на хидроенергетски проекти во националниот парк „Маврово“.


Градежен работник загина во Маврово


Дебар, 13 август, 2016 - 14:13 (META) 

Градежен работник загина вчера во Маврово откако паднал од петиот кат од зградата на која работел.

Полицијата соопшти дека вчера околу 10.40 часот во Маврово, при работа на изградба на нов објект односно поставување на плоча, од петтиот кат паднал Џ.Ш. (47) од село Добри Дол-Гостиварско, вработен во АДГ„Пелагонија“, при што починал на самото место.

Увид извршила екипа од Полициската станица – Гостивар.

По наредба на јавен обвинител телото на починатиот е дадено за обдукција.


Украден пиштол, ловечки нож и евра во куќа во село Трница


Скопје, 26 март, 2016 - 14:41 (META) 

Шеесет и тригодишниот А.П. од мавровското село Трница вчера околу 19,15 часот во полиција пријавил дека ограбен му е домот.

Непознато лице користејќи ја балконската врата упаднал во неговата куќа, при што одзел пиштол „застава ЦЗ-99“ со полна рамка, еден ловечки нож и 1.700 евра.

Краадецот заминал во непознат правец, а полицијата презема мерки за за пронаоѓање на сторителот и целосно расчистување на случајот.

 


Забранет сообраќај за товарни возила на Стража и на Маврово


Скопје, 3 јануари, 2016 - 18:23 (META) 

Поради интензивните врнежи од снег, превентивно е воведена забрана за сообраќај на тешки товарни возила на планинскиот премин Стража и на Маврово, соопштуваат од АМСМ.

Сообраќајот на другите патишта во земјава се одвива непречено, по влажни коловози и со остатоци од снег на коловозот на повисоките планински места.

Вржени од снег, со слаб интензитет се регистрирани во Тетово, Попова Шапка, Делчево, Смојмирово, Ресен, Железнец, Струмица, Павлешенци, Македонски Брод, Ѓавато, Буково, Плетвар, Пресека, Маврово, додека поинтензивно паѓа во Кичево, Гостивар, Крушево, Прилеп, Стража.

Од АМСМ препорачуваат внимателно возење, прилагодена брзина на движење и почитување на поставената сообраќајна сигнализација. Особено внимание е потребно на делниците што минуваат низ клисурите и засеците, односно на патните правци Катланово – Велес, Маврово – Дебар – Струга, Гостивар – крак Маврово, Демир Капија – Удово, Кочани – Делчево и Виница – Берово, каде е можна почеста појава на одрони.


Во Маврово наврна најмногу снег 12 сантиметри


Гостивар, 27 ноември, 2015 - 17:57 (META) 

Најмногу врнежи од снег денеска до 13 часот и 30 минути има во Маврово, 12 сантиметри, потоа во Пожаране 10, Лазарополе 7 и Крушево 1 сантиметар, се вели во соопштението на УХМР.

До крајот на денот, во Македонија ќе се задржи облачно време со врнежи од дожд, а во западните делови на планините со врнежи од снег и натамошен пораст на снежната покривка.

Во ноќните часови, врнежите ќе слабеат по интензитет и утре претпладне повремени слаби врнежи ќе има само во западните делови.