МВР: Полицајката сама се удрила од пајакот, Асани само вербално ја нападнал


Скопје, 2 март, 2018 - 12:19 (META) 

Полицајката Јасмина Јаначковска која вчера имаше инцидент со функционерот на ДУИ и поранешен претседател на огранокот во Чаир, денеска била примена од министерот за внатрешни работи Оливер Спасовски, извести МВР.

Притоа, според соопштението, таа пред министерот кажала дека не била удрена од Асани, кого долго време медиумите го посочуваат како учесник во некои физички инциденти, туку дека самата се удрил од пајакот.

МВР вчера извести дека „со Б.А. е извршен разговор во полициската станица Бит Пазар и изготвен записник за констатиран прекршок по чл. 13 од Законот за прекршоците против јавниот ред и мир“.

Според денешното соопштение, Спасовски се сретнал со полициската службеничка Јасмина Јаначковска, за лично да се информира за вчерашниот настан, а полицајката рекла дека била вербално нападната од сопственикот на возилото Б.А.

„Пристапи едно непознато лице за кое подоцна разбрав дека станува збор за Б.А., и почна да вика. Веднаш повикав засилување и дојдоа поголем број полициски службеници“, рекла Јаначковска, пренесува МВР.

На прашањето од министерот  дали имало било каков физички контакт и зошто полициската службеничка побарала медицинска помош, Јаначковска објаснила дека со Б.А. „имала само вербална расправија, меѓутоа  при повлекување од местото на настанот таа се удрила со левата рака во специјалното возило „пајак“, но не се здобила со посериозна повреда, што било констатирано и при лекарскиот преглед во ГОБ Св. Наум Охридски“, тврди МВР.

Спасовски порачува дека ги охрабрува сите полициските службеници да постапуваат неселективно и професионално, согласно нивните  законските овластувања.

– Полициските службеници кои постапуваат професионално, од мене како министер и од целото раководство на МВР, ќе имаат целосна поддршка. Сите мора да бидат еднакви пред законот. Заврши времето кога некои беа поеднакви од другите – вели Спасовски.


ВМРО-ДПМНЕ повторно ќе блокира улици и ќе протестира


Скопје, 7 декември, 2017 - 10:02 (META) 

ВМРО-ДПМНЕ денеска во 18 часот повторно ќе протестира пред Основен суд Скопје 1, а од 15 до 17 часот ќе ги блокира крстосниците кај ТЦ „Мавровка“, кај Рампа во Кисела Вода и крстосницата помеѓу улиците Васил Чакаларов и Ангел Динев во Влае.

„Република Македонија сега е единствена земја каде што се притвораат пратеници и невини граѓани во судски монтирани случаи. Секој граѓанин на Република Македонија кој ќе каже не и ќе се спротистави на оваа власт завршува во затвор“, порачува партијата.


Тепачка за паркинг-место пред „Мавровка“


Скопје, 4 октомври, 2015 - 15:08 (META) 

На булеварот Филип Втори Македонски, вчера, во 15 часот, пред влезот на подземната паркинг-гаража во Трговскиот центар „Мавровка“, Е.Р. (27) од село Студеничани, го паркирал возилото марка „голф“ на тротоарот, по што настанала тепачка со С.Ш.(36) од Скопје, вработен во фирмата „Франк“, која стопанисува со подземната гаража.

Во тепачката дошло до кршење на задното ветробранско стакло на автомобилот. Потоа Е.Р. со шипка го удрил С.Ш. во пределот на главата, кој паднал на асфалтната површина, а Е.Р. го напуштил местото оддалечувајќи се во непознат правец и оставајќи го возилото.

Со возило на Итната медицинска помош, С.Ш. е пренесен во болницата „Св. Наум Охритски“, каде му е констатирана фрактура на черепот со крварење од увото.

Увид на местото на настанот извршила екипа од СВР Скопје.


Четворица млади нападнати и избодени во трговскиот центар „Мавровка“


Скопје, 27 јануари, 2015 - 11:46 (META) 

Четири лица од Арачиново и од Скопје, на возраст од 18 до 23 години, вчеравечер во трговскиот центар „Мавровка“ биле нападнати од три непознати лица, кои со остар предмет им нанеле убодни рани, соопштуваат од полицијата.

Повредените биле пренесени во градската хируршка клиника „Свети Наум Охридски“, каде кај едно од лицата, Б.М. (23), лекарите констатирале тешка телесна повреда, додека останатите имале телесни повреди.

Полицијата презема мерки за расчистување на случајот и за откривање на напаѓачите.


Приведено 14-годишното момче што прободе девојка кај „Мавровка“


Скопје, 12 ноември, 2014 - 10:04 (META) 

Четиринаесетгодишно момче е приведено под сомневање дека со нож нападна 16-годишна девојка пред трговскиот центар „Мавровка“.

Од МВР велат дека девојчето и 14-годишното момче прво почнале да се караат, по што тоа со нож ѝ нанел две убодни рани во пределот на левата натколеница.

На малолетното девојче му е пружена лекарска помош во Градска општа болница.


Малолетна девојка прободена со нож кај „Мавровка“


Скопје, 11 ноември, 2014 - 20:32 (META) 

Попладнево, пред трговскиот центар „Мавровка“, со нож е прободенa 14-годишнa девојка. Според неофицијални информации, девојката двапати била прободена во левата нога. Таа е префрлена на една од скопските клиники и е надвор од животна опасност. Од полицијата го потврдија случајот, но сè уште нема официјални информации за напаѓачот.


Застреланиот полицаец пуштен на домашно лекување


Скопје, 8 ноември, 2014 - 10:14 (META) 

Полицаецот што синоќа беше застрелан во близина на трговскиот центар „Мавровка“ во Скопје и притоа доби повреда на левото рамо, е пуштен на домашно лекување.

Според неофицијални информации, настанот се случил кога полицаецот, кој бил без униформа и не бил на работно место, тргнал кон Старата скопска чаршија.

На улицата Стив Наумов, тој бил нападнат од две непознати лица, при што едното истрелало куршум кон него и тој бил погоден во левото рамо.

МВР работи на расветлување на случајот.


Полицаец застрелан кај „Мавровка“


Скопје, 8 ноември, 2014 - 8:22 (META) 

Во престрелка кај трговскиот центар „Мавровка“ доцна синоќа, еден полицаец е повреден.

Според неофицијалните информации, во полицаецот стрелале две лица кои се дале во бегство.

Полицаецот од Бит Пазар бил префрлен во болница и не се даваат информации колку се сериозни повредите.

Полицијата најавува повеќе детали за денеска.