Саем на книга во Народен театар „Јордан Хаџи-Константинов Џинот“ во Велес


Велес, 16 април, 2015 - 15:44 (META) 

„Неделата на книга“ и официјално почна во Велес. Во организација на „Клуб Матица“, Народниот театар, а поддржана од Општина Велес, оваа манифестација ветува многу возбудливи наслови. Велешани ќе имаат можност од 16 до 18 април да си ги купат омилените книги, а со тоа да помогнат да се соберат средства со кои ќе се купат книги и ќе се донираат во Библиотеката „Гоце Делчев“ во Велес.

– Сметам дека овој настан е од големо значење за велешани, пишаниот збор и за достапноста на книгите. Овие три дена, од 16 до 18 април во Велес ќе може секој да си ги купи омилените наслови, а со тоа да придонесе за богата полица со книги дома и во Библиотеката во Велес. Благодарност до градоначалникот на Општина Велес, Славчо Чадиев, како и на домаќинот, директорот на Народниот театар, Јордан Витанов – изјави Дејан Павлески, директор на „Матица“.


„Книга во секој дом“: Претставување на поетскиот опус на Славе Ѓорѓо Димовски


Скопје, 4 февруари, 2015 - 10:48 (META) 

На современиот македонски автор Славе Ѓорѓо Димовски, в петок, 6 февруари, со почеток во 19 часот, во книжарницата „Матица“ ќе му биде промовирано најновото дело „Ткаења“, во рамките на проектот „Книга во секој дом“.

За поетскиот опус на Димоски, со кој се одбележуваат два јубилеи, 55 години од раѓањето на авторот и 35 години од објавувањето на првата поетска книга, ќе говори Веле Смилевски, претседател на Друштвото на писателите на Македонија.

Оваа недела, исто така, ќе бидат претставени нови дела на Панде Манојлов, Јован Дамјановски, Коле Манев и на Трајче Кацаров.


„Традиција 2000-2015“ е слоганот на 15. саем на Булеварот на книгите


Скопје, 20 јануари, 2015 - 11:01 (META) 

„Традиција 2000-2015“ е слоганот под кој ќе се оддржи традиционалниот, 15. саем на Булеварот на книгите.

– Книга во секој дом на Булеварот на книгите, овојпат посветена на македонските автори. Нашата идеја е едноставна – секојдневно дружење со македонски автори, денови во кои нивните дела ќе имаат промотивни цени. Ова е воедно продолжување на афирмирањето на идејата за празнување Ден на македонската книга. Празник кој, со вклучувањето на сите релевантни институции од областа на културата, од приватниот и од општествениот сектор, ќе ја промовира културата на читање, со разни теми од сите области на општественото живеење. Токму затоа, би ги поканил сите љубители на книгата да го посетат саемот бидејќи книгите се големи сами по себе, но се уште повеличествени кога се во рацете на читателите – изјави Дејан Павлески од „Клуб Матица“.


Изложба на академскиот сликар Димитар Малиданов


Скопје, 1 декември, 2014 - 10:15 (META) 

Во Мултимедијалниот центар „Матица ексклузив“, на 2 декември (вторник), во 12 часот, ќе биде отворена изложбата на академскиот сликар Димитар Малиданов. Познатиот уметник ќе се претстави со 35 дела, создавани во последниве неколку години. За оваа пригода, книгоиздателството „Матица македонска“, подготви каталог за творештвото на Малиданов. Изложбата ќе ја отвори академикот Луан Старова.

Димитар Малиданов досега има реализирано 30 самостојни изложби, а учествувал и на повеќе од 200 групни изложби. За својата уметничка и педагошка работа, добитник е на национални и на меѓународни признанија.
Со оваа изложба, „Матица македонска“ ја продолжува востановената традиција да ги афирмира високите вредности на македонските сликари и уметници.


В сабота „Булевар на книгите“ до полноќ


Скопје, 27 ноември, 2014 - 12:55 (META) 

Налик на светските метрополи, Клуб „Матица“ го продолжува трендот кој низ светот е посветен на промоција на читањето и на дружењето со книгите.

В сабота, „Булеварот на книгите“, ќе биде „буден до полноќ“. „Матица“ препорачува забава со книгите, како извор на љубов и на инспирација.

Овојпат, манифестацијата ќе ја промовира иницијатива на клубот за празнување на ден на македонската книга, кој би се одбележувал на 23 мај, еден ден пред Денот на македонската писменост. Инцијативата произлезе од проектот „Читај повеќе“, а ги вклучи сите еминентни македонски писатели, актери, музичари, кои на различни локации низ Скопје и низ Македонија, со јавно читање поезија и проза, ги славеа зборот, словото и книгата.
Акцијата „Будни до полноќ“, ќе биде реализирана в сабота, кога Клуб „Матица“ на булеварот Климент Охридски ќе биде отворен за љубителите на книгите до полноќ. Со големи попусти и со подароци, продолжува имплементацијата на светскиот тренд за 24-часовна достапност на книгите за граѓаните на Скопје.


„Дискурси на визуелното“ од Иван Џепароски во Матица македонска


Скопје, 18 ноември, 2014 - 9:46 (META) 

Монографијата „Дискурси на визуелното“ на нашиот еминентен филозоф и естетичар, проф. д-р Иван Џепароски, раководител на Институтот за филозофија на Филозофскиот факултет во Скопје, која деновиве ја објави „Матица македонска“, е прва македонска книга во целина посветена на прашањата на визуелното и на визуелните уметности од гледна точка на филозофијата и на естетиката.

Со повеќе од 110 црно-бели репродукции и преку 60 колор репредукции во оваа книга, во првиот нејзин носечки дел, се анализираат теориските прашањата поврзани со односите помеѓу убавината и визуелната убавина, уметноста и визуелните уметности, но и со прашањата за калокагатија (добрината и убавината), естетското задоволство и естетското искуство, како и прашањата поврзани за вкусот и за визуелното.

Во вториот дел од книгата, практично се спроведуваат неколку херменевтичко-иконолошки анализи на клучни дела од областа на европската ликовна историја (Питер Бројгел Постариот, Винсент ван Гог, Марк Шагал), а третото поглавје, исто така, е посветено на соодветни анализи во контекст на македонската ликовна сцена (Томо Владимирски, Свето Манев, Газанфер Бајрам, Рубенс Корубин и Мирчо Матевски-Рисимкин).

Иако живееме во доба на доминација на визуелната уметност и на визуелната култура, чиишто сведоци на светско-историски план сме сите ние, т.н. „сликовен пресврт“ (pictorial turn) со оваа книга добива своја и теориска и практична обработка. Книгата е напишана со голема ерудиција и со познавање на проблематиката, но и покрај тоа не е книга само за упатените, туку и за сите оние љубители на уметноста за кои уметноста и визуелните уметности се не само инспирација, туку и тајна која бара да биде постојано преоткривана.


Промоција на книгата „Збор за зборот“ од Златко Жоглев, Данилеа Трајковска и од Гордана Стојаноска


Скопје, 5 ноември, 2014 - 10:45 (META) 

Во мултимедијалниот културен центар „Матица екслузив“ од Скопје, на 6 ноември (четврток) 2014 година, ќе се одржи промоција на поетската книга „Збор за зборот“ од Златко Жоглев, Данилеа Трајковска и од Гордана Стојаноска. Во заедничкото дело на тројцата автори, застапени се 60 песни, во кои се говори за мноштво социјални, родољубиви и љубовни теми. Книгата ќе ја промовираат писателите Панде Манојлов и Паскал Гилевски.