!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Со победата на парламентарните избори во Франција, засилен подемот на Макрон


Париз, 19 јуни, 2017 - 12:17 (META) 

Политичкиот подем на младиот француски претседател Емануел Макрон дополнително се засилува по победата на неговата центристичка коалиција на парламентарните избори во Франција, чиј втор круг се одржа вчера.

Со 350 пратенички места од вкупно 577, коалицијата формирана од партијата на Емануел Макрон, Републиката напред (РЕМ), инаку формирана пред отприлика една година, и Демократското движење (Модем) освоија 60,7 отсто пратеници во парламентот.

Во вчерашниот втор круг, 49,1 отсто од гласовите беа дадени за оваа коалиција, чиј триумф зададе горчлив вкус за Социјалистичката партија, која сега има само 29 пратенички места. На изборите во 2012 г., набргу откако нејзиниот кандидат Франсоа Оланд победи на претседателските избори, Социјалистичката партија освои десетпати повеќе – 280 места. Падот, според аналитичарите, се должи на низата непопуларни мерки на Оланд во текот на мандатот, како и поради некои проблеми што го следеа него како личност.

Националниот фронт на ултранационалистката Марин ле Пен, освои само осум пратеници, од кои една е таа, со што оваа партија е деветтата по големина во Националното собрание на Франција.

Коалицијата на Макрон освои пратеници во речиси сите изборни единици во Франција, но најубедлива е победата во Западна Франција, каде припаѓаат градовите Париз, Нант и Тулуз. Покрај тоа, Макрон добро помина и кај гласачите кои живеат во странство, освојувајќи девет од вкупно 11 пратенички места резервирани за дијаспората.

Со излезност од 42 отсто, вчерашниот втор круг на парламентарните избори во Франција постигна негативен рекорд, што можеби е и одраз на заморот на гласачите по седуммесечната изборна кампања.


Инаугурацијата на Макрон ќе се одржи в недела


Париз, 8 мај, 2017 - 14:30 (META) 

Францускиот претседател во заминување, Франсоа Оланд, денеска изјави дека инаугурацијата на неговиот наследник, Емануел Макрон, ќе се одржи в недела на 14 мај. Како што се наведува, церемонијата ќе биде одржана во Елисејската палата.

На изборите за претседател на Франција, проевропски ориентираниот Емануел Макрон освои 66,10 отсто од гласовите, а кандидатката на екстремната десница, Марин ле Пен, освои 33,90 отсто од гласовите. Овие конечни резултати денеска ги соопшти француското министерство за внатрешни работи.

Конечниот број на луѓе кои не излегоа на гласање е 25,44 отсто од впишаните во избирачкиот список, што е рекорд за француските избори.


Еврото на шестмесечен максимум по победата на Макрон


Токио, 8 мај, 2017 - 12:12 (META) 

По победата на Емануел Макрон на претседателските избори во Франција, утринава еврото ја достигна највисоката вредност во последните шест месеци во однос на доларот и на јенот, јавија светските медиуми.

Причината е што инвеститорите се убедени дека ваквиот резултат, односно победата на Макрон над ултранационалистката Марин ле Пен, претседателка на крајно десничарската партија Национален фронт, ќе предизвика свеж дотек на пари во еврозоната.

Доларот во однос на еврото падна на 1,202, кога берзите во Азија реагираа оптимистички, но набргу се искачи на 1,099 кога почнаа со работа и европските берзи. Индексите на европските берзи исто така почнаа да се зголемуваат, а FTSE 100 во Лондон се искачи на самото отворање за 0,5 отсто.

На азиските берзи, исто така, едно евро се продаваше за 124,59 јени, во споредба со 124,05 јени на крајот од минатата недела и го достигна својот највисок курс кон јапонската валута по повеќе од една година.


Емануел Макрон победи на претседателските избори во Франција


Париз, 7 мај, 2017 - 21:24 (META) 

Проевропски ориентираниот претседателски кандидат, Емануел Макрон, победи на изборите во Франција.

По неговиот избор за претседател, тој изјави дека неговата победа претставува „надеж“ и „ново поглавје“ за Франција.

Макрон освои помеѓу 65,5 и 66,1 отсто од гласовите во вториот круг на гласање, додека неговата противничка, лидерката на ултрадесницата, Марин ле Пен, освоила помеѓу 33,9 и 34,5 отсто од гласовите.

Приврзаниците на Макрон почнале да се собираат околу музејот Лувр во Париз, каде што планирале да ја прослават неговата победа, јавуваат француските медиуми.


Денеска се одржува вториот круг од претседателските избори во Франција


Париз, 7 мај, 2017 - 12:52 (META) 

Во Франција утринава, во осум часот, беа отворени избирачките места на кои 47 милиони Французи во вториот круг од претседателските избори ќе одлучуваат за новиот шеф на државата.

До 12 часот, излезноста на гласачите е 28,23 отсто. Своето право на глас го остварија и претседателските кандидати, лидерката на ултрадесницата, Марин ле Пен, и проевропски ориентираниот претседателски кандидат, Емануел Макрон.

Францускиот претседател во заминување, Франсоа Оланд, исто така гласаше и ги повика гласачите да го поддржат Макрон.

Аналитичарите оценуваат дека овие избори во Франција може да бидат одлучувачки за иднината на Европа.

Првите официјални резултати се очекуваат по затворањето на избирачките места, во 20 часот.


Макрон жртва на хaкерски напад, голем број податоци за кампањата излегоа во јавноста


Париз, 6 мај, 2017 - 12:34 (META) 

Изборниот штаб на независниот кандидат на претседателските избори во Франција, Емануел Макрон, соопшти дека тој е жртва на голема и координирана хакерска операција. Имено, голем број на меилови од кампањата биле објавени на интернет на еден ден пред одржувањето на вториот круг на претседателските избори.

Странските медиуми јавуваат дека околу девет гигабајти податоци биле објавени на веб-страницата „Пејтсбин“, која овозможува споделување на документите кои анонимно се објавени.

Изборниот штаб на Макрон исто така соопшти дека пред неколку недели биле украдени автентични документи кои притоа биле измешани со лажни документи за да предизвикаат сомнеж и дезинформации.

Портпаролот на министерството за внатрешни работи на Франција изјави дека нема да го коментира наводното хакирање на меиловите на Макрон, бидејќи кампањата е завршена.

Вториот круг на претседателските избори во Франција ќе се одржи утре (7 мај), а во трка се лидерката на ултрадесницата, Марин ле Пен, и проевропски ориентираниот претседателски кандидат, Емануел Макрон.


Ле Пен ја гаѓаа со јајца и доби студен туш од анкетите


Париз, 5 мај, 2017 - 11:26 (META) 

Во завршницата на предизборната кампања, ултранационалистичката кандидатка за претседател на Франција, Марин ле Пен, вчера ја гаѓаа со јајца при средба со граѓани во Бретања. Во меѓувреме, таа доби и студен туш од најновите анкети, кои покажуваат дека нејзиниот противкандидат, Емануел Макрон, убедливо води пред неа.

Француската кандидатка за претседател, Марин ле Пен, при посета на Дол де Бретањ беше пречекана со негодување и ја гаѓаа со јајца. Инцидентот беше снимен од еден од присутните, а обезбедувањето ја заштити Ле Пен и набргу ја внесе во еден објект. Со јајца беа погодени некои од нејзините придружници и обезбедувањето.

Анкетите покажуваат дека Макрон би требало да победи во вториот круг од претседателските избори в недела, со околу 60 отсто од гласовите, додека Ле Пен би добила околу 40 отсто.

Макрон и Ле Пен денеска, на последниот ден од кампањата што завршува ноќеска на полноќ, ќе даваат интервјуа.


Макрон поубедлив од Ле Пен во дебатата, покажуваат анкетите


Париз, 4 мај, 2017 - 11:12 (META) 

Кандидатот за претседател на Франција, независниот кандидат на центарот, Емануел Макрон, бил поубедлив од Марин ле Пен за време на клучната телевизиска дебата, покажуваат резултатите од истражувањето на јавното мислење.

Околу 63 отсто од лицата што учествувале во анкетата за телевизијата БФМ сметаат дека проевропскиот поранешен министер за економија бил поуверлив за време на дебатата од лидерката на Националниот фронт.

Две третини од лицата што гласале за кандидатот на радикалната левица Жан-Лик Меланшон во првиот круг на изборите, одржан на 23 април, сметаат дека Макрон бил поуверлив од Ле Пен, како и 58 отсто од тие што во првиот круг го поддржале конзервативецот Франсоа Фијон.

Двајцата кандидати што освоија најмногу гласови во првиот круг на изборите одржани на 23 април, синоќа за време на жестоката телевизиската дебата изнесоа меѓусебни обвинувања.

Макрон ја обвини Ле Пен дека лаже и предупреди дека таа ќе ја однесе Франција во граѓанска војна и дека ќе им даде на исламските екстремисти тоа што го сакаат со тоа што би ги прекршила правата на муслиманските граѓани.

Од друга страна, Ле Пен го обвини Макрон дека е благ спрема исламскиот екстремизам и го нарече кандидат на елитата.


Ле Пен ги сака гласовите на екстремните левичари


Париз, 29 април, 2017 - 15:45 (META) 

Кандидатката за претседател на Франција, Марин ле Пен, ги повика гласачите кои во првиот круг гласаа за кандидатот на левицата, Жан-Лик Меланшон, да ја поддржат во вториот круг на изборите.

Ле Пен објави видео на „Твитер“ во кое ги повика приврзаниците на Меланшон да го бојкотираат нејзиниот противкандидат, Емануел Макрон, поранешен банкар и министер, за кој рече дека е претставник на сегашната состојба и на „арогантниот финансиски сектор“.

Ле Пен и Меланшон заедно освоија околу 40 отсто од гласовите во првиот круг на изборите откако двајцата водеа популистичка кампања.

Марин ле Пен освои 21,3 отсто од гласовите, а Меланшон 19,6 отсто.

Меланшон сè уште не им порача на своите приврзаници како да се определат во вториот круг на претседателските избори, кој ќе се одржи на 7 мај.


Оланд: Ќе гласам за Макрон, Ле Пен е опасност за Франција


Париз, 24 април, 2017 - 19:56 (META) 

Францускиот претседател, Франсоа Оланд, го поддржа проевропски ориентираниот претседателски кандидат на центарот, Емануел Макрон.

Тој предупреди дека евентуалната победа на Марин ле Пен во вториот круг на изборите закажани на 7 мај, би значела „опасност по Франција“.

Оланд истакна дека Франција ризикува да „стане изолирана и да се отцепи од Европската Унија“ во случај антиевропскаи настроената Ле Пен да биде избрана.

– Што се однесува до мене, јас ќе гласам за Емануел Макрон – изјави Оланд.

Тој синоќа му честиташе на независниот кандидат за претседател на Франција откако првите резултати на вчерашниот прв круг на гласање покажаа дека Макрон ќе оди во вториот круг.

Кабинетот на Оланд соопшти дека тој телефонски го повикал Маркон за да му честита што влегува во одлучувачкиот круг.