Захарова: Заев без никакви докази шири антируска хистерија додека Западот се меша во Македонија


Москва, 19 јули, 2018 - 11:02 (META) 

Марија Захарова, портпаролка на руското Министерство за надворешни работи на брифингот со новинарите вчеравечер во Москва порача дека обвинувањата од македонскиот премиер Зоран Заев, кои тој ги искажа во интервју за „БазФид њуз“, а потоа и на почетокот на изградбата на фабриката на американската фабрика „Дура“, обвини дека „грчки бизнисмени” кои „се сочувствителни на руската кауза“ им платиле на Македонци суми во износ од 13.000 до 21.000 долари за „извршување акти на насилство”, се неосновани, антируски и обид на Заев да води внатрешно-политичка борба со други алатки, во време кога Западот отворено се меша во внатрешните работи на Македонија.

– Предизвикуваат вчудовидување изјавите на македонскиот премиер Зоран Заев дека некои бизнисмени што се симпатизери на Русија наводно го финансираат антивладиното протестно движење во Македонија против Преспанската спогодба постигната со Грција за преименување во „Република Северна Македонија“. Станува збор за уште едни неосновани обвинувања на адреса на Москва, коишто се во правецот на засилување на антируската хистерија. Очигледно дека нема да видиме никакви докази што би можеле да ги потврдат зборовите на Зоран Заев, оти да беше така, веќе ќе ни беа презентирани. Во меѓувреме, западните земји отворено се мешаат во внатрешните работи на Македонија и, како што гледаме, тоа од нивна гледна точка, е нормално – рече Захарова.

Според портпаролката на руското МНР, играјќи со „антируска карта“ Заев ги заплашува сопствените граѓани, во време кога Русија се залага единствено за взаемно прифатливо решение на спорот за името на Македонија со Грција, но без наметнати рокови.

– Наместо да ги почитува нормите на македонското законодавство и меѓународното право, владејачката коалиција во Скопје рутински игра со „антируската карта“ како метода за внатрешно политичка борба и, за жал, заплашување на сопствените граѓани. Руската Федерација секогаш беше определена за постигнување на взаемно прифатлива спогодба на Скопје и Атина за име на земјата без надворешни притисоци и наметнати вештачки рокови, спогодба што би ја рефлектирало волјата на народите на двете држави и би се темелела на широк општествен консензус и неоспорна уставна и правна основа. Но до тоа не дојде – порача Марија Захарова.

Според неа, со спогодбата на двете влади се создадени поделби во двете општества и таа не ги зацврстува мирот и безбедноста на Балканот, туку е само пат за втурнување на Македонија во НАТО.

Преспанската спогодба доведе до длабоки расцепи во општествата во Грција и во Република Македонија. Очигледно е дека таа спогодба е далеку од темелните интереси за зацврстување на мирот и безбедноста на Балканот и служи исклучително како алатка за побрзо внесување на Република Македонија во НАТО – порача портпаролката на Министерството за надворешни работи на Руската Федерација.


Москва: Договорот за името, наместо консензус, предизвика дополнителен раскол


Москва, 18 јули, 2018 - 16:22 (META) 

Решение за името треба да се потпира на широк општествен консензус и беспрекорна уставна основа. Преспанската спогодба не е таков случај. Таа само предизвика дополнителен раскол и во Грција и во Република Македонија, изјави Марија Захарова, портпаролката на руското министерство за надворешни работи на денешниот брифинг за новинари, сподели Руската амбасада во Скопје на својот „Твитер“ профил.

– Збунети сме од изјавата на македонскиот премиер Зоран Заев дека некои бизнисмени кои сочувствуваат со Русија наводно го финансираат анти-владиното протестичко движење во Македонија во врска со Договорот постигнат со Грција. Целта на паушалните обвинувања на сметка на Москва имаат за цел создавање на антируска хистерија. Никакви докази нема, ниту ќе има што би можеле да ги потврдат зборовите на Зоран Заев – рече Захарова.


Москва: Македонија на сила се турка во НАТО


Москва, 13 јули, 2018 - 16:34 (META) 

Откако вчера Македонија и официјално доби покана за преговори за членство во НАТО, Москва оценува дека Македонија насила се турка во НАТО.

-Внесувањето на Македонија во НАТО со присила, само потврдува дека политиката на „отворени врати“ стана цел сама за себе и алатка да се стекне контрола врз геополитичка територија – вели портпаролката на руското министество за надворешни, Марија Захарова.

Премиерот Заев денеска само кратко одговори дека не ја слушнал информацијата и дека Македонија повеќе од две децении се обидува да стане земја членка на НАТО.

Македонија беше и дел од прашање до американскиот претседател Трамп на самитот на Алијансата каде го прашаа дали очекува зголемување на руското влијание врз дестабилизација на Балканот по поканата за Македонија, на што претседателот на САД не даде никаков одговор.


Руско МНР: Балканските држави не треба да се тераат да брзаат кон ЕУ


Москва, 15 февруари, 2018 - 17:02 (META) 

Принципиелен став на Русија е дека најкомлицираните проблеми во регионот мора да ги решат самите балкански држави независно, без да се тераат да брзаат и да се ограничуваат само на формалните критеруми, или со други зборови – без никакво надворешно мешање.

„Ова се однесува на прашањата за границите, темата со именувањето на Македонија, и особено ситуацијата со Косово“, изјави портпаролката на Министерството за надворешни работи на Русија, Марија Захарова на денешната редовна прес-конференција, зборувајќи за Стратегијата на ЕК за Западен Балкан.

Захарова истакна дека Стартегијата на ЕК за Западен Балкан ја потврдува геополитичката цел на Унијата за понатамошно проширување и зајакување на нејзината улога во овој важен европски регион.

– Ние повеќе пати истакнавме дека Русија не се спротивставува на европската интеграција на Балканот, сè додека потенцијалните членки на ЕУ не мора да избираат помеѓу ЕУ и Русија – рече Захарова.


Руско МНР за Стратегијата за Западен Балкан: Нашиот став не е „Со нас или против нас“


Москва, 9 февруари, 2018 - 10:42 (META) 

Русија не гледа никакви пречки во развојот на односите со земјите кои сакаат да станат членки на Европската Унија и кон нив не пристапува по принципот „со нас или против нас“, изјави вчера на прес-конференција портпаролката на руското Министерство за надворешни работи, Марија Захарова прашана за коментар на Стратегијата на Европската комисија за проширувањето на ЕУ со земјите од Западен Балкан, меѓу кои е и Македонија.

Захарова не сакаше да ја коментира Стратегијата, посочувајќи дека првин „треба да ја проучат“, а потоа ќе ги „споделат проценките“.

– Што се однесува до нашите односи и со земјите од Западен Балкан и со земјите од Европската Унија тие имаат суштинска вредност за нас. Ние ги развиваме односите со овие држави, како и со интегративните асоцијации во кои тие припаѓаат – рече Захарова, одговарајќи на прашањето како руското МНР ја оценува Стратегијата на Европската комисија и какво влијание ќе има таа на односите на Москва со земјите од овој регион и со Европската Унија.

Таа истакна дека позицијата на Русија секогаш била јасна по ова прашање.

– Ние, се разбира, тргнуваме од членството во ЕУ и соодветните обврски на земјите од Унијата, и се залагаме за хармоничен развој во неколку правци, како во билатералниот формат, така и во формат на Унијата. Што се однесува до оние змеји кои не се членки на ЕУ и го разгледуваат нивното членство или поблиска интеракција со Европската Унија, не гледаме никакви пречки во развојот на односите со нив и никогаш не го поставивме прашањето „со нас или против нас“. Ние секогаш сме за усогласување на овие односи. Ние веруваме дека практиката и искуството покажуваат дека таквиот пат е можен – изјави Захарова.


Руското МНР нема коментар за насилствата од 27 април, кои биле „антинатовски митинг“


Москва, 6 декември, 2017 - 16:28 (META) 

Министерството за надворешни работи на Русија нема никаков коментар во врска со притворањето на 36-мина осомничени за насилствата во Собранието од 27 април, меѓу кои и шестмина пратеници на опозициската ВМРО-ДПМНЕ.

Ова денеска го соопшти портпаролката на руското МНР, Марија Захарова, прашана „за коментар за ситуацијата во Македонија, каде што кон крајот од минатата недела имаше апсења на претставници на опозицијата, кои во април оваа година учествуваа во организирање митинзи против НАТО, односно за вмешаност во инцидентот во Собранието“.

– Во овој поглед, немам никаква реакција. Можам да проверам со експертите. Ако има нешто, ќе ве известам – рече Захарова во кусиот одговор на прашањето во рамките на редовниот неделен брифинг на руското МНР.


Обвинувањата за руско мешање во Македонија не се неосновани


Скопје, 17 август, 2017 - 16:41 (META) 

Портпаролката на руското Министерство за надворешни работи, Марија Захарова, по повод интервјуто на  министерката за одбрана Радмила Шекеринска за агенцијата „Блумберг“ (во кое таа рече дека новата Влада ги зајакнува напорите за влез на Македонија во НАТО и дека членството во воената алијанса ќе ја заштити земјата од руското мешање), изјави:

Обвинувањата на сметка на Москва за наводното мешање во внатрешните прашања на Македонија се исконструирани и неосновани.

[Извор: Мета, датум: 15.08.2017]

ОБРАЗЛОЖЕНИЕ:

Оваа изјава на портпаролката на руското Министерство за надворешни работи, Марија Захарова, ја сметаме за невистинита.

Во изминатиот период се објавувани повеќе написи кои го демантираат тврдењето на Захарова дека „обвинувањата на сметка на Москва за наводното мешање во внатрешните прашања на Македонија се исконструирани и неосновани“а овде ќе наведеме само неколку.

Во јуни 2017 година видео-порталот НОВА ТВ објави заедничко истражување со партнерите „ОССРП“ (Мрежата за известување за оганизиран криминал и корупција OCCRP) и Српската мрежа за истражување кримнал и корупција – „КРИК“ во партнерство  со британскиот весник „Гардијан“, според кое:

Руски шпиони и дипломати биле вклучени во речиси децениски долги напори за ширење пропаганда и провоцириње раздор во Македонија како дел од пошироки регионални напори за спречување на балканските држави да му се придружат на НАТО.

Зклучоците кои произлегуваат од документите (од тајните македонски служби) кои повеќе недели ги анализирал и проверувал тимот новинари од четири држави, укажуваат дека:

Со употреба на сите техники и методологии на такаранечената мека моќ, како дел од стратегијата на Руската федерација на Балканот, целта е изолација на земјата (Македонија) од влијанијата на Западот“, се вели во еден од документите. „Уште повеќе, руската надворешна политика е во тесна врска со енергетската стратегија чија што цел е контрола врз стратешките енергетски ресурси преку партнерства со балканските држави“, пишува во еден од извештаите според коишто долгорочната цел на Русија е да ја смести Македонија во состојба на „ексклузивна зависност од руските политики“.

Настрана ова, туку документите објавени во ова истражување говорат и дека во изминатиот период во земјава се основани дури 30-ина македонско-руски асоцијации, што претставува значителна бројка, а толку билатерални пријателски асоцијации во Македонија нема со ниедна друга земја.

Понатаму, во мај 2017 година „Спутник Србија“ (регионалното претставништо руската информативна агенција основана и во сопственост на Кремљ), потпирајќи се на неофицијална информација од „Вечерње новости“ објави текст со наслов: „Во Македонија од Косово  влегле 800 вооружени ветерани на ОВК “ во кој тврди дека:

Српските служби за безбедност откриле дека околу 800 вооружени ветерани на озогласената терористичка организација ОВК од Косово влегле на територија на Македонија.

Овој маневар е извршен во два наврати, а според оперативните податоци албанските екстремисти биле опремени со автоматски пушки. На македонска територија влегле во групи, а тајно пренесувале и товари оружје

Со ова, државниот „Спутник“ влезе во кампањата која ја водеа проруските весници во Србија, но и некои во Македонија, објавувајќи вести за наводни стотици екстремисти на македонските западни и северо-западни граници, а кои во најголем број ги имаше пред настаните на 27 април во Собранието на РМ и насилството врз пратениците од новото владејачко мнозинство. Како што сега веќе знаеме, никакви вооружени екстремисти ниту имаше, а уште помалку тие влегоа на македонска територија.

На 06.04.2017 година „Спутник“ објави текст Косово плус Македонија – Голема Албанија, во кој пишуваше дека:

Сегашната криза во Македонија е подметната од странство, со цел земјата  да се федерализира со отцепување на  Албанците, што претставува последен чекор кон создавање на „Голема Албанија”, е заклучено во емисијата  „Светот со Спутник”.

Ова не се единствени примери во кои „Спутник“ подгреваше предвоена еуфорија во земјава. Се објавуваа написи со кои се навестуваше војна во Македонија и се цитираа изјави кои велеа дека „постои потенцијал да дојде до инцидентот  помеѓу припадниците на спротивставените страни, но и опасност да се случат организирани напади, како што беше оној во Куманово, во мај 2015 година“ (Стои ли ЦИА позади конфликтот во Македонија 26 април), создавајќи впечаток како да е таа „пред врата“.

На 21 мај 2017 година руската информативна агенција објави текст во кој вели:

Иако во Македонија веќе не постои вистинска патриотска партија, тоа не значи дека земјата нема патриоти.

Според  „Спутник“, „стотици илјади активисти на граѓанското општество кои учествуваа на демонстрациите за задржување на нивната сакана Обединета Македонија, како и некои познати новинари, би можеле да го сочинуваат јадрото на новата про–македонска партија“. Текстот дури и спомнува имиња на потенцијални лидери на таквата партија, при што станува збор за лица кои отоврено го напаѓаат НАТО и кои во минатото имаат изнесено про-руски ставови.

Така што,  наспроти тврдењето на  портпаролката на руското Министерство за надворешни работи,  Захарова , овие примери  говорат  дека „Обвинувањата на сметка на Москва за наводното мешање во внатрешните прашања на Македонија “, сепак, не се исконструирани и неосновани.

 


Захарова: Зголемувањето на рокот за издавање американска виза е нов притисок врз Русија


Москва, 4 август, 2017 - 15:23 (META) 

Рокот за издавање американски визи на граѓаните на Русија се зголеми, но тоа нема никаква врска со намалувањето на бројот на американските дипломати, вели портпаролката на руското МНР, Марија Захарова.

Таа истакна дека таквиот тренд бил присутен и во претходните месеци и поради тоа не може да се поврзе со новото намалување на персоналот на американската амбасада, воведено по одлуката на САД да воведе нови санкции кон Русија.
– Најсмешно е што периодот за издавање американска виза се зголеми неколкупати во последните четири-пет месеци. Претходно интервјуата за виза се закажуваа за десетина дена по предавањето на документите, а сега се закажува по еден до еден и пол месец – рече Захарова во интервју за телевизијата „Русија 1“.

Захарова вели дека сите изјави дека продолжувањето на рокот за издавање американски визи е последица на намалувањето на бројот на американските дипломати мора да се гледаат како „внатреполитички игри во САД“.

– Ние совршено добро сфаќаме дека тоа е застрашување, вид на притисок врз Русија – рече Захарова.

Кон крајот на јули, руското Министерство за надворешни работи соопшти дека Вашингтон треба да го изедначи бројот на својот дипломатски и технички персонал во Москва и во генералните конзуларни претставништва со бројот на руските дипломати и технички персонал кои работат во САД.


Руското МНР иронично му забележа на Столтенберг за изјавата по средбата со Заев


Москва, 15 јуни, 2017 - 16:42 (META) 

Портпаролката на руското министерство за надворешни работи, Марија Захарова, на денешниот брифинг за новинарите иронично ја искоментира изјавата на генералниот секретар на НАТО, Јенс Столтенберг, по средбата со македонскиот премиер Зоран Заев, во понеделникот оваа недела во Брисел.

Захарова се осврна на изјавата на Столтенберг, во која тој рече дека секое мешање однадвор во внатрешните политички процеси на некоја земја е неприфатливо, додавајќи дека токму грубото мешање на Западот предизвикало длабока криза во Македонија.

– Посветивме внимание на изјавата на генералниот секретар на НАТО, Јенс Столтенберг, од 12 јуни, околу исходот од средбата со премиерот на Република Македонија, Зоран Заев. Челникот на НАТО истакна дека секое мешање однадвор во внатрешните политички процеси е неприфатливо. Да зборуваме отворено, досега не сме слушнале генералниот секретар на НАТО, Jенс Столтенберг, толку остро да ги критикува Вашингтон, раковдството на Европската Унија, Берлин, Тирана, самиот себе и неговата организација. Токму грубото мешање на Западот предизвика длабока и долготрајна криза во Република Македонија. Оваа криза доведе до сериозна деградација на ситуацијата во оваа земја. Ѝ даваме целосна поддршка на оценката на Столтенберг. Би било убаво западните држави да почнат да ги користат ваквите ставови во практика – вели Захарова.

Инаку, премиерот Заев, во понеделникот беше во прва официјална посета на Брисел, каде покрај генералниот секретар на НАТО, имаше средби и со високата претставничка за надворешна политика и за безбедност на ЕУ, Федерика Могерини, еврокомесарот за проширување, Јоханес Хан, и со претседателот на Европскиот совет, Доналд Туск.


Русија негира дека бомбардирала школо во Идлиб


Москва, 27 октомври, 2016 - 16:00 (META) 

Руското министерство за надворешни работи соопшти дека руските и сириските сили не го бомбардирале училиштето во покраината Идлиб, во кое загинаа 28 лица, од кои 22 се деца.

– Руската Федерација нема никаква врска со оваа страшна трагедија, ниту со овој напад – рече портпаролката Марија Захарова.

Таа истакна дека тврдењата на активистите за човекови права и на западните дипломати дека руски и сириски воздухопловни сили извеле напади на 26 октомври се „лага“.

Претходно министерството за одбрана соопшти дека во последните девет дена немало воздушни напади на Алепо.

Захарова, исто така, рече дека акциите на меѓународната коалиција предводена од САД против Исламска држава ги „дестабилизираат“ состојбите во Сирија.

УНИЦЕФ претходно соопшти дека нападите на школи, како тоа во Идлиб, се воено злосторство.