Запленети 91 килограм марихуана во Кичево, тројца приведени


Скопје, 22 март, 2018 - 14:18 (META) 

Министерството за внатрешни работи (МВР) вчера во Кичево привело три лица од Скопје и запленило 91 килограм марихуана. Против тројцата, како и уште против три други лица, две од Струга и едно од Скопје, се поднесени кривични пријави.

Како што објасни портпаролот на МВР, Тони Ангеловски, марихуаната била набавена во Албанија, а требало со автомобил да биде транспортирана до Скопје. Притоа, полицијата откако добиле сознанија за шверцот, на влез во Кичево бил сопрен автомобилот „мерцедес“, а потоа и автомобилот што му бил претходница. Дрогата била во девет вреќи и во една патна торба.

По кривичните пријави, на тројца скопјани на возраст од 22 и 24 години, судија на претходна постапка им одредил притвори од по 30 дена. Еден од вмешаните во шверцот издржува казна во затворот во Струга и бил префрлен во „Шутка“. Полицијата трага уште по двајца 23-годишници – едниот од Скопје, а вториот од Струга.


Во Јажинце и Тетово пронајдени 30 килограми марихуана и два пиштола


Тетово, 9 март, 2018 - 12:46 (META) 

Во два одвоени претреси вчера во Тетово и во тетовското село Јажинце полицијата пронашла 30 килограми марихуана, малку хашиш и два пиштола.

Во Јажинце претрес е направен во куќата и помошни простории на Е.М. (52), при што се пронајдени 29 пакувања со марихуана со тежина од околу 30 килограми, дигитална вага, еден куршум калибар 7,62 милиметри, две зрна од непознат калибар со ралична големина и мало најлонско ќесе со хашиш.

Во претрес на домот и помошни простории на М.С.(39) во Тетово, пак, биле пронајдени два пиштоли, кои тој ги поседувал без дозвола, како и муниција.

Полицијата ги документира случаите и најавува пријави.


Полицијата спречила криумчарење на 143 килограми марихуана


Скопје, 28 февруари, 2018 - 16:49 (META) 

Во две одвоени акции, Министерството за внатрешни работи (МВР) вчера спречила криумчарење на околу 143 килограми марихуана, при што приведени се осум лица. Шестмина се македонски државјани, а другите двајца албански државјани, соопшти директорот на Бирото за јавна безбедност (БЈБМ), Лазо Велковски на денешната прес конференција во МВР.

Во првиот случај, од Албанија преку Македонија во Грција требало да бидат пренесени 55 килограми марихуана со вредност на нарко пазарот од околу 150.000 евра. Во оваа акција се уапсени шест македонски и еден албански државјанин.

Во близина на браната на Мавровско Езеро вчера биле уапсени четири жители на скопско Студеничани, кои со автомобили „бмв“ и „ауди“ ја презеле марихуаната од Дебар и требало да ја транспортираат до Солун, за надомест од 9.000 евра.

По ова апсење, набргу во Дебар бил уапсен 49-годишен маж од албанското село Блата, Република Албанија, кој ја прокриумчарил дрогата во Македонија илегално премиинувајќи ја границата.

Набргу се уапсени и двајца роднини од Дебар, кои биле на 26 и 27 годишна возраст. Тие ја презеле дрогата од Албанецот и ја предале на жителите на Студеничани.

Во вториот случај вчера околу 18 часот на граничниот премин „Деве Баир“ од слобода е лишен 47-годишен државјанин на Албанија. Тој управувал со камион во чија приколка биле пронајдени 88 килограми марихуана. Дел од дрогата била скриена во штици од приколката на камионот.


Притворен грчки државјанин кој превезувал 300 килограми марихуана


Велес, 30 јануари, 2018 - 10:15 (META) 

Основното јавно обвинителство Велес поведе постапка против едно лице за производство и промет на дрога, информираат од таму.

„Осомничениот, грчки државјанин, на 28 јануари пренесувал наркотична дрога, марихуана во количина од 309,6 килограми што била наменета за продажба. Дрогата ја пренесувал во товарно возило „сканиа“ со грчка регистарска ознака. Во возилото, помеѓу разновидната стока наменета за превоз од Атина до Вупертал, Германија, осомничениот пренесувал и 95 вреќи ориз со крајна дестинација Керкаде, Холандија. Во 75 вреќи, покрај оризот биле најдени алуминиумски вреќи обвиткани со фолија каде се наоѓала наркотичната дрога марихуана“, се вели во соопштението на ОЈО.

Надлежен јавен обвинител донел наредба за спроведување на истражна постапка против осомничениот за сторено кривично дело, неовластено производство и пуштање во промет наркотични дроги, психотопни супстанции и прекурсори.

„Ценејќи дека се исполнети законските околности за определување на мерката притвор, обвинителството до Основниот суд Велес поднесе и предлог за определување на оваа мерка, што беше прифатено од страна на судот и со решение определи притвор за осомничениот во времетраење од триесет дена“, се додава во соопштението.


Пронајдена еден килограм марихуана при претрес кај тетовец


Тетово, 6 јануари, 2018 - 12:51 (META) 

Врз основа на судска наредба, полициски службеници извршиле претрес во дом и помошни простории на лицето Б.М. (22), на улицата Ленин во Тетово, вчера во периодот од 16 до 18 часот.

„При претресот, на повеќе различни места и во различни пакувања, била пронајдена вкупно околу еден килограм наркотична дрога марихуана. Пронајдените предмети со дрогата биле одземени и дадени на вештачење, а Б.М. бил приведен и задржан во полициска станица. По целосно документирање на случајот, против Б.М. ќе биде поднесена соодветна пријава“, информираат од МВР.


СВР Штип околу Нова година запленил три килограми марихуана – двајца притворени


Штип, 2 јануари, 2018 - 13:16 (META) 

Секторот за внатрешни работи Штип во два одвоени случаи запленил околу три килограми марихуана и поднел кривични пријави против три лица, кои се товарат за неовластено производство и пуштање во промет на наркотични дроги и психотропни супстанции и прекузори.

Во едниот случај, кривична пријава е поднесена против 33-годишниот штипјанец Б.М. во чиј, при претрес полицијата пронашла и запленила околу половина килограм марихуана, псакувана во три најлонски ќеси.

Вториот случај бил реализиран од екипа на надворешната канцеларија за криминалистички работи Кочани кои по добиени инофрмации на 29 декември, минагтата година извршиле претрес во домот на 20-годишната Н.Ј. од каде заплениле 2.245 килограми марихуана, 133 таблети амфетамин и дигитална вага.

Истиот ден бил извршен и претрес во домот на 22-годишниот К.С. во Кочани. Кај него биле пронајдени 21,82 грама марихуана и дигитална вага.

На Б.М. и на Н.Ј. судија на претходна постапка им одредил мерка притвор од 30 дена.


Откриени 128 килограми марихуана во македонски камион во Србија


Владичин Хан, 21 декември, 2017 - 16:24 (META) 

Во камион со македонски регистерски таблички во близина на Владичин Хан, српската полиција пронашла 128 килограми марихуана. Возачот И.И. (69), македонски државјанин, е уапсен, јави „Јужне вести“.

Првично полицајците во резервоарот и во шуплини во камионот пронашла вкупно 131 пакување марихуана со тежина од 80 килограми, а при дополнителните проверки уште 48 килограми марихуана.

Возачот ќе биде предаден на Основното јавно обвинителство во Белград.


Запленети 30 килограми марихуана во селото Аранѓел, Кичевско


Кичево, 13 декември, 2017 - 11:58 (META) 

Полициски екипи вчера при претрес на домовите на две лица во кичевското село Аранѓел заплениле 30 килограми марихуана, соопшти денеска Министерството за внатрешни работи.

Претресот бил извршен по добиени оперативни сознанија и врз основа на судска наредба.

Како што информираат од МВР, при претресот во просториите на приземјето од куќата сопственост на А.А. (45) биле пронајдени три најлонски кеси во кои имало три големи пакувања – црни најлонски вреќи завиткани со селотејп трака, додека во спалната соба во куќата на Е.А. (47) била пронајдена една црна најлонска кеса полна со марихуана.

Запленетата марихуана е предадена на вештачење во МВР, а двете лица се приведени и против нив, по целосното документирање на случајот, ќе биде поднесена кривична пријава за неовластено производство и пуштање во промет на наркотични дроги, психотропни супстанци и прекурсори.


Уапсени двајца албански државјани со 38 килограми марихуана кај Меџитлија


Скопје, 4 декември, 2017 - 12:44 (META) 

Екипа на граничната полиција викендов, во близина на преминот Меџитлија, привела двајца албански државјани кои се обиделе да прошверцуваат 38 килограми марихуана, преку Македонија во Грција, соопшти денеска МВР.

Според полиција, станува збор за Р.А. (45) и Б.Г. (33), и двајцата од Република Албанија, против кои е поднесена кривична пријава за неовластено производство и пуштање во промет на наркотични дроги, психотропни супстанци и прекурсори. Судија на претходна постапка од битолскиот суд, на барање на Основното јавно обвинителство, на осомничените им одредил притвор од 30 дена. Третото лице кое било дел од групата, според МВР, успеало да ѝ побегне на полицијата.

Според истрагата на МВР, осомничените ја набавиле марихуаната во Албанија и откако ја препакувале, тргнале преку Македонија да ја транспортираат во Грција.

Ноќта меѓу саботата и неделата, екипа од полициската станица за граничен надзор Меџитлија, ги забележала тројцата албански државјани во близина на напуштената караула Лажец, но по дадената наредба од полицијата да застанат, тие почнале да бегаат.

По кратко време Р.А. и Б.Г. биле фатени во близина на граничната линија, со две торби со марихуана, додека третото лице успеало да избега.

„Од извршената анализа утврдено е дека во торбите има 38 најлонски пакувања со марихуана со вкупна нето-маса од 38,1 килограми. Во торбите имало и 201 грам хашиш и околу 350 милилитри хашишова смола“, стои во соопштението на МВР.


Пронајдени 60 килограми марихуана покрај реката Сатеска


Охрид, 24 ноември, 2017 - 13:50 (META) 

Дури 60 килограми марихуана во пакувања од околу еден килограм биле пронајдени вчеравечер крај мостот на реката Сатеска, на стариот пат Охрид – Струга, извести СВР Охрид.

Дрогата била пронајдена околу 21 часот вчера, во 59 пакувања, ставени во пет торби. Покрај нив имало и едно пакување кафена прашката материја, која заедно со марихуаната, е испратена за вештачење во Министерството за внатрешни работи во Скопје.

СВР Охрид и Секторот за недозволена трговија со оружје и со опасни материи преземаат мерки за целосно документирање и за расчистување на случајот.