Галичка свадба ќе се одржи од 13 до 15 јули


Скопје, 5 јули, 2018 - 14:52 (META) 

Годинешното 45. издание на Галичка свадба ќе се одржи од 13 до 15 јули во истоименото село на планината Бистра.

И оваа година неколку илјади посетители од земјава и странство одново ќе бидат сведоци на над 30 оригинални свадбени обичаи и ритуали, проследени со традиционални народни носии, песни и ора кои пленат со својата автентичност, убавина и културна вредност.

– Горди сме што Галичка свадба од Агенцијата за подршка на туризмот беше прогласена за најуспешна туристичка манифестација за минатата година, а од „Њујорк тајмс“ и „Нешeнал геoграфик“ за најтрадиционален свадбен фестивал во Европа. Овие признанија се само уште една причина Галичка свадба да продолжи да го негува македонското културно богатство и да биде негов промотор во целиот свет – вели Александар Костиќ, претседател на Месната заедница „Галичник“ која е организатор на манифестацијата.

Покрај останатите гости, на годинешната Галичка свадба ќе присуствува и премиерот Зоран Заев, во својство на покровител на манифестацијата, заедно со неколку други членови на Владата.

– Оваа манифестација игра огромна улога во зачувувањето и афирмацијата на оригиналниот фолклор, традиционалните вредности, архитектурата и на народното творештво, како темели на нашиот културен и национален идентитет. Дополнително, Галичка свадба претставува и своевиден македонски туристички бренд. Заради ваквото огромно значење, Владата и понатаму останува силен промотор и поддржувач на оваа и останатите слични манифестации во нашата земја – изјави министерот без ресор задолжен за комуникации, отчетност и транспарентност, Роберт Поповски.


Саемот на книга го посетиле 44.300 посетители


Скопје, 9 мај, 2018 - 12:13 (META) 

Саемот на книга 2018 завршува денеска, а манифестацијата до вчера ја посетиле 44.300 посетители, информираа организаторите. На 30. јубилејно издание се претставиле 70-на издавачки куќи од Македонија, Србија, Црна Гора, Косово, Албанија.

„Соработката со Министерството за култура, како покровител на манифестацијата, Владата, Град Скопје заедно со ЈСП, со воведувањето на двете вонредни линии специјално за најголемата културна манифестација, придонесоа, покрај промената на локацијата, овој Саем уште повеќе да го зацврсне неговото постоење. Ова е голем напредок кој резултираше со инзвонредна бројка од 44.300 посетители, а Саемот уште не е завршен“, изјави проект-менаџерот на Саемот на книгата, Сања Кондарко.

Во рамките на програмата на Промотивниот центар, се доделија наградите во организација на Македонската асоцијација на издавачи (МАИ), а се доделија и наградите од страна на Здружението на издавачите и книжарите на Македонија (ЗИКМ).


Иван Лотески од населбата Варош го фати крстот во Охридското езеро


Охрид, 19 јануари, 2018 - 10:49 (META) 

Иван Лотески од охридската населба Варош го фати Светиот крст што во осветените води на Охридското езеро го положи митрополитот на Дебарско-кичевската епархија, владиката Тимотеј.

Лотески беше најсреќниот од неколкуте стотини верници кои денеска скокаа по крстот во Охридското езеро, чија температура според утринските мерења изнесуваше седум Целзиусови степени.

– Скокам по крстот од мои 13 години. Денеска прв пат го фаќам крстот. Среќен сум и за ова живееме. Нека ни е за многу години празникот – изјави Лотески.

Владиката Тимотеј и градоначалникот на Охрид, Јован Стојаноски го дарува Лотески со златен синџир со крст и икона.

Точно напладне на Сараиште, во рамките на верскиот дел од прославувањето на Богојавление – Водици, ќе се врши масовно крштевање во осветените езерски води.

Централната манифестација во Скопје ќе се одржи напладне, кога архиепископот охридски и македонски г.г. Стефан ќе го положи крстот во реката Вардар од мостот „Слобода“.


Манифестацијата „Бела ноќ“ ќе се одржи утре


Скопје, 6 октомври, 2017 - 12:31 (META) 

Годинешното 13. издание на манифестацијата „Бела ноќ“ ќе се одржи утре, сабота (7 октомври). Град Скопје информира дека ќе има квалитетна програма која посетителите ќе може да ја видат на неколку точки во градот.

Како и изминатите години, ќе има изложби, концерти, перформанси, бесплатен филмски маратон во кино „Милениум“ и музички спектакл.

Во галеријата на Младинскиот културен центар ќе биде поставена изложбата на графики од Салвадор Дали, „Помеѓу ѕвездите и басните“.

На плоштадот Македонија, ќе настапи корејската трупа „Таго анд Ато БИЗ“ (Tago&АtoBIZ) кои ќе го претстават перформансот „Таго: Корејски тапан 2“ во 21 часот. Во музичкиот спектакл учествуваат околу 30 актери, танцувачи, изведувачи и членови на оваа светска атракција.

Градско кино „Миленум“ ќе има уште еден бесплатен филмски маратон.

Организатор на манифестацијата „Бела ноќ“ е Младинскиот културен центар, а Градот Скопје, како покровител, од буџетот за 2017 година одвои 48.780 евра.

На денот на одржување на манифестацијата, организирано е бесплатно возењето во градските автобуси на ЈСП, кои сообраќаат кон централното градско подрачје, од 19 часот до раните утрински часови.


Конкурс за манифестацијата „Нов културен бран“


Скопје, 31 јули, 2017 - 9:59 (META) 

Министерството за култура денеска на својата веб-страница ќе ги објави условите и формуларите за пријавување на општини, здруженија на граѓани, асоцијации, неформални групи и автори од областа на културата и на уметноста за манифестацијата „Нов културен бран“.

Таа ќе се реализира од крајот на август до крајот на октомври годинава,  односно сè до исцрпување на средствата за реализација на манифестацијата.

„Цел на манифестацијата е да се обезбеди деметрополизација и децентрализација на културата, дисперзија во локалните средини и збогатување, омасовување и раздвижување на културната понуда во сите региони на Македонија. За разлика од претходниот пристап со манифестацијата „Топол културен бран“, на која право за аплицирање со проекти за културни настани имаа само општините, со овој повик, право на аплицирање со проекти и со идеи за манифестацијата ќе имаат здруженија на граѓани, асоцијации, неформални групи и автори од областа на културата и на уметноста, кои ќе треба да понудат квалитетна, естетски профилирана и вредносно издржана понуда, со која ќе внесат посвежи идеи и поиновативни пристапи во креирањето на културата, како и нови и современи форми во создавањето и во презентирањето на културниот и на уметничкиот продукт“, порачува Министерството за култура.


Почнува „Галичка свадба 2017“, младенците се запознале во Галичник


Галичник, 15 јули, 2017 - 10:52 (META) 

Скопјаните Тања Чаловска и Бошко Лепчески, обајцата со потекло од Галичник, се младенците на „Галичка свадба 2017“ која ќе се одржува овој викенд. Триесет и едногодишниот правник и 28-годишната економистка се запознале пред седум години токму во Галичник, каде што утре ќе бидат и венчани во црквата „Св. Петар и Павле“.

По подолго време се случува на Галичка свадба двајцата младенци да имаат потекло од Галичник. Чаловска на свадбата ќе носи носија која е семејно наследство и е стара еден век, а необлечена повеќе од 50 години. Носијата сосе историски вредниот накит што ќе ги носи тежат околу 25 килограми.

Свадбата ќе почне вечерва во 19.30 часот, со китење, редење на бајракот и фрлање пушка, а утре наутро во 9 часот ќе продолжат обичаите меѓу кои централен настан ќе биде венчавката во црквата „Св. Петар и Павле“.

Посетителите своите возила ќе може да ги остават на фудбалското игралиште близу Галичник, а потоа со организиран превоз со комбиња ќе бидат превезени до влезот на Галичник.

Со Галичката свадба ќе биде отворено и годинашното Галичко културно лето, во чии рамки се 24. Галичка книжевна колонија во организација на Здружението „Галикул“, на која ќе учествуваат домашни и странски писатели, како и 28. Галичка ликовна колонија на која гости ќе бидат осум уметници од Израел, Индија, Босна и Херцеговина, Македонија, Словенија, Косово и од Бугарија.


Отворена културната манифестација „Скопско лето 2017“


Скопје, 22 јуни, 2017 - 10:34 (META) 

Меѓународната културна манифестација „Скопско лето“ беше отворена синоќа со настапот на Омер Фарук Текбилек во Македонската опера и балет.

– И оваа година, програмите ќе се реализираат на 18 локации и простори во Скопје, во театри, ликовни галерии, музеи, Старата скопска чаршија, Сули-ан, централното градско подрачје и на други места, кои во квечерините на летото се претвораат во летни сцени – изјави градоначалникот на Град Скопје, Коце Трајановски, на отворањето на манифестацијата.

Манифестацијата ќе трае 40 дена, ќе учествуваат 900 учесници во 52 програмски термини, исполнети со концерти на класична, народна и на џез-музика, драмски, балетски и оперски претстави, изложби и филмски проекции, специјални проекти и премиери, содржини презентирани од домашни и од изведувачи од 16 држави во светот.


Петар Рупев од населбата Варош го фати крстот во Охрид


Охрид, 19 јануари, 2017 - 10:59 (META) 

Петар Рупев, од охридската населба Варош, беше најсреќниот кој прв стигна до крстот во осветеното Охридско Езеро. За централната манифестација по повод празникот Богојавление – Водици во Охрид, беа пријавени околу 300 лица, на кои не им пречеа студените води на езерото, од само 6 Целзиусови степени.

На Рупев, кој по четврти пат го фаќа крстот, црквата му подари крст, а од градоначалникот на општина Охрид, Никола Бакрачески, доби икона.

На оваа масовна црковно-народна манифестација, присуствуваа неколку илјади посетители, од другите градови во земјава, како и од регионот, пред сè, од Бугарија, Албанија, Грција и од Србија.

На богојавленските чествувања во Охрид присуствуваа и претставници на дипломатскиот кор во земјава.

Организатор на прославата годинава е посебно координативно тело, составено од претставници на локалната власт, Македонската православна црква – Охридска архиепископија и од други здруженија и институции кои помагаа во организацијата.

Црвениот крст, традиционално, денеска ќе организира масовна акција за дарување крв, а нивните екипи ги посетија и социјално загрозените лица, на кои им однесоа помош во храна и во облека.

И оваа година дел од угостителите и од хотелиерите во Охрид, по повод празникот, ги намалија цените на услугите за 10 до 15 отсто.


Денеска почнува „Вевчанскиот карневал“


Струга, 10 јануари, 2017 - 11:07 (META) 

Годинешниот „Вевчански карневал“ почнува денеска со културни настани предвидени за оваа манифестација.

Програмата денеска е во знакот на одбележувањето на верскиот празник Свети Василиј Велики, заштитник на вевчанските василичари и на Вевчани, додека формалниот почеток на карневалот е в четврток.

Денеска, со почеток во 17 часот, во Клубот на пензионери во Вевчани ќе се одржи трибина на тема „Перспективите на руралниот туризам во Република Македонија со осврт на општина Вевчани“. Утре ќе биде извршена промоција на романот „Пред шарени врати“ од Косте Шутиноски.

Изложбата на слики од академскиот сликар Ниче Василев ќе биде отворена на 12 јануари (четврток) во 12 часот, во Клубот на пензионери.

Забавниот дел ќе почне на 12 јануари во 21 часот, со настап на домашните групи „ДНК“ и „Нокаут“, а пред полноќ ќе се претстави групата „Фрајле“ од Србија.

На 13 јануари, во 21 часот, присутните ќе ги забавува фолк-пејачката Анета Наковска, додека православната Нова година ќе биде пречекана со настапот на вевчанецот Ефто Пупиноски.

Традиционалното дефиле на маските ќе се одржи на 13 јануари, по 14 часот.

Карневалот завршува на 14 јануари, со традиционалното палење на маските.


Кампања против ксенофобија насловена „Деца на планетата Земја“


Скопје, 24 септември, 2016 - 11:04 (META) 

Во Паркот на франкофонијата денеска се одржува манифестацијата „Деца на планетата Земја“, која е дел националната кампања против ксенофобија.

„Деца на планетата Земја“ е граѓанска акција на Фондација „Отворено општество“ – Македонија, која порачува дека сите имаме право да живееме мирно, слободно и безбедно.

Во рамки на манифестацијата, која почнува во 11.30 часот и ќе трае до 19 часот, ќе се одржат изложби, проекции на филмови, работилници за изработка на маици и на постери, а ќе биде отворен и пункт за донации кои се наменети за бегалците на пограничниот премин во Гевгелија. Собраните донации ќе бидат предадени во текот на утрешниот ден.Programa sabota 24.09.2016 2 del (2-2)

 

Организаторите порачуваат дека на бегалците во кампот им се потребни чинии, лажици, вилушки и стаклени чаши за кујните во камповите, како и играчки, разни едукативни боенки, блокчиња, боички, фломастери, школски прибор и слично, кои децата ќе ги коритстат во занималните во кампот.