Снежана Калеска-Ванчева седна во пратеничката фотелја на Петар Атанасов


Скопје, 29 август, 2018 - 15:52 (META) 

Собранието го верификува мандатот на пратеничката Снежана Калеска – Ванчева од СДСМ, која доаѓа на местото на пратеникот Петар Атанасов.

Атанасов на 23 овој месец поднесе оставка на функцијата, која денеска беше констатирана. Се очекува тој да биде избран за заменик-министер за образование и наука.

Претседателот на Државната изборна комисија (ДИК) Оливер Деркоски изјави дека го известиле наредниот кандидат, Снежана Калеска-Ванчева од листата на кандидати за пратеници за ИЕ 1 од СДСМ и коалиција. Во законскиот рок Калеска-Ванчева ја известила Државната изборна комисија дека го прифаќа мандатот за пратеник во Собранието по што и е издадено уверение.

На седницата не беа присутни пратениците на опозициската ВМРО-ДПМНЕ.


Вучиќ во посета на Русија, ќе се сретне со Путин


Белград, 8 мај, 2018 - 13:59 (META) 

Претседателот на Србија, Александар Вучиќ е во посета на Русија каде што ќе се сретне со рускиот претседател, Владимир Путин а ќе присуствува и на воената парада по повод Денот на победата над фашизмот, 9 мај.

Дводневната посета е на покана на рускиот претседател Владимир Путин, а Вучиќ ќе биде првиот странски државник кој ќе се сретне со Путин на почетокот на неговиот четврт мандат како претседател.

На воената парада, покрај Вучиќ од странските државници ќе присуствува само израелскиот премиер Бенјамин Нетјанаху.


Тевдовски – Соса: ММФ ќе помогне во спроведувањето на реформите


Скопје, 28 февруари, 2018 - 14:54 (META) 

Министерот за финансии, Драган Тевдовски денеска се сретна со новоназначениот резидентен претставник на Меѓународниот монетарен фонд ММФ во Македонија, Себастијан Соса.

На состанокот било истакнато дека Македонија нема потреба од аранжман со ММФ, но Фондот ќе понуди експертска и техничка помош, со цел помагање на реформите кои се во тек и се планираат, како среднорочното буџетирање, фискалниот совет и правила и даночната реформа.

На средбата биле разменети мислења околу остварениот и очекуваниот економски раст, како и фискалната политика во тековната и наредните години.

„Притоа, беше констатирано дека се совпаѓаат очекувањата на Владата и ММФ за пораст на економијата од 3,2 проценти во 2018. Исто така, Тевдовски истакна дека мерките на фискалната политика ќе бидат насочени кон стабилизирање на нивото на јавниот долг на среден рок“, информираат од министерството.

Резидентниот претставник во Македонија, Себастијан Соса истовремено е и резидентен претставник на ММФ во Србија. Тој ќе остане со седиште во Белград, но ќе има редовна комуникација со властите во Македонија. Фондот инаку две години немаше резидентен претставник во земјава, од завршувањето на мандатот на Патрик Гитон.


Проблемот со загадениот воздух, еден од приоритетите на Шилегов за 100 дена мандат


Скопје, 3 февруари, 2018 - 13:19 (META) 

Заштита на животната средина и подобрување на состојбата со загадениот воздух, биле приоритетите на градоначалникот на Град Скопје, Петре Шилегов во првите 100 дена од мандатот. Тој денеска даде отчет за сработеното.

„Тројно го зголемивме буџетот за заштита на животната средина, кој за 2018 година изнесува 141 милиони денари, што претставува речиси трипати повеќе од ребалансот на буџетот од 2017 година, кој што, за овој сектор предвиде само 48 милиони денари. Ја организиравме најголемата акција за чистење на Скопје, што беше дел од краткорочните мерки против загадувањето, со која беа отстранети околу 3.000 кубни метри смет од улиците и јавните површини во градот. Во оваа акција, освен јавните градски претпријатија беа ангажирани неколку стотици лица, баратели на работа преку Агенцијата за вработување“, рече Шилегов.

Со есенска акција за зазеленување на Скопје, како што информираше, биле засадени 615 нови дрвја низ различни локации во градот. Акцијата за зазеленување на Скопје ќе продолжи и на пролет, кога е планирано да се засадат повеќе од 4.000 садници.

Градот Скопје обезбедил и субвенции за набавка на печки на пелети во висина до 70 отсто од вредноста на печката, трипати се вовел бесплатен јавен автобуски превоз, а се ограничил периодот во кој е дозволен дотур на стока во централното градско подрачје.

Шилегов ја стопирал и изградбата на 95 фасади, кои требаше да добијат нов барокен лик.

– Со пренамена на средствата кои беа предвидени за „Скопје 2014“, започнаа интензивни активности и подготовки за реконструкција на сите средни училишта, истите да добијат енергетски ефикасни фасади, во согласност со современите стандарди за рационализација и заштеда на електричната и топлинската енергија – рече Шилегов.

Тој додаде дека, веднаш по преземањето на градската власт се вовело двосменско работење на службите што непосредно работат со граѓаните.


Ал Сиси ќе се кандидира за втор мандат


Каиро, 20 јануари, 2018 - 12:30 (META) 

Египетскиот претседател Абдел Фатах ал-Сиси објави дека ќе се кандидира за втор мандат на претседателските избори во март оваа година.

-Искрено и отворено ја објавувам својата кандидатура за должноста претседател на Републиката и се надевам дека ќе ја прифатите – рече Сиси.

Тој ова го изјави во говорот кој го одржа на конференцијата посветена на резултатите на својот мандат.

Ал-Сиси на функцијата беше избран во 2014 година и ја води земјата со цврста рака. Во 2013 година додека беше врховен командант на вооружените сили, го смени од власт исламистот Мохамед Морис, првиот демократски избран претседател на Египет, по што почна прогон на стотина негови подржувачи.


Собранието ги констатираше оставките на членовите на ДИК


Скопје, 25 декември, 2017 - 16:06 (META) 

Спикерот на Собранието, Талат Џафери денеска на пленарна седница констатираше дека им престанува мандатот на членовите на ДИК откако тие си поднесоа оставки.

Тој не соопшти кога и како ќе продолжи постапката за избор на нови членови на ДИК.

Нивните оставки следуваа по притисок на јавноста откако американскиот амбасадор Џес Бејли обелодени дека на затворена седница членовите одлучиле да си поделат бонуси за спроведување на локалните избори.

Во рок од три дена Талат Џафери ќе треба да ги извести партиите да предложат нови членови на Комисијата, а доколку тие не дадат свој предлог, членовите ги предлага собраниската комисија за прашања на избори и именувања.

Новите осум членови треба да бидат изгласани со двотретинско мнозинство.

Оставки поднесоа претседателот Александар Чичаковски, потпретседателот Реџеп Прекопуца и експертот Атанас Урумов како и партиските членови – Игор Милев и Виолета Дума предложени од СДСМ, Сашо Срцев и Силвана Бонева од ВМРО-ДПМНЕ и Субхи Јакупи од ДУИ. Само Ермира Асани Салија, од редовите на БЕСА не поднесе оставка.


Јанева очекува СЈО да продолжи да работи и по 2020 година како дел од ОЈО


Скопје, 19 декември, 2017 - 15:18 (META) 

Специјалната јавна обвинителка на денешната прес-конференција соопшти оти очекува реформите во правосудниот сектор да овозможат СЈО и по 2020 година да продолжи да работи како дел од Јавното обвинителство на Република Македонија.

– Се надеваме дека ќе бидат донесени соодветни законски решенија во 2020 година ова јавно обвинителство да се трансформира и да се припои кон Јавното обвинителство на Република Македонија како самостојна институција во постапување на делата од негова надлежност и гонење на кривични дела од корупција од висок профил – рече Јанева на прес-конференцијата на која СЈО информираше за седум нови истраги.

Таа додаде СЈО ќе поднесе и други обвинија за време на актуелниот петгодишен мандат, доколку надлежните институции изнајдат решенија што ќе го овозможат тоа.

Јанева информираше дека СЈО подготвува правилник и други акти за формирање на истражителски центар кој, како што рече, во изминатиот период веќе неформално постои и успешно функционира во рамките на ова обвинителство, а се подготвувал и правилник за примена на законот за заштита на сведоци кој е во собраниска процедура.

– Би сакала да ја информирам јавноста дека во изминатиот период се превземени предистражните предмети од Основното јавно обвинителство Скопје и од Основното јавно обвинителство за гонење на организиран криминал и корупција Скопје за „Скопје 2014“, „Актор“ и за незаконска дивоградба за објектот „Космос“ и за се донесени решенија за воспоставување на наша надлежност и истите се припоени или се отворени нови предистражни постапки кои се водат во ова Јавно обвинителство – рече Јанева.

Таа нагласи дека во овој период додека не биде донесено соодветно решение за членот 22 од Законот за СЈО, со кој е регулиран рокот за поднесување на обвиненија, законска обврска на СЈО е да продолжи со работа и да отвора нови предистраги и истраги.


Таравари на три јазици вети дека во Гостивар нема да има поделби


Гостивар, 2 ноември, 2017 - 15:16 (META) 

Новиот градоначалник на општина Гостивар, поранешниот министер за здравство, Арбен Таравари, денеска на новите членови на Советот на Општината им го честиташе назначувањето на албански, македонски и на турски јазик и повика на соработка. И тој и советниците денеска ги добија уверенијата од општинската изборна комисија и ги почнаа своите мандати.

– Кампањата и изборите завршија, од денеска нема да има поделби на припадници на етнички заедници и на партиски членови. Има само гостиварци и едно семејство што се вика Гостивар. Луѓето во администрацијата ќе се делат на тие што работат и тие што не работат. Ве уверувам дека од денеска, вратите на Општината ќе бидат отворени за сите граѓани. Општината повеќе нема да биде ничија лична сопственост. Општината ќе биде на сите граѓани на Гостивар, без оглед на нивните убедувања, односно политичка, етничка или религиозна припадност – рече, меѓу другото, градоначалникот Таравари.

Тој рече и дека е постигнат договор со политичките партии на локално ниво и е обезбедено мнозинство во Советот.

– Изминативе денови имавме состаноци и според последното, имаме поддршка од 17 советници. Сепак, би сакал тоа мнозинство да биде над 20 и сите одлуки да бидат поддржани од повеќе советници – рече Таравари.

Инаку, се огласи и Општина Гостивар, која демантираше некои пишувања во медиумите, дека новиот  градоначалник почнал да брка од работа вработени во Општината. Според, соопштението, Таравари ги информирал вработените дека ќе има прераспределувања на службеници од една во друга канцеларија, за да бидат на исто место колеги кои вршат задачи од иста област.


ЕК: Новите градоначалници имаат чист мандат, лидерите да се однесуваат одговорно


Брисел, 30 октомври, 2017 - 19:25 (META) 

Локалните избори во Македонија им даваат чист мандат на новите градоначалници и советници за тоа како граѓаните сакаат да изгледаат локалните власти во нивните општини, оцени денеска портпаролката на Европската комисија, Маја Коцијанчич.

Според неа, акцентот сега треба да се стави на придвижување на реформската агенда насочена кон ЕУ преку инклузивен процес, во интерес на сите граѓани.

– Изборите беа набљудувани од Мисијата на ОБСЕ/ОДИХР, која во својата првична изјава оцени дека двата круга беа одржани во атмосфера на антпревар преку почитување на основните слободи, иако беа забележани одредени слабости. Сите чинители во државава треба да ги спроведат препораките од набљудувачите на ОБСЕ/ОДИХР, со што ќе им се овозможи на државните институции да ги зајакнат своите капацитети пред следниот изборен циклус. За оваа цел Европската Унија е подготвена да понуди поддршка – вели Коцијанчич.

Забелешките и жалбите од учесниците во изборите, според Коцијанчич, треба да се насочат кон релевантните државни институции, во согласност со установените процедури и во рамките на законските рокови.

– Важно е сите лидери да се однесуваат одговорно, за да ја зголемат довербата на граѓаните во државните институции и во политичките процеси – додава Коцијанчич.


„Тврдокорни“ го прогласија Иванов за „кукавица од претседател“ бидејќи не ги примил


Скопје, 12 октомври, 2017 - 20:21 (META) 

Дваесеттината членови на здружението „Преродба“, Семакедонскиот национален совет „Македониум“ и Македонското патриотско здружение „Тврдокорни“ кои денеска излегоа на протест пред претседателската резиденција, не успеаја да му го предадат барањето на претседателот Ѓорге Иванов за одземање на мандатот на премиерот Зоран Заев.

Претставници на здруженијата пред резиденцијата соопштија дека биле известени од обезбедувањето дека Иванов си заминал.

Гневни поради ова, тие го прогласија Иванов за „кукавица“.

– Овој момент да биде јавно пренесен за да види македонскиот народ каков кукавица од претседател има избрано. Кукавица од претседател кој што не сака да прими претставници на сопствениот народ, не може да има легитимитет – изјави Страшко Олумчев, претседател на Семакедонскиот национален совет „Македониум“.

Тој рече дека протестите ќе продолжат и дека повторно ќе се обидат да му ги достават барањата на Иванов.

Членовите на здруженијата денеска одржаа мирен протестен марш, кој почна пред канцеларијата на Делегацијата на Европската Унија и преку булеварот Мајка Тереза (поранешна Водњанска) продолжи до претседателската резиденција на Водно.

Од иницијативата велат дека со одземањето на мандатот на премиерот Зоран Заев „ќе биде овозможено да се преземат сите неопходни мерки за заштита на уставниот поредок на државата, од сите дејства со кои државата и македонскиот народ се ставаат под директна мирна окупација“.