Иванов сè уште не побарал термин за годишното обраќање во Собранието


Скопје, 30 ноември, 2018 - 13:30 (META) 

Нема најава од претседателот на државата, Ѓорге Иванов дека сака има годишно обраќање во Собранието, рече собранискиот спикер, Талат Џафери на брифинг за новинарите.

– Претходните години, порано добивавме барање од Иванов, оваа година сè уште не е пристигнато. Доколку сака да се обрати тој мора да побрза со доставување барање за да може да му се обезбеди термин. Ова на претседателот на државата му е право, а не обврска, што значи може да не сака оваа година да го искористи ова право – смета Џафери.

Мандатот на Иванов истекува на 2 мај наредната година, а претседателските избори ќе бидат распишани најверојатно на крајот на јануари или почетокот на февруари, информира Џафери.

Претседателот на законодавниот дом е категоричен дека на поранешниот премиер, Никола Груевски, кој е во бегство во Унгарија, мора да му биде исплаќана плата затоа што тој има уставно право на тоа.

– Јас сум должен да му пуштам плата додека тој има пратенички мандат. Таа ќе му биде намалена поради неоправдано отсуство. Ако има пристап до неговата банкарска сметка ќе си ја подигне платата. За да му се одземе мандатот мора да гласаат две третини од вкупниот број на пратеници. Пратеничкиот мандат е уставна категорија и не може да се смени само со промена на Деловникот – категоричен е Џафери.

Собраниската седница за утврдување на уставните амандмани за промена на Уставот согласно Договорот од Преспа почнува утре и може да трае најмногу 12 дена, но Џафери е убеден дека овој рок ќе биде пократок.

– Ако на собраниските комисии немаше ништо сензационално, не очекувам да има ни на седницата. Предлагачот, односно владата, потоа треба да организира јавна расправа и по завршувањето треба до Собранието да испрати извештај за да можат да течат следните рокови – вели собранискиот спикер.

Објавувањето на законот за јазици во Службен весник, вели Џафери, ќе чека соодветен момент и контекст во целокупната политичка ситуација.


Собранието за шест месеци ќе одлучува за одземање на мандатот на Груевски


Скопје, 14 ноември, 2018 - 13:16 (META) 

На координацијата кај претседателот на Собранието, Талат Џафери бил донесен заклучок дека пратеникот Никола Груевски, од денешниот ден се смета за неоправдано отсутен, поради неговото бегство во Унгарија.

Според Деловникот, на пратеникот кој отсуствува најмалку трипати едно по друго на седниците на Собранието, а за тоа не го известил претседателот, му се одзема 5 проценти од платата за секој ден отсуство, за што акт донесува Комисијата за прашања на избори и именувања. Од денеска овој член ќе важи за неоправданото отсуство на пратеникот Никола Груевски.

„За пратеникот Никола Груевски, Собранието не донесе одлука за одземање на мандатот, бидејќи не се изјасни минимумот од 80 пратеници. Според ова, по овој основ и за оваа казна затвор, на пратеникот не може да му биде одземен мандатот. Во Деловникот во член 59 е пропишано дека за пратеник кој неоправдано отсуствува од седниците повеќе од шест месеци, претседателот на Собранието ја известува Комисијата за деловнички и мандатно-имунитетни прашања, а одлуката за одземање на мандатот по овој основ се носи на седница на Собранието“, велат од собраниските служби.

На денешната координација, иако бил извеатен, не присуствувал координаторот на пратеничката група на ВМРО-ДПМНЕ, но бил информиран за заклучоците од координацијата.


Собранието одлучи да не му го одземе пратеничкиот мандат на Груевски


Скопје, 9 ноември, 2018 - 13:06 (META) 

Собранието денеска одлучи да не му го одземе пратеничкиот мандат на поранешниот премиер и екс лидерот на ВМРО-ДПМНЕ, Никола Груевски.

Од вкупно 87 присутни пратеници, 58 гласаа „за“ одземање на мандатот, а 28 против. За одземање на мандат на пратеник потребно е двотретинско мнозинство од вкупниот број на пратеници односно минимум 80 пратеници.

Предлогот за одземање на мандатот на пратеникот Груевски беше доставен до пратениците од Kомисијата за деловнички и мандатно-имунитетни прашања врз основа на добиеното известување од Основен Суд Скопје 1 Скопје, за пресудата со која Груевски е осуден на казна затвор во траење од две години во случајот „Тенк“.

Комисијата во средата со мнозинство гласови препорача одземање на мандатот, но денеска не беше постигнато двотретинско мнозинство.

Одлуката на пратениците да не го му го одземат мандатот на Груевски, нема да го одложи издржувањето на затворската казна.


Со 5 гласа „за“, Комисијата му предложи на Собранието да му го одземе мандатот на Груевски


Скопје, 7 ноември, 2018 - 12:06 (META) 

Со пет гласа „за“ Комисијата за мандатно имунитетни прашања реши да му предложи на Собранието да му го одземање пратеничкиот мандат на Никола Груевски. Одлуката треба да ја донесе Собранието на пленарна седница со двотретинско мнозинство.

Груевски не се појави на седницата иако претседателот на Комисијата, Павле Богоевски рече дека бил поканет на седницата на која единствена точка на дневен ред беше известувањето од судијката Добрила Кацарска за правосилната пресуда од две години против него во случајот „Тенк“ на СЈО.

Поранешниот претседател на парламентот, Трајко Вељаноски обвини дека против Груевски се води политички монтиран процес. Вељаноски рече дека пратеничката група на ВМРО-ДПМНЕ ќе биде против, по што членовите на овој табор ја напуштија комисијата.

Александар Кирацовски од СДСМ рече дека никој не смее да се крие зад пратеничкиот мандат за да избегне кривична одговорност.

Сашо Василевски од новата независна пратеничка група, кому истата Комисија лани во декември му го одзема имунитетот заради 27 април, кажа дека осумтемина пратеници ќе бидат против одземање на мандатот во духот на вчера формирано тело за помирување.


Собранието денеска ќе расправа за одземање на пратеничкиот мандат на Груевски


Скопје, 7 ноември, 2018 - 10:01 (META) 

Собраниската Комисија за деловнички и мандатно-имунитетни прашања денеска со почеток од 11 часот ќе расправа за барањето од судот за одземање на пратеничкиот мандат на Никола Груевски заради издржување на двегодишната затворска казна за предметот „Тенк“ на Специјалното јавно обвинителство.

Претседателот на Комисијата, Павле Богоевски во петокот го доби барањето од Судот од претседателот на Собранието, Талат Џафери и имаше рок од 15 дена да ја закаже седницата.

Барањето за одземање на мандатот на Груевски е според членот 59 од Деловникот на Собранието на РМ. Со него се предвидува за пратеникот осуден за кривично или друго казниво дело што го прави недостоен за вршење на пратеничката функција, известување до претседателот на Собранието да достави судот кој ја изрекол казната.

За да му биде одземен мандатот на Груевски на Собранието му е потребно двотретинско мнозинство. Неизвесно е дали за одземање на мандатот на поранешниот премиер ќе гласаат 80 пратеници, ако се знае дека пратениците од опозициската партија ВМРО-ДПМНЕ нема да гласаат за, а најголем дел од пратениците од независната пратеничка група предводена од поранешната министерка за култура Елизабета Канческа Милевска се изјаснија дека нема да гласаат.

Груевски најдоцна до утре овој месец треба да се јави на издржување на затворската казна. Во петокот, Кривичниот суд соопшти дека судија за извршување санкции ја одбил молбата на Груевски за одлагање на казната.


Собранието утре ќе одлучува за одземање на мандатот на Груевски


Скопје, 5 ноември, 2018 - 10:08 (META) 

Комисијата за деловнички и мандатно-имунитетни прашања на Собранието утре треба да одлучи дали пратеникот Никола Груевски е недостоен за вршење на пратеничката функција. Груевски е осуден на две години затвор во случајот на СЈО „Тенк” и на 8 ноември треба да се јави на издржување на затворската казна. Во овој случај за одземање на пратеничкиот мандат потребно е двотретинско мнозинство.

Осумтемина пратеници, членови на новата пратеничка група, кои гласаа за пристапување кон промена на Уставот според Договорот од Преспа за промена на името, веќе најавија дека нема да гласаат за одземање на мандатот на Груевски. По собраниската комисија, за ова прашање треба да одлучи Собранието со двотретинско мнозинство.

На пратеник кој е осуден на казна затвор од најмалку пет години, пратеничкиот мандат автоматски му престанува, пропишува собранискиот Деловник. Во случајов, потребно ќе биде двотретинско мнозинство на собраниска седница. Без гласовите на овие осум пратеници, такво мнозинство нема да има.

Груевски веќе го доби упатниот акт за издржување на казната затвор најдоцна до 8 ноември. Неговата молба за одложување на казната беше одбиена од судија за извршување санкции при Основниот Суд Скопје 1. Сега неговата одбрана има право на жалба до Кривичниот совет кој има рок од три дена да одлучи.


Снежана Калеска-Ванчева седна во пратеничката фотелја на Петар Атанасов


Скопје, 29 август, 2018 - 15:52 (META) 

Собранието го верификува мандатот на пратеничката Снежана Калеска – Ванчева од СДСМ, која доаѓа на местото на пратеникот Петар Атанасов.

Атанасов на 23 овој месец поднесе оставка на функцијата, која денеска беше констатирана. Се очекува тој да биде избран за заменик-министер за образование и наука.

Претседателот на Државната изборна комисија (ДИК) Оливер Деркоски изјави дека го известиле наредниот кандидат, Снежана Калеска-Ванчева од листата на кандидати за пратеници за ИЕ 1 од СДСМ и коалиција. Во законскиот рок Калеска-Ванчева ја известила Државната изборна комисија дека го прифаќа мандатот за пратеник во Собранието по што и е издадено уверение.

На седницата не беа присутни пратениците на опозициската ВМРО-ДПМНЕ.


Вучиќ во посета на Русија, ќе се сретне со Путин


Белград, 8 мај, 2018 - 13:59 (META) 

Претседателот на Србија, Александар Вучиќ е во посета на Русија каде што ќе се сретне со рускиот претседател, Владимир Путин а ќе присуствува и на воената парада по повод Денот на победата над фашизмот, 9 мај.

Дводневната посета е на покана на рускиот претседател Владимир Путин, а Вучиќ ќе биде првиот странски државник кој ќе се сретне со Путин на почетокот на неговиот четврт мандат како претседател.

На воената парада, покрај Вучиќ од странските државници ќе присуствува само израелскиот премиер Бенјамин Нетјанаху.


Тевдовски – Соса: ММФ ќе помогне во спроведувањето на реформите


Скопје, 28 февруари, 2018 - 14:54 (META) 

Министерот за финансии, Драган Тевдовски денеска се сретна со новоназначениот резидентен претставник на Меѓународниот монетарен фонд ММФ во Македонија, Себастијан Соса.

На состанокот било истакнато дека Македонија нема потреба од аранжман со ММФ, но Фондот ќе понуди експертска и техничка помош, со цел помагање на реформите кои се во тек и се планираат, како среднорочното буџетирање, фискалниот совет и правила и даночната реформа.

На средбата биле разменети мислења околу остварениот и очекуваниот економски раст, како и фискалната политика во тековната и наредните години.

„Притоа, беше констатирано дека се совпаѓаат очекувањата на Владата и ММФ за пораст на економијата од 3,2 проценти во 2018. Исто така, Тевдовски истакна дека мерките на фискалната политика ќе бидат насочени кон стабилизирање на нивото на јавниот долг на среден рок“, информираат од министерството.

Резидентниот претставник во Македонија, Себастијан Соса истовремено е и резидентен претставник на ММФ во Србија. Тој ќе остане со седиште во Белград, но ќе има редовна комуникација со властите во Македонија. Фондот инаку две години немаше резидентен претставник во земјава, од завршувањето на мандатот на Патрик Гитон.


Проблемот со загадениот воздух, еден од приоритетите на Шилегов за 100 дена мандат


Скопје, 3 февруари, 2018 - 13:19 (META) 

Заштита на животната средина и подобрување на состојбата со загадениот воздух, биле приоритетите на градоначалникот на Град Скопје, Петре Шилегов во првите 100 дена од мандатот. Тој денеска даде отчет за сработеното.

„Тројно го зголемивме буџетот за заштита на животната средина, кој за 2018 година изнесува 141 милиони денари, што претставува речиси трипати повеќе од ребалансот на буџетот од 2017 година, кој што, за овој сектор предвиде само 48 милиони денари. Ја организиравме најголемата акција за чистење на Скопје, што беше дел од краткорочните мерки против загадувањето, со која беа отстранети околу 3.000 кубни метри смет од улиците и јавните површини во градот. Во оваа акција, освен јавните градски претпријатија беа ангажирани неколку стотици лица, баратели на работа преку Агенцијата за вработување“, рече Шилегов.

Со есенска акција за зазеленување на Скопје, како што информираше, биле засадени 615 нови дрвја низ различни локации во градот. Акцијата за зазеленување на Скопје ќе продолжи и на пролет, кога е планирано да се засадат повеќе од 4.000 садници.

Градот Скопје обезбедил и субвенции за набавка на печки на пелети во висина до 70 отсто од вредноста на печката, трипати се вовел бесплатен јавен автобуски превоз, а се ограничил периодот во кој е дозволен дотур на стока во централното градско подрачје.

Шилегов ја стопирал и изградбата на 95 фасади, кои требаше да добијат нов барокен лик.

– Со пренамена на средствата кои беа предвидени за „Скопје 2014“, започнаа интензивни активности и подготовки за реконструкција на сите средни училишта, истите да добијат енергетски ефикасни фасади, во согласност со современите стандарди за рационализација и заштеда на електричната и топлинската енергија – рече Шилегов.

Тој додаде дека, веднаш по преземањето на градската власт се вовело двосменско работење на службите што непосредно работат со граѓаните.