Полицијата спречила тепачка на Грци со Македонци на протест во Мелбурн


Мелбурн, 21 јануари, 2018 - 12:28 (META) 

За време на протестите на грчката заедница во Мелбурн дошло до вербална и физичка пресметка меѓу група демонстранти и Македонци кои од страна ги набљудувале протестите. Главна порака на демонстрациите на Грците во Мелбурн била „Македонија е грчка”.

На протестот со транспаренти и грчки знамиња, се извикувало „Македонија е грчка“, „Скопјани“, а учествувале над 2.000 луѓе.

Протестите се одржале во центарот на Малбурн, каде дошло првин до вербална пресметка на учесници на демонстрациите и група Македонци кои, облечени во маици со македонски национални обележја, седеле на кафе во близина на грчкиот конзулат.

Потоа дошло и до физичка пресметка, по што интервенирала полицијата која употребила и солзавец.


Мета: Македонското национално малцинство е богатство за Албанија


Тирана, 5 јануари, 2018 - 21:26 (META) 

Албанскиот претседател Илир Мета, кој денеска престојуваше меѓу Македонците во општина Пустец порача дека македонското малцинство е богатство за Албанија, јави „Илинден“.

Претседателот на државата Беше пречекан од заменик-градоначалник Андон Јани, членовите на Советот на општината Пустец и претставници на МАЕИ, предводени од генералниот секретар Васил Стерјовски.

– Многу е значајно да го негувате вашиот идентитет. Јас сум посветен и понатаму да го промовирам македонското малциство, кое има прекрасни вредности и традиции. Македонското малцинство ќе биде постојано во моето внимание – изјави Мета по средбата.

Според него, поради потешкотиите со кои се соочуваат жителите на оваа општина, посебно невработеноста на младите, треба заедничка ангажираност бидејќи општината е една од оние која располага со најмногу природни богатства и убавини, извести „Илинден“.


Заев: Србија е земјата со која односите најмногу ни напреднаа во последните пет години


Белград, 21 ноември, 2017 - 13:32 (META) 

Перцепцијата на граѓаните во Република Македонија е дека Србија е на прво место од соседите со кои најмногу се подобрени односите во последните пет години, сосед со кој граѓаните имаат најдобри лични искуства, сосед чија историја и култура најдобро ги познаваат, сосед за кој се има најдобро мислење, како и сосед со кој би сакале најблиски односи, рекол македонскиот премиер Зоран Заев на заедничката прес-конференција со премиерката на Србија, Ана Брнабиќ, во Белград.

Зборувајќи за регионалната соработка, Заев нагласил дека таа ќе се базира на принципот за еднакви услови за сите, пренесува владината служба за информирање.

– Планот за регионална економска област на Западен Балкан, кој се базира на принципите на еднакви услови за сите во регионот, предвидува наши заеднички интереси: промовирање на понатамошна трговска интеграција, воведување динамичен регионален инвестициски простор, олеснување на регионалната мобилност и креирање агенда за дигитална интеграција – нагласи Заев.

Македонскиот премиер посочил дека со премиерката Брнабиќ се согласиле дека од особен интерес на двете земји е соработката во областа на дигитализацијата, партнертво на отворени влади, ИТ-секторот, како и креирање на култура на иновативни бизниси и претприемачки дух кај младите.

Заев ја оценил економската соработка меѓу Македонија и Србија како константно добра, укажувајќи на фактот што Србија е трет по обем на размена трговски партнер на Македонија, веднаш зад Германија и Велика Британија.

Српската премиерка Брнабиќ истакнала дека унапредувањето на односите меѓу двете земји е од особен интерес на Република Србија, со оглед на фактот дека двете земји делат многу заеднички интереси како што се евроинтеграциите, инфраструктурните проекти во рамките на Коридорот 10 и многу други.

Зборувајќи за малцинските прашања, Заев рекол дека српскиот народ е еден од конститутивните народи наведени во Уставот на Република Македонија и српскиот е службен јазик во општините Старо Нагоричане и Чучер-Сандево, како и еден од службените во Општина Куманово. Зборувајќи за Македонците во Србија, тој истакнал дека е добро што е во службена употреба во повеќе места, се изучува во неколку училишта во Србија, а во Статутот на Војводина, Македонците се наведени како конститутивен народ.


Македонска алијанса бара безусловно ослободување на Темелко


Тирана, 27 септември, 2017 - 10:37 (META) 

Македонската партија во Албанија – Македонска алијанса за европска интеграција (МАЕИ) порача дека најостро го осудува притворањето на Едмонд Темелко, градоначалник на општина Пустец, под обвинение за изборни нерегуларности за локалните избори во Република Македонија во 2013 година.

Од партијата велат дека Темелко не се криел од никого и редовно се јавувал во суд, според тоа што му било наложено. Велат дека немало забрана тој да ја напушта Македонија.

„МАЕИ потврдува дека Едмонд Темелко секојдневно ги извршуваше работните обврски градоначалник на општина Пустец во Република Албанија чиешто државјанство и пасош, исто така, ги поседува, но никогаш не се криел, ниту се дал во бегство, туку редовно се јавувал секоја среда, прво во Основниот суд Скопје 1, а потоа во Основниот суд Ресен, во согласност со претходно утврдените мерки на претпазливост при што му беше одземен само македонскиот пасош. МАЕИ укажува дека иако Специјалното јавно обвинителство и Основниот суд Скопје 1 знаеја дека Едмонд Темелко е државјанин и на Република Албанија, никогаш не му беше изречена мерка на претпазливост со којашто му се забранува да ја напушта територијата на Република Македонија!“, се вели во партиското соопштение.

МАЕИ смета дека приведувањето на Едмонд Темелко претставува навреда за сите Македонци во Република Албанија и „е дел од оркестрираната асимилација од албанската држава и бугарската пропаганда!“.

Партијата бара претседателот на Република Македонија веднаш да го помилува Едмонд Темелко, имајќи ја предвид и неговата нарушена здравствена состојба.


Бугарија сака да го забрза издавањето пасоши за 53.000 Македонци


Софија, 20 септември, 2017 - 13:33 (META) 

Имаме 53.000 поднесени барања со приложени потребни документи од граѓани на Македонија што не можат да станат бугарски државјани поради одредени недостатоци во законодавната база, рече бугарскиот заменик-премиер Валери Симеонов вчера, за време на тркалезната маса на тема „Демографска политика и трудова мобилност“, организирана од бугарската влада, јавува бугарската агенција БГНЕС.

Тој истакнува дека во моментов процедурата за добивање бугарско државјанство трае две до три години, а некогаш и подолго, и дека една од целите на бугарската влада е скратувањето на рокот за добивање бугарско државјанство за Македонци до шест месеци.

– Нашата цел е периодот за добивање бугарско државјанство, кога сите документи се исправни, да го сведеме на шест месеци. Тоа е нормален рок, а од тие шест месеци, четири месеци и 17 дена ќе траат процедурите што се извршуваат во рамките на извршната власт. Останатото време ќе биде за да може потпретседателот да го потпише соодветниот указ за барателот на државјанство. Но, таму работата се завлечкува, имаме проблеми поврзани со несовршеноста на законите – рекол Симеонов.

На трибината, пренесува БГНЕС, се зборувало и за олеснување на процедурата за добивање сина карта, која е наменета за привлекување висококвалификувани кадри во Бугарија.

Инаку, според напис на бугарски „Капитал“ од април годинава, во последните 15 години бугарско државјанство добиле 87.483 граѓани на Македонија. Вкупната бројка странци што го добиле државјанството во периодот од 15 години е 132.020 лица.


Македонски државјани повредени во сообраќајка кај Будимпешта


Будимпешта, 26 август, 2017 - 18:02 (META) 

Пет македонски државјани се повредени во сообраќајна несреќа во близина на автопатот М5, во близина на Будимпешта, соопшти денеска портпаролот на бугарското Министерство за надворешни работи, Иван Димов, повикувајќи информации на бугарската амбасада во Будимпешта, која е во контакт со унгарските власти.

„Во сообраќајната незгода учествувале автомобил „мерцедес“ со бугарски регистерски ознаки и возило „форд“ со германски регистерски ознаки. Мерцедесот, поради дупната гума се наоѓал во лентата за итни случаи, кога во него, со голема брзина удрил фордот. Како последица на судирот, четворица патници од „фордот“ и еден од „мерцедесот“ се повредени. Жртвите се македонски државјани“, пишува Димов.

Засега нема официјална потврда за несреќата од македонското МНР – се чекаат детални информации од македонската амбасада во Унгарија.


ТМРО: Собранието уште во 1995 година се откажа од Македонците во соседните земји


Скопје, 30 јули, 2017 - 12:25 (META) 

Очекувањата на македонската јавност дека во договорот за добрососедство со Бугарија ќе стои и признавање на македонскиот народ во Бугарија се забетонирани уште на 5 октомври 1995 година, реагираат денеска од ТМРО.

– Нема потреба да се лаже и да се крие вистината од народот за оваа договорена игра пред две децении, кој очигледно долги години се манипулира. ТМРО ја потсетува домашната јавност дека на 5 октомври 1995 г. или само два дена по атентатот над претседателот Киро Глигоров, тогашниот парламент неочекувано едногласно го смени државното шеснаесеткрако сонце, но и го смени Уставот и член 49 со кој се откажавме од Македонците во соседните држави“, велат од ТМРО.

Од партијата истакнуваат дека одговорот на прашањето зошто овој член од Уставот е отстранет треба да се бара од тогашна политичка гарнитура во Македонија.

„Околу деталите на оваа разузнавачко предавничка операција со катастрофални последици денес, одговор треба да дадат Бранко Црвенковски, Стојан Андов и Љубчо Георгиевски или поточно КСИО при ДПМНЕ, кои како тогашна опозиција, треба да објаснат зошто во 1994 г. се бојкотирани изборите со што свесно е овозможено двотретинско мнозинство – единствено досега, кое тогаш го смени уставот, а последиците доаѓаат денес“, велат од ТМРО.


Невреме во Грција: Македонско семејство се јавило во конзулатот во Солун, но не е во опасност


Скопје, 17 јули, 2017 - 16:34 (META) 

Поројните дождови што ја погодија цела Грција предизвикаа поплави по патиштата. Од невремето поплавен е патот Лариса – Козани и Ситонија, вториот крак на Халкидики, односно местата Торони, Порто Куфо и Тристиника.

Надојдената вода ги поплави паркираните возила, а десетина туристи беа заглавени. Грчките власти денеска ги евакуираа туристите, а според податоците на македонското МНР, меѓу нив нема македонски државјани.

Од МНР соопштија дека македонско семејство кое е на летување во Торони се јавило во конзулатот во Солун, но дека неговите членови не се во опасност.

Врнежите и силниот ветер во Ситонија би требало да престанат утре напладне.

Од МНР велат дека во македонскиот конзулат во Солун функционира дежурен мобилен телефон, +306987200410, на кој македонските граѓани во Грција можат да се обратат за помош.

Видеото подолу е од Торони.


Во Австралија живеат 98.441 Македонец


Сиднеј, 27 јуни, 2017 - 20:08 (META) 

Бројот на Македонците во Австралија во последните пет години се зголемил за околу 5.000 лица, покажуваат најновите статистички податоци на австралиското Биро за статистика.

Според денеска објавените податоци од минатогодишниот попис во Австралија, 98.441 лице одговориле дека имаат македонско потекло, додека според претходниот попис, спроведен во 2011 година, така се изјасниле 93.570 лица.

Сепак, според овие податоци, намален е бројот на Македонците во Австралија кои дома зборуваат на македонски јазик. Според најновите податоци, 66.019 лица одговориле дека дома го зборуваат македонскиот јазик, додека според пописот во 2011 година, нивниот број бил 68.849 лица.

На минатогодишниот попис, 38.985 лица одговориле дека се родени во Република Македонија, додека на пописот во 2011 година оваа бројка изнесувала 40.222 лица.


Двајца македонски државјани фатени во Косово со фалсификувани евра


Приштина, 25 јуни, 2017 - 19:29 (META) 

Косовската полиција уапсила двајца македонски државјани на граничниот премин Хан Елези – Блаце, на косовско-македонската граница, поради поседување 4.190 фалсификувани евра.

„Кај македонските државјани пронајдени и запленети се 75 банкноти од 50 евра,19 банкноти од 20 евра, три банкноти од 10 евра и шест банкноти од 5 евра, за кои постои сомнеж дека се фалсификувани“, соопшти косовската полиција.

На уапсените им е одреден притвор.