Македонската економија заложник на запустената железница (инфографик)


Скопје, 11 октомври, 2018 - 14:54 (META) 

Измина една недела откако „Македонски железници Транспорт“ информира дека поради појавени деформации на бетонскиот мост кој се наоѓа помеѓу станицата Градско и крстосницата Кукуричани, патниот правец Велес – Гевгелија е прекинат за сообраќај. Додека се санираше дефектот целосно беше стопиран товарниот транспорт кон Солунското пристаниште поради што македонските компании трпат огромни штети бидејќи се оневозможени производите да ги транспортираат до своите купувачи во странство.

Овој случај го илустрира недостигот од инвестиции во нова и во обнова на постоечкаата железничка инфраструктура, што го потврдуваат и статистичките бројки кои покажуваат дека со децении наназад не е изграден ниту еден километар железничка пруга.

На овој проблем укажаа од Стопанската комора на Македонија од каде што изразија надеж за брза санација на дефектот и овозможување непречен транспорт кон солунското пристаниште.

– Има ли крај на маките на „Македонски железници“, а со тоа и на македонската економија?Зошто е толку важна оваа железничка делница? Затоа што е единствената железничка точка за поврзување со солунското пристаниште, кое претставува главна транзитна дестинација за македонскиот извоз – вели Бранко Азески, претседател на Стопанската комора на Македонија.

Оттаму објаснуваат дека низ пристаништето во 2017 година поминале 3.569.045 тони стока, од кои повеќе од една четвртина е стока наменета за увоз и извоз во Република Македонија.

-Бројот на контејнери изработени во пристаништето во Солун е 401.947, од кои за Македонија се наменети приближно 7 отсто. Овие бројки неспорно говорат за стратешката позиција на ова пристаниште, како традиционално најискористена морска меѓународна врата преку која се реализираат меѓународните зделки. Во изминатите години, особено соочени со проблемите на блокадите и штрајковите кои го оневозможуваа користењето на пристаништето, македонското стопанство се обидуваше да изнајде и други опции (Бургас и Варна во Бугарија, Драч во Албанија, Бар во Црна Гора), но сите инфраструктурни, технички и економски аспекти сé уште ги прават овие опции помалку исплатливи алтернативи. Секој ден од прекинот на можностите за користење на солунското пристаниште, за македонското стопанство се мери во илјадници евра загуби – вели Азески.

Впечаток е дека поради несоодветните државни политики и слабата реализиција на капиталните инвестиции во железницата, Македонија и понатаму останува една од ретките земји во светот која нема железничко поврзување со две соседни земји(Албанија и Бугарија) и покрај тоа што различни владејачки гарнитури ветувале изградба на пруги во овие две насоки.


Железничарите го откажаа штрајкот, ќе почекаат на ноемвриската плата


Скопје, 25 декември, 2017 - 15:49 (META) 

Вработените во Македонски железници – Транспорт, се договориле да го одложат штрајкот кој претходно го договорија за утре, поради најавата од раководството на претпријатието и на Владата дека неделава ќе им биде исплатена целата плата за ноември.

Пред извесно време, со штрајкот кој траеше три дена, вработените во МЖ – Транспорт издејствуваа да им биде исплатена втората половина од платата за октомври, а тогаш најавија дека повторно ќе стапат во штрајк ако до 25 декември не им биде исплатена целата плата за ноември.

На седницата во петокот владата прифатила одлуки на двете државни енергетски претпријатија, ЕЛЕМ и МЕПСО, со кои му позајмуваат пари на АД Македонски железници – Транспорт, за исплата на ноемвриската плата.


ЕЛЕМ и МЕПСО ќе дадат заем за исплата на заостанатите плати во Македонски железници


Скопје, 22 декември, 2017 - 22:54 (META) 

На својата 44 седница вечерва, Владата меѓу другите точки направила подготовки за проект за транспортно и трговско поврзување на Западен Балкан, како и прифатила одлуки на двете државни енергетски претпријатија, ЕЛЕМ и МЕПСО, со кои му позајмуваат пари на АД Македонски железници – Транспорт, соопшти секторот за информирање на Владата.

Со тие позајмици, се обезбедени пари за неисплатените плати за ноември на вработените во МЖ Транспорт.

Исто така, владата ја разгледала и информацијата за предлог проектот „Трговијата и транспортот на Западен Балкан“ од Светска Банка, како и потребните идни активности за негова реализација. Проектот предвидува полесно прекугранично движење на стоки со усвојување на Национален Единствен Прозорец (National Single Window), и со подобрување на граничните премини во одбрани трговски коридори.

На 44-та седница, Владата го разгледала Извештајот за процена и утврдување на висината на штетата во скопскиот и тетовскиот регион од невремето и поплавите во август 2016 година и го проследила до Министерството за финансии.


Министерството за транспорт и врски до утре исплати дел од платите во МЖ-Транспорт


Скопје, 13 декември, 2017 - 13:31 (META) 

Министерството за транспорт и врски (МТВ) денеска, најдоцна до утрешниот ден, ќе обезбеди дел од потребните пари за покривање на загубите за патнички сообраќај во Македонски Железници – Транспорт, но вработените треба во најбрз рок да овозможат повторно да профункционира железничкиот сообраќај.

Ова го соопштиле вицепремиерот за економски прашања Кочо Анѓушев и министерот за транспорт и врски Горан Сугарески  на денешната средба со менаџерскиот тим на МЖ Транспорт и со претставници на штрајкувачкиот одбор. Вработените втор ден штрајкуваат поради неисплаќање на вториот дел од платата за октомври.

„Министерството за транспорт и врски во рамките на своите надлежности и понатаму ќе продолжи со исплата на средства на име на трансфери и субвенции кон Железница, но потребно е да се создадат услови за нормално функционирање на железничкиот систем. Во случај на продолжување на блокада на железничкиот сообраќај ќе се доведе во прашање исплатата на заостанатите плати за сите вработени во железничките претпријатија“, стои во соопштението од МТВ.


Продолжи штрајкот на железничарите, возовите мируваат


Скопје, 6 јуни, 2017 - 11:14 (META) 

Товарниот и патничкиот железнички сообраќај во земјава се во прекин поради штрајкот на машинскиот персонал на „Македонски железници – Транспорт“ што почна вчера. Денеска е пропуштен единствено експресниот воз  Белград – Скопје – Солун.

Штрајкот ќе трае до исполнувањето на барањето за зголемување на коефициентот за работните места, исплата на вториот дел од платата за април, како и за гаранција дека во јуни вработените ќе ја добијат и мајската плата, објасни Душко Чакаровски од синдикатот на оваа компанија.

Министерот за транспорт и врски, Горан Сугарески, на вчерашната средба со Синдикатот на машинскиот персонал и со раководството на „МЖ Транспорт“ АД Скопје најавил дека во најкратко време ќе се разгледаат сите законски можности за решавање на ситуацијата во железницата, како и за долгорочно решавање на состојбите во железничкиот сообраќај во  Македонија.


Тројца гевгеличани продавале лажни билети од „МЖ-Транспорт“ на мигранти


Гевгелија, 19 ноември, 2015 - 16:04 (META) 

Надворешната канцеларија за криминалистички работи Гевгелија до надлежното обвинителство поднела кривична пријава против тројца гевгеличани, осомничени дека изработувале и им продавале на мигрантите лажни возни билети од „Македонски железници“, соопшти полицијата.

Како што информираат оттаму, пријава е поднесена против Ќ.С. (44), С.В. (19) и В.М. (22), кои се товарат за фалсификување исправа.

„Во периодот од 13 до 21 август 2015 година, тројцата пријавени успеале да направат лажни јавни исправи – возни билети на Јавното претпријатие „Македонски железници – Транспорт“ АД и да ги продадат на лица-мигранти“, стои во информацијата на МВР за случајот.

Оттаму информираат дека Ќ.С. бил иницијатор на групата, додека С.В. и В.М. по негови насоки ја набавувале хартијата и ги правеле лажните билети.

„Во наведениот период второпријавениот и третопријавениот, откако изработиле одреден број лажни билети, секојдневно му ги давале на првопријавениот да ги продава. На 21 август, тие ги уништиле трагите и предметите со кои е извршено кривичното дело“, велат од полицијата.