Османи – Хан: Македонија ќе успее да ја оствари Агендата 2025 на ЕК


Брисел, 12 ноември, 2018 - 16:41 (META) 

Македонија успешно ќе се приклучи на стратегијата на Комисијата за проширување со земјите од Западниот Балкан и ќе успее да ја оствари Агендата 2025, му порачал вицепремиерот Бујар Османи на еврокомесарот за проширување и соседска политика Јоханес Хан на нивната денешна средба во Брисел, соопшти Секретаријатот за европски прашања.

– Планот 18 е веќе усвоен на Влада и неговата имплементација, сега за сега, се одвива непречено. Очекувам навреме да бидат адресирани сите клучни области и да се создадат услови за конфирмација на одлуката за почеток на преговорите. Собранието го даде првото зелено светло за уставните измени согласно договорот од Преспа, со што, не само што се отвори патот за имплементација на обврските од Договорот, туку се создадоа услови и за забрзување на реформскиот процес на земјата согласно заклучоците на Европскиот совет од јуни – рекол Османи на средбата.

Тој нагласил дека односите меѓу Македонија и Грција се унапредуваат со забрзано темпо, потсетувајќи на обновата на авионските летови меѓу Атина и Скопје, по пауза од 10 години.

Османи го информирал Хан и за напредокот во подготовката на преговарачката структура за почеток на преговорите, нагласувајќи дека Владата работи на тоа да го вклучи во процесот и граѓанскиот сектор и академската заедница.


Бујар Османи утре од Атина во Скопје се враќа со првиот лет по повеќе од една деценија


Скопје, 31 октомври, 2018 - 15:48 (META) 

Вицепремиерот за европски прашања Бујар Османи утре ќе отпатува во работна посета на Атина, од каде ќе се врати со авион, со првиот лет меѓу Скопје и Атина по повеќе од една деценија, соопштија од кабинетот на Османи.

Тој во Атина ќе се сретне со заменикот министер за надворешни и европски работи на Грција, Јоргос Катругалос. Тема на средбата ќе бидат билатералните односи меѓу двете земји, Договорот од Преспа и обврските на двете земји што произлегуваат од него, но и за мерките за градење доверба,  унапредување на односите меѓу двете земји и поддршката од Грција за нашите европски интеграции.

По завршувањето на официјалната посета, Катругалос и Османи на атинскиот меѓународен аеродром ќе присуствуваат на церемонија по повод првото полетување на авион кон Скопје по пауза од повеќе од 10 години. Османи и делегацијата ќе се вратат во Македонија со овој лет на компанијата „Ејџиан Ерлајнс“.


За руската агенција „Спутњик“ земјава е „С. Македонија“


Скопје, 24 октомври, 2018 - 11:57 (META) 

Руската новинска агенција „Спутњик њус“, порано позната како „РИА Новости“ и „Гласот на Русија“ веќе ја преименува Република Македонија во Северна Македонија.

Со наслов „Грција, С. Македонија, почнаа да разговараат и покрај идентитетскиот конфликт“ руската агенција која е дел од владиниот медиумски конзорциум „Росија Сегодња“, во понеделникот објави интервју со професорот Неофитос Лоизидес од универзитетот на Кент, Велика Британија за најновите случувања околу Договорот со Грција и деценискиот спор на двете земји, а во насловот земјава ја наведе како „С. Македонија“.

Со оглед на фактот дека станува збор за државна новинска агенција, која е директно под капата на руската влада, преименувањето би можело да се сфати како сигнал на официјалната руска политика дека уставните измени во македонското Собрание се веќе готова работа, и Македонија ќе го прифати името Северна Македонија, како главен сегмент на Договорот од Преспа.


Грчки медиуми пак пишуваат дека со тајните пари на МНР биле финансирани македонски и албански медиуми


Атина, 19 октомври, 2018 - 11:26 (META) 

Околу еден милион евра од тајните фондови на грчкото МНР биле искористени за финансирање на медиуми во Македонија и Албанија и за поддршка на православни цркви, а обвинителството наредило истрага за објавување доверливи информаци, пишува информативниот грчки портал „Ефимерида тон синдактон“.

Според порталот, информациите се од 10 октомври, последниот пат кога бил известен грчкиот Парламент за тајните фондови, односно една седмица пред кавгата на Панос Каменос и Никос Коѕиас на владината седница.

„Според информациите, во запечатениот документ што во Парламентот го донесе специјален службеник од Министерството за надворешни работи имаше три кодови, додека пак вкупниот износ ставен на располагање изнесуваше околу 1.000.000 евра. Првиот код се однесуваше на парите распределени на медиуми во Албанија. Вториот код се однесуваше на финансирање на медиуми во поранешната југословенска Република Македонија. Третиот код се однесуваше на средства што беа распределени за поддршка на православни цркви и главно на православието“, објави грчкиот портал.

На прашањата на потпретседателите на Парламентот зошто биле финансирани медиуми во Македонија и Албанија, било објаснето дека тоа е „за да постојат позитивни написи за Грција и да се лобира врз тамошните новинари или раководствата на медиумите во корист на грчките интереси“.

„Мета“ веќе пишуваше за овој најнов скандал по оставката на Коѕиас, но и дека не е прв пат да се спонуваат „црни пари“, и тајни фондови во Грција за „финансирање“ странски и домашни медиуми и кампањи.

Во текот на 1989-1993 година, се пишуваше дека од тајните фондови на грчкото Министерство за надворешни работи, предводено од Антонис Самарас, грчки новинари добиле 130 милиони долари за да се промовира “грчкиот карактер на Македонија”!

– Сите средства се во црни пластични ќеси, налик на оние црни вреќи ѓубре. Таму никогаш нема проверка, секогаш исплатата беше во готово. Парите се главно за пропаганда на името на Македонија, но наместо да одат во странство, оваа пропаганда е насочена кон внатре, кон нашата земја – рече Мицотакис и пред комисија повика да се разјаснат на случајот.

Самарас беше сменет во 1992 година како министер за надворешни работи од страна на тогашниот премиер Мицотакис, кој го презеде Министерството за надворешни работи.

Истрагата заврши без заклучоци. Самарас јавно призна дека големи суми на пари биле исплатени на издавачи, новинари, па дури и на локалните власти, додавајќи дека сите пари биле искористени за “национално корисни цели”.

Доцна синоќа, според „Ефимерида тон синдактон“, Обвинителството во Атина наредило итна истрага за објавување доверливи информации, по написот на грчкиот информативен портал.

Претходно, со соопштение реагираше кабинетот на грчкиот премиер, во кое вели дека е „невидената бедност на порталот да објавува наводни информации за распределувањето на тајните фондови на Министерството за надворешни работи директно ги задира националните интереси“ и обвини дека зад тоа стои Нова демократија.

„Ако господинот Мицотакис сака да се информира за тајните фондови, да побара итно средба со премиерот“, соопштуваат од кабинетот на Ципрас.

За објавените информации од грчкиот портал реагираше и Никос Вуцис, претседателот на грчкиот Парламент.

– Предизвикува огорченост протекувањето во медиумите на наводните „доверливи трошоци“ на МНР, но во исто време покренува и сериозни прашања за целта и стремежите на оние политичари и електронските медиуми кои ги даваат и ги објавуваат овие „вести“ – вели Никос Вуцис во пишаната изјава.


Српски медиуми: Уставните промени се невозможна мисија, нови избори сè поизвесни


Белград, 18 октомври, 2018 - 15:07 (META) 

„Вонредни избори во Македонија се поизвесни“, и „Промените на уставот станаа невозможна мисија“, се денешните наслови вза Македонија во медиумите блиски од власта во Србија.

Во извештајот од Скопје, агенцијата „Танјуг“ пишува дека после три дена дебата во македонскиот парламент се помали се изгледите дека власта и опозицијата би можеле да постигнат било каков договор за уставните промени. Се наведува дека опозицијата останала цврсто на ставот дека Договорот со Грција е неприфатлив, што лидерот на ВМРО-ДПМНЕ, Христијан Мицкоски јасно му го пренел на американскиот функционер Вес Мичел порачувајќи му дека за пропаста на Преспанскиот договор не е одговорна опозицијата туку владата на Зоран Заев.

Во текстот се пренесува и острата реакција на СДСМ на премиерот Зоран Заев од каде соопштуваат дека „Мицкоски во очите на демократскиот свет е срам за Македонија“. Се додава дека и прва „жртва“ на Преспанскиот договор е грчкиот министер за надворешни работи, Никоас Коѕиас кој после конфликтот со министерот за одбрана Панос Каменос поднесе оставка.

Повеќе медиуми пренесоа и дека „во очекување на гласањето во Собрание за потребата од уставни амандмани во согласност со Договорот од Преспа, Македонија денеска и официјално во Брисел ги започна преговорите за приклучување во НАТО“.


Плевнелиев: Бојкотот е голема грешка на ВМРО-ДПМНЕ


Софија, 18 октомври, 2018 - 15:01 (META) 

Бојкотот на референдумот беше повеќе од очигледен. Тој е голема историска грешка на политичката партија ВМРО-ДПМНЕ, која застана зад него. Зошто е грешка? Затоа што кога имаме момент од историска важност, не се криеш зад отсуството на опозиција. Ако се против, требаше да ја кажат позицијата. Но тоа што водечката опозициска партија се скри зад бојкот на инает, без никакви аргументи, тоа не помага на државата и на демократијата.

Со таква порака се огласи поранешниот претседател на Бугарија и член на Охридската група за поддршка на Македонија за членство во НАТО, Росен Плевнелиев во интервју за „Блумбергтв.бг“.

Тој вели дека одлуката на ВМРО-ДПМНЕ ги испровоцирала проевропските граѓани во државата да излезат на референдумот и дури 92 проценти од нив да гласаат „за“.

– Затоа, овој референдум за мене е успех. Многу жалам што народните претставници нема да бидат на висината на очекувањата – вели поранешниот бугарски претседател.

Тој во бојкотот од ВМРО-ДПМНЕ ја гледа продолжената рака на Кремљ и ја обвини Русија дека директно го финансира национализмот на Балканот за да предизвика поделби и остварување на руско влијание.

– Речиси сите националисти и популисти во регионот, вклучително и во Бугарија се директно финансирани од Русија и застапуваат геополитички интереси на Кремљ – оценува Плевнелиев.

Според Плевнелиев, сега Бугарија, како поразвиена земја подава рака на Македонија, иако претходно улогите биле обратни.

– Во многу аспекти, Западен Балкан заостана во многу работи. Се сеќавам на времето кога бев ученик, од Благоевград одевме во Штип на таканаречените „собори“. Тоа за мене беше вонземска држава. Убава, богата, имаше сè. А денеска гледате како благодарение на членството во НАТО и Европската унија, Бугарија доби шанса се разви многу подобро и ја престигна Македонија. И ако пред 30 години, Македонија била 10 години пред нас, сега е 10 години зад нас. Ние Бугарите ја осознавме својата важност и сме фактор на пријателство и стабилност во регионот. Бугарија, заедно со ЕУ и НАТО подава рака и предлага помош на Македонија, Босна и Херцеговина, Србија и Косово. Така и со Македонија – има подадена рака, судбината чука на врата и зависи од нашите браќа во Македонија да го донесат вистинското решение – вели Плевнелиев.


Вучиќ: Потребно е засилено присуство на ЕУ за да го зачуваме мирот на Западен Балкан


Белград, 18 октомври, 2018 - 12:26 (META) 

Претседателот на Србија, Александар Вучиќ, денеска изјави дека после неуспешниот референдум во Македонија и изборите во БиХ неопходно е посилно присуство на Европската Унија, за да се зачува мирот и стабилноста на Западен Балкан.

На панелот Белградски безбедносен форум на кој учествува заедно со претседателот на Австрија, Александар ван дел Белен, Вучиќ рече дека засилено присуство на ЕУ е неопходно „за да ЕУ остане тој сон, тоа светло на демократијата и слободата кон кое сме тежнееле“.

Вучиќ рече дека ЕУ треба на земјите од Западен Балкан да им понуди нешто големо и „опипливо“ и оцени дека е очигледно дека на народот во Македонија не му се допаднало тоа што му било понудено, а дека ЕУ не сметала на тоа.

– Потребно е да направиме нешто големо на Западен Балкан, мораме да понудиме нешто големо за иднината на Западен Балкан, затоа што ако ја потцениме волјата на луѓето и разочарувањето на народот на кое не сме сметале, се плашам дека ќе не доведе во ситуација кога нема да можеме да одржиме мир и стабилност – оцени Вучиќ.


Димитров: Со Коѕиас станавме вистински пријатели и постигнавме историски договор


Скопје, 18 октомври, 2018 - 10:23 (META) 

Министерот за надворешни работи Никола Димитров по повод оставката на шефот на грчката дипломатија, Никос Коѕиас вели дека двајцата со Договорот од Преспа постигнале нешто што претходните 27 години се сметало за невозможно.

-Предводени од премиерите Алексис Ципрас и Зоран Заев, со министерот за надворешни работи Коѕиас имавме интензивни месеци на комуникација, станавме вистински пријатели и во период од една година успеавме да направиме нешто кое во претходните 27 години се сметаше за невозможно – ги приближивме нашите две земји и го склучивме историскиот договор од Преспа, градејќи мост на пријателство и докажувајќи дека и нашиот регион може да решава спорови и да создава иднина – вели Димитров.

Тој на Коѕиас му посака добро здравје и успех во сите идни предизвици.

– Од наша страна, ние ќе продолжиме со силна посветеност кон заокружување на ова историско решение, заедно со останатите прогресивни и демократски сили во Скопје и Атина – додаде Димитров.


Димитров: Не е разговарано за бришење на „Македонија“ во бугарските учебници


Софија, 12 октомври, 2018 - 15:52 (META) 

На втората седница на заедничката комисија на Бугарија и Македонија за образовни и историски прашања не се разговарало за отстранување на името „Македонија“ од учебниците во Бугарија, порача претседателот на Комисијата, Ангел Димитров, демантирајќи ја информацијата од една политичка партија, која се повика на македонски медиум, како „неточна интерпретација“.

На седницата се разговарало за учебниците во двете земји и за заедничките одбележувања на празници, но не се донесени конкретни решенија.

– Забелешките од страна на Бугарија за учебниците во Република Македонија се многу повеќе од нивните. Комисијата уште е во почетна фаза на работата. Слободно можам да кажам, и тоа е сосема коректно кон колегите од Скопје, дека не сме стигнале до ниту едно сериозно, крајно решение или до заклучување на темите кои сме ги разгледувале – рече професор Димитров за бугарското радио „Дарик“.

Тој појасни дека претставниците на двете страни во Комисијата се договориле да предложат заеднички датуми или настани коишто двете влади треба да ги одобрат за заедничко чествување во двете држави.
– Вклучително и датуми сврзани со Цар Самуил – објаснува Димитров.

Претседателот на заедничката комисија вели дека е планирана размена на дополнителни пишани белешки и дури потоа ќе може членовите да се произнесат за редица прашања.

Прашан како ги оценува колегите од македонска страна, професорот вели дека не е коректно да ги коментира колегите персонално, но смета дека од комисијата е нехомогена, од гледна точка на пристрасност и предрасуди. Сепак, сите се професионалци, вели тој.

– Задачата на комисијата е со размена на аргументи да се стигне до историската коректност – вели Димитров.


Столтенберг во Белград: НАТО ќе ја прими Македонија штом го примени договорот со Грција


Белград, 8 октомври, 2018 - 12:07 (META) 

Генералниот секретар на НАТО, Јенс Столтенберг денеска повтори дека примената на договорот со името со Грција е единствениот пат до членство на Македонија во НАТО и дека не постои друг начин, ниту план Б за прием на земјата во воената алијанса.

– НАТО е подготвена да ја прифати Македонија како 30 членка многу брзо по спроведувањето на договорот за името, но на граѓаните на Македонија и на нејзините демократски институции е дали тоа ќе го направат или не. Ние сме подготвени. Нема план Б, ни алтернатива за пристапување без договорот за името – рече Столтенберг во заедничкото обраќање до новинарите со претседателот на Србија, Александар Вучиќ после отворањето на вежбите за спасување во вонредни ситуации „Србија 2018“ во Белград.

Столтенберг рече и дека НАТО во целост ја почитува војната неутралност на Србија и повторно изрази жалење како што рече, за невините жртви во бомбардирањето од 1999 година.

– Минатото не можеме да го заборавиме, но можеме да идеме понатаму во иднината – рече Столтенберг и додаде дека партнерството ќе и донесе корист и на Србија и на НАТО.

Вучиќ рече дека Србија е воено неутрално и дека тој статус „љубоморно ќе го чува“, но дека тоа нема да го спречи да оствари добра соработка со НАТО.