!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Сообраќајот кон Грција утре ќе биде во прекин поради штрајк на грчките царински служби


Скопје, 18 октомври, 2017 - 19:45 (META) 

Поради штрајк на грчките царински служби, утре ќе биде во прекин сообраќајот за сите видови возила на границата помеѓу Македонија и Грција, освен за пешаци, информираат од Министерство за внатрешни работи.

„Прекинот на сообраќајот на граничниот премин Богородица ќе биде од 6 часот утре до 6 часот на 20 октомври, на Меџитлија од 6.30 часот до истиот термин на 20 октомври, а на преминот Дојран од 5 часот до 23 часот утре“, се вели во соопштението на МВР.


Сончево и топло со температура до 28 степени


Скопје, 18 октомври, 2017 - 9:18 (META) 

Времето  денеска ќе биде сончево и топло, со мала до умерена облачност и со слаб до умерен јужен ветер.

Утринската температура ќе се движи од 3 до 9 Целзиусови степени, а максималната од 23 до 28 степени.

Во Скопје и во околината ќе биде умерено облачно со слаб јужен ветер и со температура која ќе се движи од 7 до 26 Целзиусови степени.

Стабилното, суво и топло време со позитивна утринска температура ќе продолжи и понатаму. Максималната температура ќе биде над просекот за овој период од годината. В понеделник ќе има зголемување на облачноста и локални врнежи од дожд, а температурата ќе биде во опаѓање. Ќе дува умерен до засилен ветер од северен правец.


ОМД бара од Трамп да се заложи за членството на Македонија во НАТО


Вашингтон, 17 октомври, 2017 - 18:17 (META) 

Обединетата македонска дијаспора (ОМД) побараа од американскиот претседател Доналд Трамп на претстојната средба со грчкиот премиер Алексис Ципрс во Вашингтон да се заложи за членството на Република Македонија во НАТО.

„Од воспоставувањето на дипломатските односи во 1995 година, САД ја поддржуваат Република Македонија во нејзините напори за целосна евроатлантска интеграција. Република Македонија, од друга страна, е силен сојузник и поддржувач на САД во голем број мисии, вклучително во Авганистан. Грција го блокира членството на Македонија во НАТО. Претседателе Трамп, Вие имате одговорност да го браните интегритетот на НАТО како институција и да се осигурате дека им служи на заедничките интереси на евроатлансткото семејство, а не само на тесните интереси на една земја членка. Заложете се премиерот Ципрас да ја тргне блокадата за членство на Република Македонија во НАТО, како знак дека Грција е сериозна во намерата да биде регионален лидер“, стои во писмото кое ОМД го испрати до американскиот претседател Трамп.

ОМД исто така бара Трамп наскоро да обезбеди и посета на висока американска делегација на Република Македонија.


Груевски му соопштил на Рама дека е за отворена соработка со Албанија


Скопје, 17 октомври, 2017 - 16:11 (META) 

Претседателот на опозициската ВМРО-ДПМНЕ, Никола Груевски, денеска се сретна со премиерот на Република Албанија, Еди Рама, со кого разговарал за македонско-албанските односи, актуелната политичка состојба и за стратешките приоритети на Република Македонија.

Груевски му посочил на Рама дека е за отворена соработка со Република Албанија, базирана на принципиелна основа.

– Во таа насока не помагаат различните документи, како што е тиранската платформа која, како по формата во која беше промовирана, така и во својата суштина нема да придонесе за развивање на пријателство базирано на искрени основи меѓу двете држави и може да има негативен ефект во однос на меѓусебниот соживот во Република Македонија – рекол Груевски. Тој истакнал дека добрите односи меѓу двете држави треба да се развиваат и да  придонесат за релаксирање на атмосферата за градење доверба, која е потребна за економски и за политички напредок на регионот.

Лидерот на ВМРО-ДПМНЕ истакнал дека е добредојдена поддршката на Република Албанија за интеграција во НАТО и дека постојат заеднички предизвици за напредок на патот кон Европската Унија.


Заев и Рама: Македонија и Албанија немаат отворени политички прашања


Скопје, 17 октомври, 2017 - 9:40 (META) 

Македонскиот премиер Зоран Заев и неговиот албански колега, Еди Рама, на синоќешната средба во Скопје констатирале дека Република Македонија и Република Албанија имаат одлични политички односи, без отворени прашања и дека е тоа добра основа за интензивирање на соработката во насока на примена на европските стандарди, економската соработка, како и обезбедување услови за евро-атлантски интеграции на целиот регион, соопшти владината служба за информирање.

Еди Рама стаса вчера во Скопје за „Самит 100“, а како што информираа од Владата, му честитал на Заев за фер и демократски спроведените локални избори.

– Резултатите од изборите се ветар во грб за демократската агенда, како и поддршка на реформските политики што отвораат перспективи. Тие се победа на концептот едно општество за сите, што ги обедини граѓаните. Ќе направиме сè што треба за да ја оправдаме довербата и да обезбедиме квалитетен живот за сите граѓани во Македонија – рекол премиерот Заев.

На средбата разгледани се можности за унапредување на економската и на трговската соработка помеѓу Република Македонија и Република Албанија. Посочено е дека заедничкото учество на „Самит 100“ во Скопје е доказ за политичката волја за развој на регионалната економска соработка, за поврзување на бизнис-заедниците, заеднички инвестиции, вмрежување, транспортно поврзување.

Двајцата премиери се договориле и за заеднички владини седници.


Сончево со температура до 28 степени


Скопје, 16 октомври, 2017 - 9:29 (META) 

Времето денеска ќе биде сончево и топло со мала до умерена локална облачност и со слаб северен ветер.

Минималната температура ќе се движи од 1 до 10 Целзиусови степени, а дневната од 22 до 28 степени.

Во Скопје и во околината се очекува слично време, сончево и топло со мала до умерена облачност и со слаб северен ветер. Минималната температура ќе се спушти до 5 Целзиусови степени, а дневната ќе се искачи до 26 степени.

Следува период на стабилно, суво и топло време, со позитивна утринска температура, а максималната ќе биде над просекот за овој период од годината.


Тачи очекува ДПА да постигне подобри резултати на локалните избори


Мендух Тачи, 15 октомври, 2017 - 20:04 (META) 

Лидерот на ДПА, Мендух Тачи, денеска откако го искористи своето гласачко право, соопшти дека очекува гласањето на локалните избори да помине во мирна атмосфера, а партијата да постигне добри резултати.

– Мислам дека на крајот ќе успееме да имаме мирни и демократски избори и се надевам на добар резултата на нашата партија – рече Тачи откако гласаше на избирачко место во старата градинка „Младост“ во Тетово.


Партија што ќе ги изгуби изборите се обиде да направи инциденти, тврди Беса


Скопје, 15 октомври, 2017 - 19:35 (META) 

Од Движењето Беса денеска соопштија дека во неколку избирачки места регистрирале неправилности и обиди за нарушување на изборниот процес, за купување гласови, како и обид за правење инцидент од политичка партија што, како што рече партискиот портпарол, Фатон Фазлиу, знае дека ќе изгуби на изборите.

Фазлиу рече дека брзата реакцијата на органите на редот докажува дека нема да биде оштетен изборниот процес.

Портпаролот посочи дека две гласачки места во Гостивар биле затворени, дека нивните набљудувачи добивале закани и дека во општина Сарај забележале обид за купување гласови. Тој посочи неправилности во неколку избирачки места во општина Бутел, а нагласи и дека имало обид за правење инциденти во општина Чаир.

Фазлиу рече дека поседуваат информации за разни криминални обиди од група на една партија, но дека таа се судрила со отпорот на народот кој позитивно им одговорил со излегување на гласање.

– Ова е денот кога народот ја зеде судбината во своите раце. Денешната одлука ја означува нивната судбина не само за четири години, туку за подолго. Секој кој седи дома и не излегува да гласа треба да знае дека е бесчуствителен кон својата иднина и кон своите деца. Сепак, им се заблагодаруваме на сите што ја извршија својата граѓанска одговорност – рече Фазлиу.

Претседателот на движењето Беса Биљал Касами денеска по гласањето на изборите во Тетово изјави дека денес е голем ден за сите на кој имаме можност да избереме наши претставници во локалната власт.

– Се надевам дека ова ќе биде можност да се избере помеѓу едно минато каде локалната власт не ги исполни задачите поради што Тетово е еден од најнеразвиените градови, каде нема вода, чистота, каде улиците не се проодни, истакна Касами, притоа изразувајќи надеж се избере нова власт која ќе ги исполни задачите и ќе биде во служба на сите граѓани без разлика на припадноста.


Жбогар и евроамбасадорите повикаа на избори без заплашување и без насилство


Скопје, 13 октомври, 2017 - 11:25 (META) 

Делегацијата на ЕУ и на амбасадите на земјите членки на ЕУ денеска порачаа дека локалните избори на 15 и на 29 октомври се можност за граѓаните да ги изразат своите гледишта за правецот во кој нивните општини треба да се движат во иднина.

„ЕУ ги охрабрува политичките лидери, нивните партии како и релевантните чинители да го искористат изборниот процес за да ја потврдат и да ја покажат својата посветеност на демократските вредности и владеење на правото. Ги повикуваме политичките лидери и партиските членови да овозможат одржување на избори без заплашување и насилство“, стои во заедничката изјава.

Делегацијата на ЕУ и амбасадите потсетуваат на важноста да се направи јасна поделба меѓу државните и партиските активности и ресурси пред, за време на изборите и по нив.

„Ги повикуваме медиумите да им обезбедат на граѓаните разновидно и објективно информирање, кое им е потребно за да донесат информирана одлука на денот на изборите. Ја подвлекуваме важноста од меѓународни набљудувачи на изборите, особено на ОБСЕ/ОДИХР. Секој глас е важен. Ги повикуваме сите граѓани да го исполнат своето демократско право на глас и на тој начин да ја обликуваат иднината на своите општини“, се вели во изјавата.


Македонија може да биде следната членка на НАТО, оцени Хачисон


Брисел, 13 октомври, 2017 - 10:38 (META) 

Постојаниот амбасадор на САД во НАТО, Кеј Бејли Хачисон, оцени дека Макдонија е земја што може да ги исполни критериумите за да стане следна членка НАТО, но додаде дека мора да се реши проблемот со името, односно да се најде решение што ќе биде прифатливо и за Грција.

Хачисон, во интервју за американскиот весник „Вашингтон пост“, рече дека ја поддржува интеграцијата на Македонија во НАТО, но потсети дека новите земји членки треба да исполнуваат одредени демократски и воени стандарди.

– Пред 10-15 години имаше дебата и донесена е одлука да имаме политика на отворени врати и да ги вклучиме балканските и балтичките земји и да имаме стандарди што ќе ги направат посилни. Ако имаме исполнети стандарди на демократија, војска и на владеење на правото, тогаш овие земји ќе бидат поспособни да се бранат самите и да опстанат како демократии на долг рок. Политиката на отворени врати сè уште е тука и стандардите се тука – рече Хачисон.

Сепак, Хачисон истакна дека поради спорот со Грција, нема едногласно гласање за членството на Македонија.

– Сметам дека сите ја гледаат Македонија и нејзиното исполнување на овие стандарди. Има уште малку до целосно исполнување, но верувам дека ако кажат дека се близу до договор за спорот за името, а ние сакаме да имаат име какво што тие сакаат или во некоја друга форма, мора да има едногласен консензус. Сметам дека се многу близу. САД ги поддржуваат и ако можат да го исполнат последното парче на внатрешен план и да работат на слободни избори и силна влада, тогаш ќе бидат следната земја членка – изјави Хачисон.