Ципрас: Преговараме врз основа на имињата предложени од Нимиц


Атина, 23 мај, 2018 - 16:28 (META) 

Ние јасно изјавивме дека преговараме врз основа на четирите имиња предложени од ОН, конкретно пакетот предлози од медијаторот Метју Нимиц, рече грчкиот премиер Алексис Ципрас во Парламентот, одговарајќи на критиките упатени од лидерот на опозициската Нова демократија, Киријакос Мицотакис, во врска со името „Република Илинденска Македонија“.

Грчкиот премиер на Мицотакис му возвратил дека владата јасно и навремено излегла со став, а лично тој се стремел кон што е можно побрзо информирање.

– Од Софија, пред да се вратам, во моите изјави на прес конференцијата реков дека, и покрај напредокот, уште имаме пат да поминеме за да имаме договор, но и дека приоритет за нас, за грчката страна, е обезбедување на ерга омнес и уставна ревизија и, како што видовте, за ова прашање имавме важен напредок. Господинот Заев е првиот премиер од соседот што јавно ја прифати оваа перспектива за сложено име, ерга омнес со уставна ревизија. Ова го немате до сега видено во период кога вашата партија се наоѓаше во влади што преговараа, како што и немаме досега видено да се врши толку голем притисок врз извршната опозиција на соседната земја – рече грчкиот премиер и додаде дека нема дополнително да говори за суштината на преговорите, бидејќи утре ќе се одржи нова средба на министрите за надворешни работи на двете земји со медијаторот Нимиц.

Претходно, претседателот на Нова демократија, побара од грчкиот премиер јасно да каже дали го отфрлил предлогот за „Република Илинденска Македонија“ или „сѐ уште тајно се разговара за тоа“.


Кумуцакос: Каменос со изјавата ги поткопува обидите на владата


Атина, 23 мај, 2018 - 9:29 (META) 

Со изјавата дека нема да има решение во разговорите за името, Панос Каменос ги поткопува преговорите што се во тек, смета одговорниот за надворешна политика во грчката опозициска партија Нова демократија, Јоргос Кумуцакос.

– Ако ова е изјавата на Каменос, тогаш владата има голем проблем, бидејќи додека преговорите се во тек и додека Коѕиас се наоѓа во Вашингтон и Њујорк за овие преговори, се појавува министерот за национална одбрана и во суштина ги поткопува напорите на владата. Ова е голем проблем, голем проблем што пред себе го има владата и треба да го реши – изјави Кумуцакос по конференција во Атина, коментирајќи го ставот на грчкиот министер за одбрана, извести МИА.

Во однос на името „Република Илинденска Македонија“,  што според соопштението на Нова демократија во петокот вечерта, грчката Влада го разгледуваше како предлог за евентуален договор, а 24 часа подоцна, од кабинетот на Ципрас индиректно го отфрлија. Одговарајќи на прашање на дописничката на МИА од Атина Кумуцакос уште еднаш го повторува ставот на неговата партија против ова име и вели дека ова „не е прв пат што владата е изгубена во превод“.

– Тоа се има случено повеќе пати, дали на дипломатско, дали на економско ниво. Тоа е нивни проблем и јас не можам да го толкувам. Едноставно ќе треба во следните денови да разјаснат која точно е нивната позиција. Во секој случај многу ми е тешко да разберам како грчката Влада прифати, па дури и како предмет на разговор, едно име што има тешка политичка и геополитичка одговорност,  односно наследство што е идентификувано со „македонскиот иредентизам“ и со македонската експанзија – вели Кумуцакос и додава дека „прославите на Илинден се моментите кога се отвораат карти на Голема Македонија“.


Каменос: Нема да има решение за името, не прифаќам име со терминот Македонија


Атина, 22 мај, 2018 - 16:57 (META) 

Грчкиот министер за одбрана и коалициски партнер во владата, Панос Каменос, вели дека решение за името нема да се најде. Лидерот на Независни Грци во интервју за радиото „Алфа989“ уште еднаш ја повтори позицијата дека неговата партија нема да гласа за сложено име со терминот Македонија, без разлика дали, како што рече, ќе се вика „Илинден, Свети Илија, дали ќе се вика Горна, дали ќе се вика Долна, Вардарска Македонија, тоа е Македонија“.

– Верувам дека нема да се најде решение. Верувам дека нема да се најде бидејќи самите Скопјани го имаат убедено нивниот народ во еден мит што го изгради Тито и што се врти околу името Македонија. Јас имам јасна позиција, нема никогаш да гласам за име што го содржи терминот Македонија. Независни Грци ова го имаат во основачката прокламација, ние нема шанси да гласаме кое и да е името дали Горна, Долна или Свети Илија – рече Каменос во интервјуто.

Според коалицискиот партнер во грчката влада предуслов за договор е да се направат уставни промени за кои смета дека не би поминале во македонското собрание.

– Грција водеше преговори, ја доби играта на меѓусебни обвинувања, покажа дека не е таа што го турка Скопје, самите си се самоубиваат, самите одлучуваат дека не го менуваат нивниот Устав. Штом не го менуваат нивниот Устав, запира секаков разговор – додаде Каменос во интервјуто.


Најдобро е името да произлезе од предлозите на Нимиц, вели Ѕанакопулос


Атина, 21 мај, 2018 - 14:44 (META) 

Грчката страна инсистира на тоа дека најдобро решение е избор на едно име од оние што ги достави медијаторот Нимиц во неговите предлози, вели портпаролот на грчката Влада и министер без ресор Димитрос Ѕанакопулос, во интервју за грчкото радио „Реал фм“.

Ѕанакопулос го поздравил прифаќањето на ерга омнес, споменувајќи го како позитивна разврска и позитивен чекор од средбата на двајцата премиери.

-Што се однесува на името, не сме стигнати до таму. Секако постојат предлози што биле ставени на маса, но, сепак, грчката страна инсистира на тоа дека најдобро решение е избор на едно име од оние што ги достави медијаторот Нимиц во неговите предлози. Но, не сме стигнати до таму, треба да поминеме уште пат за да можеме да говориме за конечен договор, вели Ѕанакопулос во интервјуто и додава дека секако дека се разговара и „за предлозите на нашите соседи, но, сепак, преговорите функционираат во една конкретна рамка и добро е да се држиме до таа“.

– Ние го поздравуваме прифаќањето ерга омнес од соседите, одговорно ги продолжуваме преговорите, нешто што не гледам дека го дели и го прави опозицијата и говорам за опозицијата речиси во целост, додаде портпаролот на грчката Влада и министер без ресор, упатувајќи критики до Нова демократија дека нема расположение да функционира конструктивно.


Мицотакис: Илинденска Македонија е олицетворение на иредентизмот


Атина, 21 мај, 2018 - 10:17 (META) 

Илинден и илинденското востание се идентификуваат со македонскиот иредентизам, смета лидерот на грчката опозициска Нова демократија Киријакос Мицотакис при посетата на грчкиот остров Крф и додаде дека неговата партија никогаш нема да го прифати ова име.

– Во изминатите денови слушнавме и јас лично бев избрифиран, дека се разговара за име на Скопје, за името „Илинденска Македонија“. Значи, да разјасниме одредени прашања за оние кои се чини дека не ја познаваат добро нашата историја. Илинденското востание и името на Илинден се идентификуваат со македонскиот иредентизам. Тоа е име што беше идентификувано со националистичко востание, кое тогаш, како централен слоган, го имаше Македонија на Македонците и формирање на една голема Македонија, со главен град Солун. Со други зборови, истото име за кое разговараше и веројатно уште разговара Ципрас, е олицетворение на иредентизмот – рече Мицотакис и додаде дека му се чини дека „секогаш кога Ципрас преговара ноќе и сам, е опасен за националните интереси.

Претседателот на грчката конзервативна партија одново ги спомена позициите на Нова демократија за ерга омнес име и уставна ревизија како предуслов за било кое решение и го повтори ставот дека тие нема да го прифатат конкретното име.

– Навистина се надевам, иако господинот Ципрас уште не не известил, дека ова име веќе го отфрли како неприфатливо, бидејќи ја навредува историјата на нашата земја и кое под никакви околности не може да биде прифатено 0 додаде лидерот на Нова демократија.


Ѕанакопулос: Многу имиња се најдоа на маса, немаме стигнато до конкретно решение


Атина, 18 мај, 2018 - 16:56 (META) 

Министерот без ресор на Грција и портпарол на Владата, Димитрис Ѕанакопулос во интервју за грчкото радио „Алфа 989“ одби да ги коментира натписите во медиумите дека Илинденска Македонија е предлогот од македонска страна.

Ѕанакопулос, вели дека многу имиња се нашле на маса, но дека двете страни се уште не стигнале до конкретно име.

– Многу имиња се најдоа на преговарачката маса. Во овој момент, не можам да кажам нешто повеќе. Сѐ ова се однесува на суштинската содржина на преговорите, кои треба сите да ги почитуваме дека не може да бидат предмет на јавна дискусија. Повторно ви велам, многу имиња се најдоа на маса. Во овој момент, немаме стигнато до нешто – вели Ѕанакопулос во интервјуто.

Во однос на тоа дали е можно до средината на јуни да се постигне решение, грчкиот министер и владин портпарол вели дека не сака да дава предвидувања за исходот на преговорите.

– Она што е сигурно е дека постои политичка волја. Сепак, како што кажа и премиерот, имаме уште пат да изодиме за да стигнеме до заемено прифатлив договор. Така функционираат преговорите. Не можеш да го предвидиш успешниот исход. Секако, можеш да работиш во оваа насока. И ова, Ве уверувам дека го прави грчката влада, со чувство на одговорност за решавање на едно прашање што ја измачува нашата земја, но и поширокиот регион, над 30 години – додава Ѕанакопулос.


Пресуда на Стразбур против Македонија за неправедно протерана бегалка


Стразбур, 18 мај, 2018 - 12:51 (META) 

Европскиот суд за човекови права донесе пресуда за случајот „Љатифи против Република Македонија“, со која се утврдува повреда на членот 1 од протоколот 7 на европската конвенција за човековите права, кој се однесува на процедуралните гаранции во случај на протерување на странци.

Како што образложува судот во Стразбур, жалителката Ѓилизаре Љатифи, родена во 1991 година, на осумгодишна возраст, заедно со своето семејство, избегала од Косово во Македонија, каде што во 2005 година ѝ бил одобрен азил и ѝ бил дозволен престој.

Азилот и престојот ѝ биле продолжувани сè до 2014 година кога министерството за внатрешни работи ѝ го прекинува азилот, со тврдење дека таа претставува закана за националната безбедност. Љатифи се жалела на ваквата одлука и започнала административно-судски постапки кои не завршиле во нејзина корист, бидејќи судските инстанции се повикувале на документи од класифициран карактер во кои жалителката немала увид, со што се оневозможило нејзиниот случај адекватно да биде презентиран во поведените постапки.

Според судот во Стразбур, во овој случај постои прекршување на процедуралните гаранции во случај на протерување странци.


ВМРО-ДПМНЕ и партиите на Албанците не коментираат за „Илинденска Македонија“


Скопје, 18 мај, 2018 - 12:28 (META) 

ВМРО-ДПМНЕ нема информации околу процесот што го води Владата и несериозно е сега да лицитира, вели директорот на Центарот за комуникации на ВМРО-ДПМНЕ, Иво Котевски, во изјава за „Порталб“.

Вчеравечер и денеска многу медиуми, повикувајќи се на дипломатски извори, напишаа дека решението за кое македонскиот премиер Зоран Заев и грчкиот Алексис Ципрас констатирале дека е обострано прифатливо, е Република Илинденска Македонија.

– Несериозно е да лицитираме за вака сериозно прашање. Веќе кажавме дека ВМРО-ДПМНЕ нема информации околу процесот што го води Владата. Не знаеме ниту кој е опсегот што се договара, ниту дали е договорено некакво име кое е прифатливо за двете страни, а нема информации ниту како предвидуваат да ги решат другите идентитетски одредници – вели Котевски за „Порталб“.

Не сакаше да коментира ниту вицепремиерот Бујар Османи, во својство на портпарол на ДУИ.

– Не коментирам шпекулации – гласи кусиот одговор на Османи до „Порталб“.

Од движењето БЕСА, односно крилото на Африм Гаши, велат дека очекуваат официјален одговор, кој потоа ќе се разгледува и ќе се формира партиски став.

– Иако се шпекулира, ние немаме официјално соопштение дека тоа е името кое се предлага. Меѓутоа, ако тоа име биде предложенно и формално, телата на нашата партија ќе го разгледува и потоа ќе излеземе со став – објаснува портпаролот Орхан Муртезани во одговорот за „Порталб“.

И Алијансата за Албанците вели дека не може да се коментира ништо додека не стаса формално известување.

– Не можеме да коментираме за неофицијални решенија, а официјалниот предлог ќе се разгледува од партиските тела – велат од партијата на Зијадин Села.

Од БЕСА на Билал Касами, велат дека немаат конкретна комуникација со страните кои преговараат.

“Досега многу шпекулации дојдоа за многу различни имиња. Немаме конкретна комуникација од страна на преговарачите и не можеме да дадеме било каков официјален став. Во принцип ние поддржуваме брзо решение и такво кое ќе вклучува елементи на мултиетничка и мултирелигиозна реалност што државата ја има. Секое решение што ќе идентификува етничка или верска заедница, ќе донесе уште поголеми поделби во општеството – вели портпаролот на партијата, Абдуш Демири.


ВМРО-ДПМНЕ повторно повика Заев да каже што се договара за името


Скопје, 15 мај, 2018 - 14:41 (META) 

Опозициската ВМРО-ДПМНЕ денеска повторно го повика премиерот Зоран Заев да соопшти на јавноста што се разговара за името и повторно побара лидерска средба.

– Трет ден имаме молк од владата и премиерот Заев на повикот за итна лидерска средба на која ќе се разговара за деталите и тековите на  најважното прашање на граѓаните на Република Македонија, прашањето за името. Единствените информации со кои располага македонската јавност се оние кои се од грчките медиуми. Дополнително на ова претходеше еден процес на ретерирање во изјавите на премиерот и владините претставници околу прашањето за организирање на референдум и непромена на Уставот, што само ги зголемува дилемите дека работите се движат во непосакуван правец за Република Македонија – порача генералниот секретар на партијата, Игор Јанушев.

Тој побара премиерот Заев јавно да излезе и да каже што се преговара за името, посочувајќи дека со сегашната ситуација Македонија ја става пред свршен чин.

– Дали решението кое го договарате или веќе сте го договориле значи капитулација на Република Македонија? Нема ниту една причина да нема итна лидерска средба. Власта се плетка во сопствените лаги и лажни надежи искреирани за народот. Кажаа дека претседателот Иванов не е тука, а претседателот на државата  е тука. Кажаа дека проблем бил терминот на одржување на средбата, а  досега лидерите не се воопшто исконтактирани за можен термин. Обврска на владата е да бара консензус за вакви историски прашања. Итната лидерска средба ќе помогне, никако не може да одмогне – порача Јанушев.


Димитров зборуваше за „Убавата Македонија“, Коѕиас дофрли дека и Албанија е убава


Атина, 11 мај, 2018 - 14:06 (META) 

Шефот на македонската дипломатија Никола Димитров во обраќањето пред неговите колеги во Сунио се осврна на насловот на конференцијата „Иднината на Европа“ велејќи дека за земјите кандидати за членки во ЕУ од Балканот, „иднина“ и „Европа“ се два збора синоними, јави дописничката на МИА од Атина.

– За нас на Балканот, државите кандидати, земјите аспиранти, иднината на Европа, двата збора од насловот на сесијата се речиси синоними. Кога мислиме на нашата иднина мислиме на Европа, кога мислиме на Европа се работи за нашата иднина. Ние исто така се чувствуваме и препознаваме дека се обидуваме да фатиме подвижна цел – рече Димитров во почетното обраќање.

Шефот на македонската дипломатија додаде дека оваа е важна година за регионот.

– Мислам и верувам во многу историска година поради бугарското претседателство, поради различни елементи што го одново го вратија вниманието на Европа кон регионот и дека имаме можност да успееме и имаме опасност да паднеме – рече Димитров и додаде дека на сите им е јасно дека членството во ЕУ нема да се случи преку ноќ, туку дека се потребни години, но како што наведе „треба да инвестираме политичка енергија и политички капитал во процесот што на некој начин ќе ја комплетира Европа“.

„Beautiful Macedonia“ е терминот што го искористи шефот на македонската дипломатија говорејќи за нашата земја, на што неговиот грчки колега Никос Коѕиас, неофицијално, односно не зборувајќи во микрофон, му дофрлил дека и Албанија е исто така убава, а Димитров одговори дека постои поубава.

На конференцијата за иднината на Европа во Сунио, освен Македонија и домаќинот Грција, учествуваат и министри од Словачка, Унгарија, Црна гора, Босна и Херцеговина, Полска, Романија, Бугарија, Хрватска, Словенија, Чешка и Косово.

На маргините на конференција, се очекува министерот за надворешни работи на Македонија, Никола Димитров да одржи повеќе билатерални средби