!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Поврзување на бизнисот и на информатичката технологија – главна тема на годинашната конференција на „Мајкрософт“


Скопје, 18 октомври, 2016 - 14:09 (META) 

„Мајкрософт Македонија“ следниот месец, на 16 и на 17 ноември, ќе одржи конференција насловена „Мајкрософт визија: рилоудед“, на која ќе присуствуваат повеќе од 300 директори, менаџери и професионалци од ИТ-секторот од повеќе земји.

„Сите тие ќе бидат дел од новата, освежена и дополнета „Мајкрософт визија конференција“, која веќе со години е најважниот настан во ИТ-индустријата, а од годинава и најголемиот настан што ја поврзува ИТ со бизнис-секторот, со образовниот и со јавниот сектор. „Мајкрософт визија: релоудед“ ја раскажува новата приказна за интегрираните бизнис-решенија на „Мајкрософт“. Во три предавања ќе бидат презентирани потенцијалите на дигиталната трансформација на денешното време и можностите за зголемување на продуктивноста, користејќи ја технологијата во рацете на бизнисот, односно како да се направи повеќе, побрзо и со помалку“, стои во соопштението на „Мајкрософт Македонија“.

Главен говорник на конференцијата ќе биде Мајкл Кугелер, генерален директор за регионот кој опфаќа 15 земји во Централна и во Источна Европа. На настанот ќе се обратат и Петар Иванов, генерален директор на „Мајкрософт“ за Македонија, Бугарија и за Косово и Љупчо Георгиев, директор на „Мајкрософт“ за Македонија и за Косово.

– Нашата стратегија е да го трансформираме работниот простор преку наjдобрите облак-решениjа на „Мајксоофт“, кои ќе им помогнат на нашите клиенти да ги стават своите податоци во функција, да ја зголемат продуктивноста на својот бизнис, како и да заштедат пари преку еволуциjа на работните процеси. Целта на „Мајкрософт“ е да им дадеме на луѓето комплетна контрола над своето време за да можат да ги завршат сите работи – во секое време, на секое место и на која било направа“, изјави Љупчо Георгиев, директор на „Мајкрософт“ за Македонија и за Косово.

На конференција, меѓу другото, „Мајкрософт Македонија“ во соработка со „Цертиадриа“ ќе обезбеди и бесплатни ваучери за 30 кандидати вработени во јавната администрација да можат на самото место да го полагаат испитот „мајкрософт офис спешлст“.

Регистрацијата за учество на конференцијата се врши преку официјалната веб-страница: www.vizijareloaded.mk.


Софтверски донации од „Мајкрософт“ за поддршка на граѓанскиот сектор


Скопје, 21 јуни, 2016 - 20:45 (META) 

Фондацијата „Метаморфозис“, заедно со локалната канцеларија на „Мајкрософт Македонија“, денеска во Конгресниот центар на Скопски саем, организираше ден на „Мајкрософт“, посветен на граѓанскиот сектор „Со технологија до успех“.

Претставниците на граѓанскиот сектор имаа шанса да дознаат повеќе за можноста да добијат софтверски донации од програмата на „Мајкрософт“ за поддршка на граѓанскиот сектор, која ја спроведува „Метаморфозис“, преку платформата „Теchsoup Balkans“.

Влора Адеми, менаџер за академските програми на „Мајкрософт“, рече дека нивната амбиција е да ги поттикнат продуктивноста, соработката, споделувањето на идеи и креативноста.

– „Офис 365“ и „офис 2016“ се дизајнирани да им овозможат на луѓето да се фокусираат на прогресот, не на процесот, на заедничкото работење, споделување на ресурси во кое било време на кој било уред. Ние во „Мајкрософт“ отсекогаш сме ја препознавале важноста на работата на непрофитните организации и верувавме дека може да им помогнеме со тоа што ќе им ја ставиме на располагање нашата најнова технологија. Така, во рамки на нашите програми за општествена одговорност, ја креиравме иницијативата „Со технологија до успех“ (Technology for good) за да придонесеме за решавање на комплексните социјални и општествени проблеми. „Мaјкрософт“ е горд што има можност да соработува и да поддржува повеќе од 86.000 непрофитни организации во светот, вклучувајќи ја и Македонија, на кои им овозможува технологии што им се потребни да работат со локалните заедници – изјави Адеми.

Според извршниот директор на Фондацијата „Метаморфозис“, Бардил Јашари, овие настани се дел од континуираните напори за градење на капацитетите на граѓанските организации, за тие да станат поефикасни, подобри и поактивни во исполнување на нивните мисии.

-„Метаморфозис“ го помага градењето на капацитетите на невладиниот сектор преку ширење знаење, со помош на обуки и на менторства, обезбедување пристап до знаења преку издавачка дејност, а и преку обезбедување пристап до различни софтверски решенија – како што се во овој случај технологиите на „Мајкрософт“. Конкретно, „Метаморфозис“ овозможува софтверски донации преку платформата „Techsoup Balkans“. Со поддршката на „Мајкрософт“, „Метаморфозис“ на невладините организации од Македонија, Косово и од Албанија им нуди можности за добивање легален софтвер во форма на донации. Како дел од платформата, „Метаморфозис“ овозможува и директни консултации за граѓанските организации во рамки на отворените денови (секој втор петок), како и на индивидуално барање, за што повеќе организации од Македонија да имаат прилика да ги искористат можностите за донации – изјави Јашари.


Најавен ден на „Мајкрософт“ посветен на граѓанскиот сектор


Скопје, 19 јуни, 2016 - 11:35 (META) 

Фондацијата „Метаморфозис“, заедно со локалната канцеларија на „Мајкрософт Македонија“, задутре, 21 јуни, организира ден на „Мајкрософт“, посветен на граѓанскиот сектор „Со технологија до успех“.

Настанот, кој задутре во 10 часот ќе се одржи во Конгресниот центар на Скопски саем, ќе им овозможи на претставниците на граѓанскиот сектор да дознаат повеќе за нивните можности како да добијат софтверски донации од програмата на „Мајкрософт“ за поддршка на граѓанскиот сектор, која во Македонија ја спроведува „Метаморфозис“, преку платформата „Теchsoup Balkans“.

На настанот ќе бидат презентирани совети и конкретни примери на фукционалностите на „офис 2016“ за продуктивност, тимска работа и креативност, а ќе биде презентирана и новата понуда од „Мајкрософт“ за невладините организации: Платформа за податоци и „Power BI“, како и други технологии што придонесуваат во подобрувањето на работата на граѓанските организации.

Бројот на учесници е ограничен, поради што пријавувањето ќе трае до 20 јуни, до 18 часот. Селекцијата на пријавените учесници ќе биде извршена според редоследот на пријавување. За учесниците од други градови, ќе биде обезбедено покривање на патните трошоци во висина на повратен автобуски билет.


Љупчо Георгиев е новиот генерален директор на „Мајкрософт“ за Македонија и Косово


Скопје, 31 март, 2016 - 14:09 (META) 

Љупчо Георгиев е новиот генерален директор на „Мајкрософт“ за Македонија и Косово. Тој на 2 април ќе ја преземе позицијата од Стефан Плавјански, кој беше директор три години.

Георгиев има 19 годишно искуство во оваа област, а пред да му се придружи на тимот на „Мајкрософт“, Георгиев работел во „Густав Кејзер тренинг интернационал“ каде што работел како консултант, лидер за обука и тренер.

– Воодушевен сум од можноста да придонесам за успехот на компанијата и да направам силно влијание врз развојот на бизнисот и земјата – изјави Георгиев.   

 


„Мајкрософт“ го претстави „виндоус 10“


Скопје, 1 октомври, 2015 - 16:55 (META) 

„Мајкрософт“ завчера во кино „Синеплекс“ организираше ден на „виндоус 10“ и официјално го промовираше новиот оперативен систем на деловните корисниците и на партнерите.

„Овој „виндоус 10“ e без конкуренција најдобриот „виндоус“ кој досега бил објавен и во него се собрани најдобрите искуства, знаење, технологии и иновации. „Виндоус 10“ им овозможува на луѓето и на организациите да ја зголемат продуктивноста во работењето и целосно да ги реализираат своите потенцијали“, велат од „Мајкрософт“.


„Мајкрософт“ слави 25 години „пасијанс“


Вашингтон, 19 мај, 2015 - 13:53 (META) 

Пред 25 години, во мај 1990 година, на оперативниот систем „виндоус 3.0“ се појави „пасијанс“ – вградена игра со карти која стана омилена забава на корисниците во целиот свет. Оваа култна игра заслужи компанијата „Мајкрософт“ да ѝ го прослави 25. роденден со официјална прослава – голем турнир.

Прелиминарните турнири ќе се одржат во рамките на компанијата, а на нив вработени на „Мајкрософт“ од оваа недела до почетокот на јули ќе си ги одмерат силите во сложување карти. Потоа ќе биде направена листа на најдобрите, а истиот предизвик кој го имале вработените ќе биде доставен и до јавноста. Така секој ќе има можност да види колку е „јак“ во „пасијанс“ во споредба со луѓето од компанијата, кои ја создадоа играта.


„Мајкрософт“ нуди награда од 11.000 евра


Вашингтон, 14 мај, 2015 - 20:42 (META) 

Пребарувачот кој ќе биде замена за „интернет eксплорер“ ќе го носи називот „еџ“ (Edge), а ќе се испорачува со оперативниот систем „виндоус 10“.

Развојниот тим ветува едноставен и брз интернет-пребарувач.

Колку „Мајкрософт“ е подготвен да го докаже квалитетот на својот нов пребарувач, говори и паричната награда од 11.000 евра за секој експерт што ќе најде некој технички пропуст.


„Мајкрософт“ купи технологија за дигитални моливи


Редмонд, 4 мај, 2015 - 13:50 (META) 

„Мајкрософт“ од израелската компанија „Ен-триг“ ја купи технологијата поврзана со дигиталното моливче кое се испорачува со нејзиниот таблет „сурфејс 3“.

Иако условите од купувањето не се објавени, како што пишува „Вол стрит џурнал“, „Мајкрософт“ платил 30 милиони долари за технологијата која стои зад дигиталниот молив кој се испорачува со таблетите „сурфајс про 3Е“ и „сурфејс 3“. „Мајкрософт“ соработува со „Ен-триг“ од 2008 година и има околу шест отсто удел во компанијата.

„Ен-триг“ е основана во 1999 година, а развива дигитални моливи и чипови за екрани чувствителни на допир. Компанијата има седиште во Израел, вработува околу 150 лица, сопственик е на околу 100 патенти, а соработува и со други компании, како што се „Леново“ и „Сони“.


Апликациите на „Мајкрософт“ ќе бидат прединсталирани на уредите со „андроид“


Вашингтон, 25 март, 2015 - 15:36 (META) 

Компанијата „Мајкрософт“ објави дека најдоцна до крајот на годинава ќе почне да ја применува практиката за таблетите на „Самсунг“ и на „Дел“ со оперативен систем „андроид“ да доаѓаат со прединсталирани апликации како што се „ворд“ „ексел“, „пауер поинт“, „ван ноут“, „ван драјв“ и „скајп“.

Уште во февруари „Мајкрософт“ потврди дека „скајп“ „ван ноут“ и „ван драјв“ доаѓаат прединсталирани на телефоните „samsung galaxy S6“ и „galaxy S6 edge flagship“.

Корисниците, кои од некоја причина не сакаат да ги користат овие апликации, ќе бидат задоволни со информацијата од „Самсунг“ дека ќе постои можност за отстранување на прединсталираните апликации.


„Мајкрософт“ и „Метаморфозис“: Бесплатен „офис 365“ за невладините


Скопје, 17 март, 2015 - 13:52 (META) 

Првпат невладиниот сектор има можност да добие бесплатен пристап за „мајкрософт офис 365“ (Microsoft оffice 365) на денот на „Мајкрософт“ посветен на граѓанскиот сектор. Работилницата и трибината „Бидете иницијатор на промени со Microsoft Office 365 и облак-технологиите“ ги организираше Фондацијата за интернет и општество „Метаморфозис“, со поддршка на „Мајкрософт Македонија“.

На настанот, на претставниците на граѓанскиот сектор им беше овозможено да дознаат повеќе за можностите да добијат софтверски донации од програмата „Мајкрософт сајбергрантс“ (Microsoft Cybergrants).

– „Мајкрософт“ одамна ги препознава улогата и важноста на невладиниот сектор за напредок и за развој на општеството и преку ставање технологии и информатички софтвер и опрема на располагање на невладиниот сектор, се обидува да помогне на невладините организации во изведувањето на нивните општествено важни мисии. Она што оваа година имаме да го објавиме како новост е дека платформата „офис 365“ (Office 365) за соработка и за комуникација стана достапна за граѓанскиот сектор во Македонија. Се надеваме дека на тој начин ќе дадеме придонес за да се зголемат продуктивноста и ефикасноста на невладините организации – вели Стефан Плавјански, генерален менаџер на „Мајкрософт Македонија“.

На настанот беше презентирана и програмата „Техсуп Балкан“ (TechSoup Balkan), преку која граѓанските организации имаат можност да набават софтвер од различни компании.

– Целта на „Метаморфозис“ е да помогне на невладините организации да го зголемат својот капацитет. Ние го правиме тоа преку континуирани активности во форма на обуки, а оваа димензија на овомозожување пристап до софтвер ја имаме исто така во нашата работа. Ние во минатото промовиравме слободен софтвер, но во ситуации кога производителите на сопственички софтвер се подготвени да го помогнат општеството, ние соработуваме со нив. Најдобар пример за тоа е нашата соработка со „Мајкрософт“. Со овозможување софтверски донации, на невладините организации кои сакаат да го користат овој софтвер им се отвараат нови можности, особено преку „Техсуп Балкан“ – вели Филип Стојановски, програмски директор на Фондацијата „Метаморфозис“.