Владата ќе одлучува што со „Воинот на коњ“, „Ќосето“ и „Мајка Тереза“


Скопје, 13 ноември, 2017 - 13:27 (META) 

Министерството за култура ги добило од работната група првите елаборати за спомениците на Андон Јанев – Ќосето кај коплексот судови, на „Мајка Тереза“ и за „Воин на коњ“ на плоштад „Македонија“, соопшти министерот за култура, Роберт Алаѓозовски, кој денеска учествуваше на конференцијата за програмата на Европската Унија „Креативна Европа“.

Елаборатите, како што изјави Алаѓозовски, ќе бидат проследени до Владата, која ќе одлучи што понатаму со нив.

– Дел од елаборатите се подготвени и ги разгледуваме надлежностите на институциите на локално и на централно ниво за овие објекти – рече министерот за култура, кој појасни дека процедурите се толку згрешени што е сложено да се отплетка кој е надлежен да преземе активности во однос на овие објекти поставени во Скопје.

Алаѓозовски изјави дека културното наследство не само што не било соодветно третирано, туку дека било и злоупотребено.

– Многу актуелни градби, како скулптуралната композиција која носи чуден наслов „Мајка Тереза“ беше погрешно финансирана од програмата за културно наследство, иако таму нема никакво културно наследство. Истото се однесува и за спорните градби на Плаошник. Ние ќе го заштитиме вистинско културно наследство. Обезбедивме средства за манастирот Трескавец, обезбедивме средстав за Офицерскиот дом, ќе обезбедиме средства и за нашето најзагрозено културно наследство – рече Алаѓозовски, додавајќи дека нема да се дозволи проектот „Скопје 2014“ да продолжи и да повлекува финансиски средства.


ВМРО-ДПМНЕ: Сè што СДСМ ќе урне, ќе го обновиме кога ќе се вратиме на власт


Скопје, 3 ноември, 2017 - 20:26 (META) 

ВМРО-ДПМНЕ порача вечерва дека сè што СДСМ „ќе урне и ќе уништи од она што е создадено, веднаш по враќањето на власт ќе биде обновено и вратено таму каде што било и такво како што било“. Опозициската партија се закани и дека ќе се бара одговорност за секој што ќе учествува во разни уривања, уништување или преместувања.

Во соопштението партијата порачува дека отстранувањето на споменикот на Ќосето, како и на други личности, ќе внесе раздор во народот.

„ВМРО-ДПМНЕ укажува дека политиката на пресметка или обид за собирање на политички поени на СДС преку отсранување на спомениците на композиција на светица која за време на својот живот била и добитник на Нобелова награда за мир, скопјанката Мајка Тереза, или преку отстранувањето на обележјето на македонскиот војвода Андон Јанев Ќосето, близок и многу доверлив соработник на Гоце Делчев, Даме Груев и Христо Татарчев, човек кој сериозно го ризикувал својот живот за целите на македонската револуционерна борба за слобода, ќе биде чекор кој ќе внесе негативна енергија и нов раздор во македонското општество“, се вели во партиското соопштение.

Партијата му порача на владејачкиот СДСМ „да се фокусира на градење наместо на уривање, на создавање наместо на уништување и на решавање на проблемите на граѓаните“.


Мали „мајки терези“ собирале пари за децата од поплавените подрачја!


Скопје, 16 септември, 2016 - 16:53 (META) 

Мали деца од општината Аеродром облечени како Мајка Тереза собирале пари за училишен прибор за децата од поплавените подрачја во Скопје.

Настанот се одржал пред Спомен куќата на Мајка Тереза, по повод нејзиното прогласување за светица, како и по повод Светскиот ден на милосрдието.

На фотографиите кои Општината Аеродром денеска ги објави на својата интернет страница се гледа дека децата и воспитувачките се облечени како Мајка Тереза, наредени во круг, а пред нив бела лента на која граѓаните оставале ситни пари.

Овие фотографии на социјалните мрежи предизвикаа низа реакции.


Пораки за мир, единство и за почитување на светата миса во чест на Мајка Тереза


Скопје, 11 септември, 2016 - 14:17 (META) 

Денеска на плоштадот Македонија се одржа светата понтификална миса, крунски настан на „Деновите на Мајка Тереза“, која ја предводеше сараевскиот надбискуп, кардиналот Винко Пуљиќ, кој беше именуван од папата Франциск да го предводи овој настан во Скопје.

– Гордејте се со светата мајка. Вие, верниците, кога ќе ви падне духот и ќе се најдете во опасност да ја изгубите надежта, инспирирајте се од оваа прекрасна мајка, која со своето застапништво ќе ви помогне. Мајките кои го изгубиле мајчинството, вратете го преку почитувањето на оваа света мајка, а Вие кои се плашите од животот, учете од оваа света мајка колкава е силата во верата. Не заборавајте го овој ден и овој настан – порача кардиналот Пуљиќ.

На настанот обраќање имаше и претседателот на државата, Ѓорге Иванов, кој истакна дека единствениот вистински начин да ја покажеме нашата почит кон светата Мајка Тереза е да живееме заедно со сите наши најдлабоки верски, етнички и идеолошки разлики. Иванов нагласи дека наместо истоштувањето со политички битки за докажување на нејзиното потекло и присвојувањето на нејзното име, Мајка Тереза „би нè упатила да се угледаме на нејзиниот пример“.

– Да правиме мали добри дела со голема љубов. А за тоа не мора да одиме на крајот од светот бидејќи, како што таа велеше, почитта и љубовта почнуваат во нашиот дом, во нашето маало, во нашиот град, во нашата држава Македонија. Гледајќи нè политички разединети и поделени, би побарала од нас да не се делиме и караме, туку да си простиме, да се помириме и да се почитуваме… Би нè охрабрила да го чуваме највредното нешто што го имаме, највредното што и таа го понесе со себе во Индија, а тоа е нашиот македонски модел на соживот и почитување и прифаќање на различноста. Затоа што само така ќе научиме да живееме заедно со сите наши најдлабоки верски, етнички и идеолошки разлики – рече Иванов.

Скопскиот бускуп и апостолски егзарх Киро Стојанов ја прогласи капелата во Спомен-куќата на Мајка Тереза за светилиште на света Мајка Тереза.

Светата понтификална миса на плоштадот Македонија ја следеа голем број верници, граѓани, претставници на Католичката црква и на другите верски заедници, како и домашни и странски делегации.

Папата Франциск на 4 септември пред стотици илјади граѓани и верници на плоштадот Свети Петар во Ватикан ја прогласи Мајка Тереза за светица.


Утре голема света миса на скопскиот плоштад за канонизацијата на Мајка Тереза


Скопје, 10 септември, 2016 - 18:09 (META) 

Кардиналот Винко Пуљиќ ќе ја предводи понтификалната света миса во Скопје, која ќе се одржи утре на плоштадот Македонија, а е крунскиот настан од „Деновите на Мајка Тереза“, пренесува „Дојче веле“.

Скопскиот бискуп и апостолски егзарх во Македонија, Киро Стојанов, пред неколку недели соопшти дека папата Франциск на 24 август го именувал сараевскиот надбискуп, кардиналот Винко Пуљиќ, за негов специјален пратеник кој ќе ја предводи понтификалната света миса во Скопје.

Се очекува утре на плоштадот Македонија да се соберат голем број гости, верници и граѓани. Најавени се и високи претставници на Католичката црква и на другите верски заедници, бројни домашни и странски делегации и гости, во чест на светата Мајка Тереза.

На централниот настан во рамките на „татковинската прослава по повод канонизацијата на Мајка Тереза“, кој почнува утре во 10 часот, обраќање ќе има и претседателот на државата, Ѓорге Иванов, соопштија денеска од неговиот кабинет.

Папата Франциск на 4 септември пред стотици илјади граѓани и верници на плоштадот Свети Петар во Ватикан ја прогласи Мајка Тереза за светица.


Народна банка објави како ќе изгледа кованата пара „Мајка Тереза“


Скопје, 6 септември, 2016 - 14:09 (META) 

Народна банка го објави изгледот на кованата пара за колекционерски цели „Мајка Тереза“, која ја пушти во оптек на 11 август по повод прогласувањето на Мајка Тереза за светица.

Цената на кованата пара „Мајка Тереза“ изнесува 3.500 денари.

Кованите пари за колекционерски цели издадени од Народната банка се законско средство за плаќање во Македонија.


Заев: Испраќаме порака на обединување


Скопје, 5 септември, 2016 - 11:51 (META) 

„Драго ни е што нашата сограѓанка, граѓанин на Република Македонија, веќе е светица. Мајка Тереза – симбол на милосрдието, хуманоста, солидарноста, претставува пример како треба да им се помага на луѓето без разлика на нивните различности, без разлика на какви било поделби, етнички и религиски, национални или слично“, изјави во Ватикан, Зоран Заев, претседател на СДСМ.

– Помагањето нè прави пред Бога почесни, подобри, а секако и на сите нас во душата ни е потопло. Верувам дека овој симбол на хуманоста, на солидарноста, на милосрдието, кој е предзнак на светицата Мајка Тереза, ќе нè следи сите нас, исправени пред многу важни моменти во Македонија. Испраќаме порака на обединување, на меѓусебно помагање, без разлика кој на која вера или етничка заедница припаѓа и без разлика дали е сиромашен или богат – изјави Заев.

 


Иванов: Македонија е горда на Мајка Тереза


Скопје, 4 септември, 2016 - 15:53 (META) 

Претседателот Ѓорге Иванов по повод денешната канонизација на Мајка Тереза рече дека земјата е горда што има сограѓанка светица. Тој информираше и дека македонската делегација, која имаше почесно место на денешниот настан, имала куса средба со папата Франциск, кој му потврдил на Иванов дека ќе дојде во Македонија.

Премиерот Емил Димитриев рече дека канонизацијата на Мајка Тереза е голем настан за Македонија и за македонскиот народ.

„Во овие моменти на условно кажано политичка криза, која Македонија ја држи подолг период, убава беше можноста да се сетиме на делата на Мајка Тереза. Хуманоста, добродетелта, почитувањето едни со други, вредностите што ги промовираше Мајка Тереза, апсолутно би ни помогнале во надминување на оваа политичка криза, бидејќи нејзината помош не беше условена ниту од вера, ниту од боја на кожата, ниту од раса“, рече истакна Димитриев.

Порака за почит и за помош испрати и министерката за труд и социјална политика, Фросина Ременски. Таа рече дека со прогласувањето на Мајка Тереза за светица, испратена е порака до сите луѓе на светот, без разлика на нивната национална, етничка и верска припадност, дека сите со своите дела треба да оставаме белег на нашиот животен век – белег на мирољубивост, милосрдие, солидарност и на љубов.

„Денеска е денот кога сите ние, заедно, треба да се обврземе дека споменот и делата на светата Мајка Тереза ќе бидат наша водилка во грижа за најблиските, за децата, за оние што бегаат од злото на војната, за телесно посебните, за болните и за напуштените, за гладните…, за сите што ја љубат, ја слават и ја живеат милоста кон човекот, добрината и праведноста“, пишува во соопштението на Ременски.

Утре на плоштадот Свети Петар ќе биде одржана утринска миса во чест на Мајка Тереза, што ќе ја води државниот секретар на Светиот престол, кардиналот Пјетро Паролин.


Папата Франциск ја прогласи Мајка Тереза за светица


Ватикан, 4 септември, 2016 - 11:45 (META) 

Папата Франциск пред стотици илјади граѓани на плоштадот Свети Петар во Ватикан ја прогласи Мајка Тереза за светица.

Во тек е процесијата околу канонизацијата на светицата Мајка Тереза, а папата Франциск пред граѓаните читаше од „Светата книга на мудроста“.

На прогласувањето во Ватикан присуствува делегација на Македонија во која се претседателот Ѓорге Иванов, министерот за надворешни работи Никола Попоски, министерката за култура Елизабета Канчевска-Милеска, лидерите на ВМРО-ДПМНЕ и на СДСМ, Никола Груевски и Зоран Заев.

По повод прогласувањето на Мајка Тереза за света, во Скопје се одржува манифестација „Денови на Мајка Тереза“, која почнува денеска со света литургија во Спомен-домот на Мајка Тереза, а ќе заврши на 11 септември со прогласувањето на домот на Мајка Тереза за светилиште.

Лидерот на ВМРО-ДПМНЕ, Груевски, на својот профил на „Фејсбук“ напиша дека повел иницијатива да се воспостави меѓународен орден за заслуги „Мајка Тереза“, кој би се давал на истакнати жени од светот со особени и вонредни достигнувања во различни области.

„Замислата е орденот за заслуга да се воспостави со точен ред и прецизни критериуми со единствен домашен и меѓународен одбор во кој задолжително би учествувал секој министер за надворешни работи од Македонија, но во одборот би биле, покрај него, и други личности од Македонија, а би имало и истакнати високоавторитетни личности од различни држави и области во светот. Би се воспоставил прецизен ред по принципот како тоа што е направено во земји со долга традиција од ваков вид, на пример, Франција или Англија. Самиот чин на врачување на орденот за заслуга би бил афирмација на делото и на животот на Мајка Тереза, но и афирмација на Македонија. Се разбира, би било и огромна чест за оној кој ќе ја прими и кој ја заслужил таа награда“, напиша Груевски на „Фејсбук“.


Ватикан денеска ќе ја прогласи Мајка Тереза за светица


Скопје, 3 септември, 2016 - 11:21 (META) 

Папата Франциск денеска на плоштадот Свети Петар во Ватикан ќе ја прогласи Мајка Тереза за светица.

Предводник на македонската државно-црковна делегација на свеченоста во Ватикан е претседателот Ѓорге Иванов.

На свеченоста, покрај Иванов, ќе присуствуваат министерот за надворешни работи, Никола Попоски, и министерката за култура, Елизабета Канческа-Милевска, делегации на Католичката црква во Република Македонија и на Македонската православна црква – Охридска архиепископија, градоначалникот на Град Скопје, како и член на семејството на Мајка Тереза.

Своето присуство на манифестацијата во Рим го потврдија Никола Груевски, Зоран Заев и Али Ахмети.

По повод прогласувањето, во Македонија ќе се одржи манифестација „Денови на Мајка Тереза“, која ќе почне денеска, а ќе трае до 11 септември.

Првиот настан во рамките на манифестацијата, односно света литургија, ќе се одржи утре во Спомен-куќата на Мајка Тереза во Скопје.

Од 5 до 11 септември во Скопје ќе има серија хуманитарни активности, а централната манифестација ќе се одржи на 11 септември, недела, во родното место на светицата, на плоштадот Македонија, кое ќе се прогласи за светилиште.

Централната манифестација во Скопје ќе ја предводи кардинал – пратеник на папата.

Организатор на прославата е Скопската бискупија, а покровител е претседателот на Република Македонија, Ѓорге Иванов.