!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Николовски: Деведесет отсто од производството на јаболка во Преспанскиот Регион е загрозено


Ресен, 22 април, 2017 - 15:32 (META) 

Деведесет отсто од производството на јаболка од оваа реколта, според жителите на Преспанскиот Регион, е загрозено, изјави денеска во Крани, пратеникот на СДСМ, Љупчо Николовски.

Тој истакна дека и минатата година имало штети во производството на јаболка, но отштетата од страна на актуелната влада и на надлежното министерство не е исплатена, а доцнат и субвенциите за 2016 година, но и од претходните години.

Николовски најави дека наскоро ќе бидат деблокирани процесите во Собранието на Република Македонија и дека парламентарното мнозинство ќе ја преземе одговорноста и сите овие проблеми, еден по еден, ќе ги решава новата влада.

– Жална е сликата овде. Луѓето се во паника. Затоа сме тука да ја пратиме пораката дека на овие луѓе мора да им се помогне. Мнозинството во парламентот ќе ја преземе одговорноста. Граѓаните и земјоделците треба да бидат убедени и уверени дека врвен приоритет на новата реформска влада ќе бидат проблемите на граѓаните и нивното решавање. Доколку не беше оваа блокада од страна на ВМРО-ДПМНЕ, денес земјоделците веќе ќе имаа зелена нафта, ќе имаа редовни, навремени и зголемени субвенции, земјоделството ќе беше врвен приоритет на новата реформска влада – изјави Николовски.


Николовски: Намерно го блокирате Собранието, ја загрозувате исплатата на плати и на пензии


Скопје, 21 април, 2017 - 14:30 (META) 

На почетокот на 15. продолжение на конститутивната седница на Собранието, пратеникот Љупчо Николовски од СДСМ се јави за процедурална забелешка во која рече дека претседавачот Трајко Вељаноски го крши деловникот затоа што дозволува да се дебатира на други теми, а не на точката која е на дневен ред, а со тоа намерно се блокира Собранието.

Тој го обвини пратеникот Љупчо Димовски дека е криминалец. Токму на говорот на Димовски, пратениците на ВМРО-ДПМНЕ реплицираа, а тој даваше контрареплики.

– Постојат сериозни индиции кои говорат дека токму во овој период, кога ја правите оваа блокадата, стопирате 100 милиони евра субвенции за земјоделците. Во овој период на блокада од релевантни извори се знае дека од следниот месец ќе биде загрозена исплатата на плати, пензии и на социјална помош. Љупчо Димовски незаконски дозволи исплата на стотици илјади евра за субвенции кои не отидоа кај вистинските земјоделци, туку кај ваши функционери – рече Николовски.

На ова со процедурални забелешки се јавија Антонијо Милошоски, Илија Димовски и Љупчо Димовски.

– Тука сите зборуваме во име на народот, а тоа најмалку може да го каже тој што го претрпе најголемиот пораз на овие избори, а тоа е Љупчо Николовски. Луѓето се изјаснија и кажаа дека повеќе му веруваат на Илија Димовски отколку на Љупчо Николовски. Зборувате за криминал, па претходно расчистете го во своите редови. Сакам да ви укажам, не заканувајте се на колегите пратеници, народот го има последниот збор – рече Милошоски.

Љупчо Димовски рече дека нема да одговара на „овие глупави обвинувања“, на што Вељаноски додаде дека „не мора на секоја глупост да се одговара“.

Според Весел Мемеди од Алијансата за Албанците, кризата ја креираат тие што имаат корист од неа.

– Од оваа голготата и криза во Македонија, придобивка имаат сите деструктивни струи што постојат во државните институции и, за жал, постојат и во верските институции. Тие комуницираат на перфектен начин едни со други, без оглед на нивниот етникум. Треба да му ставиме крај на групното размислување во Македонија. Мора да сфатиме дека Македонија е сопственост на сите и мораме идентично да се грижиме за неа – додаде Мемеди.

Собраниската седница ќе продолжи во 15 часот по паузата за ручек.


ВМРО-ДПМНЕ: Грижата на СДСМ за земјоделците е лицемерна


Скопје, 13 април, 2017 - 16:35 (META) 

„Тиранската платформа за криминогеното раководство на СДС е поважна отколку судбината на земјоделците и иднината на Република Македонија“, стои во реакцијата на ВМРО-ДПМНЕ на денешната прес-конференција на пратеникот на СДСМ, Љупчо Николовски.

Од партијата велат дека грижата на СДСМ кон земјоделците е лицемерна и дека земјоделците знаат дека „единствено ВМРО-ДПМНЕ се грижи за нив и за подобрување на нивниот стандард“.

„За разлика од СДС, кој за време на неговото владеење имаше издвоено нула евра за субвенции, за време на владеењето на ВМРО-ДПМНЕ како субвенции на земјоделците им се доделени преку една милијарда евра. Земјоделците знаат дека ВМРО-ДПМНЕ ќе стори сè за да ја надмине деструктивноста на СДС, со што нивниот труд ќе биде соодветно валоризиран, односно ќе ги добијат заслужените субвенции. Пари во буџетот за субвенции има. Истите се програмирани и треба да бидат исплатени“, стои во соопштението на ВМРО-ДПМНЕ.


Николовски: Земјоделците и нивните семејства ќе го дочекаат Велигден без пари


Скопје, 13 април, 2017 - 13:12 (META) 

„Освен што се блокирани сите процеси во државата, и граѓаните се економски загрозени. Меѓу нив се земјоделците кои сè уште не ги имаат добиено субвенциите за минатата година, а многумина од нив и за претходните неколку години“, изјави на прес-конференција пратеникот на СДСМ, Љупчо Николовски.

Тој додаде дека поради несериозноста и неодговорноста на раководството на ВМРО-ДПМНЕ и на нивните пратеници, илјадници земјоделци и нивните семејства ќе го дочекаат Велигден без пари.

„Луѓето се оставени без субвенции токму во време кога најмногу им се потребни за нови вложувања. Дел од нив се задолжуваат за да продолжат да работат. Дел од нив немаат кој да им помогне, и тие, ако не посадат род, следната година нема да има ни од што да се прехранат. Со недели досегашната власт ги лаже земјоделците дека исплатата на субвенциите само што не почнала. Тоа се случува додека секојдневно смислуваат нови изговори да не им ги исплатат парите на луѓето, префрлувајќи ја одговорноста од една на друга институција“, изјави Николовски.

Тој нагласи дека и по смена на тројца директори на Платежната агенција, субвенциите не се исплаќаат, а Министерството за финансии не одговара зошто земјоделците не ги добија субвенциите што им следуваат по закон.


СДСМ во меѓународна „офанзива“


Стокхолм, 9 април, 2017 - 18:45 (META) 

Претседателката на Комисијата за труд и социјална политика на СДСМ, Мила Царовска Потпретседателот на СДСМ Дамјан Манчевски и пратеникот Љупчо Николовски остварија повеќе средби со битни фигури во политичкиот живот на Шведска и Хрватска, меѓу кои и со премиерот на Шведска, Стефан Лефвен, министерката за надворешни работи на Шведска, Маргот Волстром, како и со европратеникот Кнут Флекенштајн, потпретседател на Групата на социјалистите и демократите во Европскиот Парламент  и со  европратеничката Тања Фајон, соопшти СДСМ.

Пратеникот Љупчо Николовски, и претседателката на Комисијата за труд и социјална политика на СДСМ, Мила Царовска учествуваат на меѓународната парламентарна конференција којашто е посветена на перспективите на Југоисточна Европа и интеграциските процеси во Унијата, што се одржува во Цавтат, Хрватскa.

Притоа се сретнале со европратеникот Кнут Флекенштајн, потпретседател на Групата на социјалистите и демократите во Европскиот Парламент  и со  европратеничката Тања Фајон.

„Европратениците посочија дека очекуваат брз и мирен трансфер на власта во Македонија, деблокирање на Собранието, како и формирање на новата реформска Влада, којаштo ќе започне со спроведување на итните реформи во интерес на граѓаните“, се вели во соопштението на СДСМ.

На конференцијата присуствуваат претставници на 13 национални парламенти, како и претставници на Европскиот парламент.

Потпретседателот на СДСМ, Дамјан Манчевски, пак, е во работна посета на Кралството Шведска. Тој денеска се сретнал со премиерот на Шведска, Стефан Лефвен, со  високи претставници на Социјалдемократската партија на Шведска, којашто е и владеачка партија во земјата, на коишто е изразена јасна поддршка на демократските процеси во Македонија, а на конгресот на Социјалдемократската партија на Шведска, Манчевски имал средба со министерката за надворешни работи на Шведска, Маргот Волстром.

„Министерката Волстром пренесе очекување за деблокирање на Собранието во Македонија, избор на претседател и брзо формирање нова реформска Влада, во интерес на граѓаните и на Република Македонија“, се вели во соопштението на СДСМ.

Потпретседателот на СДСМ се сретнал и со Јенс Нилсон, пратеник во Европски парламент и со Бјорн фон Сидоф, пратеник во шведскиот Парламент, поранешен претседател на Парламентот и поранешен министер за одбрана.


Груби: Заев и Ахмети разговараа за решение за деблокирање на Собранието


Скопје, 5 април, 2017 - 21:16 (META) 

Артан Груби, шефот на кабинет на лидерот на ДУИ, Али Ахмти, потврди дека денеска во Собранието имало средба помеѓу лидерот на СДСМ, Зоран Заев. и на ДУИ, Али Ахмети.

„Денешната средба беше во насока на наоѓање решение за да се надмине блокадата на Собранието, а тоа да биде на начин кој го бараат граѓаните од нас. Нема ништо чудно и тајно, туку нормални контакти помеѓу двајца лидери“, изјави Груби во емисијата „Топ-тема“ на телевизија „Телма“.

Пратеникот на СДСМ, Дамјан Манчевски, исто така потврди дека се разговарало за следните чекори во Собранието.

„Ние не бараме од Ахмети ништо. Ние бараме конститутивната седница во Собранието да се одвива во согласност со деловникот“, изјави Манчевски.

Пратеникот на СДСМ, Љупчо Николовски денеска на прес-конференција изјави дека СДСМ и коалицијата имаат стратегија и конкретен план за да се деблокира Собранието.

„Дозволете стратегијата и планот да не ги објавуваме преку медиумите, туку конкретно да бидат операционализирани и со тоа Собранието да го деблокираме“, одговори Николовски на новинарско прашање.


Николовски: Блокадата на Собранието е на директна штета на граѓаните


Скопје, 5 април, 2017 - 15:49 (META) 

„Блокадата на Собранието е неодржлива ситуација и мора веднаш да прекине затоа што се одразува директно на штета на граѓаните на Македонија“, изјави на прес-конференција пратеникот на СДСМ, Љупчо Николовски.

Тој додаде дека раководните кадри на ВМРО-ДПМНЕ во Платежната агенција и во Министерството за финансии „буквално си играат со егзистенцијата на илјадници семејства на земјоделци со мали деца“.

„Ако од Платежната агенција има налози до Министерството за финансии, зошто Министерството за финансии не ги исплаќа субвенциите на луѓето? Ако Министерството за финансии нема пари, Кирил Миноски мора веднаш да одговори каде отидоа повеќе од 300 милиони евра од задолжувањата направени од почетокот на годината до денес? И што е поважно од интересите на граѓаните?“, изјави Николовски.

Тој нагласи дека станува збор за задоцнета исплата на субвенции за 2016 година, 2015 г., па сè до 2012 година“.

„Несериозните кадри на ВМРО-ДПМНЕ прво менуваа директори, дадоа откази, па потоа се правдаа со процедури, но тука е крајот. Досегашната криминална власт на ВМРО-ДПМНЕ до последен ден е подготвена да работи за криминалот со кој трупа богатства на своја сметка. И во февруари и во март, приоритет им биле нафтени платформи, тендерите и бизнисите на Мијалков и на Груевски“, додаде Николовски.

Според него, затоа „Трајко Вељаноски, пратениците на ВМРО-ДПМНЕ, Ѓорге Иванов, мора веднаш да се ослободат од  директивите со криминална заднина од криминалното раководство на ВМРО-ДПМНЕ и да дозволат да се изберат новиот собраниски претседател и новата демократска и реформска влада“.

„Тоа ќе значи исплата на субвенциите за земјоделците, но и решавање на сите други важни прашања од интерес за сите граѓани на Македонија“, изјави Николовски.


Николовски: ВМРО-ДПМНЕ да не ја кочи исплатата на субвенциите на земјоделците


Скопје, 4 април, 2017 - 15:56 (META) 

„Пратениците на ВМРО-ДПМНЕ и коалицијата немаат ама баш никакво право со блокадата на парламентот и понатаму да ја загрозуваат егзистенцијата на земјоделците, коишто ги немаат добиено субвенциите за ланската, но и за неколку претходни години,“ изјави на прес-конференција пратеникот на СДСМ, Љупчо Николовски.

Тој додаде дека „итно мора да се овозможи формирање на новата демократска и реформска Влада којашто ќе го реши проблемот со исплатата на субвенциите на земјоделците.“

„Егзистенцијата на илјадници земјоделци е сериозно загрозена затоа што несериозни кадри на ВМРО-ДПМНЕ и коалицијата ги узурпираат институциите и си ја префрлуваат одговорноста. Тие ги користат процедурите како изговор, за да не им ги дадат субвенциите на луѓето кои што ги заслужуваат и им следуваат по закон,“ изјави Николовски.

Тој појасни дека „досега се сменија тројца директори на Платежна агенција, а исплатата на субвенциите никако да почне.“

„В.д. директорот на Платежната агенција, Игор Златков изјави дека има потпишано налози за исплата и дека субвенциите ќе бидат исплатени. Министерството за финансии, пак, известува дека немаат добиено комплетна документација со налози за да се изврши исплата, којашто ќе зависела од состојбата на трезорот и од тоа дали има или не пари во буџетот,“ изјави Николовски.

Тој додаде дека „ова e безобразно поигрување со маката на земјоделците коишто трпат за леб, додека Мијаков и Груевски се шират и во нафтениот бизниси, а нив ги штитат пратениците на ВМРО-ДПМНЕ во Собранието и Ѓорге Иванов кој противуставно не го доделува мандатот за состав на влада на мнозинството во парламентот“.


Николовски најави повисоки плати и помали трошоци за секое семејство


Делчево, 12 ноември, 2016 - 18:45 (META) 

Носителот на кандидатска листа на коалицијата предводена од СДСМ во третата изборна единица, Љупчо Николовски, денеска пред граѓаните на Делчево соопшти дека врвен приоритет на нивната коалиција ќе биде парите да се вратат назад, кај граѓаните.

Тој најави дека во првите четири месеци минималната плата ќе биде зголемена на 12.000 денари, а до крајот на мандатот на 16.000 денари.

– Наш фокус и наша цел е просечната плата во државата да биде 30.500 денари! Тоа ќе го направиме со низа мерки за подобар живот на секој граѓанин тука во Македонија. Не само што ќе се зголемуваат платите на граѓаните туку ќе се намалуваат и трошоците на секое семејство! – рече Николовски, додавајќи дека во секое семејство на крајот на годината ќе влегува по една просечна плата како резултат на нивната мерка за враќање на 15 отсто од ДДВ во секој семеен буџет.

Николовски најави укинување радиодифузната такса, враќање на евтината тарифа на електрична енергија секој викенд и дополнително два часа секој друг ден во неделата, двапати годишно зголемување на пензиите и воведување на државна социјална пензија.

Тој истакна дека планираат да воведат и европска Младинска гаранција која ќе гарантира дека секој млад човек, четири месеци по завршувањето на своето образование ќе добие понуда за вработување, понуда за тренинг или ќе го продолжи своето образование.

Според програмата на Коалицијата 32 општини на крајот на мандатот ќе се гасифицираат во целост, со што ќе се намалат трошоците на граѓаните.

– За нас секој човек е важен, за нас секој човек е битен. Затоа, нашиот План за живот во Македонија предвидува мерки коишто ги враќаат парите назад кон граѓаните – порача Николовски.


Николовски: Офшор-компании со непознат сопственик ќе нема во Македонија


Штип, 9 ноември, 2016 - 13:09 (META) 

„Нашите анализи покажаа дека 470 милиони евра годишно од буџетот се трошат незаконски. Тие 470 милиони евра ние ќе ги пренасочиме и ќе ги вратиме кон граѓаните. Се обврзуваме дека ќе се заплени криминално стекнатиот имот и дека ќе се вратат парите испумпани од Македонија. Затоа преземаме обврска да не може во Македонија да постои офшор-компанија без да се знае кој стои зад неа и кој е сопственикот“, изјави во Штип дополонителниот заменски министер за земјоделство, Љупчо Николовски, на новинарско прашање за економските идеи од изборната програма на СДСМ.

Николовски нагласи дека токму заради согледувањето на проблемите на жителите од истокот на Македонија, СДСМ организира средби со граѓаните, но и за да поразговараат со нив за визијата и за планот за живот во Македонија што ги има Социјалдемократскиот сојуз.

– Клучните проблеми во третата изборна единица се ниските плати, невработеноста, иселувањето на младите, но и криминалот и корупцијата кои владеат и на локално ниво. Токму затоа нашиот фокус е зголемувањето на минималните плати, кое ќе важи за секој вработен во текстилната индустрија. Нашата идеја е просечната плата во државата да биде 30.500 денари на крајот на мандатот – додаде Николовски.

На прашањето какви очекуања има СДСМ за текот на изборите во оваа изборна единица, Николовски рече дека опстанале на ставот дека нема да дозволат да има криминални избори и ќе преземат сè што стои на располагање за да ги заштитиме луѓето од овој крај.

– Никој не смее да врши притисок, ниту во корист на ВМРО-ДПМНЕ, ниту во корист на СДСМ. Мора да има фер и демократски избори – истакна Николовски, додавајќи дека источниот регион е опустошен, раселен и осиромашен.