„Китка“, селска идила и гозби под Љуботен ве очекуваат во Вратница


Тетово, 13 декември, 2018 - 9:48 (META) 

Авантуристите, планинарите, ловците, но и секој што љуби планински амбиент и вкусна органски произведена домашна храна и специјалитети од Долни Полог, ќе најдат одлично место за остварување на желбите во хостелот и ловечка куќа „Китка“ во живописното шарпланинско село Вратница, од каде погледот го плени моќниот врв Љуботен.

До селото се стигнува лесно – без разлика дали со автомобил или со велосипед – преку широкиот регионален пат што од Тетово води кон граничниот премин „Јажинце“. Алтернативен правец е локалниот пат, по кој почнувајќи од клучката „Желино“ на автопатот Скопје – Тетово, преку селата Сиричино, Шемшово и Жилче се стасува до Лешок, од каде се свртува десно и се продолжува по патот Тетово – Јажинце.

Селска кујна и специјалитети на чист воздух

Непосредно до овој пат, во средината на селото Вратница, е Хостел и Хантинг Лоџ „Китка“, објект на надморска височина од 750 метри, кој покрај чистиот шарпланински воздух во времето на енормно загадување на воздухот во градовите, ќе ве пречека и со грст специјалитети од дивеч, но и со печурки и други безмесни деликатеси, со тамошни органско произведени свежи зеленчуци и овошја и чаеви собрани од падините на Шар Планина, како и вкусни специјалитети подготвени од нив.

Хостелот за селски и авантуристички туризам нуди шест соби –  една еднокреветна, три двокреветни и две четворокреветни. Од последните две, едната, со претходна резервација, домаќините ќе ја претворат во ВИП соба со дрвен брачен кревет и сопствена бања со масажна када.

Во пакетот „Ноќевање“ е вклучен и појадок кој ја негува традицијата, со познатиот љуботенски природен чај.

Печено и колбаси од дивеч

Гостите ќе бидат послужени со свежи јајца, костени, мед што домаќините го вадат од своите сандаци, овошје и зеленчук произведени од локалните жители, но и нешто што е специфично за „Китка“ – месо од дива свиња, дивокоза, зајак и друго, приготвено на традиционален начин. Се разбира, ако имате стрв за такви специјалитети, тоа ќе мора да им го најавите на домаќините.

Домашните колбаси од дива свиња се уникатен производ на „Китка“ и може да се пробаат во секое време, без најава.

Во секое време ќе бидете послужени и со тетовско гравче подготвено во грне „По рецептот на баба“ и со компири израснати на локалните ниви. Тука се и сезонските салати, а сега, во зимскиот период, туршии направени од вредните домаќини.

Авантури за физички подготвените и локалитети за другите

Во близина на хостелот се наоѓат неколку прекрасни места, како Вратничко Езеро, кое е на еден километар јужно од „Китка“. На полпат е и манастирската црква „Свети Цар Константин и Елена“, изградена на темелите на стара црква од 12. век.

За тие што сакаат пешачење во планина, на еден час пеш од Вратница се наоѓа заедничка мала планинарска куќа од отворен тип, која е на половина од правецот од Ливадичко Езеро до границата со Косово. Вратница, инаку, е почетното место за сите што сакаат да го освојат врвот Љуботен.

Доколку не можете да пешачите долго, хостелот располага со две теренски возила со кои ќе ве одвезат до таму до каде што се може на четири тркала.

Хостелот и ловечка куќа „Китка“ ги нуди и сите услови за велосипедистите, а тоа досега го искористиле и голем број странци.

Ведрите домаќини велат дека во рамките на Проектот за зајакнување на иновативен туризам (СТЕП) се планираат и комплетни туристички пакети, како „Планински велосипедизам“, „Пчеларење“, и „Селски пакет“, односно собирање костени, правење ајвар, печење ракија и се друго што може да биде интересно за гостите од бетонските „џунгли“.


На традиционалното искачување на Титов Врв учествувале 800 планинари


Тетово, 30 мај, 2018 - 16:39 (META) 

Планинарски Клуб „Љуботен“ од Тетово, на 26 и на 27 мај го организираше традиционалното искачување на Титов Врв, по триесет и седми пат.

Од клубот информираа дека, на овој настан имало 800 учесници, 14 планинарски клубови од Македонија и 17 од регионот.

Настанот официјално го отворил холандскиот амбасадор Ваутер Пломп, кој искажал особена чест што присуствува на овој настан и е дел од искачувањето на Титов Врв.

Планинарски клуб „Љуботен“ ја поддржа иницијативата на планинарско-еколошкото друштво „Аргентус моунт“ за реконструкција на кулата на Титов Врв, со тоа што сите учесници ги информираше за акцијата за пренесување на песок до врв.

И оваа година традиционалното искачување беше дел од прославата за Денот на Европа, организирано од страна на Канцеларијата на Европска унија во Македонија.


Обвинителството има осомничен во врска со изгореното тело пронајдено кај Љуботен


Скопје, 26 септември, 2017 - 20:00 (META) 

Основното јавно обвинителство – Скопје издало наредба за истражна постапка за едно лице поради сомнеж дека сторило свирепо убиство. Лицето е осомничено дека е одговорно за пожарот на ливада кај селото Љуботен на 4 август годинава, по чие гаснење е пронајдено изгорено човечко тело.

Жртвата била жена. Осомниченото лице е приведено и обвинителството за него побарало притвор од 30 дена.


Најдено изгорено човечко тело кај селото Љуботен


Скопје, 4 август, 2017 - 15:20 (META) 

Изгорено човечко тело било пронајдено ноќеска во меѓа на ливада кај скопското село Љуботен, извести СВР Скопје.

Околу 23.30 часот вчера, во полиција било пријавено дека гори меѓа од ливада кај селото, по што полициска екипа излегла на терен и по згаснувањето на огнот било најдено изгорено човечко тело. По наредба на јавен обвинител телото е предадено за обдукција.

Полицијата работи на расчистување на случајот.


На 28 мај ќе се одржи традиционалното искачување на Титов Врв


Тетово, 25 мај, 2017 - 14:52 (META) 

Во недела на 28 мај ќе се одржи 36 традиционално искачување на Титов Врв на Шар Планина, во организација на планинарскиот клуб „Љуботен“. Настанот е дел од прославата по повод денот на Европа организирана од Канцеларијата на Европската Унија во Скопје. Годинешното мото на традиционалното искачување гласи „Планинскиот цвет и пластичниот смет не одат заедно, да ја зачуваме животната средина за поздрава иднина“.

– Поаѓањето на планинарската колона е од 6 часот наутро пред платото на хотел Попова Шапка. Кон Титов Врв ќе се оди по Вакуфска Патека и апелираме да се користи оваа патека, каде што ќе оди самата колона. Се случувало, некои планинари да одат по други патеки до Титов Врв, па да има несакани последици. До Титов Врв ќе се пристигна некаде околу 11 часот, еден час имаме пауза на самиот врв, потоа кон Попова Шапка тргнуваме околу 12 часот, а на овој скијачки центар колоната ќе треба да пристигне околу 16 часот – изјави Јован Божиновски претседател на планинарскиот клуб „Љуботен“.

Традиционалното искачување на Титов Врв, кој е втор по големина врв во Македонија, со надморска височина од 2.747 метри е најпосетена планинарска тура во Македонија. Во изминативе 35 година на Титов Врв, преку оваа манифестација се искачиле околу 23 илјади планинари од земјава и странство.