Николовски: Деновиве ќе биде исплатена дополнителната субвенција за лозарството


Скопје, 16 април, 2018 - 16:27 (META) 

Министерот за земјоделство, шумарство и водостопанство, Љупчо Николовски на денешниот состанок со винарските визби, на кој учествуваше и директорот на Агенцијата за финансиска поддршка во земјоделството и руралниот развој, Николче Бабовски, порача дека лани се исплатени сите обврски и субвенции за лозарите и винарските визби, а наскоро треба да стартува и исплатата на дополнителната субвенција од по два денари.

– Лани се исплатија сите заостанати обврски и кон лозарите и кон винарските визби. Оваа година сме насочени кон навремена исплата кон лозарите и кон визбите, тогаш кога им се потребни. Овие денови ќе биде исплатена и дополнителната поддршка од 2 денари од минатата година, и тоа се уште 140 милиони денари плус субвенции за лозарите – рече министерот Николовски.

Тој нагласи дека пред почетокот на новата производствена реколта, се исплатени над 600 милиони денари субвенции за одржување на лозови насади за лозарите и за винарниците кои имаат сопствени насади.

Во годинешната Програма за финансиска поддршка во земјоделството за 20 отсто се зголемени субвенциите за одржување на лозови насади за оние кои имаат од 1 до 10 хектари , односно наместо 40.000 ќе добијат 48.000 денари по хектар, а дополнителна субвенција од 12.000 денари по хектар ќе добијат оние кои ќе извршат реконструкција на лозовите насади, за промена на асортиментот, што е важно за следење на светските трендови и за зголемување на конкурентноста. Дополнително, 30 отсто повисока субвенција ќе добијат оние земјоделци ќе преминат во попрофитабилна гранка, на пример од полјоделство во лозарство, овоштарство и градинарство.


Николовски: Ќе се зголемат субвенциите за лозарите кои имаат насади до 10 хектари


Кавадарци, 14 февруари, 2018 - 16:50 (META) 

Министерот за земјоделство, шумарство и водостопанство, Љупчо Николовски на одбележувањето на денешниот празник на лозарите и винарите, ги информираше лозарите за новите мерки во програмата за поддршка на земјоделството и руралниот развој.

– Оваа година со програмата предвидуваме зголемување на субвенциите за сите лозари кои имаат  лозови насади до 10 хектари. Нашата интенција како политика ќе биде, да ги стимулираме лозарите да го модернизираат производството, и да даваме уште поголема поддршка на категоријата на земјоделци кои што навистина може да го донесат развојот – рече Николовски.

Премиерот Зоран Заев кој исто така денеска беше во Кавадарци, изјави дека Владата почнала разговори со винарниците и откупувачите, за да може да се обезбеди поповолна цена за производителите.

– Убеден сум дека со новите мерки што ги прави Владата, посебно за стимулирање на нови насади, отварањето на нови пласмани и со освојувањето нови пазари, цените на грозјето ќе растат – рече Заев.


„Повардарие“ ќе го исплати долгот кон лозарите до крајот на годината


Неготино, 1 ноември, 2017 - 14:18 (META) 

Винарската визба „Повардарие“ целосно ќе го исплати долгот за откупеното грозје кон лозарите до крајот на оваа година. Тоа е заклучено на денешниот состанок на лозарите со менаџментот на винарската визба, кој се одржа во Неготино, во присуство на претставници од Министерството за земјоделство, шумарство и водостопанство и на новиот градоначалник на Неготино, Тони Делков.  Средбата беше организирана од министерството.

Раководството на винарската визба уверило дека комплетно ќе бидат расчистени долговите кон лозарите за преземеното грозје за 2014, 2015 и за 2016 година, велејќи дека парите, околу еден милион евра, ќе бидат исплатени од продажбата во странство на резервите вино. Дека во визбата има доволно резерви вино, потврдиле и од Државниот инспекторат за земјоделство.

Министерството внимателно ќе ја следи состојбата со исплатите на лозарите, односно на 15 дена ќе проверува колку вино е извезено, колку пари се наплатени за тоа и дали им се префрлаат на лозарите.


Рокот за поднесување барања за субвенции за земјоделството истекува в петок


Скопје, 12 септември, 2017 - 12:41 (META) 

Рокот за поднесување барања за субвенции за земјоделството од Програмата за финансиска поддршка во земјоделството за 2017 година истекува в петок, информира  Министерството за земјоделство, шумарство и водостопанство.

До денеска, според податоците од подрачните единици на министерството, поднесени  се 66.126 барања. Најмногу барања има поднесено во подрачните единици во Кавадарци – 6.233, потоа во Струмица – 5.962 и во Куманово – 5.075.

Земјоделците можат сами да поднесат барање за директни плаќања преку „е-барање“, кое е поставено на веб-страницата на Агенцијата за финансиска поддршка во земјоделството и руралниот развој. Барањето се поднесува по електронски пат без доставување документи, а врз основа на претходно евидентирани податоци во Единствениот регистар на земјоделски стопанства и Регистарот за идентификација и за регистрација на домашни животни.

Одгледувачите на говеда, овци, кози и на пчели, пред поднесување на барањето, треба задолжително да ја проверат и по потреба да ја ажурираат состојбата на животните во ветеринарното друштво со кое имаат склучено договор.

Постапката за поднесување барање за директни плаќања е иста како и претходната година. На сите огласни табли на подрачните единици на Министерството за земјоделство, на видно место се истакнати сите потребни информации за аплицирање. Земјоделците можат да побараат помош за аплицирањето од подрачните едници при МЗШВ, каде што го поднесуваат барањето, но може и да ги користат услугите на Агенцијата за поттикнување и развој на земјоделството.


Николовски во Кавадарци вети дополнителни субвенции за лозарите


Кавадарци, 9 септември, 2017 - 19:59 (META) 

Mинистерот за земјоделство, шумарство и водостопанство, Љупчо Николовски, денеска соопшти дека на првата наредна седница Владата ќе донесе одлука за дополнителни директни плаќања за произведено и предадено грозје во домашните винарски визби.

Тој беше во Кавадарци на традиционалната манифестација во чест на грозјето и виното „Тиквешки гроздобер“.

– Висината на субвенцијата ќе биде определена на самата седница на Влада. Со оваа мерка ќе бидат опфатени сите земјоделски стопанства што до 15 септември пријавуваат површини за лозје и кои произведеното и предадено грозје ќе го дадат во домашните винарски визби – рече Николовски.

Како што рече, според податоците од Државниот инспекторат за земјоделство, заклучно со 5 септември откупени се околу 16 милиони килограми грозје, од кои најголемиот дел се од сортите вранец и смедеревка.

– Би сакал да им порачам на лозарите дека грозјето од годинешната реколта ќе биде целосно откупено од винарските визби, а исплатата за откупеното грозје ќе се реализира според законските одредби и прописи. Државниот инспекторат за земјоделство ги зајакнува контролите на откупните пунктови на грозје за да нема манипулации со откупните цени – рече министерот за земјоделство.

Порача дека уште во првите 100 дена на новата влада се зголемени субвенциите за одржување на лозови насади за 10 отсто по хектар, како и дека за одржување на површини со лозови насади по Програмата за 2016 година се исплатени 8,7 милиони евра, а за вкупно 13 винарски визби за откупено грозје се исплатени субвенции од 700.000 евра.


Лозарите ќе блокираат патишта поради неисплата на грозјето


Велес, 13 јули, 2016 - 12:50 (META) 

Лозарите од Неготино и од Кавадарци ќе ги блокираат регионалните патишта в понеделник поради неисплата на нивниот род од визбата „Повардарие“, пишува порталот „Дума“.

Тие побарале помош од надлежните институции, бидејќи се загрозувал откупот на грозјето од идната реколта, но и нивната егзистенција.

Лозарите додаваат дека се наближува нова берба, а сè уште има лозари кои не можат да си го наплатат старото грозје од винарниците.

За да го свртат вниманието на јавноста и на институциите, најавуваат масовни блокади.


СДСМ ќе воведе бенефициран стаж за земјоделците


Свети Николе, 26 февруари, 2016 - 19:38 (META) 

Претседателката на комисијата за земјоделство, шумарство и водостопанство на СДСМ, Татјана Прентовиќ, денеска ги посети жителите на Лозово и на Дорфулија.

– Земјоделството е клекнато на колена. По промена на власта, лозарите ќе имаат сигурност на производството и пониски производствени трошоци. Субвенциите ќе ги зголемиме на 160 милиони евра. Земјоделците субвенциите ќе ги добиваат навремено и тогаш кога им се најпотребни – изјави Прентовиќ.

Таа ги образложила и мерките од програмата на СДСМ.

– СДСМ нуди државна помош за отворање нови погони во земјоделството. Секоја година ќе инвестираме по 10 милиони евра во системите за наводнување и во микроакумулации. Ќе воведеме бенефициран земјоделски стаж, бидејќи земјоделците тоа и го заслужуваат – изјавила Прентовиќ.


Николовски: Одоговорност за криминалните политики на Груевски мора да има


Скопје, 14 февруари, 2016 - 17:39 (META) 

Членот на извршниот одбор на СДСМ и дополнителен заменик-министер за земјоделство, Љупчо Николовски, и генералниот секретар на СДСМ и министер за внатрешни работи, Оливер Спасовски, денеска имаа средби со лозарите од Кавадарци и од Неготино.

Како што соопштуваат од партијата, лозарите се пожалиле дека трошоците им стануваат сè поголеми, откупните цени на грозјето се помали од година во година, а исплатата на субвенции доцни.

Николовски и Спасовски ги образложија мерките од програмата на СДСМ кои новата влада ќе ги спроведе по промените, во интерес на сите граѓани на Република Македонија.

– Токму поради погрешните, криминални политики најавуваме дека веднаш по промена на власта, прво што ќе имаат лозарите е сигурност на производството и пониски производствени трошоци. Субвенциите ќе ги зголемиме на 160 милиони евра. За разлика од досега, земјоделците ќе ги добиваат навремено и тогаш кога им се најпотребни, пред почетокот на сезоната – рече Николовски.

Спасовски им соопштил на насобраните дека мора да се врати вербата во судството и во полицијата.

– Во изминатиот период почнавме да ги разобличуваме криминалите на Груевски и на „фамилијата“. Мораме да ја вратиме државата назад на граѓаните, да ја вратиме вербата во судството, во полицијата за повторно граѓаните да живееат слободно, да се чувствуват сигурно во сопствената држава – порача генералниот секретар Оливер Спасовски.

Зборувајќи за актуелните случувања, како што се наведува во соопштението, Николовски рекол дека Никола Груевски не сака слободни медиуми бидејќи тогаш нема да може да шири лаги, сокривајќи ги криминалот и корупцијата.

– Груевски три дена бега и не сака да одговори за отворените постапки против дел од неговите најблиски соработници. Нека не се крие зад своите медиумски курири, платени со милиони евра народни пари, туку нека излезе пред граѓаните и нека одговори –  порача Николовски.

Николовски и Спасовски на средбите со граѓаните на Кавадарци и на Неготино беа придрижувани од координаторката на жени на СДСМ, Цветанка Ласкова, претседавачот на централниот одбор на СДСМ, Диме Велковски, и од претседателот на комисијата за транспорт на СДСМ, Благој Бочварски.


Ставрески: За осум години исплатени се 4,6 милијарди денари за субвенции на лозарството


Кавадарци, 14 февруари, 2016 - 15:22 (META) 

Од 2008 година досега исплатени се субвенции за поддршка на лозарството во износ од 4,6 милијарди денари, а така ќе продолжиме и во иднина, изјави вицепремиерот и министер за финансии, Зоран Ставрески, при посетата на Кавадарци по повод верскиот празник Свети Трифун, заштитник на лозарите.

Ставрески рече дека од дамнина е забележано дека во Македонија и во Тиквешијата се создаваат чудесно моќни вина со мириси на југот.

– Секој којшто дошол кај нас и пиел од нашето вино, рекол дека е најдоброто и највкусното вино што некогаш го пробал. Вие и вашиот труд сте заслужни за тоа и знаете дека ја имате и секогаш ќе ја имате нашата поддршка и преку субвенции и преку промоција на виното – нагласи Ставрески.

Министерот најави дека до Владата ќе биде доставен предлог за скратување на рокот во кој винарските визби ќе го исплаќаат грозјето.


Ѓорѓиев: Ниска е откупната цена на грозјето


Кавадарци, 30 септември, 2015 - 16:10 (META) 

Претседателот на општинската организација на СДСМ Кавадарци, Зоран Ѓорѓиев, вели дека во екот на прибирањето на годинешната реколта, лозарите минуваат низ тешка есен.

– Најквалитетното грозје, кратошијата, ни го земаат и по осум денари за еден килограм. Тоа се пет денари помалку од загарантираната цена. Ова го прават со кражба при процената. Бидејќи исплатата оди по шеќерни единици, со наштимани ваги, небаждарени широмери, го спуштаат квалитетот на грозјето. Дури и да успее некој да се договори да ја добие загарантираната цена, таа противзаконски се намалува за исплата веднаш. Од 13 на 12 денари за кратошијата, од 11 на 10 денари за смедеревката – вели Ѓорѓиев во соопштението испратено до медиумите.

Тој додава дека Владата тврди дека ќе го казни тој што ќе ја намали откупната цена, но дека „тоа е лага“ и „напротив, тоа се дозволува“.

– Има лозари на кои сè уште не им е исплатено предаденото грозје од мминатата година. Според законот, рокот за исплата е најдоцна за шест месеци. И ова си поминува пред очите на Груевски и на власта. Сè уште не се исплатени и субвенции за минатата година, а еве за три месеци завршува оваа година. Тие што земаат субвенции, не се вистински лозари. Тоа се, главно, соработници на власта, на кои им е дадено земјиште за обработка – посочува Ѓоргиев.

Најново, според него, е што лозарите се соочуваат со огромни глоби од неколку илјади евра.

– Незамисливо за еден лозар е да плати толкава глоба. Премиерот во заминување, Груевски, самиот рече дека тракторите ќе се регистрираат на секои пет години за да им се олесни на лозарите. Но, наместо тоа, испрати инспекции да ловат нерегистрирани трактори. Инспекторите тврдат дека работат по наредба, а ветувањето на Груевски следната година ќе се остварело. Ни претовар на грозјето не може да помине без стрес. И за ова, огромни се казнитe! За претовар од возило на камион, казната е повеќе од 3.000 евра – објаснува Ѓоргиев.