Заев за Лондонскиот самит: Македонија имаше специјално место


Лондон, 11 јули, 2018 - 9:43 (META) 

Премиерот Зоран Заев во оценката за учеството на ова издание на Самитот ЕУ/Западен Балкан во Лондон вели дека Република Македонија имала специјално место на овој собир посветен на Регионалната економската соработка, потоа на надворешната политика и билатералните прашања и наследство од минатото, како и на безбедносните прашања и миграциите.

– Мора да се каже дека Република Македонија има специјално место на ова издание на Самитот на ЕУ за Западен Балкан. Со постигнатиот договор македонско-грчкиот спор за името и за стратегиско партнерство со Грција, како и со датумот за преговори со Европската Унија, нашата земја е препознаена како лидер во регионот од аспект на надворешната политика и билатералните прашања и наследство од минатото. Начинот на кој нашата земја ги затвори отворените прашања со сите соседи е модел за успешна приказна што ја поздрави целиот демократски свет, и посебно нашите соседи и нашите партнери во Европската Унија – изјави Заев по завршувањето на Лондонскиот самит.

Заев имаше средба и со Високата претставничка за безбедност и надворешна политика на ЕУ, Федерика Могерини, на која биле и вицепремиерот Бујар Османи и министерот за надворешни работи Никола Димитров.

Како што соопштија од Службата за односи со јавноста на Владата, Могерини лично му честитала на Заев за одлуката на Европскиот Совет да одреди датум за отворање на преговорите во делот за поглавјата за членство во ЕУ, како и за храбрата одлука за постигнување на договор со Грција.


Заев во Лондон се сретна со претставници на Охридската група


Лондон, 10 јули, 2018 - 10:44 (META) 

Премиерот Зоран Заев, на маргините на Самитот на ЕУ за Западен Балкан, што денеска се одржува во Лондон, имаше средби со претставници на Охридската група, пријатели и поддржувачи на Македонија, предводени од сер Џорџ Робертсон.

Од владиниот кабинет велат дека на средбите, искусните дипломати и политичари, претставници на повеќе меѓународни организации, го истакнале исклучителниот напредок на Република Македонија и ја нагласиле историската важност за постигнатиот договор со Република Грција кој ги отвара вратите за членство во НАТО и датум за преговори со ЕУ.

„Соговорниците на работните состаноци се согласија дека од огромна важност е што мнозинството од граѓаните го поддржуваат членството во ЕУ и НАТО и дека тоа е аргумент за оптимистички очекувања за исходот од референдумот. Лорд Робертсон, поранешниот Генерален секретар на НАТО, информираше на средбите дека сите членови на групата Охрид и пријатели на Република Македонија го поддржале писмото кое во име на групата било испратено до шефовите на државите и на владите на земјите членки на ЕУ и НАТО, за позитивна одлука на Европскиот Совет и за најавеното активирање поканата за членство во НАТО“, информираат од владината прес-служба.


Аеродромот „Сити“ во Лондон затворен поради пронајдена бомба


Лондон, 12 февруари, 2018 - 20:10 (META) 

Лондонскиот аеродром „Сити“ е затворен откако бомба од Втората светска војна била пронајдена во близина на реката Темза. Аеродромот ќе биде затворен цел ден и сите летови се откажани, а тоа ќе има влијание врз 16.000 патници, изјави портпаролката на аеродромот.

Полицијата воспостави забранета зона од 214 метри, поради што лондонскиот „Сити“ аеродром сега е затворен, стои во соопштението на аеродромот.

Бомбата е пронајдена за време на работата на кејот на реката Темза во близина на единствената писта на тој аеродром.

Аеродромот се наоѓа во источниот дел на Лондон, во близина на бизнис-областа Канари Ворф и од него се изведуваат кратки летови.


Евакуација во Лондон поради опасност од истекување на гас


Лондон, 23 јануари, 2018 - 11:38 (META) 

Лондонската железничка станица Черинг крос и околните хотели и ноќни клубови ноќеска се евакуирани поради истекување гас.

Од клубот „Хевен“ и хотелот во близина се евакуирани околу 1.450 луѓе.

Службите за брза помош биле предупредени околу два часот по полноќ дека на улицата Крејвен, во близина на железничката станица Черинг крос, е забележана голема концентрација на природен гас. На местото веднаш пристигнале две противпожарни возила, 20 спасувачки возила и 20 пожарникари.

Полицијата ја затворила улицата „Странд“, главната сообраќајна артерија на британската престолнина, која води до плоштадот Трафалгар и апелираше граѓаните да го избегнуваат тој дел од градот.

Поставен е кордон од 150 метри, додека инженери се обидуваат да го најдат местото од каде што протекува гасот.


Трамп ја откажа посетата на Лондон


Вашингтон, 12 јануари, 2018 - 11:43 (META) 

Претседателот на САД, Доналд Трамп ја откажа плaнираната посета на Велика Британија, во текот на која требаше да ја отвори новата американска амбасада во Лондон.

Токму новата амбасада, која според Трамп е уште една лоша одлука на неговиот претходник, Барак Обама, е причината за откажувањето на посетата.

„Го откажувам патувањето во Лондон затоа што не сум голем обожавател на администрацијата на Обама која ја продаде најубавата амбасада на најдобрата локација во Лондон за ‘кикиритки’ за да изгради на оддалечена локација нова, за 1,2 милијарди долари. Лош договор. Сакаа да ја пресечам лентата – не“, напиша Трамп на „Твитер“.

Инаку, посетата на Трамп на Лондон беше планирана за февруари.


Пожар изби во зоолошката градина во Лондон


Лондон, 23 декември, 2017 - 12:47 (META) 

Пожарникарите го ставија под контрола пожарот кој ја зафати зоолошката градина во Лондон, но за сега не е познато дали некое животно е повредено.

Пожарот утринава изби во кафулето на зоолошката градина, во близина на делот каде има животни.

Медиумите јавуваат дека најмалку едно животно е исчезнато, но тврдењата не се официјално потврдени.
Објавени се снимки на кои се гледа дека кафулето во зоолошката градина е многу оштетено.

Официјални лица соопштија дека зоолошката градина ќе биде одредено време затворена за посетители.


Полицијата во Лондон се повлекува, немало докази за пукање


Лондон, 24 ноември, 2017 - 20:05 (META) 

По големата паника што го зафати Лондон, под сериозни сомнежи за терористички напад со пукање во метро-станицата Оксфорд сиркус, специјалните полициски сили се повлечени, а станицата е повторно отворена. Повторно е отворена и станицата Бонд стрит, која беше затворена за да не се случи огромна маса луѓе во паника да влезе во неа, обидувајќи се да се евакуираат.

Според „Би-би-си“, полицијата не дошла до докази дека имало пукотници, а нема ни осомничени за нападот, па веројатно станува збор за паника која се создала поради гласини. Британската транспортна полиција соопшти дека во паниката една жена добила повреда при бегањето од Оксфорд сиркус. Лондонската полиција, пак, соопшти дека добиле бројни извештаи за пукотници на улицата Оксфорд и во метро-станицата Оксфорд сиркус околу 16.30 часот по локално време. Веднаш на терен се испратени специјални полициски сили, бидејќи во тој момент инцидентот се третирал како терористички напад.

„Полицијците што работеа заедно со нивните колеги од Британската транспортна полиција итно направија пребарување на областа. Полицијата не утврди жртви, докази за пукање ниту, пак, наидовме на осомничени“, соопшти лондонската полиција.

Сепак, поради чувството на сигурност на лондончани, одреден број полицајци ќе останат на улиците во Вест енд.

Кога во метро-станицата се случила паниката, дел од патниците објавуваа на социјалните мрежи дека виделе чад и слушнале истрели. Во рестораните близу станицата имало преплашени луѓе, од кои дел и плачеле.

Евакуацијата и паниката во центарот на Лондон се случи точно во време на најголемиот метеж поради купувачката треска за т.н. „црн петок“. Улицата Оксфорд е една од најголемите улици со продавници на светот.


Паника во и околу метро-станицата Оксфорд во Лондон


Лондон, 24 ноември, 2017 - 18:56 (META) 

Една од најфреквентните метро-станици во Лондон вечерва е евакуирана, откако беше пријавен инцидент со пукање. Имаше информации и дека се пукало на улиците во близина и, според досегашните сознанија, најверојатно станува збор за терористички напад.

Полицијата не соопштува детали, туку само упати апел до граѓаните да не се движат во тој дел на Лондон без потреба. На улиците во близина се распоредени вооружени специјалци.

Во метрото владее паника, а дел од патниците виделе чад и слушнале истрели. Во рестораните на станицата имало луѓе во паника, кои викале и плачеле.

Евакуацијата и паниката во центарот на Лондон се случи точно во време на најголемиот метеж поради купувачката треска за т.н. „црн петок“.


Автомобил влета на тротоар во Лондон – едно лице уапсено


Лондон, 7 октомври, 2017 - 16:39 (META) 

Неколку лица се полесно повредени откако автомобил влета на тротоар во близина на Националниот музеј во Лондон, јавуваат британските медиуми.

Британската полиција соопшти дека во Лондон се случила несреќа во која повеќе лица се повредени. Репортерот на „Би-би-си“ јавува дека лицата се полесно повредени и дека нема загинати.

Едно лице веќе е уапсено, но засега не се откриваат никакви детали.

Ова е втор ваков настан во Лондон во последните неколку месеци. Претходниот се случи во јуни на Лондонскиот мост.


Ново апсење поради нападот во лондонското метро


Лондон, 20 септември, 2017 - 12:19 (META) 

Двајца мажи се уапсени во Велс под сомневање дека се вмешани во минатонеделниот напад во лондонското метро, кога беа повредени 30 лица.

Досега се уапсени вкупно пет лица, соопшти британската полиција.

Двајца мажи на возраст од 48 и 30 години се уапсени во Њупорт и во Велс на основа на законот за тероризам.
За време на викендот уапсени беа двајца мажи, еден 18 годишен бегалец од Ирак и 21-годишен Сириец.

Бомбата која делумно експлодираше во воз во Лондон повреди 30 лица, а Исламска држава ја презеде одговорноста за нападот.