!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

ВМРО-НП Тетово повика на заеднички настап на македонските партиите на локалните избори


Тетово, 22 март, 2017 - 16:25 (META) 

Општинскиот комитет на ВМРО – Народна партија од Тетово ги повика македонските политички партии, во Западна Македонија на локалните избори да настапат со единствена платформа.

ВМРО – Народна партија од Тетово на својата последна седница донела заклучок, дека е потребно да се формира национален совет во кој ќе членуваат сите македонски политички партии кои гравитираат на територијата на Општините Тетово и Гостивар, граѓански здруженија и локални еминентни личности.

Преку писмено соопштение, општинскиот комитет на ВМРО-Народна партија од Тетово, ги повика општинските комитети и организации на ВМРО-ДПМНЕ, СДСМ и на сите други македонски политички партии кои функционираат на ова подрачје, за заеднички настап на следните локални избори со заедничка платформа, во која ќе бидат дефинирани националните интереси на македонскиот народ, кој живее на територијата на Западна Македонија.

Општинскиот комитет на ВМРО – Народна партија од Тетово, предлага редефинирање на Законот за територијална поделба, каде што Тетово ќе добие статус на град со три општини, при што во една од општините со мнозинско македонско население, градоначалник би бил Македонец.


Димитриев: Нови избори се единственото решение за излез од кризата


Скопје, 8 март, 2017 - 15:12 (META) 

Техничкиот премиер Емил Димитириев, при денешната посета на Делчево, го повтори партискиот став на ВМРО-ДПМНЕ дека предвремени парламентарни избори, кои би биле организирани заедно со локалните, се единствениот излез од политичката криза.

Димитриев забележа дека постизборните дискусии, според него, длабоко задираат во уставното уредување, а не биле дел од предизборната кампања или многу малку се зборувало за тоа.

– Сметам дека ваквите теми не се привилегија на политичките елити, колку и тие да се сметаат за способни да се справуваат со овие процеси. За вакви теми, единствен фактор кој може да каже и да се изјасни е народот на нови парламентарни избори, кои би биле организирани заедно со локалните. Партиите, сето тоа што сметаат да го работат постизборно, ќе мора да го кажат предизборно, бидејќи за тоа треба да добијат легитимитет, за граѓаните да имаат јасна претстава кому го даваат гласот и во кој правец ќе се движат работите во иднина – изјави  Димитриев.

Техничкиот премиер ја коментираше највата за можноста од отворање на бегалски кампови од Македонија, која ја спомена шефот на австриската дипломатија, Себастијан Курц.

– Македонија даде огромен придонес во справувањето со мигрантската криза и тоа беше забележано од сите земји на ЕУ и пошироко. Ние и во иднина ќе се однесуваме така, меѓутоа за евентуално формирање кампови за згрижување бегалци во нашата земја, нашиот став е категорично „не“, бидејќи во државава бегалците доаѓаат од земја членка на ЕУ, земја која е безбедна и не гледаме никаква логика во нашата земја да се формираат бегалски кампови. На тој предлог ние, како држава, се спротивставуваме – рече Димитриев.


Арифи: Ќе се бара некое законско решение за распишување на локалните избори


Тетово, 8 март, 2017 - 13:57 (META) 

Албанците не се проблем во земјава и платформата на Албанците е во рамки на Уставот и на законите. Ова е одговорот на потпретседателката на ДУИ, Теута Арифи, на новинарско прашање околу влошената политичка ситуација во Македонија, откако претседателот Ѓорге Иванов не го додели мандатот на лидерот на СДСМ, Зоран Заев, за составување влада.

Таа додаде дека ДУИ, како партија, останува на ставот Иванов да ја повлече одлуката за недоделување на мандатот, која, како што рече, е во линија на барања и на американскиот Стејт департмент и на Европската Унија.

– Иванов со одлуката да не го додели мандатот, ја вовлече државата во институционална криза. Ние, како ДУИ, се однесувавме со сериозна одговорност и кога пристапивме кон платформата и кон нејзините точки, кои, како што реков, а уште еднаш да потсетам, не се надвор од Уставот на Македонија ниту од тоа што значи Охридски рамковен договор. Ние размислуваме да дадеме придонес за надминување на оваа ситуација и сакаме да посочиме дека секоја тенденција на злоупотреба на фактот дека Албанците постојат во оваа држава и тие да се демаркираат како проблем во земјава, е погрешна и како таква нема да помогне за излез од кризата – вели Арифи.

Арифи изјави дека ќе се најде и некое законско решение за распишување на локалните избори.

– Ова е проблем на сите политички партии. Ќе се бара некое законско решение, имајќи го предвид фактот дека општинските власти имаат директни ингеренции кои се однесуваат на граѓаните и на функционирање на градовите, така што мислам дека ќе се најде еден заеднички интерес, ако се одложуваат, да не се одложуваат многу и се тоа да биде во рамки на законите – рече Арифи.


СДСМ Битола со 12 предлог-кандидати за градоначалник


Битола, 20 февруари, 2017 - 9:40 (META) 

Битолските социјалдемократи синоќа на партиски состанок се одлучија да испратат до централата на партијата во Скопје 12 имиња, како предлози за евентуален кандидат за градоначалник на Битола за престојните локални избори, кои треба да се одржат во првата половина на мај.

На списокот се општинските советници Зоран Стојчевски, Златко Ќурчиевски, Наташа Петровска, Горан Козаров и Методија Илијевски, потоа поранешниот пратеник Борче Петковски, поранешниот претседател на Советот на Општина Битола, новинарот Марјан Танушевски, лекарите Дијана Ѓеоргиевска, Зоран Лазаров, како и претседателот на комисијата за здравство на СДСМ, Гоце Чакаревски.

На списокот се и бизнисмените Раде Христoвски-Кандико и Сребре Нечовски- Конект. Сите овие имиња во изминатиот месец или биле предложени од месните организации или лицата се кандидирале самите.

Изненадува тоа што на спискот, како предлози, не се наоѓаат потпретседателот на СДСМ и пратеник, Александар Кирацовски ниту, пак, локалниот лидер и пратеник, Васко Ковачевски, бидејќи меѓу битолчани веќе долго време се шпекулираше дека најголеми шанси за кандидат за градоначалник имаат токму пратениците. Сепак, од СДСМ велат дека и двајцата не поднеле кандидатури, иако биле предложени од најголем дел од месните организации.

Заедно со листата на предлози за кандидати за градоначалник, во централата на СДСМ во Скопје е испратен и список на 47 кандидати за советници, кои треба да го поминат партискиот филтер.

– Тоа што ќе следува во наредните неколку недели се акетите на кои ќе се мерат рејтинзите на понудените кандидати. Доколку некој од кандидатите значително отскокнува од другите, недвосмислено ќе биде нашиот фаворит. Ако, пак, неколку кандидати имаат ист рејтинг, тогаш ќе пресече општинската конференција и ќе го избере најдобриот – вели потпретседателот на СДСМ, Александар Кирацовски.

Сепак, битолските социјалдемократи велат дека не е исклучено централното раководство на СДСМ до крајот на оваа постапка да понуди ново име како кандидат за градоначалник, надвор од веќе предложените.


Јакимовски: Загадувањето во Карпош доаѓа од другите општини


Скопје, 12 февруари, 2017 - 11:47 (META) 

Загадувањето во општина Карпош претежно доаѓа од другите – соседни општини, каде што домаќинствата користат дрва, ќумур или друг начин на греење, вели градоначалникот на Општина Карпош, Стевчо Јакимовски, во неделното интервју за „Радио Слободна Европа“.

„Загадувањето не е проблем на една општина во Скопје. Загадувањето е проблем од Шар Планина па се до Дервенската клисура. Значи мерки мора да се преземаат интегрално, а не дава резултат ако ние преземаме само парцијални мерки. Ако една општина недоволно презема мерки тоа си има влијание врз атмосферата во друга општина…Како што покажуваат анализите, сериозни загадувачи претставуваат домаќинствата, особено во зимскиот период. Но, морам да кажам дека тие загадувања се многу помалку од Општина Карпош, многу повеќе доаѓаат од другите соседни општини каде што се користи дрва, ќумур и друг начин на греење…Може да замислите дека 19 отсто од загадувањето во Општина Карпош доаѓа од индустријата која ја нема. Ние имаме мали трговски единици, мали сервиси и претежно трговија…Морам да кажам и дека ПМ-честичките и она што значи градежна прашина претежно доаѓа од Цементарата во Генерал Јанковиќ, како и загадувањето од домаќинствата од другите општини“, вели Јакимовски во интервјуто.

Тој ги отфрла обвинувањата дека во Карпош се случува градежна експанзија на сметка на зелените површини и дека тоа е една од причините за загадувањето.

„Тоа воопшто не е точно. Во Општина Карпош за осум години вкупно се изградени 23 станбени згради од 4 до 10 ката. Во исто време во Општина Аеродром се изградени 130 згради“, вели Јакимовски.

Во врска со актуелните политички случувања, градоначалникот на Карпош вели дека доколку СДСМ формира влада, нема да биде испочитувана волјата на граѓаните и тоа ќе „предизвика сериозни проблеми“, кризата нема да се реши, туку „дополнително ќе се продлабочи“.

Тој потврдува дека планира повторно да се кандидира за градоначалник на Карпош на претстојните локални избори кои треба да се одржат во првата половина на мај, а дали тоа ќе биде во коалиција со ВМРО-ДПМНЕ вели дека за тоа ќе одлучат органите на неговата партија – ГРОМ.


Тачи останува претседател на ДПА до локалните избори


Тетово, 11 февруари, 2017 - 20:08 (META) 

Централното собрание на ДПА одлучи Мендух Тачи и понатаму да ја води партијата. По шестчасовната дискусија денеска највисокото партиско тело со мнозинство гласови, реши вонредниот конгрес на кој ќе се избира идниот претседател и други партиски тела, да се одржи по завршувањето на локалните избори.

Тачи изјави дека партијата сметала дека е неопходно да се донесе ваква одлука, бидејќи „не е паметно“ пред локални избори да се избираат највисоките функционери на ДПА.

– Имам многу волја да се борам со противници, ама не со ДПА кои се моите луѓе. Контекстот временски е таков, што не ми овозможува многу простор, се наоѓаме на праг на локалните избори. Морално не сакам да изиграм како некои други лидери. Ако изберевме друг претседател на ДПА, имавме голема можност да се соочиме со слаб резултат на локалните избори и тоа да се интерпретираше како евтин политички трик од моја страна. Затоа јас прифатив да ја вода партијата на овие локални избори и убеден сум дека ќе имаме многу подобар резултат – изјави Тачи.

Тој додаде дека Централното собрание го овластило да почне разговори со политичките чинители за состав на нова влада.

– Првиот состанок ќе го барам со Иванов и ќе барам од него да ми даде мандат за следна влада. Гледам дека се смеете, но и јас се смеам кога друг некој бара мандат. Иванов 99 отсто нема да ми го даде мандатот, сигурно ќе ми рече да соберам 61 потпис и потоа ќе се обидам да соберам како што другите се обидоа – рече Тачи

Тој, одговарајќи на новинарско прашање рече дека е подготвен да разговара и со лидерот на СДСМ, Зоран Заев за состав на нова влада.

– Кризата е голема и таа се влошува, затоа треба да се седне и со сите да се разговара, бројките не се проблем – додаде Тачи.

Поради лошите изборни резултати, лидерот на ДПА Мендух Тачи си поднесе оставка од функцијата претседател на партијата.


СДСМ во Битола од 1 февруари почнува со изборот на кандидат за градоначалник


Битола, 26 јануари, 2017 - 14:36 (META) 

Битолскиот разгранок на СДСМ од 1 февруари почнува со процедурата за избор на кандидат за градоначалник, за претстојните локални избори, кои, според актуелниот Изборен законик, треба да се одржат во првата половина на мај годинава.

Извори од партијата во Битола велат дека централниот одбор на СДСМ по состанокот во вторникот во Скопје, им дал зелено светло на општинските организации да ја почнат процедурата за кандидирање лица за градоначалник, како и кандидати за советничките листи.

Ова значи дека до средината на март треба да завршат внатрепартиските избори на општинските организации и потоа да се знае најтесниот круг на кандидати за локалните избори.

– Процедурите за избор на кандидат за градоначалник и на кандидати за советничките листи почнуваат на 1 февруари и ќе траат до 7 март. Пред сè, ќе се цени мислењето на членството, предлозите ќе бидат испратени на консултации во централата, а на крајот, за конечните избори, пресудни ќе бидат општинските конференции – изјави за „Мета“ потпретседателот на СДСМ, Алаксандар Кирацовски.

Од општинската организација на партијата во Битола велат дека веќе имало членови кои јавно најавиле дека ќе се кандидираат за градоначалничката функција, а еден од нив е бизнисменот Сребре Нечовски-Конект, кој на претходните избори беше еден од кандидатите за градоначалник во помалата пелагониска општина Могила.

Меѓу посериозните кандидати за градоначалник се споменуваат Алаксандар Кирацовски, шефот на изборниот штаб за парламентарните избори во Битола, Методија Тасевски, како и советниците Благојче Котевски и Горан Козаров.

Аспирации за градоначалничката фотелја покажале и неколку лекари од битолската клиничка болница, меѓу кои и Гоце Чакаровски, претседател на комисијата за здравство на СДСМ.

Од општинската организација велат дека не е исклучена можност во Битола, опозицискиот СДСМ да излезе и со надпартиско решение, ако тоа го покажат анкетите, што допрва ќе се прават, како и расположнието на битолската јавност.


Ако се договорат, ни Уставот не ги спречува партиите да ги поместат локалните избори


Скопје, 11 јануари, 2017 - 15:17 (META) 

Според измените во Изборниот законик од јануари 2014 година, локалните избори во Македонија, наместо во втората половина на март, се одржуваат во првата половина на мај, но и оваа календарска одредница може да претрпи измени бидејќи прашањата околу локалните избори не се целосно уредени со Уставот туку со закон, кој го носи Собранието.

„Изборите за членови на совет и за градоначалник се одржуваат секоја четврта година истовремено во сите општини, во првата половина во месец мај“, стои во член 16, став 1 од Изборниот законик.

Поради тесните резултати од изборите на 11 декември лани, кои не овозможуваат формирање на стабилно парламентарно мнозинство и го доведуваат во прашање составот на идната влада, сè поизвесно е дека годинава ќе има нови предвремени парламентарни избори.

Ако тоа биде случај, тогаш можни се три сценарија:

  • Парламентатните избори да бидат заедно со локалните, кои, според членот 16, став 1 од Изборниот законик, треба да се одржат во мај;
  • Одржување на предвремени парламентарни избори рано напролет или по локалните, летоска или наесен;
  • Одржување и на локалните и на предвремените парламентарни избори заедно, на датум кој ќе го договорат партиите, а кој не мора да биде во првата половина на мај.

За спроведување на кое било од овие сценарија, изборите треба да ги распише претседателот на Собранието, кој и две недели по конституирањето на новиот пратенички состав, не е избран.

Ако партиите се договорат за последното сценарио, Уставот не ги спречува да ги направат неопходните измени во Изборниот законик и да направат поместување на локалните избори.

„Локалната самоуправа се уредува со закон кој се донесува со двотретинско мнозинство гласови од вкупниот број пратеници, при што мора да има мнозинство гласови од вкупниот број пратеници кои припаѓаат на заедниците кои не се мнозинство во Република Македонија. Законите за локално финансирање, локални избори, општинските граници и за градот Скопје, се донесуваат со мнозинство гласови од присутните пратеници, при што мора да има мнозинство гласови од присутните пратеници кои припаѓаат на заедниците кои не се мнозинство во Република Македонија“, се вели во амандманот 16 од Уставот.

Не е исклучена и можноста ваквите измени да бидат донесени и да важат само за конкретниот случај и да се однесуваат само на овие избори.

Ваков преседан беше направен пред локалните избори во 2013 година, кога на неколку недели пред изборите беа направени измени во Изборниот законик заради продолжување на роковите за регистрација на кандидати.

Имено, по насилното исфрлање на членови на опозицијата и на медиумите од Собранието во текот на расправата за буџетот на 24 декември 2012 година, СДСМ почна со бојкот на парламентот, а на 2 јануари 2013 година партијата објави дека ќе ги бојкотира и локалните избори ако не им бидат исполнети неколку барања.

Изборите беа распишани на 11 јануари, бојкотот на СДСМ на локалните избори заврши на 1 март кога Европската Унија посредуваше за постигнување договор меѓу лидерите на ВМРО-ДПМНЕ и на СДСМ, Никола Груевски и Бранко Црвенковски, а следниот ден Собранието на итна седница го продолжи рокот за регистрација на кандидати за учество на изборите до 8 март за да им овозможи на опозициските кандидати да се регистрираат.

Универзитетскиот професор Јове Кекеновски за „Мета“ вели дека нема потреба од поместување на локалните избори и дека заедно со нив во мај треба да се одржат и нови предвремени парламентарни избори затоа што тоа го налага актуелната ситуација.

„Во една ваква ситуација логично е локалните избори и новите предвремени избори за пратеници да се одржат заедно и на еден трошок. Локалните избори не би требало да се одложуваат. Проблеми околу спроведувањето на двата избори не би требало да има, освен можеби што покомплоцирано ќе биде печатењето на гласачките ливчиња. Доколку и локалните и предвреените парламентарни избори се одржат заедно, тоа ќе придонесе за поголема излезност на гласачите, а крајниот исход ќе го зголеми легитимитетот на победникот“, смета Кекеновски.


Утрово најзагадени се скопските населби Центар и Карпош


Скопје, 22 ноември, 2016 - 10:52 (META) 

Мерните станици на Министерството за животна средина и просторно планирање утрово измерија највисоки концентрации на честичките ПМ10 во Центар, односно 159,09 микрограми на еден кубен метар, во Карпош – 149,73 микрограми, Лисиче – 131,09 микрограми и во Гази Баба – 125,87 микрограми на еден кубен метар.

Неодамна, на регионалниот форум на програмата за поддршка на граѓанското општество „Цивика мобилитас“  беше истакнато дека политичките партии треба да понудат програми за заштита на животната средина, а потоа како активност да се спроведат за следните локални избори.

Учесниците на форумот предложија да се направи кратка предлог-политика за заштита на животната средина, која ќе се однесува на загадувањето на воздухот, управувањето со отпадот, урбанистичкото планирање и на спроведувањето акции.


ВМРО-ДПМНЕ назначи нов претседател на ОК во Охрид


Охрид, 22 октомври, 2016 - 13:56 (META) 

Извршниот комитет на владејачката ВМРО-ДПМНЕ донел одлука со која за нов претседател на општинскиот комитет на партијата во Охрид е назначен д-р Љубен Арнаудов, актуелен директор на Општата болница во градот.

Досега оваа функција ја вршеше Атанаско Михаилов, исто така лекар, чиј мандат формално завршил уште во 2014 година. Назначувањето на новиот претседател на општинскиот комитет на ВМРО-ДПМНЕ во Охрид се толкува како престројување на партијата на терен, во пресрет на изборите закажани за 11 декември.

Владејачката партија веќе распишала и интерен конкурс за кандидати за градоначалник на Охрид, иако локалните избори се догодина.

На огласот се јавиле десетина кандидати, кои поднеле свои видувања за идниот развој на градот. Најголемиот број од пријавените се членови на Советот на Општината или се функционери во локалната самоуправа.