!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Груевски: Гласачите не казнија бидејќи се оддалечивме од традиционалните политики


Скопје, 21 октомври, 2017 - 23:14 (META) 

ВМРО-ДПМНЕ беше казнета од своите гласачи бидејќи во изминатиот период партијата се оддалечи од традиционалните политики и се обиде да им се допадне на „некои други“, рече лидерот на опозициската партија, Никола Груевски во вечерашното интервју на телевизијата „Алфа“.

– ВМРО-ДПМНЕ беше казнето од страна на традиционалните гласачи кои испратија порака до раководството. Имавме традиционална политика во изминатите 15 години, а овој период се обидовме да им се допаднеме на некои други, што не им се допадна на традиционалните гласачи. Ние тоа го направивме нагло и недоволно вешто – рече Груевски.

Претседателот на ВМРО-ДПМНЕ, за тешкиот пораз на партијата во првиот круг на локалните избори ја обвини власта за „поткуп, уцени и заплашување“ на членството на партијата и кандидатите за градоначалници.

Во интерјвуто Груевски рече дека изборите биле „нелигитимни и недемократски“. Тој  го обвини СДСМ дека вложил „20 милиони евра црни пари“ за поткуп, а цената за гласачите изнесувала од 1.500 денари до 100 евра.

Во однос на изборните нерегуларности, Груевски рече дека печатницата која била избрана да го печати изборниот материјал била во сопственост на активист на СДСМ и која го печатела материјалот на Шарената револуција.

– Имавме недостиг на материјал, а ДИК не реагираше. Беа испечатени паралелни гласачки ливчиња за потребите на ДИК и на СДСМ. Мнозинството членови на ДИК се наклонети на СДСМ. ОБСЕ/ОДИХР ги викавме двапати за нерегуларностите и од нивно лице се гледаше дека не се дојдени да слушнат и да спречат –  изјави Груевски.

Прашан за идните активности на партијата и за неговата оставка рече дека ќе се фокусираат на вториот круг на локалните избори и по завршување на изборите ќе се прават длабински анализи и ќе се донесе одлука која е најдобра за партијата и за државата.

– Ако сакаат да се пресметуваат со ВМРО-ДПМНЕ и со мене тука сум, нека ме уапсат и нека ме осудат на доживотен затвор. На на што личи ова што се случува во државата? Нема да го скршат душот на Македонецот без разлика дали Груевски ќе биде лидер или не – рече Груевски.

Тој истакна дека, според информациите што ги има, целото раководство на ВМРО-ДПМНЕ, односно над 100 луѓе биле прислушувани во изминатиот период.

– Во УБК е отворено досие под името „Македонски екстремизам и тероризам“, какви што се воделе во комунизмот и во 1990-те против ВМРО-ДПМНЕ, како случаите „Темел“ и „Сина птица“, така и сега против ВМРО-ДПМНЕ се водат такви истраги за да се урниса партијата – рече Груевски.


Заев ја потврди коалицијата со ВМРО – Народна партија во Штип за вториот круг од изборите


Штип, 21 октомври, 2017 - 15:41 (META) 

Кандидатот за градоначалник на Штип од СДСМ, Благој Бочварски, во вториот круг од локалните избори, што ќе се одржи на 29 октомври, ќе ја има поддршката од ВМРО – Народна партија, потврди лидерот на СДСМ и премиер, Зоран Заев, за време на денешната посета на Штип, во рамките на кампањата за вториот круг од изборите.

– Она што е новина во вториот дел од изборите, е тоа што ние сме засилени со ВМРО – Народна партија. Коалицијата е потврдена на централно ниво, заедно стоиме во таа коалиција. Јас верувам дека дополнителната поддршка од граѓаните, симпатизери, поддржувачи на ВМРО – Народна партија, ќе ја зголемат разликата (во гласови), што сакаме да ја направиме во вториот изборен круг, гледајќи напред кон перспективите што доаѓаат и за Штип и за целиот наш Источен Регион – изјави Заев.

Тој истакна оти е убеден дека коалицијата предводена од СДСМ ќе победи во Штип и дека „конечно промените ќе бидат заокружени“ и во оваа општина.

– Јас сум убеден дека граѓаните веќе знаат како да го дадат својот глас. Имаме одличен кандидат, неговата програма е одлична и се вклопува со програмата на Владата. Локалната и централната власт заедно, можат да реализираат крупни проекти во Штип. Браната што мораме да ја направиме е еден од покрупните проекти, гасификацијата на Штип, затворениот базен и инфраструктурните проекти што се наброени во програмата на Благој Бочварски ќе бидат реалност – рече Заев.


ВМРО-ДПМНЕ до Управниот суд ќе поднесе жалби за сите приговори одбиени од ДИК


Скопје, 21 октомври, 2017 - 13:25 (META) 

ВМРО-ДПМНЕ ќе го искористи правото на жалба пред Управниот суд за сите приговори за локалните избори на 15 октомври, што беа одбиени од Државната изборна комисија, соопштија денеска од опозициската партија, додавајќи дека нема да дозволат некој да ја уништува демократијата и правната држава во Република Македонија.

Рокот за поднесување жалби до Управниот суд е 24 часа и истекува вечерва, имајќи предвид дека ДИК синоќа им ги достави решенијата на политичките партии за чии приговори одлучуваше. Откако ќе ги добие приговорите, Управниот суд има рок од 48 да одлучи по нив.

Од ВМРО-ДПМНЕ обвинуваат дека СДСМ ги организирала најнедемократските избори во историјата на независна Македонија и дека целата изборна кампања поминала во изборен поткуп, уцена и со закани врз гласачите, додека во текот на изборниот ден бил спроведен и т.н. бугарски воз, односно гласачките кутиите биле полнети со гласачки ливчиња однапред заокружени за СДСМ.

Партијата ја обвини и ДИК дека станала соучесник во сето тоа, „занемарувајќи и релативизирајќи очигледни факти и докази, со што се стави во функција на прикривање на изборните криминали на СДС“.

„ВМРО-ДПМНЕ ги повикува ОБСЕ/ОДИХР да ги нотираат овие очевидни случаи на криминал, да застанат на страна на демократијата, правото на глас и на слободата како врвни вредности на цивилизираниот свет“, се додава во соопштението.

Државната изборна комисија ги одби сите приговори поднесени за гласањето и за сумирањето на резултатите од првиот круг на локалните избори, од кои 40 беа поднесени од ВМРО-ДПМНЕ и по еден од ТМРО, Алијанса за Албанците и од Левица.


Заев побара поддршка од гостиварци за кандидатот за градоначалник на ДУИ, Бејта


Гостивар, 21 октомври, 2017 - 10:16 (META) 

Лидерот на СДСМ и премиер, Зоран Заев, синоќа побара поддршка од граѓаните на Гостивар за кандидатот за градоначалник на ДУИ, Невзат Бејта, во вториот круг од локалните избори, кој ќе се одржи на 29 октомври.

– Дојдов во овој убав град на соживотот, да побарам поддршка за Невзат Бејта. Гостивар беше во незавидна состојба затоа што вашиот градоначалник знаеше да пофали и да искритикува кога треба и тоа го фрли во немилост од претходната власт. Мојот другар и добар пријател Невзат Бејта, знам колку си го сака Гостивар и со мала поддршка од централната власт, Гостивар ќе блеска – рече Заев, на синоќешната средба со граѓани на Гостивар.

Тој додаде дека целосно застанува зад програмата на Бејта за Гостивар, која, како што рече, ќе ги реши проблемите на граѓаните.

– Стоиме целосно зад потребите на Гостивар, а тоа е трајно решавање на депонијата, реконструирање на главната улица во булевар, со што ќе се растовари сообраќајот и ќе се овозможи Гостивар да дише. Вие граѓаните го полните буџетот на Општината, вие ќе кажувате за што ќе се наменуваат парите – додаде Заев, изразувајќи уверување дека граѓаните на Гостивар ќе ја дадат довербата на Невзат Бејта.


СДСМ: Помина времето кога граѓани „за уши, еден по еден“ се носеле на гласање


Скопје, 20 октомври, 2017 - 16:48 (META) 

Социјалдемократскиот сојуз на Македонија (СДСМ), се огласи со реакција на обвинувањата што денеска на прес-конференција ги изрече Спиро Ристовски, претседател на републичкиот изборен штаб на ВМРО-ДПМНЕ, кој обвини за огромни нерегуларности и „бугарски возови“ во првиот круг од локалните избори, кој се одржа во неделата, 15 октомври. Владејачката партија на ВМРО-ДПМНЕ ѝ порачува дека завршило времето кога снемувало ливчиња, се правеле „бугарски возови“, а граѓаните „за уши еден по еден“ се ваделе да гласаат за ВМРО-ДПМНЕ.

„Институциите обезбедија слободни избори, ВМРО-ДПМНЕ да го признае поразот на фер и демократски избори. ВМРО-ДПМНЕ не може да се помири со фактот што Македонија конечно после долг период имаше фер, демократски и слободни избори на кои граѓаните гласаа слободно и без притисоци, што беше потврдено и од извештаите на релевантните институции. Резултатите јасно покажаа каква е вистинската избирачка волја кога граѓаните гласаат слободно и без притисоци. Изборниот поткуп, злоупотребата на државните институции и ресурси, заканите и списоците за притисоци на граѓаните беа одлика на децениското владеење на Никола Груевски и ВМРО-ДПМНЕ“, се вели во реакцијата од СДСМ.


ВМРО-ДПМНЕ со нови обвинувања за изборни нерегуларности


Скопје, 20 октомври, 2017 - 15:56 (META) 

Постојано ни пристигнуваат информации за огромни изборни нерегуларности, злоупотреби, кршења на процедури, притисоци. По завршувањето на гласањето на повеќе локации низ државата забележано е недостаток или вишок на гласачки ливчиња. На голем број места не соодветствува бројот на ливчињата и бројот на потпишани граѓани што гласале, што укажува на сериозни сомневања за организиран т.н. бугарски воз, со што се наполнети кутиите со однапред заокружени гласачки ливчиња за кандидатите на СДСМ, тврди Спиро Ристовски, претседател на републичкиот изборен штаб на ВМРО-ДПМНЕ.

Тој на прес-конференција во седиштето на ВМРО-ДПМНЕ рече дека гласачко ливче од општина Карпош е најдено во гласачки кутии во општина Охрид, гласачко ливче од Велес е најдено во гласачки кутии во Струмица, како и дека во Гевгелија на избирачкото место 334 по затворање на гласачко место констатирано е дека недостасува гласачко ливче и од листата за советници но и од листата за градоначалници, што е и заведено и во записникот, додека во општина Берово, во селото Русиново ливче од листа на советници недостасува во рамки на утврдениот број на истите.

– Ова се сериозни докази дека има сериозни сомневања за спроведен изборен фалсификат со таканаречен метод на бугарски воз. Според утврденото од терен и информациите објавени по медиумите постојат основи на сомнение дека биле испечатени и паралелни гласачки ливчиња, едни за потребите на ДИК, други за потребите на СДС, кои однапред им биле давани на гласачите. Доказ за ова се пронајдени гласачки ливчиња во Ресен со ист сериски број – рече Ристовски.

Шефот на републичкиот изборен штаб на ВМРО-ДПМНЕ ја обвини и ДИК дека на вчерашната седница не казнила многу незаконитости.


ДИК го проби рокот за одлучување, досега решени само седум приговори


Скопје, 19 октомври, 2017 - 21:50 (META) 

Државната изборна комисија го проби рокот од 48 часа за разгледување и одлучување по приговорите од политичките партии за изборите, кое требаше да заврши вечерва во 19 часот.

Ова, во текот на седницата, која сè уште е во тек и на која има жестоки расправии меѓу членовите од СДСМ и од ВМРО-ДПМНЕ, го спомена и претседателот на Комисијата, Александар Чичаковски, како и членот на ДИК од СДСМ, Игор Милев.

Во моментов се пребројуваат ливчиња од гласачко место во Чаир за да се утврди дали се 406 или 409, во врска со приговорот од ВМРО-ДПМНЕ за поголем број ливчиња во гласачката кутија од бројот на запишани избирачи.

Претходно ДИК отфрли уште два приговори од ВМРО-ДПМНЕ за две избирачки места во Кривогашатни и за едно изборачко место во Аеродром. И во овие два приговори, како и во претходните, се повторуваше грешката со локацијата на избирачките места, односно наместо за избирачки места во општина Кривогаштани и во општина Аеродром беше наведена општина Прилеп.

Комисијата ќе чека да пристигне и општинска изборна комисија од Струга за да објасни зошто не е забележано дека на едно избирачко место гласал граѓанин што не бил во избирачкиот список и не се потпишал во него.

Од вкупно 43 приговори, ДИК на денешната седница досега успеа да разгледа само десет, сите од ВМРО-ДПМНЕ. Од нив отфрли седум, а постапката за трите приговори сè уште е во тек.

За разгледување остануваат уште 30 приговори на ВМРО-ДПМНЕ и по еден од ТМРО, Алијанса за Албанците и на Левица.


ААВМУ: Медиумите имале генерално еднаков третман на партиите во првиот изборен круг


Скопје, 19 октомври, 2017 - 17:35 (META) 

Програмските сервиси на државно ниво, опфатени со надзорот на Агенцијата за аудио и аудиовизуелни медиумски услуги (ААВМУ), во првиот круг од локалните избори „генерално обезбедиле еднакви услови за пристап до сите облици на изборно медиумско претставување“, соопшти денеска Агенцијата.

Голем дел од нив, се вели во соопштението, вложиле напори да организираат и дебатни соочувања на учесниците на изборите. Во овој контекст, од Агенцијата забележуваат дека дел од кандидатите учествувале во посебни информативни емисии кај едни медиуми, а не одговориле на поканите на други медиуми.

„Јавниот радиодифузен сервис и Собранискиот канал ги исполнија обврските да обезбедат бесплатно политичко претставување, кое учесниците во изборната кампања го искористија со различен интензитет. Карактеристично е што партиите на Албанците во Македонија не ја искористија можноста за бесплатно претставување“, стои во соопштението.

Во последните девет дена од изборната кампања (од 5 до 13 октомври), радиофузерите што емитуваат програма на македонски јазик, според ААВМУ, во вестите биле фокусирани на известување за кампањите на двете коалиции кои имаа најголем број потврдени листи со кандидати за градоначалници и за советници – едната предводена од СДСМ, а другата од ВМРО ДПМНЕ.

„Радиодифузерите што емитуваат програма и на албански и на македонски јазик имаа квантитативно подобро воедначен пристап во известувањето. И едните и другите, квалитативно настојуваа да обезбедат еднаков третман. Во овој извештаен период не беше констатирано прекршување на барањето за правично, избалансирано и непристрасно покривање на изборите“, стои во соопштението на ААВМУ.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


ВМРО-ДПМНЕ: Црната кампања на СДСМ го достигна дното


Скопје, 19 октомври, 2017 - 12:23 (META) 

Членот на СДСМ, Сафет Али, кој е еден од најблиските соработници на кандидатот на СДСМ за градоначалник на Штип, Благој Бочварски, е сликан со погребен венец за кандидатот на ВМРО-ДПМНЕ и штипски градоначалник, Илчо Захариев, се вели во соопштението на ВМРО-ДПМНЕ.

Во него се додава дека „ова е врвот на една морбидна кампања на СДС и е доказ за аздисаноста и за самоволието“.

„Ова однесување доаѓа по низата брутални кршења на законите, нерегуларности, негативната кампања на притисоци и на заплашувања. Јавноста беше сведок на напад на полицаец од Свети Николе, кој беше крвнички тепан и му се заканувале со ликвидација нему и на неговото семејство. Исто така, пред очи на јавноста се случи и нападот врз претседателот на политичката партија ГРОМ, Стевчо Јакимовски, од луѓе блиски до врхушката на власта“, се вели во соопштението.

Во него се додава дека на повеќе места во државата било пукано од огнено оружје од страна на активисти на СДС, но исто така биле искршени и запалени автомобили само неколку часа по завршувањето на локалните избори.


ВМРО-ДПМНЕ повлече три приговори за локалните избори од 43 доставени до ДИК


Скопје, 19 октомври, 2017 - 10:55 (META) 

На почетокот на денешната седница на ДИК, на која треба да се расправа за приговорите за локалните избори од ВМРО-ДПМНЕ, Алијансата за Албанците, ТМРО и од Левица, седницата беше бргу прекината затоа што ВМРО-ДПМНЕ повлече три приговори од вкупно 43 што ги поднесе до ДИК.

Како што објаснија претставниците од ВМРО-ДПМНЕ, тие повлекуваат приговори и за избор на советници и за градоначалници.

Во моментот трае паузата на која правната служба на ДИК ќе го подготви предлогот за приговорите со изменетите приговори од ВМРО-ДПМНЕ, по што ДИК ќе врши ждребање за редоследот по кој што ќе решава за приговорите.