!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

ДИК во 14 часот ќе одлучува дали ќе ги поништи одлуките за бонусите


Скопје, 5 декември, 2017 - 13:12 (META) 

Државната изборна комисија во 14 часот ја закажа седницата на која треба да расправа за исплатата на дополнителни плати на членовите и на вработените во ДИК за спроведување на локалните избори.

ДИК ја закажа седницата откако вчера амбасадорот на САД, Џес Бејли, рече оти слушнал дека членовите на Државната изборна комисија зад затворени врати едногласно си изгласале да добијат четири дополнителни плати по завршувањето на локалните избори во октомври годинава.

– Слушнав дека членови на ДИК си изгласале дополнителна плата за четири дополнителни месеци за нивната работа на октомвриските избори, кои штотуку завршија. Тие претходно дополнително добиле плата и за пет месеци по изборите од 2016 година. Гласањето во Комисијата било едногласно, меѓу сите партии и сите етникуми, а персоналот во Комисијата добил помали бонуси. Јас сум јавен службеник, поддржувам наградување на јавни службеници кои работат повеќе од предвиденото, но имам прашање во врска со ова. ДИК е независно тело. Можеби овој потег бил дури и легален, но гласањето се случило зад затворени врати – рече Бејли.

Од ДИК вчера стигна реакција во која стои дека одлуките за надоместок на вработените во ДИК се носени врз основа на закон, но и врз основа на одговорноста, сложеноста и на обемот на работните задачи и врз основа на извештаите за работа на изборната администрација.

На седницата на ДИК на дневен ред е и разгледувањето и усвојувањето на извештајот за спроведените избори за членови на советите на општините и на советот на Град Скопје и за градоначалници на општините и за градоначалник на Град Скопје.


Бејли: Слушнав дека членовите на ДИК тајно си изгласале четири дополнителни плати


Скопје, 4 декември, 2017 - 16:37 (META) 

Амбасадорот на Соединетите Американски Држави во Македонија, Џес Бејли, на денешното предавање за борбата против корупцијата што се одржа на Факулетот за безбедност во Скопје, рече оти слушнал дека членовите на Државната изборна комисија зад затворени врати едногласно си изгласале да добијат четири дополнителни плати по завршувањето на локалните избори во октомври годинава, пренесува порталот „Нова ТВ“.

– Слушнав дека членови на ДИК си изгласале дополнителна плата за четири дополнителни месеци за нивната работа на октомвриските избори, кои штотуку завршија. Тие претходно дополнително добиле плата и за пет месеци по изборите од 2016 година. Гласањето во Комисијата било едногласно, меѓу сите партии и сите етникуми, а персоналот во Комисијата добил помали бонуси. Јас сум јавен службеник, поддржувам наградување на јавни службеници кои работат повеќе од предвиденото, но имам прашање во врска со ова. ДИК е независно тело. Можеби овој потег бил дури и легален, но гласањето се случило зад затворени врати – рече Бејли.

Тој праша што кажува ваквата практика за лидерските приоритети и за вредностите на самата организација.

– Зошто јас го кажувам ова, што кажува ова за вредностите на самата организација? Каде беа свиркачите, истражувачките новинари или парламентарните тела за надзор? Што би сториле сите вие во оваа ситуација? – рече Бејли.


Груевски му се пожалил на Хан дека СЈО користи незаконски стекнати материјали


Скопје, 21 ноември, 2017 - 9:59 (META) 

Лидерот на ВМРО-ДПМНЕ, Никола Груевски, на вчерашната средба му посочил на еврокомесарот за проширување и за соседска политика Јоханес Хан, дека опозицијата не е вклучена во реформските процеси и дека освен барањето јавна поддршка, нема суштинско вклучување во процесот на изработување на реформите.

Груевски, се вели во партиското соопштение, истакнал дека има политички притисок врз судството, кој создава страв кај судиите и судските власти.

„Тој го информираше комесарот Хан за повеќе случаи за нарушување на судските правила и постапки, како и за барањето на СЈО за употреба на незаконски стекнати материјали во судските процеси, што укажува на недостиг од постоење на фактички докази и на прибегнување кон незаконски методи. Членот 12 од Законот за кривична постапка јасно и недвосмислено пишува дека нелегално стекнати аудио и видеоматеријали не можат да бидат доказ во судска постапка ниту, пак, од нив да се изведуваат докази“, велат од ВМРО-ДПМНЕ.

Груевски му посочил на Хан дека на локалните избори имало бројни неправилности, случаи на поткуп, бугарски воз, притисоци, уцени и закани, како и политички мотивирани кривични пријави врз градоначалници без правна основа.


Висар Ганиу, и официјално, е новиот градоначалник на Чаир


Скопје, 12 ноември, 2017 - 20:55 (META) 

Кандидатот на ДУИ, Висар Ганиу, и официјално, победи во општина Чаир, покажаа резултатите од повтореното гласање објавени на сајтот на Државната изборна комисија.

Ганиу во вториот круг, и по денешното прегласување во избирачкото место 2901 во Чаир, освои 48,92 отсто од гласовите додека неговиот против кандидат од паријата Беса, Зеќирија Ибрахими доби 47,71 отсто.

По вториот круг од локалните избори, оджрани на 29 октомври беа поднесени 16 тужби од Управниот суд, но беше прифатена само онаа на Беса за ИМ 2901 во општина Чаир. Поради малата разлика меѓу кандидатите од 209 гласа, Управниот суд и ДИК наложија да се направи прегласување. По денешното гласање, Ганиу ја зголеми разликата на 346 гласа, освојувајќи 13.987, додека Ибрахими 13.641.

Движењето Беса денеска обвини дека се вршело притисок врз гласачите и дека на некои од жителите на ова избирачко место, со знаење на Министерството на внатрешни работи, им биле одземени личните документи, со цел да ги спречат да гласаат.


Заврши гласањето на ИМ 2901 – Беса обвинува дека се вршело притисок врз гласачите


Скопје, 12 ноември, 2017 - 19:17 (META) 

Заврши гласањето на избирачкото место 2901 во општина Чаир, каде се прегласуваше вториот круг од локалните избори 2017 одржани на 29 октомври.

Како што соопштија од ДИК, гласањето минало непречено и во мирна атмосфера, а до 17 часот од вкупно запишани 719 избирачи на гласале 251, односно 34,9 отсто.

Првичните резултати од гласањето по електронски пат ДИК ќе ги објави на веб-странцата rezultati.sec.mk по 19 часот откако ќе бидат завршени броењето и сумирањето на гласовите.

Политичките партии по вториот круг од изборите поднесоа 16 тужби до Уставниот суд за изборни неправилности, но судот ја прифати само тужбата на Беса за избирачкото место 2901 во општина Чаир, каде разликата меѓу двата е 209 гласа. Поради тесната разлика беше одлучено во ова место да се прегласува.

Разликата во Чаир меѓу кандидатот на ДУИ, Висар Ганиу и кандидатот на Беса, Зекирија Ибраими во вториот круг беше 209 гласа, а на избирачкото место 2901 разликата е 66 гласа во корист на БЕСА.

Во меѓувреме, движењето Беса денеска обвини дека жителите на Чаир, од избирачкото место 2901 биле спречени да го остварат своето гласачко право и надлежните органи интервенираат.

„Бараме од органите кои го спроведуват законот, особено од Министерството за внатрешни работи, да создадат услови за граѓаните на Чаир кои гласаат на гласачкото место 2901 да излезат и слободно да ја изразат својата волја и политичка убеденост, пошто група насилни милитанти од партијата на власт им врши притисок на граѓаните од оваа област за да не излезат на гласање. Исто така бараме од Министерството за Внатрешни Работи на сите жители кои гласаат на гласачкото место 2901 да им ги вратат документите за лична идентификација за да можат да гласат.

Од партијата наведуваат дека имаат обезбедено информации дека на жителите кои живеат на оваа област им се одземени документите за лична идентификација од партиските активисти на владејачката партија, а за сето ова била информирана и МВР.


ДИК: Излезноста до 13 часот на ИМ 2901 во Чаир е 20,86 отсто


Скопје, 12 ноември, 2017 - 14:49 (META) 

Гласањето на избирачкото место 2901 во општина Чаир, каде се врши прегласување на вториот круг од локалните избори се одвива непречено, а до 13 часот на гласање излегле 20,86 отсто од запишаните избирачи.

Како што соопшти портпаролката на Државната изборна комисија, Љупка Гугучевска, до 13 часот од вкупно запишани 719 избирачи на гласање излегле 150, односно 20,86 отсто.

Гугучевска потсети дека гласачите на кои им е повредено гласачкото право имаат можност да достават приговор до ДИК во рок од 24 часа, но досега до ДИК не е доставен ниту еден ваков приговор.

Граѓаните исто така можат изборните неправилности да ги пријават на бесплатната телефонска линија на ДИК, односно на 0800 555 44.


Денеска се прегласува на избирачко место во Чаир


Скопје, 12 ноември, 2017 - 8:22 (META) 

Во избирачкото место 2901 во општина Чаир денеска повторно се гласа за градоначалник на општина Чаир. Тоа е единственото место на кое се прегласува по вториот круг од локалните избори. Како што соопштија од ДИК за „Мета“, гласачкото место навреме е отворено и засега изборниот процес се одвива без никакви проблеми.

По вториот круг од локалните избори, одржани на 29 октомври, политичките партии поднесоа 16 тужби, но Управниот суд отфрли 15 од нив, а ја прифати тужбата за избирачкото место 2901 во општина Чаир.

Избирачкото место 2901 има 719 гласачи. Поради неправилностите и малата разлика од 209 гласа меѓу двајцата кандидати во оваа скопска општина, Управниот суд и ДИК одлучија да има прегласување.

Резултатите од утрешното гласање ќе утврдат кој од двајцата кандидати ќе ја добие градоначалничката функција.


Заев – Бејли: Време е Владата да се фокусира на почнатите реформи


Скопје, 8 ноември, 2017 - 15:58 (META) 

Премиерот Зоран Заев и амбасадорот на САД, Џес Бејли, денеска разговараа за спроведените локални избори, за почнатите реформи и за безбедносните предизвици.

„Амбасадорот ѝ честиташе на земјата за успешниот изборен процес и препорача државните институции да ги имплементираат препораките на набљудувачите на ОБСЕ/ОДИХР“, се вели во соопштението од владината прес-служба.

На средбата, Бејли истакнал дека сега е добро време и дека се создадени услови Владата да се фокусира поинтензивно на најавените и на почнатите реформски процеси, особено во делот на владеењето на правото и борбата против организираниот криминал и корупција на национално и на локално ниво.

Американскиот амбасадор истакнал дека Вашингтон е подготвен да ги поддржува своите партнери во справувањето со глобалните закани во зајакнувањето на капацитетите на институциите, како што е Националниот комитет за спречување на насилен екстремизам и борба против тероризам.

Заев истакнал дека победата на изборите и големиот број освоени градоначалнички места за коалицијата што ја предводел на изборите, во исто време е и голема одговорност и дека претстои период во кој освоената доверба ќе треба да се оправда. Тој истакнал дека инсистира на чесно, одговорно и отчетно спроведување на политиките на централната и на локалната власт и дека за сите отстапувања од овие принципи ќе следуваат реакции на институциите, кои треба да го спроведуваат законот еднакво за сите.

Премиерот нагласил дека по политичката криза и успешно спроведените избори, Владата целосно ќе се посвети на интензивирање на реформите за економски развој на земјата, како и на динамизирање на процесите за евроатлантските аспирации. Тој истакнал дека во спроведувањето на суштинските реформи, Владата ќе продолжи да се заложува тој процес да биде исклучително инклузивен и дека во овие активности очекува поактивно вклучување на опозицијата и на другите чинители.


ДИК одлучи да има прегласување во Чаир на 12 ноември


Скопје, 6 ноември, 2017 - 20:57 (META) 

Државната изборна комисија попладнево на седница го разгледа решението на Управниот суд и ја усвои одлуката за повторување на гласањето на избирачкото место 2901 во основното училиште Илинден во општина Чаир.

Во Чаир ќе се прегласува откако Управниот суд ја усвои тужбата на Беса.

На ова избирачко место запишани се 719 гласачи, број што може да влијае на конечниот резултат и на изборот. Гласањето ќе биде в недела, на 12 ноември.

Разликата во Чаир меѓу Висар Ганиу од ДУИ и Зекирија Ибраими од Беса во вториот круг беше 209 гласа, а на избирачкото место 2901 разликата е 66 гласа.

Во вториот круг во ова избирачко место гласале 278 избирачи, од кои 164 за Ибраими, а 98 за Ганиу.

Управниот суд претходно ги одби другите 15 тужби што политичките партии ги поднесоа по вториот круг од локалните избори. Најмногу тужби против одлуките на ДИК до судот поднесе Алијанса за Албанците – вкупно 11, четири поднесе Беса, а една тужба поднесе Народното движење за Македонија (НДМ).


Управен суд утре ќе ги соопшти одлуките за тужбите за приговорите што не ги прифати ДИК


Скопје, 4 ноември, 2017 - 20:34 (META) 

Управниот суд денеска разгледал десет од 16 тужби поднесени од политичките партии Алијанса на Албанците, Беса и Народно движење за Македонија, но одлуките ќе ги соопшти утре.

Незадоволни од неприфаќањето на нивните приговори поднесени до ДИК, партиите поднесоа тужби, и тоа Алијанса за Албанците – 11, Беса поднесе четири тужби, а НДМ – една тужба, односно вкупно 16 тужби се поднесени до 10 часот денеска.

Останатите шест тужби Управниот суд ќе ги разгледува утре. Тој има обврска да донесе одлука по жалбите во рок од 48 часа по нивниот прием.