!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Локалната власт има низок степен на транспарентност


Скопје, 16 јуни, 2017 - 11:05 (META) 

Општините во Република Македонија исполнуваат 34 отсто од индексот на отвореност, покажа истражувањето за степенот на отвореност на институциите во шест земји од регионот, во рамки на проектот „Актион СЕЕ“ што го спроведува Фондацијата за интернет и општество, „Метаморфозис“.

„Овој податок е загрижувачки со оглед дека мерењето е направено на обезбедувањето на пристап до информации кои треба да се објавени на општинските веб-страници без да бидат побарани, како, на пример, одлуките што ги носат советите на општините, одлуките што ги носат градоначалниците, записниците од седниците на советите на општините, статутот на општините и деловниците за работа на советите“, велат од „Метаморфозис“.

Истражувањето покажува дека на ниското исполнување на индексот на достапност од страна на општините влијае и нивната недоволна интеракција со граѓаните преку социјалните мрежи, необјавувањето месечни информатори за граѓаните за работата на општините, како и недостигот од јавни дебати за граѓаните за прашања од локално значење, необјавувањето планови за јавни консултации со граѓаните за општинските политики и записници од одржани средби со граѓаните.

Според „Метаморфозис“, за подобрена транспарентност на македонските општини, кои исполнуваат 35 отсто од индексот за транспарентност, секоја активност која е финансирана со јавни пари мора да биде јавна, а информациите за овие активности мора да бидат еднакво и лесно достапни за сите граѓани.

„Индексот на транспарентност, во поткатегоријата транспарентност на буџетите, општините го исполнуваат со 49 отсто. Голем дел од општините ги објавуваат донесените буџети и завршните сметки, но во заштитени ПДФ-формати, што ги прави тешко пребарливи. Исто така, на процентот на исполнувањето на индексот влијае необјавувањето на граѓанските буџети од страна на општините, како полугодишните извештаи за трошењето на буџетот“, се вели во извештајот.


Собранието денеска ќе го укинува екстерното и ќе го продолжува мандатот на општините


Скопје, 1 јуни, 2017 - 9:36 (META) 

Собранието за денеска има обемна програма за работа, бидејќи покрај изборот на собраниските комисии, ќе решава и за предлог-закони за да се продолжи мандатот на градоначалниците и на советите на општините, како и за укинување на екстерното тестирање.

Продолжувањето на мандатите на општинските татковци и совети ќе се прави со предлог-закон за изменување и за дополнување на Изборниот законик по скратена постапка. Предлогот е поднесен од Оливер Спасовски, Ејуп Аљими, Африм Гаши и од Весел Мемеди.

Екстерното тестирање ќе се укине со изменување и со дополнување на законите за основното и за средното образование, како и на законот за наставници во основните и во средните училишта. Сите три закони се поднесени од коалицијата на СДСМ.


ВМРО-ДПМНЕ: СДСМ ги блокираше општините


Скопје, 31 мај, 2017 - 10:02 (META) 

Во редовното утринско соопштение денеска, ВМРО-ДПМНЕ обвини дека СДСМ го манифестирал „својот страв и антидржавното дејствување со одбивање на предлогот да се изгласа во итна постапка датумот за одржување на локални избори и да се продолжат мандатите на градоначалниците и на советите на општините и на Град Скопје“.

Предлогот на седницата на Собранието на Република Македонија за избор на владата го поднесе Илија Димовски, но беше одбиен од мнозинството.

„СДС со ваквото свое дејствување прави срамен преседан и го загрозува нормалното функционирање на единиците на локална самоуправа. СДС ги доведува во прашање исплатите на платите на вработените во општинската администрација, функционирањето на јавните претпријатија формирани од општините, детските градинки, основните и средните училишта, противпожарните служби, но и го оневозможува издавањето на разни  дозволи и одобренија, кои ги потпишуваат градоначалниците или претседателите на совет“, се вели во соопштението.

Партијата обвинува дека директна вина за сите проблеми и штети од состојбите ќе има СДСМ, за која обвини дека го блокира нормалното функционирање на државата поради теснопартиски интереси.


ВМРО-ДПМНЕ: СДСМ да не бега и да не се плаши од распишување на локалните избори


Скопје, 30 мај, 2017 - 19:24 (META) 

„Ја повикуваме СДС да не бега и да не се плаши од распишување на локалните избори. Граѓаните на Република Македонија не смее да ја плаќаат сметката за стравот на СДС да се соочи со одговорноста од нивната антидржавна и деструктивна политика“, стои во реакцијата на ВМРО-ДПМНЕ на соопштението на СДСМ, во кое ја повика опозициската партија да овозможи формирање на собраниските комисии.

Од ВМРО-ДПМНЕ велат дека на граѓаните треба да им се овозможи да имаат функционална самоуправа која ќе ги реализира проектите од нивен интерес.

„Врхушката на СДС да не се обидува да го сокрие криминалот зад измислени аргументи. На последните избори ВМРО-ДПМНЕ со коалицијата доби најмногу гласови и е претставник на најголем број граѓани. Уставно загарантирано право на граѓаните е да имаат функционална локална самоуправа и СДС не смее да го ускратува тоа право“, стои во соопштението на ВМРО-ДПМНЕ.


ВМРО-ДПМНЕ: СДСМ и мнозинството еден месец ја блокираат локалната самоуправа


Скопје, 29 мај, 2017 - 9:44 (META) 

СДСМ и собраниското мнозинство имаат одговорност за одложувањето на локалните избори, со што се става под знак прашалник ефективното функционирање на локалната самоуправа, порача ВМРО-ДПМНЕ претпладнево преку соопштение.

Партијата вели дека и еден месец откако „СДС насилно изведе сценарио за избор на претседател на Собранието, флагрантно кршејќи го Уставот, низа закони и деловникот за работа на Собранието“, во законодавниот дом нема никаква активност „која би била барем обид за излез од кризата во државата“.

„Фактот дека и по еден месец од изборот на Талат Џафери за претседател на Собранието, во истото нема никаква активност и фактот дека СДС сè уште ги кочи клучните и неминовни процеси во државата, како одржувањето на редовните локални избори, покажува дека СДС, очигледно, со намера го изведе сценариото од 27 април, за дополнително продлабочување на кризата. Република Македонија и нејзините граѓани не треба да ја плаќаат сметката за антидржавното дејствување на СДС. Државата не смее да трпи, економијата не смее да стагнира, граѓаните сакаат да одат напред. СДС мора да овозможи одржување на локалните избори, а со нив и предвремени парламентарни избори, кои се вистинско долгорочно решение за државата“, стои во соопштението од ВМРО-ДПМНЕ.


Градоначалниците имаат техничка функција до 31 декември, тврди Инспекторатот


Скопје, 16 мај, 2017 - 13:24 (META) 

Државниот инспекторат за локална самоуправа реагира на толкувањата за мандатите на градоначалниците и на општинските совети и тврди дека се произволни и несериозни за да се манипулира јавноста.

„Во согласност со член 35, став 1 од Законот за локална самоуправа, мандатот на советниците е четири години и со оглед на тоа што последните локални избори се одржаа на 24 март 2013 година, нивниот мандат истече на 24 март годинава и сите одлуки што советниците ги донеле по овој датум од страна на инспекторатот се поништени, а никаква евентуална законска измена од Собранието нема ретроактивно дејство“, велат од Инспекторатот.

Состојбата со мандатот на градоначалниците, според Инспекторатот, е поинаква и тие имаат мандат до 31 декември оваа година.

„Мандатот на градоначалниците е регулиран со член 49 и 52 од Законот за локална самоуправа, каде што стои дека мандатот трае до завршување на тековната година, што значи до 31 декеври 2017 година. Со оглед на изминатиот мандат на советниците, градоначалниците извршуваат техничка функција и општините не смеат да прекинат да функционираат“, се вели во соопштението.

Оттаму додаваат дека ниту биле консултирани ниту учествувале на јавни дебати организирани од ЗЕЛС, на кои, според соопштението, се носеле произволни заклучоци без законска основа и од партиски интереси, како и дека се лицитирало со датуми за мандати.


Анкета на ИРИ: Мнозинството граѓани на Македонија не се задоволни од локалните власти


Скопје, 15 мај, 2017 - 13:34 (META) 

Мнозинството граѓани на Македонија се незадоволни од нивните локални власти, покажува најновата анкета на Центарот за анкетни истражувања на Меѓународниот републикански институт (ИРИ).

Според податоците од анкетата, 51 отсто од испитаниците изјавиле дека се донекаде или многу незадоволни од работата на нивните градоначалници, додека 47 отсто искажале идентични ставови и за општинските совети.

Четириесет и шест отсто од анкетираните се изјасниле дека, исто така, се незадоволни од локалната администрација.

На прашањето колку сте расположени да гласате на претстојните локални избори 61 отсто од испитаниците рекле дека се многу расположени, 21 отсто се расположени, а пет отсто нерасположени за гласање.

Од испитаниците, 28 отсто би гласале за ВМРО-ДПМНЕ на локалните избори, 16 отсто за СДСМ, ДУИ би го поддржале 8 отсто, БЕСА 7, Алијансата за Албанците и ДПА по 2 отсто, ГРОМ и ЛДП по 1 отсто.

Четириесет и четири отсто од испитаниците сметаат дека треба да има предвремени парламентарни избори, 41 отсто дена не треба, а 15 отсто не знаат.

Доколку се одржат предвремени парламентарни избори, 59 отсто од испитаниците би биле многу расположени да гласат, 18 отсто би гласале, а 7 отсто не се расположени да гласаат.

На прашањето за влез на Македонија во Европската Унија, значително мнозинство, односно 72 отсто од испитаниците, искажале поддршка за влез на земјава во ЕУ, а 71 отсто се за членство во НАТО.

Регионалниот директор на ИРИ за Европа, Јан Суротчак, ги повикува политичките партии да најдат начин за решавање на проблемите кои се најважни за гласачите на локално ниво.

Анкетата е спроведена за Центарот за анкетни истражувања преку фирмата за истражувања на пазарот „Брима“, во соработка со „Чериот ЛЛЦ“. Податоците се собрани преку интервјуа лице в лице од 4 до 12 март 2017 година. Вкупно биле спроведени 1.108 интервјуа, а истражувањето има маргина на грешка од плус или минус три проценти на среден опсег, на ниво на доверба од 95 отсто. Стапката на одѕив била 71 процент.

Истражување е овозможено со поддршка на Агенцијата на за меѓународен развој САД (УСАИД).


ЗЕЛС бара итен датум за локални избори за да не дојде до колапс на општините


Скопје, 9 мај, 2017 - 16:37 (META) 

Функционирањето на голем број општински јавни установи ќе се доведе во прашање, а околу 45.000 вработени во локалната самоуправа, оштинските претпријатија и во образованието ќе останат без плата.

На ова денеска предупредија градоначалниците на Скопје, Куманово и на Гостивар, но и членови на Заедницата на единиците на локалната самоуправа (ЗЕЛС), Коце Трајановски, Зоран Дамјановски и Невзат Бејта, бидејќи нивниот и мандатот на советниците во општините им истекува на 15 мај, а нови локални избори не се закажани.

„Ќе се доведат во прашање функционирањата на општински јавни установи и тоа сите културни, образовни институции на локално ниво, како музеи, театри, домови на култура, на противпожарни служби, спортски објекти, зоолошки градини и слично. Градежни дозволи нема да се издаваат. Градежното земјиште, со кое управува локалната самоуправа, веќе нема да се оттуѓува или да се дава под закуп“, предупреди Трајановски.

Тој вели дека ќе престанат сите почнати и ќе се запрат планираните инвестиции, како во инфраструктурата на општините, така и во сите други објекти што се надлежност на локалната самоуправа.

„Нема да може да се врши исплата на комуналии, како струја, вода и слично, во сите институции на локално ниво, што ќе значи дека истите институции, а, пред сè, градинките и училиштата, ќе треба да се затворат, а децата да се испратат дома. Нема да можат да се склучуваат бракови во државава. Само да потсетам дека при секое склучување брак, официјални сведоци се претставници на општинските совети“, додаде Трајановски.

Поради тоа, ЗЕЛС денеска апелираше парламентот итно и без одложување, а најдоцна до петок оваа недела, да најде решение. Една од можностите е измена на Изборниот законик.

„Наместо првата половина на мај, како што стои во Изборниот законик, треба да се утврди нов датум за одржување на локалните избори. До Уставниот суд е доставена иницијатива од Министерството за локална самоуправа за да се разгледаат одредени членови на Изборниот законик и од Законот за локална самоуправа, а во однос на мандатите на градоначалниците и на претставниците на општинските совети“, истакна Трајановски.

Уставниот суд утре на седница треба да ги разгледува иницијативите за укинување на членови од Законот за локална самоуправа и на Изборниот законок, со што би се овозможило продолжување на мандатот на градоначалниците и на советите на општините.


Павлески: Општините ќе останат обезглавени, а последиците ќе бидат врз граѓаните


Скопје, 11 април, 2017 - 14:27 (META) 

„Локалните избори требаше да се одржат најдоцна до 15 мај, но поради тоа што Никола Груевски и ВМРО-ДПМНЕ ја блокираат работата на парламентот, изборите нема услови да се одржат во предвидениот законски рок“, изјави претседателот на комисијата за локална самоуправа на СДСМ, Дејан Павлески.

Тој додаде дека по тој рок, целосно прекинува мандатот на градоначалниците и на советниците, со што тие губат секакво право на раководење со општините.

„Општините ќе останат обезглавени, а последиците ќе паднат врз граѓаните, кои не ќе може да ги реализираат своите потреби. Незаконски и недозволиво е насилно да се носат детални урбанистички планови на штета на граѓаните, во време кога градоначалниците и општините вршат само техничка функција. Особено нагласуваме дека во услови на техничко функционирање на општините, советниците и градоначалниците не смеат да распишуваат тендери“, изјави Павлески.

Тој ја посочи како пример Општина Аеродром, каде што, како што кажа, градоначалникот Ивица Конески и советниците на ВМРО-ДПМНЕ „за тендер-интереси, без согласност од граѓаните, по итна постапка, изменија детален урбанистички план.

„Согласно Законот за локална самоуправа, мандатот на сите членови на советите на општините и на сите градоначалници е четири години и е веќе истечен. Советите и градоначалниците, во периодот што следува, своите надлежности мора да ги извршуваат исклучиво технички, за да се даваат услугите што им се потребни на граѓаните. Советниците и градоначалниците, исто така, не смеат да ги задолжуваат општините, односно граѓаните! И не смеат да почнуваат инфраструктурни објекти за да се додворуваат на граѓаните во пресрет на локалните избори“, додаде Павлески.


Експертите на УНЕСКО ја почнаа контролата на проектите во Охрид


Охрид, 11 април, 2017 - 12:50 (META) 

Група експерти на УНЕСКО од денеска се во Охрид каде што вршат увид на повеќе проекти што се во тек или кои се планирани да се реализираат.

Експертите на УНЕСКО најпрво го посетиле Националниот парк Галичица, каде разговарале со раководството на јавната установа, но и со претставници на владата. Неофицијално, во НП Галичица се врши увид во однос на два проекти планирани за реализација: експресен пат до Свети Наум и зимски ски-центар на Галичица.

За утре е планирана посета на комплексот во изградба на Универзитет „Св. Климент Охридски“ на Плаошник.

Последниот надзор на УНЕСКО беше пред неколку години, кога тие вршеа детален увид на Плаошник, по што констатираа дека проектите не ги нарушуваат стандардите на УНЕСКО .

На крајот од престојот, експертите треба да се сретнат со стручните лица и со раководството на Завод и музеј во Охрид, со претставници на локалната самоуправа, но и со невладините еколошки асоцијации.

Претходно, Комитетот за светско наследство на УНЕСКО на 40. седница во Истанбул изрази сериозна загриженост за иднината на регионот на Охрид, поради бројните инфраструктурни проекти кои беа предложени, што потврдува дека тие најверојатно би предивикале значителни потенцијални влијанија врз исклучителната универзална вредност на регионот на Охрид.