!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Арапските земји испратија листа со барања до Катар, вклучувајќи и затворање на „Ал Џезеира“


Доха, 23 јуни, 2017 - 10:09 (META) 

Четирите арапски држави кои воведоа санкции кон Катар поради наводна поддршка на тероризмот, ѝ испратиле на Доха 13 барања, вклучувајќи и затворање на телевизијата „Ал Џезеира“ и намалување на врските со Иран, изјавил официјален претставник на една од четирите држави.

Листата со барањата, како што пренесуваат светските агенции, ја составиле Саудиска Арабија, Обединетите Арапски Емирати, Египет и Бахреин.

Од Катар се бара и затворање на турската воена база во оваа земја и испорачување на сите терористи од нејзина територија.

Четирите држави ѝ дале на Доха рок од десет дена да ги исполни барањата.

Листата на раководството на Катар ја предал претставник на Кувајт, земјата посредничка во спорот меѓу земјите во овој регион. Од Катар претходно ги демантираа наводите дека поддржуваат терористички групи.


УЈП објави нова листа на должници


Скопје, 13 јуни, 2017 - 11:52 (META) 

Управата за јавни приходи (УЈП) ја објави најновата листа на должници за долгови доспеани до 28 февруари и неплатени до 31 мај, врз основа на неплатени данок на додадена вредност (ДДВ), данок на добивка, персонален данок на доход, придонеси од задолжително социјално осигурување, акцизи и царини.

На листата има повеќе од 4.000 должници, меѓу кои има државни и приватни компании, но и бизнисмени и физички лица.

Јавното претпријатие „Македонија пат“ должи околу 7,4 милони евра за неплатен данок на добивка и за ДДВ.

Од бизнисмените најмногу пари должи „тутунскиот бос“, Бајруш Еврзија Сејдиу од Куманово, кој има 1,8 милиони евра неплатен данок.

Тој во 2010 и во 2011 година беше осуден на вкупно 17 години затвор, односно пет години затвор за случајот „Пепел“ и 12 години затвор за случајот „Пепел 2“, за перење пари, насилство, фалсификување цигари, неплаќање акцизи и за злосторничко здружување.


„Тајм“: Македонија и Косово меѓу десетте земји со најниски трошоци за живот


Њујорк, 15 мај, 2017 - 12:23 (META) 

Американскиот магазин „Тајм“ направи листа со земји во кои е најевтино да се живее, во кои Косово е на четврто место, а Македонија на десетто.

Србија е на 18. место, Црна Гора на 26. позиција на ранг-листата, а од регионот во листата најдоа место и Босна и Херцеговина, на 11. место,  Словенија на 36. позиција и Хрватска на 47. место.

Десетте земји најевтини за живот се Јужна Африка, Индија, Косово, Саудиска Арабија, Казахстан, Замбија, Оман, Парагвај, Чешка и Македонија.

При составувањето на листата, земјите биле рангирани според индексот на локалната куповна моќ, висината на закуп на недвижностите, цената на продуктите и индексот на малопродажните цени, а резултатите се споредувани со стандардот на животот и со цените во Њујорк.

За Македонија се вели дека локалната куповна моќ е за 49 отсто пониска, киријата е 94 проценти поевтина, продуктите се за 73,3 отсто поевтини, а локалните добра и услуги исто така се поевтини за 68,6 отсто во однос на тие во Њујорк.


УЈП ја објави новата листа на должници


Скопје, 11 мај, 2017 - 10:53 (META) 

Управата за јавни приходи (УЈП) ја објави петтата листа на должници за долгови доспеани до 31 јануари и за неплатени долгови до 30 април врз основа на данок на додадена вредност (ДДВ), данок на добивка, персонален данок на доход, придонеси од задолжително социјално осигурување, акцизи и царини.

На листата се компании, јавни претпријатија и физички лица.

„Македонија пат“ е едно од јавните претпријатија што за неплатен данок на добивка и за ДДВ должи околу седум милиони евра.


Еколозите и властите со различни толкувања на ставовите на мисијата на УНЕСКО во Охрид


Охрид, 19 април, 2017 - 10:49 (META) 

Градоначалникот на Охрид, Никола Бакрачески, ги обвинува еколошките асоцијации дека намерно шират паника и невистини околу можното симнување на Охрид од листата на светските вредности и реткости на УНЕСКО.

– Се чини дека некои структури се задолжени и од петни жили се борат Охрид да го изгуби статусот на заштитен град на УНЕСКО, многу повеќе отколку што привидно се загрижени за зачувување на природата и на културното наследство – реагираше Бакрачески.

Екологистите, пак, остануваат на своите ставови и ги поткрепуваат со сознанијата од разговорите со експертската група на УНЕСКО.

– Реактивната мисија на УНЕСКО е најригорозниот инструмент што постои во рамки на институцијата. Наспроти наративот што го презентираат македонските институции, мисијата не е овде за да дава забелешки, туку за да собира информации. Извештајот во кој тие ќе ги вклучат своите забелешки, ќе биде готов за осум недели. Врз основа на тој извештај ќе се реши дали регионот ќе биде преместен на листата на загрозено наследство или не, на 41. седница на УНЕСКО што ќе се одржи во јули годинава, во Краков, Полска – изјави Драгана Велковска од Здружението за заштита на животни и животна средина, по состанокот со експертите на УНЕСКО.

Еколошките асоцијации ја образложиле актуелната ситуација и го претставиле истражувањето на Здружението според кое речиси сите опфатени институции, граѓани и граѓански организации се против уништување на природните вредности на регионот во име на краткотрајна или еднократна финансиска добивка.

– Урбанизацијата на Студенчишко Блато ќе предизвика уништување на последниот блатен еко-систем на Охридското Езеро карактеристичен со својата флора и фауна, додека, пак, изградбата на пристаниште и на пешачки патеки во езерото од каналот Студенчишта до реката Грашница трајно ќе одземе и ќе уништи неколку хектари од литоралниот регион во овој дел од езерото со што ќе се уништат ендемски видови – предупредува д-р Трајче Талевски од „Охрид СОС“.

Експертите на УНЕСКО изнеле иницијатива за прогласување на регионот за зелена дестинација, што еколошките асоцијации ја поддржувале.

Надзорната мисијата на експертски тим на УНЕСКО, која треба да подготви извештај за заштитеното природно и културно наследство во Охридскиот Регион, покрај со невладините организации, оствари средби со претставници на Националниот парк Галичица, Завод и музеј Охрид и на локалната самоуправа.


УЈП ја објави новата листа на даночни должници


Скопје, 11 април, 2017 - 10:51 (META) 

Управата за јавни приходи (УЈП) ја објави новата листа на должници на која се наоѓаат 4.251 фирма и физички лица кои имаат долгови доспеани до 31 декември 2016 година и неплатени до 31 март 2017 година врз основа на данок на додадена вредност (ДДВ), данок на добивка, персонален данок на доход, придонеси од задолжително социјално осигурување, акцизи и царини.

Најголем должник на листата со 11,1 милиони евра е охридски „Отекс“, кој не платил данок на додадена вредност и данок на добивка.

На листата се и голем број јавни претпријатија, како, на пример, „Македонија пат“ кое должи околу осум милиони евра.

„Македонската радио-телевизија“ должи 1,4 милиони евра.


Убиениот напаѓач од аеродромот „Орли“ бил на листата на радикализирани поединци


Париз, 18 март, 2017 - 15:54 (META) 

Напаѓачот кој денеска беше убиен на аеродромот „Орли“ во Париз, бил на листата на радикализирани поедници и имал долго криминално досие, вклучувајќи и пресуди за вооружено разбојништво, соопштиле француските власти, пренесува „Би-би-си“.

Тој беше застрелан и убиен од француските безбедносни сили, откако се обидел да одземе пиштол од припадничка на воена патрола на јужниот терминал на аеродромот.

Станува збор за 39-годишен маж, чиј идентитет сè уште не се открива.

Тој, како што пренесуваат француските медиуми, повикувајќи се на информации од полицијата, утрово бил вмешан во вооружен инцидент во северниот дел на Париз, по што украл автомобил и со него дошол на аеродромот „Орли“, каде ја нападнал припадничката на воената патрола и се обидел да ѝ го земе оружјето.

Мотивите за нападот засега не се познати. Таткото и братот на напаѓачот биле веднаш приведени, што е стандардна процедура кога станува збор за сомневања за терористички напад.

Од француската полиција соопштиле дека напаѓачот не носел експлозив. Во двата инциденти нема други повредени лица.

Откако беше затворен и евакуиран, делови од аеродромот „Орли“ се повторно отворени по, како што го опишуваат француските власти, екстремно сериозниот инцидент.


УЈП ја објави новата листа на должници


Скопје, 14 декември, 2016 - 15:02 (META) 

Управата за јавни приходи ја објави најновата 12. листа на должници, на која се наоѓаат вкупно 4.570 компании и граѓани.

Станува збор за субјекти кои должат за данок на додадена вредност, данок на добивка, персонален данок на доход, продонеси од задолжително социјално осигурување, акцизи и царини.

На списокот се оние кои имаат долгови доспеани за плаќање до 31 август, а се неплатени до 30 ноември.

На листата се објавени имиња на физички лица и самостојни вршители на дејност чиј долг е повисок од 120.000 денари и на правни лица за долг повисок од 300.000 денари.


Македонија на 53. место на Индексот за просперитет на лондонски „Легатум“


Лондон, 3 ноември, 2016 - 21:56 (META) 

Институтот „Легатум“ од Лондон го објави својот десетти јубилеен глобален Индекс на просперитет, кој претставува листа на најпросперитетните земји во светот.

На индексот на „Легатум“, Македонија се наоѓа на 53. место, а најдобро рангирана земја од регионот е Словенија, која е на 20. позиција на листата.  Хрватска е на 43. место, Грција на 44., Бугарија на 57., Црна Гора на 58., Србија на 66. место, Албанија на 77., додека Босна и Херцеговина воопшто ја нема на листата од 149 земји.

Инаку, според индексот, најпросперитетна земја во светот е Нов Зеланд, а по неа следуваат Норвешка, Финска, Швајцарија и Канада.

Инситутот „Легатум“, покрај количеството пари со кои располага една држава, како фактор за просперитет, при крерирањето на листата предвид зема 104 други карактеристики.

Покрај традиционалните, како што е висината на БДП по жител или вкупниот удел на вработен, „Легатум“ во својата формула внесува и фактори како што се бројот на интернет-провајдери и количеството дневен одмор што го има просечниот граѓанин. Варијаблите потоа се делат на девет категории, односно економски квалитет, работна атмосфера, власт, образование, здравство, безбедност, лични слободи, општествен капитал и природна средина.


СДСМ Битола испратилa преку 100 предлози за пратеничката листа во петката


Битола, 19 октомври, 2016 - 10:57 (META) 

Битолските социјалдемократи до централата на СДСМ во Скопје испратиле долга листа од 104 потенцијални кандидати за пратеници на претстојните парламентарни избори.

Предлозите биле испратени директно од месните организации, а им бил оставен простор на членовите и самите да се кандидираат.

Меѓу најзвучните имиња за евентуални кандидати за пратеници се потпретседателот на партијата и актуелен дополнителен министер за информатичко општество, Александар Кирацовски, а на листата се и довчершните пратеници Јулијана Силјановска и Васко Ковачевски, шефот на изборниот штаб на СДСМ во Битола, Методија Тасевски, советниците Благојче Котевски, Горан Козаров и Зоран Стојчевски, претседателот на комисијата за здравство на СДСМ, гинекологот Гоце Чакаровски, и адвокатот Васко Талевски.

Според процедурите, по конгресот на СДСМ на крајот на овој месец, ќе се знае кои од предложените имиња за евентуелни пратеници ќе се најдат на листата во петтата изборна единица.

– СДСМ како демократската партија, воведува и демократски процедури за предлагање и за избор на кандидати за пратеници на претстојните парламентарни избори. Потоа централното раководство ќе одлучи кои ќе се најдат на кандидатската листа за пратеници – изјави за „Мета“, Александар Кирацовски.