!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

ВМРО-ДПМНЕ: Обврските што не се доспеани за наплата, Владата ги прикажува како долг


Скопје, 22 јули, 2017 - 14:41 (META) 

Министерот за финансии, Драган Тевдовски, недозволиво се обидува недоспеани обврски на државата да ги брои во долгови, само за да манипулира со бројките и да му удоволува на својот лидер и на партиските интереси, изјави на прес-конференција Лилјана Затуроска од ВМРО-ДПМНЕ.

Таа додаде дека Зоран Заев од ракав кажувал бројка дека централната власт има скриен долг од една милијарда евра, а Тевдовски потоа брзал да го оправда, ставајќи нереални бројки, броејќи долгови на општини.

– Сакајќи да ја оправдаат лагата на Зоран Заев, дека владата на ВМРО-ДПМНЕ оставила наводен скриен долг од една милијарда евра, излегоа на брзоплета прес-конференција во која ставиле сè на куп, и долгови на единици на локални самоуправи, локални јавни претпријатија и слично. Патем, за скандалот да биде уште поголем, тие во оваа манипулација користат и обврски кои сè уште не се доспеани за наплата – изјави Затуроска.

Таа додаде дека министерот за финансии предложил ребаланс на буџет со кој се кратат сериозни ставки и проекти од областа на образованието и на земјоделството.


За СДСМ актуелниот буџет е нереален, за ВМРО-ДПМНЕ со ребалансот ќе биде партиски


Скопје, 19 јули, 2017 - 19:04 (META) 

На денешната комисиска расправа за ребалансот на буџетот во Собранието, пратениците на ВМРО-ДПМНЕ истакнаа дека тие сметаат дека тој е направен по желбата на СДСМ за да се партизираат институциите, а од СДСМ, пак, посочија дека сметаат дека буџетот за 2017 година е предимензиониран и затоа е потребен ребаланс.

Лилјана Затуроска од ВМРО-ДПМНЕ рече дека со ребалансот, буџетот ќе биде неразвоен, бидејќи се кратат 78 милиони евра за капитални инвестиции.

„Не можете да кажете дека инфраструктурните проекти, кои се капитални, кои носат бенефит за економијата, за развојот на инфраструктурата, за подобрување на животниот стандард, биле закочени поради одредени грешки во проектната документација. Тоа е целосно незнаење како еден инфраструктурен проект од капитално значење треба да ја помине фазата. Вие немате капацитет тие инфраструктурни проекти да ги завршите“, рече Затуроска.

Невенка Стаменковска од ВМРО-ДПМНЕ, исто така, обвини дека не слушнала за ниту еден конкретен проект кој со ребалансот на буџетот треба да се реализира до крајот на годината.

Панче Иванов од СДСМ, пак, истакна дека буџетот за 2017 година бил предимензиониран.

„Се добива впечаток дека кога буџетот се носел бил предимензиониран, без реални очекувања и проценка. Предвидувањата биле максимални, дека сè што е планирано ќе се реализира“, рече Иванов.

На денешното второ продолжение на расправата за ребалансот на буџетот на Комисијата за финансирање и буџет, тема беа и партиските вработувања.


Затуроска: Одложувањето на СДСМ да се соочи со народот го зголемува револтот кај граѓаните


Скопје, 16 мај, 2017 - 16:25 (META) 

ВМРО-ДПМНЕ преку пратеничката Лилјана Затуроска денеска повторно го повика парламентарното мнозинство веднаш да обезбеди услови за продолжувањето на мандатот на локалната власт и да не ги одлагаат локалните избори. Тоа, според Затуроска, е неопходно за да се излезе во пресрет на интересите на граѓаните и потребите на општините, да продолжат нормално да функционираат како сервис на народот, кој може да ги решава секојдневните комунални и инфраструктурни барања.

Таа му порача на СДСМ дека „секое одложување да се соочи со народот само дополнително ја продлабочува политичката криза во државата и го зголемува револтот на граѓаните кон нивните незаконски, неуставни и, пред сè, антидржавни чекори кои ги преземаат во континуитет“ и го повтори повикот на нејзината партија заедно со локалните да се организираат и предвремени парламентарни избори.

– ВМРО-ДПМНЕ останува на ставот дека народот заслужува да биде прашан што мисли за постизборната измама преточена во тиранската платформа. Доколку парламентарното мнозинство се охрабри, во истиот термин со локалните избори би можеле да се одржат и нови парламентарни избори, на кои граѓаните не само што ќе ја изберат својата локална власт, туку ќе имаат можност да го кажат својот став и за последните политички случувања и за постизборните измами што СДС им ги приреди – рече Затуроска.


Затуроска: Заев остави простор поединци да го негираат идентитетот и да се закануваат


Скопје, 13 март, 2017 - 15:36 (META) 

Со одбивањето да ја отфрли тиранската платформа, аболираниот криминалец Зоран Заев ја отвори Пандорината кутија за редефинирање на Македонија, изјави на прес-конференција Лилјана Затуроска од ВМРО-ДПМНЕ.

Таа додаде дека на тој начин Заев оставил можност „поединци или групи сè поотворено да го негираат македонскиот идентитет и да испраќаат закани кон Македонија, искажувајќи територијални претензии“.

– Албанската пратеничка Месила Дода е последна во низата кои отворено застанаа против македонските национални интереси. Таа му порача на Зоран Заев дека доколку се повлече од тиранската платформа, треба да се соберат сеалбанските политички сили за да помогнат да се одржел референдум за Илирида – изјави Затуроска.

Според нејзе, „ваквите срамни и недолични изјави се производ на уцените на кои потклекна Зоран Заев само од страв дека тој и криминалното раководство на СДСМ ќе треба да одговараат за кривичните дела што ги сториле“.

– Пазарењето со националните интереси е најнизок и најсрамен чин. Зоран Заев мора да собере храброст, да го послуша народот и да ги отфрли уцените. Не може трите потписи на Зијадин Села да бидат поважни од македонскиот идентитет. Срамно е да се соработува со некој кој во лице те негира и ти кажува дека пред 100 години не си ни постоел – додаде Затуроска.


Затуроска: ВМРО-ДПМНЕ успеа да ја одржи економијата во правилна насока


Скопје, 16 февруари, 2017 - 14:58 (META) 

Македонската економија како и претходната година така и сега од страна на Европската комисија е оценета како стабилна, со прогнозиран пораст на домашниот бруто-производ од 3,2 проценти, што е еден од највисоките во Европа, изјави на прес-конференција Лилјана Затуроска од ВМРО-ДПМНЕ.

Таа додаде дека „во извештајот се прогнозира невработеноста да се намали на 22 проценти, што е идентична на таргетот на владата предводена од ВМРО-ДПМНЕ поставен за периодот до 2018 година.“

– Покрај вештачки креираната криза од страна на СДСМ која имаше и за цел да го отежни економскиот раст, ВМРО-ДПМНЕ успеа да ја одржи економијата во правилна насока и да обезбеди економска стабилност и просперитет – додаде Затуроска.