!На 1 февруари 2017 година, завршува промотивниот период на слободно користење, без регистрација и без претплата, на содржините на „Мета“, кое беше воведено за да им овозможиме полесен пристап на корисниците до навремени и проверени вести. За начинот на пристап и за претплата, од 1 февруари 2017 година ќе информираме дополнително. При пренесувањето и преземањето на содржините од „Мета“, задолжително е атрибуирање и линкување.

Народна банка ја намали основната каматна стапка од 3,75 на 3,5 проценти


Скопје, 11 јануари, 2017 - 14:43 (META) 

Народна банка ја намали каматната стапка на благајничките записи, како основна каматна стапка, од 3,75 на 3,5 проценти.

Ова било одлучено на 10 јануари кога се одржала редовна седница на Комитетот за оперативна монетарна политика, на која биле разгледани состојбите во домашната економија, движењата на меѓународните и на домашните финансиски пазари и показателите за домашната економија во контекст на поставеноста на монетарната политика.

По намалувањето во декември, ова е второ дополнително намалување за 0,25 процентни поени.

– Ваквата реакција на монетарната политика е одраз на понатамошното стабилизирање на очекувањата на економските субјекти и на порастот на структурната ликвидност на банкарскиот сектор – се вели во соопштението на Народна банка.

Каматната стапка на благајничките записи беше зголемена за 0,75 процентни поени, од 3,25 на 4 проценти на 4 мај минатата година, како реакција на Народна банка на зголемената побарувачка на девизи и на притисоците врз депозитната база на банките.

Народна банка и во текот на декември минатата година интервенира со откуп на девизи, шест месеци последователно, со релативно голем износ.

Според податоците од декември, има зголемување на штедењето на населението во банкарскиот систем.


И Наумов се жали на опструкции: Од Финансии не ми даваат никакви документи и податоци


Скопје, 26 октомври, 2016 - 13:18 (META) 

„Министерство за финансии продолжува со ист начин на работа како и претходно и во последниот месец, откако сум повторно на функција, немаме никаква соработка“, се пожали дополнителниот заменик-министер за финансии, Кире Наумов, на средбата со претседателот на Стопанска комора на Сојузот на Северозападна Македонија, Неби Хоџа.

Тој додаде дека ниту еден документ што го побарал од кабинетот на министерот за финансии, Кирил Миноски, не му бил доставен.

– Досега од сите испратени барања до кабинетот на министерот немам повратни информации. Не ми е доставен ниту еден баран документ со печат од Министерство за финансии. Се кријат податоци и информации од Царинската управа, Управата за јавни приходи. Штом кријат, има некаков проблем со стопанството. Ликвидноста е на ниско ниво, повратокот на ДДВ оди лошо – додаде Наумов.

Тој истакна дека ќе почека уште некое време за да ги добие потребните податоци, а потоа ќе види кои се законските можности за да дојде до нив, бидејќи, како што рече, овој однос на Министерство за финансии е неоправдан.

Уште еднаш истакна дека податоците за субвенциите на странските компании мора да бидат јавни за да може да се види нивниот ефект врз македонската економија.

– Штом се кријат податоците за субвенциите, можеби во заднината се крие корупција, а отсуствува и систем по кој се доделувани. Треба да се утврди нивната сума и врз основа на што се доделувани – рече Наумов.


Наумов – Георгиева: Државата навреме да ги исполнува обврските кон приватниот сектор


Скопје, 25 октомври, 2016 - 16:01 (META) 

Дополнителниот заменик-министер за финансии, Кире Наумов, се сретна со извршната директорка на Стопанската комора на Македонија, Јелисавета Георгиева.

На средбата зборувале за проблемите со кои се соочуваат компаниите, а се во рамки на надлежностите на институции кои се поврзани со надлежностите на Министерството за финансии, како што се Управата за јавни приходи и Царинската управа.

– Беше истакната неопходноста од навремено исплаќање на обврските од државата кон приватниот сектор врз основа на извршени работи и услуги, како и поврат на средства врз основа на даноци, како услов за обезбедување на потребната ликвидност во стопанството. Заедничка беше определбата дека компаниите не смеат да трпат негативни последици од политичката нестабилност во државата  – се вели во соопштението од кабинетот на Наумов.

 


Кога се работи за поголема сума на ДДВ, државата потешко го враќа на компаниите


Скопје, 5 септември, 2016 - 12:39 (META) 

Компаниите на кои државата треба да им врати данок на додадена вредноста (ДДВ) во износ поголем од два милиони денари месечно, многу потешко ги добиваат тие пари, покажува најновата анкета на 800 компании, што ја спроведе Стопанска комора на Македонија во август.

Доцнењата во исплатата подолго од предвидениот рок им задаваат тешкотии во работењето. За фирмите кои имаат помала сума на повраток на ДДВ. пак, законскиот рок од еден до три месеци е прифатлив период и не им задава проблеми во работењето.

– Компаниите што поднесуваат барања за повраток на ДДВ за поголема сума на месечно ниво, имаат проблем со ликвидноста и тие средства не можат да ги искористат за други намени – истакна директорката на Дирекцијата на здруженија според дејности при Стопанската комора, Билјана Пеева-Ѓуриќ.

40 проценти од компаниите алармирале за проблеми со наплатата на побарувањата од јавниот сектор. Кога исплатата доцнела подолго од предвидениот законски рок, компаниите биле принудени да земаат нови кредити и биле изложени на дополнителни трошоци и загуби во работењето.

Посебен проблем на компаниите им претставувала и наплатата од јавните претпријатија, со кои, на пример, добиле судски спор. Според членот 211 од Законот за извршување, претседателот на општинскиот суд може да одлучи дека парите на сметката на јавното претпријатие се за извршување на тековните обврски, што практично значи ставање вето на исплата на долгот кон компаниите.


Се подобрува девизната ликвидност на банките


Скопје, 10 август, 2016 - 12:31 (META) 

Сезонско зголемување на понудата на девизи од менувачи и истовремен пад на побарувачката на девизи од фирмите е забележано изминатиот месец, информираат од Народна банка.

– Трансакциите со физички лица, натамошното намалување на побарувачката и зголемувањето на понудата на девизи, придонесе банките да остварат релативно висок нето-откуп со овие клиенти. Поволните движења во трансакциите со клиенти придонесоа за подобрување на девизната ликвидност на банките, што доведе до зголемена понуда на девизи на меѓубанкарскиот девизен пазар – информираат од Народна банка.

Од 25 јули Народната банка секојдневно интервенира со откуп на девизи од банките поддржувачи, при што заклучно со 8 август се откупени вкупно 48,3 милиони евра.

– Интервенциите на Народната банка на девизниот пазар придонесоа за подобрување на денарската ликвидност на банкарскиот систем. Во такви околности и во насока на ефикасно управување со ликвидноста, банките ги зголемија пласманите во расположливи депозити кај Народната банка – велат оттаму.


Миноски: Со еврообврзницата се обезбеди ликвидност на буџетот


Скопје, 20 јули, 2016 - 16:59 (META) 

Средствата од еврообврзницата нема да се користат само во оваа буџетска година, туку и во наредната, а дел од нив ќе бидат искористени за исплата на долговите, истакна министерот за финансии, Кирил Миноски, во гостувањето во вестите на телевизија „Сител“.

Тој појасни дека „благодарение на вчерашното издавање на еврообврзницата обезбедени се неопходните финансиски средства со што има целоснa ликвидност на буџетот.“

Според него, при издавањето на еврообврзницата во целост е запазена постапката и таа е однапред дефинирана.

– Постапката на издавањето на најновата еврообврзница по ништо не се разликува од издавањето на сите претходни еврообврзници. Сите оние аргументи кои беа изнесувани од страна на опозицијата се целосно невалидни, почнувајќи од аргументот за постоење потреба за верификација од страна на дополнителен министер за финансии, кој  во моментов го немаме затоа што не постои прецизен датум за избори – вели Миноски.

Опозицијата обвинува дека еврообврзницата е издадена незаконски и побара од Министерството за правда да одговори дали пред продажбата издало мислење за нејзината законитост.


Намалена ликвидноста на банките за 7 милиони денари


Скопје, 11 мај, 2016 - 15:07 (META) 

Ликвидноста на банкарскиот систем забележа месечен пад од 7.035 милиони денари, информираат од Народна банка.

– Ликвидноста позначително се намали во втората половина од месецот, кога се зголеми неизвесноста поврзана со политичката ситуација во земјата, што беше проследено со шпекулации за стабилноста на банкарскиот систем и за девалвација на курсот на денарот. Во вакви услови беше зголемена склоноста на економските субјекти за поседување девизи – информираат од Народна банка.

Оттаму додаваат дека физичките лица значително ја зголемиле побарувачката за девизна готовина, што создало притисок на девизниот пазар.

– Со оглед на овие случувања на девизниот пазар, Народната банка во април ги обезбеди банките со потребната девизна ликвидност во износ од 77 милиони евра. Од почетокот на мај, се забележува стабилизирање на побарувачката за девизи на девизниот пазар, што услови намалени интервенции за продажба на девизи од страна на Народната банка – се додава во соопштението на Народна банка.


Банките работеле попрофитабилно лани во однос на 2014 година


Скопје, 28 април, 2016 - 13:38 (META) 

„Ликвидноста на банкарскиот систем е на задоволително ниво. И покрај благото намалување на ликвидните средства во 2015 година, тие и понатаму учествуваат со повеќе од 30 отсто во вкупните средства на банките и покриваат близу 60 отсто од вкупните обврски“, се вели во најновиот извештај на Народна банка.

И во 2015 година, во банкарскиот систем во Македонија најзастапен е странскиот капитал, при што 75 отсто од вкупниот акционерски капитал потекнува од странските акционери.

– Сепак, активностите на домашните деловни банки не зависат од изворите на финансирање од странските матични лица, со што се овозможува стабилност на ликвидносната позиција. Банките очекуваат стабилност на депозитите и во наредниот период – се додава во соопштението на Народна банка.

Кредитниот пораст на банките од 9,7 отсто е мало забавување во однос на порастот од 9,9 отсто остварен во 2014 година.

– Порастот на нефункционалните кредити видно забави, со што учеството на нефункционалните кредити во вкупните кредити, на крајот од 2015 година, падна на 10,8 отсто, од 11,3 отсто колку што изнесуваше на крајот од 2014 година. Профитабилноста на банките во 2015 година се подобри во однос на 2014 година, при што повратот на активата и капиталот изнесуваат 1,1 отсто и 10,4 отсто соодветно. На крајот од 2015 година, стапката на адекватност на капиталот изнесуваше високи 15,5 отсто што, при солиден пораст на сопствените средства на банките, претставува само мало намалување во споредба со крајот на 2014 година, кога овој показател изнесуваше 15,7 отсто – се додава во соопштението на Народна банка.


За странските партнери на компаниите, земјава е „ризично подрачје“


Скопје, 26 април, 2016 - 13:53 (META) 

Откажување на договорите и на нарачките од странство, отежната наплата од домашните компании и од јавните институции, проблеми со ликвидноста се тоа со што во моментов се соочуваат македонските компании.

Ова беше истакнато на одбележувањето на 94-годишнината на Стопанска комора.

Според директорката на Дирекцијата на здруженија според дејности при Стопанската комора, Билјана Пеева-Ѓуриќ, овие проблеми на македонските компании подолго време се провлекуваат, но со политичката криза се многу повеќе изразени.

– Засега најголема опасност се гледа во губењето на постојните и потенцијални странски партнери со кои соработуваат или планираат да соработуваат македонските комапнии. Веќе имаме примери од компании, на кои, во контакти со странските партнери, им е наведено дека како земја сме окарактеризирани како „ризично подрачје“. Затоа кај странските партнери се јавува резервираност во соработката, поради постоење на ризик од ненавремена испорака на производи или услуги – истакна Ѓуриќ-Пеева.

Негативните последици можат да се почувствуваат кај компаниите од металскиот, земјоделско-прехранбениот, металуршкиот и од текстилниот сектор.

Стопанската комора спровела анкета на која одговориле 1.000 компании од различни стопански дејности.

На прашањето дали компаниите имаат најави за откажување на договори со странски партнери, 37 отсто од компаниите одговориле со „да“, а 63 отсто дека засега немаат таква најава.

– Има откажување на посети кои биле најавени од потенцијалните странски партнери, што предизвикува губење или одложување на нови потенцијални нарачки кои ќе предизвикаат сериозни проблеми во однос на пополнување на прозводствените капацитети на компаниите за наредниот период – додаде Ѓуриќ-Пеева.

Како резултат на несклучување нови договори, како и на намалената наплата на побарувања, во одредени компании има намалување на високостручниот кадар кој е потребен за изработка на проекти за извоз.

Имајќи предвид дека изминатата година со земјите на ЕУ сме реализирале извоз кој учествувал со 77, 1 отсто од вкупниот извоз на земјата, кај бизнисмените постои сериозна загриженост во однос на одземање на препораката за претпристапни преговори на Македонија со Европската Унија.


Намалена ликвидноста на банките


Скопје, 8 февруари, 2016 - 14:52 (META) 

Во текот на четвртиот квартал на 2015 година, ликвидноста на банките се намали за 1.934 милиони денари во однос на крајот на третиот квартал, соопшти Народната банка во најновиот квартален извештај.

Со тоа, состојбата на сметките на банките кај НБРМ во декември изнесуваше 15.960 милиони денари.

На крајот на годината, примарните пари на годишна основа се повисоки за 0,6 отсто за разлика од септември 2015 година, кога забележаа пораст од 7,4 проценти.